Mai anina bada gaudia atoa guna. Baibel ia gwau: “Mai anina bada gaudia do umui diba.” (Filipi 1:10) Oi karaia mai anina bada gaudia be lista ai oi torea guna, namona be oi laloatao unai be mai anina bada o gau ginigunana—haheitalai, reana ruma aniani hoia karana be mai anina bada momokani lasi. Bona reana oi ura nega korikorina ai emu feivaret TV program do oi itaia, to unai be reana mai anina bada lasi. *

Palani karaia guna. Hadibaia Tauna 10:10 ia gwau: “Bema auri tulu ta be matana lasi bona ta ese ia segea lasi, ia be do ia hekwarahi bada,” unai siri ma ia gwau: “To aonega ese ta ia durua diba ia kwalimu totona.” Dahaka ita dibaia? Palani oi karaia namonamo guna unai amo emu nega oi gaukaralaia namonamo diba. Emu nega bada bona goada do idia haorea gaudia oi kokia eiava gabeai oi karaia. Bema oi itaia oi be gaukara momo oi karaia to nega sisina ia do noho, vadaeni gabeai oi ura karaia gaukara be unai negai ai oi karaia diba, a? Bema palani oi karaia guna, emu gaukara momo do oi hagugurua diba, hegeregere gaukara namonamo tauna ese iena auri tulu ia segea bamona.

Gau momo karaia lasi. Anina bada lasi gaudia o emu nega bada idia haorea kava gaudia dadaraia karana oi manadalaia be namo. Gaukara bona gau momo oi karaia dainai, do oi hesiku bada bona emu moale ia hadikaia diba.

Nega haorea kava bona daradara noho karana. “Lai ia raraia noho tauna be uhe do ia hadoa lasi, bona ori ia itaia noho tauna be uma aniani do ia gogoa lasi.” (Hadibaia Tauna 11:4) Dahaka ita dibaia? Nega gaukaralaia namonamo lasi karana ese gaukara ena nega ia henaoa diba bona gaukara do ia habadaia. Biru tauna ta be nega namona totona ia naria neganai, ia be uhe do ia hadoa lasi o aniani ena anina do ia utua lasi. Unai hegeregerena, iseda mauri ena lalohekwarahi gaudia ese ita dekenai daradara ia havaraia diba. Eiava do ita laloa abia hidi ita do karaia lasi neganai, namona be ita naria ela bona infomeisen maorona ita abia. Oibe, abia hidi badadia oi karaia totona tahua gaukara oi karaia namonamo bona palani oi karaia. Aonega Herevadia 14:15 ia gwau: “Aonega tauna be do ia karaia gaudia ia laloa namonamo guna. To momokani abia hidi momo lalonai daradara haida idia vara diba.​—Hadibaia Tauna 11:6.

Gau ibounai karaia goevagoeva. Iamesi 3:​17 ia gwau: “Ataiai amo [o Dirava amo] ia mai aonegana ia abia tauna be ia . . . laloa maoromaoro.” Oibe, ita ura gau ibounai ita karaia namonamo! To nega haida, ita badinaia totona ia auka neganai, unai ese lalohisihisi ia havaraia bona gau ta do ita karaia diba lasi. Haheitalai be, gado ma ta ia dibaia noho tauna be inai ia laloatao be namo, gado dibaia totona kerere haida do idia vara danu, to gabeai unai kerere amo diba do ia abia. Gau ibounai karaia goevagoeva toho tauna be ena hereva dalana dekenai do ia naria namonamo badina do ia ura lasi hereva kererena ta ia gwauraia​—unai bamona kara ia karaia tauna be gau ta do ia hagugurua diba lasi. Ita karaia gaudia ibounai lalonai namona be ita manau! Aonega Herevadia 11:2 ia gwau: “Manau taudia be aonega idia abia noho.” Danu, manau taudia be idia badu lasi bona nega momo sibodia dekenai do idia kiri danu.

Gaukara bona moale karadia. “Laga-ani sisina be mai ena namo, to gaukara goadagoada karana be lai lulua bamona.” (Hadibaia Tauna 4:6) Gaukara momo idia karaia taudia be hanaihanai edia “gaukara goadagoada” karana ena moale idia haboioa. Idia dekenai nega bona goada be lasi. To ia lahedo tauna be ia “laga-ani” momo bona ena nega ia haorea kava. Baibel ese ita ia hagoadaia ita laloa maoromaoro totona: Ita gaukara goadagoada bona ena ahuna ita moalelaia. Unai bamona moale be “Dirava ena harihari gauna.”​—Hadibaia Tauna 5:​19.

Mahuta namonamo. Baibel ia torea tauna ta ia gwau: “Lau be do lau hekure bona mai maino ida do lau mahuta.” (Salamo 4:8) Taunimanima badadia be hanuaboi ai, hora eit bamona idia mahuta be namo, unai ese edia tauanina, hemami bona laloa dalana ai idia do ia durua. Namona be ita laloatao, mahuta be mai ena namo bada badina ita ia durua ita laloa namonamo bona ita dibaia o karaia gaudia ita laloatao totona. To mahuta namonamo lasi karana ese emu diba abia karana do ia hadikaia bona aksiden, kerere momo bona badu ia havaraia diba.

Hagugurua diba tahua gaudia atoa. “Namona be emu matana ese ia itaia gaudia oi moalelaia, bona namo lasi oi abia diba lasi gaudia oi tahua goadagoada.” (Hadibaia Tauna 6:9) Point be dahaka? Aonega tauna be anina bada lasi gaudia ura henia karana ese do ia biagua lasi, hegeregere gau ta ia ura to ia diba do ia vara momokani lasi o ia hagugurua diba lasi. Danu, advertisment ta o hanamoa hereva ta ese ena lalona do ia veria lasi. To, ia laloparara, ia abia diba gaudia sibona be hegeregere—“[ena] matana ese idia itaia gaudia.”

Emu kara namodia oi laloa. Emu kara namodia ese oi ia durua do oi diba dahaka be gau badana, mai anina bada, bona nega bada ia haorea lasi. Bema emu mauri be peva bamona, emu kara ese unai peva idia badinaia diba. Kara namodia ese oi ia durua mauri ai mai anina bada gaudia oi atoa bona emu nega oi gaukaralaia namonamo totona. Unai bamona kara namodia be edeseni amo oi davaria diba? Taunimanima momo be Baibel dekenai idia tabekau, badina idia laloparara unai ese aonega ia henia.—Aonega Herevadia 2:6, 7.

Lalokau be emu kara badana ai oi halaoa. Kolose 3:14 ia gwau: Lalokau be “taunimanima ia hatamonaia gauna hereadaena.” Bema lalokau be lasi, famili lalonai moale korikorina bona noho hebou namonamo karana do ia vara lasi. Taunimanima be unai hereva idia dadaraia, reana taga tahua karana o moni gaukara namona laloa karana dekenai edia nega bada bona goada idia haorea, to idia dekenai moale ia havaraia lasi. Oibe, badina namona dainai Baibel ese nega handred momo lalokau ia herevalaia, unai kara sibona ese kara ma haida ia hereaia momokani.​—1 Korinto 13:1-3; 1 Ioane 4:8.

Nega oi atoa Dirava oi diba namonamo totona. Tau ta ladana be Geoff. Ia be mai ena adavana lalokauna, natudia rua, tura namodia, bona moni gaukara (paramedic) namona ia karaia. To, nega momo ena gaukara ai ia itaia taunimanima be idia hisihisi bona idia mase. Sibona ia henanadai, “Mauri ena badina be inai sibona, a?” Bena nega ta, Iehova ena Witnes taudia ese ia karaia Baibel pablikeisen haida ia duahia bona haere namodia ia davaria.

Geoff ese ia dibaia gaudia be ena adavana bona natudia dekenai ia herevalaia, bona idia danu unai idia ura henia. Unai famili be Baibel idia stadilaia matamaia bona unai ese edia mauri ia hanamoa bona idia ia durua mai aonega ida edia nega idia gaukaralaia namonamo totona. Baibel idia stadilaia karana amo mauri hanaihanai ena helaro namona abia dalana idia dibaia.​—Apokalupo 21:3, 4.

Geoff ena ekspiriens amo Iesu Keriso ena hereva ita laloatao, ia gwau: “Dirava dibaia totona idia hitolo taudia be idia moale.” (Mataio 5:3) Oi ura nega oi atoa Dirava oi diba namonamo totona, a? Momokani, unai oi karaia neganai do oi aonega bona heduru do oi do abia, dina ta ta ai sibona lasi, to emu mauri ibounai lalonai.