Әз бажаре Санто Домингода һатьмә буйине у жь чар зарʹа әз йе бьчʹук бум. Де-баве мьн мәрьвнә хԝәнди бун у ԝана дьхԝәст, ԝәки зарʹед ԝан нава мәрьвед баш у мәʹрифәтда мәзьн бьн. Чар сал пешийа буйина мьн де-баве мьн рʹасти мормонед мисйонер һатьбун. Кʹьнщхԝәкьрьна ԝанә маԛули у мәʹрифәтбуна ԝан ӧса сәр де-баве мьн һʹӧкӧм кьрьбу, ԝәки ԝана сафи кьрьбу бьбьнә әндәмед дера мормона. Сәр ве гьраве малбәта мә йа пешьн бу, кӧ әв дин ԛәбул кьрьбу.

Сал пәй саларʹа мьн хԝәш дьһат, ԝәки шьхӧле дере бькьм. Ӧса жи мьн хԝәш дьһат ԝәки бона ԝан фәрз бу малбәт у нав-намуси. Әз фьрнаԛ дьбум кӧ мормон ьм у мьн хԝәрʹа нет дани кӧ бьбьмә мисйонер.

Чахе әз 18 сали бум, малбәта мьн дәрбази Ԝәлатед Йәкбуйи бу, сәва кӧ әз бькарьбьм заньнгәһа башда һин бьм. Саләк шунда хатийа мьн тʹәви мере хԝә, йед кӧ Шәʹдед Йаһоԝа нә, һатьнә Флоридайе сәва мә бьвиньн. Ԝана мә тʹәглиф кьрьн сәр щьвата мәзьн. Әз гәләк әʹщебмайи мам чахе мьн дит дәр-доре мьн гьшк бәрнамә дьбьһен, рʹезед Кʹьтеба Пироз вәдькьн у фькьред һʹәԝас хԝәрʹа дьньвисьн, мьн һиви кьр кӧ кʹахаз у ԛаләме бьдьнә мьн у мьн жи дәстпекьр хԝәрʹа бьньвисьм.

Хатийа мьн у мере ԝе заньбун, кӧ әз дьхԝазьм бьбьмә мисйонер у паши щьвата мәзьн ԝана мьнрʹа гот, кӧ дькарьн али мьн бькьн, кӧ әз жь Кʹьтеба Пироз һьнә тьшт һин бьм. Әв фькьр мьн хԝәш һат, чьмки мьн жь кʹьтеба мормона дьһа зәʹф заньбу, нә кӧ жь Кʹьтеба Пироз.

Чахе мә пе тʹеле фькьред жь Кʹьтеба Пироз шеԝьр дькьр, хатийа мьн у мере ԝе әз һелан дькьрьм, ԝәки баԝәрийа хԝә бәрамбәри һинкьрьнед Кʹьтеба Пироз бькьм. Ԝана дьхԝәст, ԝәки әз хԝәха рʹастийеда баԝәр бьм.

Гәләк һинкьрьнед дера Мормона мьн чʹәʹвгьрти ԛәбул кьрьбу. Ле мьн ньзаньбу әв сәр һʹиме Кʹьтеба Пироз ьн йан на. Щарәке хатийа мьн журнала «Һʹьшйар Бьн!» мьнрʹа шанд йа сала 1995, 8 Мьждаре. Әв журнал Шәʹдед Йаһоԝа нәшьр дькьн. Ве журналеда чәнд готаред дәрһәԛа Мормона һәбун. Әз гәләк әʹщебмайи мам, чахе пеһʹәсийам ԝәки әз гәләк һаш һинкьрьнед Мормона тʹӧнә мә. Әве йәке әз һелан кьрьмә, ԝәки бькʹәвьмә малпәра Мормона, сәва бьньһерʹьм һәла чь кӧ журнала «Һʹьшйар Бьн!» дьбежә рʹаст ә. У әз баԝәр бум, ԝәки әв бь рʹасти ӧса нә. Баԝәрийа мьн һе ԛәԝи бу, чахе әз чумә Ԝәлатед Йәкбуйи, музейа Мормона.

Әз тʹьме дьфькьрим, ԝәки Кʹьтеба Мормона у Кʹьтеба Пироз һәв дьгьрьн. Ле чахе мьн дәстпекьр Кʹьтеба Пироз бьхуньм у сәр бьфькьрьм, мьн фьрԛи дит ортʹа һинкьрьна Мормона у Кʹьтеба Пироз. Мәсәлә кʹьтеба Һәзәԛел 18:4-да те готьне ԝәки нәфс дьмьрә. Ле Кʹьтеба Мормона Алма 42:9-да ньвисар ә: «Нәфс тʹӧ щар нькарә бьмьрә».

Хенщи фьрԛийа ортʹа һинкьрьна, әз ӧса жи дькʹәтьмә шьке бона һинкьрьнед ԝанә мьләтһʹьзийе. Мәсәлә, Мормона һин дькьр кӧ бахче Едене нәһийа Щексонеда бу (Штата Мисури, Америка). Әԝана ӧса жи һин дькьн, ԝәки чахе «Пʹадшатийа Хԝәде дәстпекә сәрԝертийе сәр әʹрдерʹа бькә, һьнге Хԝәде ԝе бь сайа Дәԝләтед Йәкбуйи сәрԝертийе бькә».

Һьнге әз фькьрим: «Ле гәло ԝе чь бе сәре ԝәлате кӧ әз һатьмә буйине у ӧса жи йед майин?» Еварәке Мормонәки щаһьл, кʹижан кӧ һин дьбу ԝәки бьбә мисйонер мьнрʹа тʹелехьст. Мьн сафи кьр, ԝәки әве пьрсе тʹәви ԝи шеԝьр кьм. Мьн жь ԝи пьрси, ԝәки әԝе мьԛабьли бьре хԝәйи Мормон шәрʹ бькә, һәрге ортʹа ԝәлате ԝи у ԝәлате ԝанда шәрʹ дәстпебә. Әз гәләк әʹщебмайи мам, чахе мьн бьһист, ԝәки әԝи гот «әре»! Паши ԝе йәке мьн дәстпекьр һе кʹур һинкьрьнед Мормона леколин бькьм у тʹәви рʹебәред ԝан шеԝьр бькьм. Ԝана мьнрʹа гот, ԝәки щабед пьрсед мьн вәшарти нә, ле чахе шәԝԛ һе зәлал бә, һьнге һʹәму тьшт ԝе әʹйан бә.

Жь гьлийе ԝан әз зәʹф дьлтәнг бум у мьн дәстпекьр хԝәрʹа бьфькьрьм, кӧ әз чьрʹа дьхԝазьм бьбьмә мисйонере Мормона. Мьн фәʹм кьр, ԝәки бь рʹасти нета мьн әԝ ә, ԝәки аликʹарийе бьдьмә мәрьва у ӧса жи мьн һʹьз дькьр, ԝәки ԛәдьре мьн бьгьрьн. Мисйонер гәрәке дәрһәԛа Хԝәде мәрийа һин кьн. Ле мьн дәрһәԛа Хԝәде лап һьндьк заньбу. Рʹаст ә бәре мьн гәләк щар Кʹьтеба Пироз хԝәндьбу, ле бь рʹасти мьн ԛимәте ԝе фәʹм нәдькьр. Мьн ԛә ньзаньбу, ԝәки ԛьрара Хԝәде дәрһәԛа әʹрде у инсанәте чь йә.

Чахе Шәʹдед Йаһоԝа һинбуна Кʹьтеба Пироз тʹәви мьн дәрбаз дькьрьн, әз пеһʹәсийам кӧ наве Хԝәде чь йә, паши мьрьне чь дьԛәԝьмә, у рола Иса ԛьрара Хԝәдеда чь йә, ахьрийе әз ԛимәта ве Кʹьтебе пеһʹәсийам у мьн бь шабун дәстпекьр мәрьварʹа гьли кьм рʹастийа кӧ әз педьһʹәсийам. Мьн заньбу, кӧ Хԝәде һәйә, ле ньһа әз дькарьм ԝирʹа бь дӧа хәбәр дьм, ча һәвале хԝәйи лапи незикрʹа. Сала 2004, 12 Тирмәһе әз һатьмә ньхӧмандьне у бумә Шәʹде Йаһоԝа. Ле шәш мәһ шунда, мьн хьзмәткʹарийа һәртʹьм дәстпекьр.

Бона мьн ԛәдьрәки мәзьн бу, кӧ мьн пенщ сала офиса сәрәкәйә Шәʹдед Йаһоԝада, Бруклинеда (Нийу Йорк) хьзмәт кьрийә. Мьн бь шабун аликʹари дьда шьхӧле нәшьркьрьна Кʹьтеба Пироз у әʹдәбйәтед сәр һʹиме ԝе, жь кʹижана кӧ бь милйона мәрьв нав тʹәмамийа дьнйайеда кʹаре дьстиньн. Һʹәта ньһа әз бәрдәԝам дькьм али мәрьва бькьм, ԝәки дәрһәԛа Хԝәде пебьһʹәсьн.