Кичинектеҥ ала мен ар-бӱткенди сӱӱйтен кижи болгом. Бис Финляндияныҥ Ювяскюля деп калазында јатканыс. Бис билеле кожо каланаҥ ыраак эмес сӱреен кайкамчылу аралдардӧӧн лӧ кӧлдӧрдӧӧн барып туратаныс. Анайда ок мен тындуларды сӱреен тыҥ сӱӱйдим. Бала тужымда кажы ла кӧргӧн ийтти ле кискени јажыдарга кӱӱнзеп туратам! Јаандап келеле, улус тындуларга канайып јаман баштанып турганын кӧрӱп, тыҥ санааркайтам. Эмеш ӧй ӧдӧ берерде, тындулар корулап турган улустыҥ биригӱзине кирип алгам. Мында мен ле чилеп сананып јӱрген улусты табып алгам.

Бис тындулардыҥ јаҥын корулап, тыҥ тартыжып туратаныс. Бу керегинде јетирӱлер таркадып, демонстрациялар эдип, удурлажуныҥ марштарын ӧткӱретен болгоныс. Анайда ок тындуларла лабораторный опыттар этпезин ле тындулардыҥ терезинеҥ эткен не-немелерди сатпазын деп, тартыжып туратаныс. Керек дезе тындулар корулайтан организациялар да тӧзӧп алганыс. Бистиҥ тартыжып турган эп-аргаларыс кату болгонынаҥ улам бисте јаҥныҥ улузыла кӱчтер болгон. Кезикте бистерди арестке алып, јаргылаган да ӧй болгон.

Мен јаҥыс тындулар керегинде эмес, је бастыра телекейдиҥ кӱчтери керегинде санааркап туратам. Бир эмеш ӧйдӧҥ «Международная амнистия», «Гринпис» ле оноҥ до ӧскӧ организацияларга база киргем. Мен бастыра ийде-кӱчимди бу ишке болужарга беретем. Анайда ок јокту, торолоп јӱрген, кӱч айалгада болуп калган улусты корулап, тартыжып туратам.

Је мен бу телекейди солып болбойтон эмтирим деп, араайынаҥ оҥдоп баштагам. Ӧрӧги организациялар кезик оок-теек кӱчтердиҥ аайына чыгып ийип турарда, је јаан кӱчтер там ла коомойтып туратан. Кӧрзӧм, бу телекейде кемге де, не де керек јок, ӱзе неме јаманныҥ колында деп билдирген. Мен бу телекейди солып болбозым деп јарт оҥдоп ийгем.

Нени де эдип болбозымды оҥдоп, Кудай ла Агару Бичик керегинде сананып баштагам. Та качан да Иегованыҥ Керечилериле Агару Бичикти ӱренген болгом. Олор меге јалакай баштанганы ла ајару эткени јарап туратан. Је ол тушта јӱрӱмимди солыырга мен белен эмес болгом. Је эмди айалга чек башка болгон.

Мен Агару Бичигимди табып алала, кычырып баштагам. Бу меге, шыркалаткан јӱрегиме, эмдеп турган бальзамдый билдирген. Агару Бичикте тындуларга јакшы баштанзын деп ӱредип турганына ајару эткем. Темдектезе, Укка сӧстӧр 12:10-до «чындык кижи бойыныҥ малын кичееп јат» деп айдылган. Анайда ок кижиликтиҥ тӱбегинде Кудай бурулу эмес деп оҥдогом. Улус Кудайдыҥ башкартузын укпай турганынаҥ улам, кӱчтер там ла кӧптӧп турган деп аайлагам. Иегова Кудайдыҥ сӱӱжи ле чыдамкайы керегинде билип ийеримде, бу мениҥ јӱрегиме тыҥ тийген (Сарын 103:8—14).

Бу ла кире ӧйдӧ «Агару Бичик неге ӱредет?» деген бичиктиҥ купонын табып алала, аткарып ийгем. Јаан удабай эки Керечи келип, менле Агару Бичик ӱренип баштаган. Анайда ок мен Каандыктыҥ Туразында христиан туштажуларга јӱрӱп баштагам. Мынаҥ улам Агару Бичиктиҥ чындыгы јӱрегиме тереҥ тазылданып баштаган.

Агару Бичик мениҥ јӱрӱмимди солыган. Мен кӧп аракы ичишти ле таҥкы тартышты таштап ийгем. Бойымныҥ тыш бӱдӱмимди солып, јаман сӧстӧрди токтотком. Ол ло тушта јаҥдагы улуска кӧрӱмимди база солыгам (Римдегилерге 13:1). Балыр јӱрӱм јанынаҥ бир де токтоду јок јӱрген јӱрӱмимди база артыргызып салгам.

Байагы айдылган организацияларга кӧрӱмимди солыырга эҥ ле кӱч болгон. Бу бир ле кӱнге солынбаган. Мен бу ишке турушпай барзам, олорды садып ийгем деп билдиретен. Је оноҥ, јӱк ле Кудайдыҥ Каандыгы улуска чын ижемји берер аргалу деп оҥдоп ийгем. Оныҥ учун бу Каандыкка јӧмӧжӧргӧ, бу керегинде улус билип алзын деп, бастыра ийде-кӱчимди саларга шӱӱп алгам (Матфей 6:33).

Алдында эрчимдӱ тартыжып турган ӧйимде, улусты јакшы ла јаман улуска бӧлӱп, јаман дегендериле тыҥ тартыжып туратам. Је Агару Бичиктиҥ болужыла улусты јаман кӧрӧтӧнин токтодып салгам. Карын ӧскӧ улуска христиан сӱӱштӱ баштанарга, ол сӱӱшти тыҥыдарга албаданадым (Матфей 5:44). Ол сӱӱшти кӧргӱзетен арганыҥ бирӱзи — Кудайдыҥ Каандыгы керегинде јарды айдары. Улуска бу јар амыр, сӱӱнчи ле чын ижемји берип турганын кӧрӧргӧ кандый сӱӱнчилӱ!

Иеговага иженип баштаарымда, јӱрегим токынай берген. Анайда ок удабас Јайаачыбыс тындуларды ла улусты базынатанын ла бистиҥ јараш болчок јерди ӱрейтенин токтодып салар. Оныҥ Каандыгы улуска ла јерге каршузын јетирген ончо немени јоголтып, ӱзе јакшы эдип салар (Исайя 11:1—9). Бу чындыктарды билип алганым ла улустыҥ бӱдӱмјизин бого тыҥыдарга болужатаны меге јаан сӱӱнчи берет. Эмди мен телекейди солыыр керек деп сананбай јадым.