•  Pütchi suʼttiainjatka 2

•  Korolo kojutusü suluʼuka tü Bibliakat 3-5

  •  Pütchi ekirajünüinjatka anain 3

  •  Püchajaa süchiki kaaʼürüi suluʼu tü Bibliakat 4

  •  Pütchi aashajeʼennajatka 5

•  Atüjainjana waya ekirajaa 6-14

  •  Atüjainjachi pia yootirawaa 7

  •  Ayataʼaya pikirajüin wayuu 8

  •  Pikiraja wayuu 9

  •  Pikiraja süchiki tü punoujakalü anain 10

  •  Pütchi ekirajünüinjatka anain 11

  •  Tü ekirajaanajatkalü achiki 12

  •  Tü sukuwaʼipainjatkat 13

  •  Video jee karaloʼuta weitajaka 14

•  Wakuwaʼipa sünain anoujaa 15, 16

  •  Ekirajawaa sünain tü Bibliakat namaa na wawalayuukana 16

•  Pütchi sajaʼttiamüinka 17

•  Atütüleʼeraa aaʼin otta achiawaa 18

•  Minuuto 19

•  Nuwaraijaale chi wawala alapalaaikai waaʼu 20

•  Eepa outkajawaa miyoʼu 21

•  Eepa Outkajawaa eere Sotuin Waaʼin Outuin Jesús 22

•  Chi sülaülakai tü outkajawaakat Wakuwaʼipa otta Waʼyataain nümüin Maleiwa 23

•  Shikiipüʼü tü outkajawaakat Wakuwaʼipa otta Waʼyataain nümüin Maleiwa 24

•  Niʼipajachi chi sülaülakai tü outkajawaakat 25

•  Ekirajülee piama 26

•  Videoirua 27

1. Tü aküjünakat yaʼayaa süpülajatü natüjaain saaʼu tü naaʼinrajatkat na ekirajakana sünain tü outkajawaakat Wakuwaʼipa otta Waʼyataain nümüin Maleiwa. Nanaʼlajatü napüshuaʼa na wawalayuukana tü aküjünakat suluʼu tü karaloʼutakat Wekirajaayainjatü sünain tü outkajawaakat jee nanaʼlajatü tü ashajünakat yaʼayaa süpülapünaa nekirajüin suluʼu outkajaaleekat. Naya ekirajüinjanaka napüshuaʼa na ojuʼitakana sünain aküjaa pütchi. Eeshii süpüla nekirajüin sünain tia na wayuu oʼunawaikana sünain tü outkajawaakat, wanaawainjatpejeʼe naaʼin sümaa tü sümakat tü Bibliakat jee naaʼinrajatü tü nekirajaakalü anain sünainjee. Chi wawala sülaülakai tü outkajawaakat Wakuwaʼipa otta Waʼyataain nümüin Maleiwa, aashajaainjachi nümaa chi wayuu nnojoiyüikai ojuʼitüin sünain aküjaa pütchi, nüküjeetka nümüin keraale nia süpüla ekirajaa. Naashajaapa nümaa, eeinjachi namaa chi wawala ekirajakai chia wayuukai jee niale wanee nüpüshi. Tü achuntunakat nüpüleerua wanee wayuu eekai nikirajeein, shiaʼaya neʼe tü achuntunakat nümüin wanee wayuu eekai aneekünüin süpüla nüküjain pütchi sümaa nnojolin woutiisain nia (od-S ekir. 8 püt. 8).

2. Wanee minuuto. Semaanawai süchikijee tü jayeechikat otta süchikijee oʼuraajaa, chi shikiipüʼükai tü outkajawaakat Wakuwaʼipa otta Waʼyataain nümüin Maleiwa, nüküjeerü waneirua pütchi kamalainjatka atuma tü ekirajaanajatkalü anain otta nüküjeerü tü pütchi aneetkalü atuma nakuwaʼipa na wawalayuukana.

 3. Pütchi ekirajünüinjatka anain: Poloo minuuto. Eʼitaanüsü sünülia tü pütchikat sümaa piamasü jee shiale apünüin pütchi anaka maʼin suluʼu tü karaloʼutakat Wekirajaayainjatü sünain tü outkajawaakat. Niainjachi ekirajaka wanee laülaashi jee niale wanee aʼyataakai neʼipajee na laülaashiikana eekai nütüjain ekirajaa. Jeketüle tü karaloʼuta wekirajaainjatkalü anain suluʼujee tü Bibliakat, eʼitaaneerü wanee video süchikimaajatka tia karaloʼutakat. Eesü süpüla nüküjain chi ekirajüinjachikai tü kasa wanaawakalü atuma tü videokot sümaa tü ekirajünakalü anain. Nnojotpajaʼa motuinjatüin naaʼin nikirajüinjachin süka tü pütchi suluʼukat tü karaloʼutakat Wekirajaayainjatü sünain tü outkajawaakat. Süpütaale minuuto, nikirajüinjatü anain tü ayaakuaa suluʼukat tü karaloʼutakat süka süpüshin shia tü ekirajünajatkalü anain. Eesia süpüla nikirajüin süka pütchi suluʼujeejatka waneirua karaloʼuta anale shia süpüla shiyaawatünüin aaʼu tü ekirajüneekalü anain.

 4. Püchajaa süchiki kaaʼürüi suluʼu tü Bibliakat: Poloo minuuto. Asoutunüinjatü eʼipajee tü asakinnakalü anain, nnojotsü aküjünajatüin wanee pütchi suʼttiajee jee sajaʼttiamüin. Niainjachi ekirajaka wanee laülaashi jee niale wanee aʼyataakai neʼipajee na laülaashiikana eekai nütüjain ekirajaa. Nüsakirüinjatü anain tü piamasükat pütchi. Nüneeküinjatü saashajeʼennüinjatüle tü wetsiikulokalüirua. Nnojotsü alatüinjatüin suulia 30 sekunto nanüiki na wawalayuukana.

 5. Pütchi aashajeʼennajatka: Pienchi minuuto. Wayuuinjachi toolo chi aashajeʼerakai. Naashajeʼerüinjatü tü pütchi eʼitaanakat nüpüleerua. Nnojotsü nüküjainjatüin wanee pütchi suʼttiajee jee sajaʼttiamüin. Chi shikiipüʼükai tü outkajawaakat nükaalinjainjana na aashajeʼerakana süpüla shiyaawatünüin saaʼu tü naashajeʼerakat, kottuin natuma shia, kajaalapüin nanüiki, natüjaainjatüin saaʼu joujainjanain neemeraain otta emetuluin natuma wanee pütchi. Wainmale pütchi aashajeʼennüinjatka, nüneekatüjülinjachi chi sülaülakai tü outkajawaakat jaralin chi wawala anakai süpüla aashajeʼeraa shia.

6. Poloo jaʼralimüin minuuto. Tüü, süpülajatü watüjain yootoo, ekirajaa jee watüjain aküjaa pütchi. Eeshii süpüla nekirajüin na laülaashiikana choʼujaalejeʼeya shia. Chi eekai ekirajüin jülüjainjatü naaʼin tü ekirajaaya aküjünakat suluʼu karaloʼutakalü Ekirajaa jee shiale Ai wapüla wayuu, ashajünüsü sunuumerose tia suluʼu paréntesis suluʼu tü karaloʼutakat Wekirajaayainjatü sünain tü outkajawaakat. Eesü eejeerüle pütchi ekirajaaneetka anain sümaa nasakinnüin na jutkatüshiikana, nieechi ekirajaka sünain tia wanee laülaashi jee niale wanee aʼyataakai neʼipajee na laülaashiikana eekai nütüjain ekirajaa (paashajeʼera tü  pütchikat 15 süchiki jamüinjatüin shikirajia tü pütchi asakinnakalü anain na wawalayuukana).

 7. Atüjainjachi pia yootirawaa: Nieechi ekirajaka wanee wawala jee shiale wanee wawala. Chi eʼitaanakai niʼipajee tooloinjachi wanaa nümaa, jierüle tü ekirajakat, jierüinjatü tü shiʼipajatkalü aluʼusaʼa nayale wanee napüshi. Eeshii süpüla shaʼwatüin naya jee joyotule naya (süpüla pütüjaain saaʼu tü paashajaainjatkalü achiki jee tü sukuwaʼipainjatkat putuma, paashajeʼera tü  pütchikat 12 otta  13).

 8. Ayataʼaya pikirajüin wayuu: Nieechi ekirajaka wanee wawala jee shiale wanee wawala. Nnojoishi eʼitaanajachin wanee toolo sümaa wanee jierü (km-S 5/97 2). Eeshii süpüla shaʼwatüin naya jee joyotule naya. Neeʼiyatüinjatü jamüinjatüin wanüiki wouyantapa sümaʼanamüin wanee wayuu aapajeeka tü pütchikat (süpüla pütüjaain saaʼu tü paashajaainjatkalü achiki jee tü sukuwaʼipainjatkat putuma, paashajeʼera tü  pütchikat 12 otta  13).

 9. Pikiraja wayuu: Nieechi ekirajaka wanee wawala jee shiale wanee wawala. Nnojoishi eʼitaanajachin wanee toolo sümaa wanee jierü (km-S 5/97 2). Eeshii süpüla shaʼwatüin naya jee joyotule naya. Süpülajatü shiiʼiyatünüin süpüshi neʼe sukuwaʼipa shikirajia wayuu eekai suʼttuin sünain ekirajawaa sünain tü Bibliakat. Nnojotsü choʼujaain nüküjain wainma kasa süpülapünaa nuʼttuin otta sajaʼttiamüin tü ekirajawaakat, aluʼusaʼa eere wanee kasa eʼitaanaka nüpüleerua chi ekirajakai tia pütchikat. Nnojotsü choʼujaain emetuluin nünüiki sünain aashajeʼeraa süpüshuaʼa tü pütchikat, eepejeʼe süpüla naaʼinrüin shia.

 10. Pikiraja süchiki tü punoujakalü anain: Nieechi ekirajaka wanee wawala sünain tia shiale wanee pütchi ekirajünüinjatka anain. Shiale ooʼulakünüinjatüin sukuwaʼipa aküjaa pütchi nieechi ekirajaka wanee wawala jee shiale wanee wawala. Chi eʼitaanakai niʼipajee tooloinjachi wanaa nümaa, jierüle tü ekirajakat, jierüinjatü tü shiʼipajatkalü aluʼusaʼa nayale wanee napüshi. Kamaneeinjachi jee pansaainjatü nusoutia chi ekirajakai shiʼipajee tü pütchi eʼitaanakat nüpüleerua süpüla nikirajüin sünain. Nüneeküinjatü chi ekirajüshikai nuchuntajatüle sünülia tü karaloʼuta niyuʼlakalü anainjee tü pütchi nikirajakalü anain.

 11. Pütchi ekirajünüinjatka anain: Nieechi ekirajaka wanee wawala sünain tia pütchikat. Nüküjainjatü shia namüin na jutkatüshiikana. Shiyuʼnnüle tü pütchikat sünainjee «sooʼomüin pütchi 1» suluʼujee karaloʼutakat Ai wapüla wayuu, nüküjainjatü chi ekirajüshikai kasa waaʼinrajatüin süpüla waküjain pütchi süka tü wetsiikuloirua. Jamüshijaʼa nia, nuuʼulaküinjatü nüküjain süchiki tü wetsiikulokot, jamaluʼuluin shia jee jamüin süpüla waküjain pütchi süka. Shiyuʼnnüle tü pütchikat sünainjee wanee ekirajaaya suluʼukat karaloʼutaka Ai wapüla wayuu, nüküjainjatü chi ekirajüshikai jamüinjatüin sukuwaʼipa tia watuma waküjapa pütchi. Jamüshijaʼa nia anashiire saaʼin nümüin, anasü nüküjale tü aküjünakat sünain tü palajatkat pütchi sünain wanee ekirajaaya jee shiale naashajaain achiki tü wetsiikulo eʼitaanakat sooʼomüin sünain wanee ekirajaaya.

   12. Tü ekirajaanajatkalü achiki: Tü aküjünakat yaʼayaa jee tü aküjüneetkat sünain pütchi 13, süpülajatü waküjain pütchi «soʼu palajatka wakua» jee «wouyantapa wachikuaʼa». Aluʼusaʼa naatale tü aküjünakat nümüin chi ekirajüshikai, tü alanaʼaleeinjatkalü ojutu nümüin shia nikirajüin sünain wanee pütchi shiimainkat saashin tü Bibliakat jee nüchajaain sukuwaʼipa süpüla nuuyantüin nüchikuaʼa. Nüneeküinjatü chi ekirajüshikai wanee pütchi eekai aneerüin namüin na wayuu kepiakana suluʼu tü mma eere nia jee eekai atanaleerüin naaʼin. Nüneeküinjatü chi ekirajüshikai jaralüin tü karaloʼuta jee video niiʼiyatajatka saʼakajee tü Wekirajüinjatkalü aka wayuu. Nnojotsü nütüjainjatüin apüleerua suluʼu nikii tü nünüikinjatkat, nuuʼulaküinjatü nütüjain yootoo jee jülüjain naaʼin sukuwaʼipa wayuu.

   13. Tü sukuwaʼipainjatkat: Nuuʼulaküinjatü sukuwaʼipa chi ekirajüshikai nüküjain pütchi wanaapünaa sümaa sukuwaʼipa wayuu eere kepiain nia, eesü süpüla müin sukuwaʼipa nutuma:

1.  (1) Sainküin piichi: Tia sukuwaʼipakalü aküjaa pütchi shia yootule waya sümaa wayuu sainküin piichi, suluʼupünaa teleepono, shiale washajüin carta sümüin jee wouyantüle sümaʼanamüin wanee wayuu waküjaka amüin pütchi paala shipialuʼu.

2.  (2) Eepünaale waya: Tia sukuwaʼipakalü aküjaa pütchi shia yootule waya süchiki tü Bibliakat waashajaapa sümaa wayuu. Waaʼinrüin tia waashajaale süchiki wanee wetsiikulo namüin na aʼyataajiraakana wamaa, na koleejiajiraakana wamaa, na kepiakana waʼütpünaa jee shiale namüin na suluʼukana tü kemion woʼunaka aluʼu jee eepünaale waya soʼukaiwai.

3.  (3) Aküjaa pütchi eere jouluin wayuu: Tia sukuwaʼipakalü aküjaa pütchi shia wojuʼitüle süka tü kareetachonkat, yootule waya sümaa wayuu eere eein oikaalee, kaayeruʼu, suluʼu parque, eere sünaajaanüin kemion otta eere eein wayuu wapüla.

 14. Video jee karaloʼuta weitajaka: Nüneeküinjatü chi ekirajüshikai niiʼiyatüinjachire wanee video jee naapüinjachire wanee karaloʼuta. Shiʼitaanüle nüpüleerua niiʼiyatüinjachin wanee video jee nüneeküle shia süka naaʼin nümüiwaʼa, yootuinjachi nia süchiki, nnojotpejeʼe shia niʼitaainjatüin.

15. Oʼttusü shiʼipakat tüü sükajee wanee jayeechi. Süchikijee, soʼunnaa 15 minuuto ekirajaana anainrü waneesia jee piamasü pütchi akaalinjeenaka na wawalayuukana süpüla neʼitaain suluʼu nakuwaʼipa tü sümakat tü Bibliakat. Nayeena ekirajaka na laülaashiikana jee niale wanee aʼyataakai neʼipajee na laülaashiikana eekai nütüjain ekirajaa. Niainjachire ekirajüin wanee laülaashi aküjüneerü tia sünain tü karaloʼutakat. Nayainjana ekirajaka na laülaashiikana tü pütchikat «Anouteʼennajatka eere woutkajaain». Eere wanee pütchi nasoutajatka anain na jutkatüshiikana, motsoʼoinjatü sümaa nünüiki suʼttiajee, sükajee tia yooteechi nia süchiki tü pütchi anakat maʼin jee asouteena na jutkatüshiikana. Nüsakinnajachire wanee wawala, shia anaka aluʼu nüsakinnüle eejee tü aashajaaleekat, nnojoishi joyotuinjachin nia, aaʼinnajatü tia eerejeʼe süpüla saainjünüin.

  16.  Ekirajawaa sünain tü Bibliakat namaa na wawalayuukana: Apünüin shikii minuuto. Nieechi ekirajaka wanee laülaashi atüjakai ekirajaa. (Nnojoliire wainmain na laülaashiikana naʼaka na wawalayuukana, nieechi ekirajaka wanee neʼipajachi na laülaashiikana eekai nütüjain ekirajaa). Nayeena aneekaka na laülaashiikana jaraliin anaka süpüla ekirajaa. Na aneekünakana süpüla tia, ekirajüinjana soʼu tü minuuto eʼitaanakat napüleerua, naküjainjatü tü pütchi anakat maʼin suluʼujee tü Bibliakat jee naküjainjatü namüin na jutkatüshiikana jamüin anaka maʼin tü pütchikat. Na aneekünakana süpüla ekirajaa, anasü nekirajaale sünain jamüinjatüin shikirajia natuma wanee pütchi eekai süsakinnajatüin anain (w23.04 24 recuadro). Keraapa tü pütchi ekirajaanajatkalü anain, nnojotsü choʼujaain sükooʼomüinjünüin tü pütchikat. Pachikuatüinjana na ekirajakana otta na aashajeʼerakana, eere süpüla saainjünüin tia. Nuchuntule chi shikiipüʼükai tü outkajawaakat nümüin chi ekirajüshikai paliʼirüinjatüin minuuto nikirajaka oʼu, niainjachi aneekaka chi ekirajüshikai jamüinjatüin sukuwaʼipa nutuma. Wanee kasa eeka süpüla naaʼinrüin shia nnojoluin saashajeʼennüin waneirua pütchi.

17. Apünüin minuuto. Chi shikiipüʼükai tü outkajawaakat, nüküjeerü waneirua pütchi ekirajaanüitpaka anain sünain tü outkajawaakat. Nüküjeerü waneirua pütchi ekirajaaneetka anain soʼu tü wane semaanakat. Süpütaale minuuto, eesü süpüla nüküjain nanülia na wawalayuu ekirajeenakana. Nüküjeerü wanee pütchi choʼujaaka süpüla süküjünüin otta naashajeʼereerü waneirua karaloʼuta. Nnojoleerü nüküjain jalainjatüin tü aküjaakat pütchi otta jaraliinjanain epitajüin, eʼitaaneerü tia sünain tü karaloʼutapüleekat. Choʼujaale minuuto süpüla saashajeʼennüin wanee karaloʼuta, eesü süpüla nuchuntuin motsoʼoinjatüin namaʼa na ekirajakana sünain tü pütchikat «Wakuwaʼipa sünain anoujaa» (paashajeʼera  pütchi 16 otta  19). Ojutaainjatü tü outkajawaakat süka wanee jayeechi otta oʼuraajaa.

18. Süchikijee nekirajüin na ekirajaashiikana, nüküjeerü chi shikiipüʼükai tü outkajawaakat soʼu wanee minuuto tü anakat natuma jee isayürüle nachiki wanee kasa. Nüküjainjatpa nünülia chi ekirajüinjachikai, nnojotsü nüküjainjatüin palajana tü nikirajaakalü anain. Kettaapa nikirajüin wanee wawala, nüküjeerü chi shikiipüʼükai tü outkajawaakat kasain nikirajakalü anain, nüküjeerü jamüin anaka nutuma tü pütchi eʼitaanakat nüpüleerua jee isayürüle shia nüchiki, nüküjeerü nümüin jamüin naaʼinrüinjatka tü sümakat tü ekirajaaya eʼitaanakat nüpüleerua, anainjatü nünüiki nüküjapa tia nümüin. Eesü süpüla nüküjain chi shikiipüʼükai tü outkajawaakat waneirua kasa anakat süpüla naaʼinrüin chi ekirajaashikai otta na jutkatüshiikana. Sujutaapa tü outkajawaakat jee shiale soʼu wanee kaʼi naata, eeshi süpüla naashajaain chi shikiipüʼükai tü outkajawaakat namaa na ekirajüshiikana süpüla nüküjain namüin tü anakat süpüla nanouteʼerüin sükajee tü poyeetokot Ekirajaa jee shiale Ai wapüla Wayuu otta sükajee Benefíciese. (Paashajeʼera  pütchi 19,  24 otta  25 süpüla pütüjaain saaʼu tü naaʼinrajatkat chi shikiipüʼükai tü outkajawaakat Wakuwaʼipa otta Waʼyataain nümüin Maleiwa otta tü naaʼinrajatkat chi niʼipajachikai chi sülaülakai tü outkajawaakat).

19. Süpüshuaʼa tü ekirajünakalü anain sümaʼaleeya nünüiki chi shikiipüʼükai tü outkajawaakat, nnojotsü alatajatüin suulia tü minuuto eʼitaanakat süpüla. Mayaainjeʼe süküjünüin jeʼrainjatüin sümaa wanee pütchi, eesü süpüla kettaain maalü tü pütchi ekirajünakalü anain anale sukuwaʼipa. Nalatüle suulia tü minuuto eʼitaanakat napüleerua, aashajaweechi namaa chi shikiipüʼükai tü outkajawaakat jee niale chi niʼipajachikai chi sülaülakai tü outkajawaakat (paashajeʼera  pütchi 24 otta  25). Kettaainjatü soʼu wanee oora sümaa 45 minuuto tü outkajawaakat sümaʼaleeya tü jayeechikat otta oʼuraajaa.

20. Wanaa sümaa nuwaraijaain chi wawala alapalaaikai waaʼu, shieerü ekirajaanaka anain tü sümakat Wekirajaayainjatü sünain tü outkajawaakat Wakuwaʼipa otta Waʼyataain nümüin Maleiwa jee nnojoleerü ekirajaanüin anain waneirua kasa. Nnojoleerü «Ekirajawaa sünain tü Bibliakat namaa na wawalayuukana», nieechi ekirajaka chi wawala alapalaaikai waaʼu wanee pütchi soʼu 30 minuuto. Süpülapünaa tia, chi shikiipüʼükai tü outkajawaakat, nüküjeerü waneirua pütchi wekirajaaitpaka anain otta tü wekirajaweetkalü anain tü wane semaanakaleena. Nüküjeerü waneirua anuncio, naashajeʼereerü waneirua karaloʼuta jee müsia nüküjeerü sünülia tü pütchi nikirajüinjatkalü anain chi wawala alapalaaikai waaʼu. Nujuteʼereerü tü outkajawaakat chi wawala alapalaaikai waaʼu sükajee wanee jayeechi nüneekakat, eeshi süpüla nüneeküin wanee wawala oʼuraajüinjachikai sujutaayamüin tü outkajawaakat. Soʼu kaʼikat tia, nnojoleerü aainjünüin outkajawaa suluʼu ekirajaaleeka piama. Aluʼusaʼa eere anoujashii naatakana anüikii, outkajaweena naya suluʼu ekirajüleeka piama, naapajüinjatpejeʼe tü pütchi nikirajüinjatkalü anain chi wawala alapalaaikai waaʼu.

21. Nnojoleerü outkajawaa soʼu tü semaana eekalü oʼu tü outkajawaakat miyoʼu. Tü ekirajaanajatkalü anain soʼu semaanakat tia, wekirajaajeerü anain wepialuʼu sümaa wapüshi jee wamüiwaʼa, aküjünajatü tia namüin na wawalayuukana.

22. Saainjünüle tü Outkajawaakat eere Sotuin Waaʼin Outuin Jesús süseʼeruʼupünaa semaanaka, nnojoleerü aainjünüin tü outkajawaakat Wakuwaʼipa otta Waʼyataain nümüin Maleiwa soʼu semaanakat tia.

23. Niainjachi wanee laülaashi aneekünakai natuma na laülaashiikana. Jülüjainjatü naaʼin anainjatüin sukuwaʼipa tü outkajawaakat otta saainjünüinjatüin maʼaka süküjünüin suluʼu karaloʼutakat tüü. Paaʼinwainjachin nia nümaa chi niʼipajachikai. Süntapa tü karaloʼutakat Wekirajaayainjatü sünain tü outkajawaakat, nüneeküinjana na wawalayuu ekirajüinjanakana soʼu tia piamasükat kashi. Maʼaka naaʼin na ekirajaainjanakana sünain «Atüjainjana waya ekirajaa», na shikiipüʼüinjanakana tü outkajawaakat otta na wanee ekirajüinjanakana (paashajeʼera  pütchi 3-16 otta  24). Nüneeküinjanapa chi sülaülakai tü outkajawaakat na ekirajüinjanakana, jülüjainjatü naaʼin nouyase, kakaliainnale naya ekirajüin jee jaʼyale saaʼu nukuwaʼipa naaʼinrüin tü naashajaainjatkalü achiki. Müinjatia sukuwaʼipa tia nutuma nüneeküinjanapa na ekirajüinjanakana sünain shiʼipa tü outkajawaakat. Naainjainjatü tia apünüin semaana süpülapünaa nekirajaain na wawalayuukana sünain tü outkajawaakat. Püshaja nanülia na ekirajüinjanakana sünain tü karaloʼutakat Wakuwaʼipa otta Waʼyataain nümüin Maleiwa. Wekirajaayainjatü sünain tü outkajawaakat (S-89). Chi sülaülakai tü Outkajawaakat Wakuwaʼipa otta Waʼyataain nümüin Maleiwa jülüjainjatü naaʼin shiʼitaanüle sünain tü karaloʼutapüleekat tü karaloʼuta sümaajatkat tü nekirajüinjatkalü anain na wawalayuukana. Eeshii süpüla naneeküin na laülaashiikana wanee laülaashi jee niale wanee aʼyataakai neʼipajee na laülaashiikana süpüla nükaalinjain chi sülaülakai tü outkajawaakat. Nnojoire laülaashin niʼipajana chia wawalakai, nnojoishi süpüla nüneeküin na ekirajüinjanakana sünain tü pütchi sünainka «Korolo kojutusü sulu’uka tü Bibliakat» jee «Wakuwaʼipa sünain anoujaa», naya na laülaashiikana eekana süpüla aaʼinrüin tia.

24. Niainjachi wanee laülaashi shikiipüʼükai semaanawai tü outkajawaakat Wakuwaʼipa otta Waʼyataain nümüin Maleiwa (nnojoliire wainmain na laülaashiikana suluʼu wanee outkajaalee, eeshi süpüla niain ekirajüin wanee neʼipajachi eekai nütüjain ekirajaa). Yapainjatü nutuma chi shikiipüʼükai tü pütchi suʼttiainjatkat nünüiki otta tü sajaʼttiainjatkat, niainjachi aküjaka nanülia na ekirajüinjanakana. Paliʼirüle na laülaashiikana, eeshi süpüla niain ekirajüin süpüshi tü ekirajaanajatkalü anain, maʼaka saaʼin wanee video eekai nnojoluinjatüin nüsakirüin anain. Nüküjainjatpa wanee pütchi namüin na ekirajaakana, motsoʼoinjatü sümaʼa nünüiki. Nayainjana na laülaashiikana aneekaka chi laülaashi atüjakai ekirajaa. Pachikuatüinjana na wawalayuu aneekünakana süpüla aʼyatawaakat tüü. Müleka choʼujaale shia, eeshi süpüla niain pejeewain chi sülaülakai tü outkajawaakat Wakuwaʼipa otta Waʼyataain nümüin Maleiwa noulialeʼeya na wane laülaashiikana. Wanee wawala eekai süpüla nikirajüin sünain «Ekirajawaa sünain tü Bibliakat namaa na wawalayuukana», eeshi süpüla shikiipüʼüin nia tü outkajawaakat. Chi shikiipüʼüinjachikai tü outkajawaakat, kamaneeinjachi nia anapa nünüiki namüin na ekirajakana otta anainjatü nünüiki nüchiaapa naya. Kettaainjatü nutuma tü outkajawaakat soʼu tü oora eʼitaanakat nüpüleerua (paashajeʼera  pütchi 17 otta  19). Suulia amüloulin tü minuutokot, eesü süpüla shiʼitaanüin wanee micrófono eere tü aashajaaleekat. Tia süpülajatü naashajaain chi shikiipüʼükai tü outkajawaakat sümaʼainruʼu nüntüin eemüin tü aashajaaleekat chi ekirajüinjachikai. Eeshi süpüla joyotuin nia süʼütpaʼa wanee meesa süpüla yalain nia soʼunnaa saashajeʼennüin tü «Pütchi aashajeʼennajatka» otta sünain tü pütchi «Atüjainjana waya ekirajaa».

25. Niainjachi wanee laülaashi atüjakai maʼin ekirajaa. Nüchiaainjana na laülaashiikana otta na aʼyataakana neʼipajee. Nayainjana nüchiaaka na ekirajakana sünain tü outkajawaakat Wakuwaʼipa otta Waʼyataain nümüin Maleiwa, na ekirajakana sünain tü pütchi süpülajatkat wayuu süpüshuaʼa, na ekirajakana sünain Aapiria Wayuu, «Ekirajawaa sünain tü Bibliakat namaa na wawalayuukana» jee nayale na aashajeʼerakana tü pütchikat sünain tia ekirajawaakat (paashajeʼera  pütchi 19). Kojuyale na laülaashii atüjakana ekirajaa, eeshii süpüla pachikuatüin juyawai na achiaainjanakana. Nnojotsü choʼujaain nachiaanüin waneepia na ekirajakana.

26. Wainmale na ekirajaashiikana, eeshii süpüla nekirajaain napüshi suluʼu tü ekirajüleekat piama. Eʼitaanüinjachi wanee wawala süpüla akaalinjaa na ekirajaakana, niainjachi wanee laülaashi jee nnojoliire wainmain na laülaashiikana suluʼu wanee outkajaalee, eeshi süpüla niain ekirajüin wanee neʼipajachi eekai nütüjain ekirajaa. Nayeena na laülaashiikana aneekaka jaraliinjanain akaalinjain na ekirajaakana jee pachikuatüinjanale naya sünain akaalinjaa. Shiainjatü naainjaka tü aküjünakat suluʼu  pütchi 18. Na ekirajaashiikana, oʼuneena eere tü ekirajüleekat piama süchikijee tü pütchikat «Püchajaa süchiki kaaʼürüi suluʼu tü Bibliakat». Sujutaapa tü pütchikat «Atüjainjana waya ekirajaa», aleʼejeena nachikuaʼa.

27. Sünain outkajawaakat tüü, eeʼiyatüneerü waneirua video. Eʼitaaneerü shia suluʼu JW Library^®, eesü süpüla südescargaajünüin suluʼu computador, tableta jee suluʼu serulaat.

© 2023 Watch Tower Bible and Tract Society of Pennsylvania

S-38-WY 11/23