Nya Nzame é nye a ne Mvele mam mese. Éé ndze bele atargha, éé mbele ki amangha dzô a dzôô (Bya 90:2). Mbemba mefuèñ me ne Bible été é nye a ne me tsin (1 Timothée 1:11). É nye étam bia yiane wumu, amu é nye a nga ve bia éning.​—A lang Melere 4:11.

Môr ézing aa be ki yen Nzame amu a ne nsisim, da yile naa a bele ngum aval éning da neman é bôr be ne mvelan ye minsôn ba ning a si va (Jean 1:18; 4:24). Ve daa, bi ne yem Nzame mefulu nge bia tugha bile é biôm a nga mane vele. Éfônan ane, mesam ye bibuma meval meval ma lere ényeghe dzèñ ye akeng dèñ. É mam mese Nzame a nga kôm me ne énzenzam, ma lere abim ngul a ne.​—A lang Beromain 1:20.

Bi ne tugha yem Nzame mefulu ve éyong bia lang Bible. Mam mevokh me ye été, ma kat bia é mam Nzame aa nyeghe ye é ma aa vine, aval a belan bôt, ye fe aval a ñong besôsôe ba deghe mingura mi mam.​—A lang Bya 103:7-10.

Yésu a nga dzô naa : « Ésaa waa a ne ayôp, éyôla dwiè é tobeghe éfufup » (Matthieu 6:9). Ba luè Nzame meval abuiñ Ve, a bele éyôla daa. Minkobe mise, mi bele aval ba luè Nzame. A fang, ba luè naa “Jehôva.” Ve é bôr bevokh ba luè naa “Yahvé.”​—A lang Bya 83:18.

Bôr be nga vaa éyôla Nzame abuiñ minkonghlan mi Bible été, be van furu minluan ane Ntî nge ki Nzame. Ve daa éyong be nga tsile Bible, éyôla Nzame é mbe été tang biyong 7000. Yésu a nga bo naa be yem éyôla Nzame éyong a mbe éé kobe bôr medzô me Nzame.​—A lang Jean 17:26.

Deghe éngengeng Ye Nzame a bele éyôla ?

Nge abim minzukh di é ne, ye da yili naa Jehôva aa wokh ki bia ôlun ? Bôr b’ézing ba bunu naa Nzame aa veghle bia, ve dé se ki été.​—A lang Jacques 1:13.

Nzame a nga ve moan môr mbemba dzam naa a bele fili ntoban mam (e fèè é dzam wa kômô) Ye bia yen n’nem mvèñ naa bia bebyén bi ne fèè naa bia séane Nzame ? (Josué 24:15). Ve daa bôr abuiñ ba top naa ba tam foghe bo é bôr bevokh abé, dzam te é de da ve naa minzukh mi bo abuiñ. N’nem wa bo Jehôva abé éyong aa yen aval mbimbia be mam mete.​—A lang Atargha 6:5, 6.

Jehôva a wokh bia ôlun. Aa kômô naa bi ning mevakh été. A nkunu mane zu vaa minzukh ye é bôr ba bo mie. Keghe naa awôla te é kuiñ, é myèn aa yem akal dzé aa likh naa minzukh mi boban ôyôm éyong. Ayeghle 8 da ye bia ve ayili.​—A lang 2 Pierre 2:9 ; 3:7, 13.

Jehôva a luè bia naa bi yire nye bebéñ ye kobe ye nye, da yili naa aa yaghlane nye. Aa wokh môr ase ôlun (Bya 65:2 ; 145:18). A ne ébubu a dzame. Aa yem yen mefekh bia bu naa bi yem séane nye. Afiang bo naa bi se ki sôsôe melu mese. Éde é ne naa, bi fiang bo bôr minsem, bi ne lare nya angom ye Nzame.​—A lang Bya 103:12-14 ; Jacques 4:8.

Akal Jehôva é nye a nga ve bia éning, é nye bia yiane nyeghe ye dang môr ase (Marc 12:30). Nté se wa ye lere ényeghe éyong wa yeghe a yem nye, ye bo nkôman wèñ, éyong te fe wa ye nye yire bebéñ.​—A lang 1 Timothée 2:4 ; 1 Jean 5:3.