NƐRESAALA boi n wan ta’an tara sakerɛ bɔ’ɔra Naayinɛ a san nyɛ gurebisɛ n gaŋɛ nu’usi ge bisɛ ti a san nana Naayinɛ a kan nyɛ nyuurɔ bim? Burasɛka yu’urɛ n de Yob la zuo ti sokere wa, la de lebesego yuun bɔna.

Se’em ma’a ti Israeldoma la yuun bɔna Egypt tiŋa la, Yob n yuun de Abraham yire nɛra la, yuun boi la tinsɛka yu’urɛ n nyaa de Arabia la. Sankaŋa la, malesi n yuun boi saazuo la yuun laɣesɛ mɛ Naayinɛ zɛ’an ti Sitaana n de tubekpirega la me pa’asɛ ba poan. Yehowa yuun tɔɣɛ bo malesi wa n laɣesɛ taaba la yeti eŋa nam bo a yameŋa Yob n tari yelemɛŋɛrɛ la mɛ. Yelemɛŋɛrɛ, Yehowa yuun yeti nɛresaala yuun ka boi n yuun tari birikinte wuu Yob la. Ge Sitaana yuun parum ti Naayinɛ n kã bo Yob ge gu’ura en la n sɔi ti Yob pu’usa Naayinɛ. Sitaana yuun yeti Yob san koŋe sɛla woo ti a tara la, a wan yaalɛ Naayinɛ.

Naayinɛ yuun bo Sitaana yɔ’ɔ ti a sa’am Yob lɔɣɔrɔ ge ku a kɔma ge nyaa basɛ ti Yob bɛ̃. Yob n yuun ka mi ti la dela Sitaana n ta’aseri yele ana za’a la zuo, a yuun ka bɔkɛ sɛla n sɔi ti Naayinɛ bo yɔ’ɔ ti gurebisɛ wa paɛ en. Ge la bala za’a, Yob yuun ka makɛ yaalɛ Naayinɛ .

Yob zɔdoma batã n ka tɔɣeri yelemɛŋɛrɛ la n yuun wa’an a zɛ’an. Buraasi wa yetɔɣum zo’e zo’e n boi Yob gɔŋɔ la poan la, ba yuun boti Yob sakɛ ti Naayinɛ n dɔlegeri a tuberɛ be’em se’a ti a tum suɣelum poan la. Hali ba yuun parum ti Naayinɛ puurɛ ka pee la a yamesi ge ti a me puɣum ka nam ba. Yob yuun zaɣesɛ ba putɛbe’ero wa mɛ. Yob yuun ŋmɛ la nyu’ɔ ge yeti eŋa wan tara a birikinte la bala ta paɛ a kum!

Ge Yob yuun tue mɛ la eŋa n yuun zɛɣeri ti a bo amea buurɔ la. Bunbilipaalega ayima yu’urɛ n de Elihu yuun keleseri sɔsega la za’a mɛ ge me nyaa pɔsɛ tɔɣera. Elihu yuun zɛregɛ Yob mɛ la eŋa n ka bɔkɛ ti Yehowa Naayinɛ n tari sore ti a bisera sɛla woo la, yele pakɛ gana asaala n tari buurɔ mɛ. Elihu me yuun zɛregɛ Yob zɔdoma la mɛ la ba ka tɔɣɛ yelemɛŋɛrɛ la.

Yehowa Naayinɛ yuun nyaa tɔɣɛ bo Yob mɛ ge soŋɛ en ti a tee a puti’irɛ. Yehowa yuun dekɛ la naaŋɔ lɔɣɔrɔ zo’e zo’e soŋɛ Yob ti a bɔkɛ asaala n pɔ’ɛ se’em Naayinɛ nɛŋan. Yob yuun sirege amea mɛ ge sakɛ Naayinɛ demesego. Yehowa n tari “giile la nimbɔzore” la zuo, a yuun basɛ ti Yob le tara la imma’asum, bo en eŋa n yuun tari lɔɣɔrɔ se’em la sugumnɔɔrɛ buyi ge kã bo en ti a dɔɣɛ kɔma pia. (Yames 5:​11) Yob n yuun kelum tara birikinte bɔ’ɔra Naayinɛ gurebisɛ poan la, yuun pa’alɛ ti Sitaana n yeti nɛra kan tara yelemɛŋɛrɛ bɔ’ɔra Naayinɛ gurebisɛ poan la dela pumpɔreŋɔ.

​—La ze’ele la Yob gɔŋɔ la poan.