ຄຳພີໄບເບິນປ່ຽນຊີວິດຄົນ
ຂ້ອຍບໍ່ເຊື່ອວ່າມີພະເຈົ້າ
ປີເກີດ 1974
ປະເທດບ້ານເກີດ ສາທາລະນະລັດປະຊາທິປະໄຕເຢຍລະມັນ
ອະດີດ ຄົນທີ່ບໍ່ເຊື່ອວ່າມີພະເຈົ້າ
ຊີວິດທີ່ຜ່ານມາ
ຂ້ອຍເກີດໃນບ້ານໜຶ່ງຢູ່ລັດແຊັກໂຊນີ ໃນປະເທດທີ່ຕອນນັ້ນເອີ້ນວ່າສາທາລະນະລັດປະຊາທິປະໄຕເຢຍລະມັນ. ຄອບຄົວເຮົາອົບອຸ່ນແລະຮັກກັນ ພໍ່ແມ່ສອນໃຫ້ຂ້ອຍມີຄ່ານິຍົມທາງສິນລະທຳທີ່ດີ. ສາທາລະນະລັດປະຊາທິປະໄຕເຢຍລະມັນເປັນປະເທດທີ່ປົກຄອງດ້ວຍລະບອບຄອມມູນິດ ດັ່ງນັ້ນ ຜູ້ຄົນສ່ວນຫຼາຍໃນແຊັກໂຊນີຈຶ່ງຖືວ່າສາສະໜາບໍ່ແມ່ນເລື່ອງສຳຄັນ. ແລະຂ້ອຍເອງກໍບໍ່ເຊື່ອວ່າມີພະເຈົ້າ. ຕັ້ງແຕ່ເກີດມາຈົນຮອດອາຍຸ 18 ປີແນວຄິດສອງຢ່າງທີ່ຫຼໍ່ຫຼອມຂ້ອຍແມ່ນ: ຄອມມູນິດແລະຄວາມເຊື່ອທີ່ວ່າບໍ່ມີພະເຈົ້າ.
ເປັນຫຍັງຂ້ອຍຈຶ່ງມັກຄອມມູນິດ? ຍ້ອນຂ້ອຍມັກແນວຄິດທີ່ວ່າທຸກຄົນເທົ່າທຽມກັນ. ນອກຈາກນັ້ນ ຂ້ອຍເຊື່ອວ່າທຸກສິ່ງທຸກຢ່າງຄວນມີການແບ່ງປັນຢ່າງຍຸຕິທຳ ເຊິ່ງຈະເຮັດໃຫ້ບໍ່ມີໃຜລວຍຫຼືທຸກເກີນໄປ. ຂ້ອຍຈຶ່ງມັກໃຊ້ເວລາຢູ່ກັບອົງກອນຊາວໜຸ່ມຄອມມູນິດຢູ່ເລື້ອຍໆ. ຕອນອາຍຸ 14 ປີ ຂ້ອຍທຸ່ມເທເວລາສ່ວນຫຼາຍກັບໂຄງການດ້ານສິ່ງແວດລ້ອມໃນການປ່ຽນເຈ້ຍທີ່ໃຊ້ແລ້ວໃຫ້ກັບມາໃຊ້ໄດ້ອີກ. ຜູ້ຄົນໃນບ້ານເອົາເວຂອບໃຈຄວາມພະຍາຍາມຂອງຂ້ອຍຫຼາຍ ຂ້ອຍເຖິງຂັ້ນໄດ້ຮັບລາງວັນຈາກເຈົ້າໜ້າທີ່ທ້ອງຖິ່ນ. ເຖິງວ່າຕອນນັ້ນຂ້ອຍຍັງເປັນເດັກນ້ອຍ ແຕ່ກໍຮູ້ຈັກນັກການເມືອງລະດັບສູງບາງຄົນຂອງສາທາລະນະລັດປະຊາທິປະໄຕເຢຍລະມັນ. ຂ້ອຍຮູ້ສຶກວ່າຂ້ອຍເລືອກເປົ້າໝາຍຊີວິດໄດ້ຖືກຕ້ອງແລະຂ້ອຍກຳລັງຈະມີອະນາຄົດທີ່ສົດໃສ.
ແຕ່ແລ້ວໂລກຂອງຂ້ອຍກໍພັງທະລາຍ. ໃນປີ ຄ.ສ 1989 ກຳແພງແບັກແລັງຖືກທຳລາຍຄືກັນກັບການຫຼົ້ມສະຫຼາຍຂອງກຸ່ມຄອມມູນິດໃນເອີຣົບຕາເວັນອອກ. ເລື່ອງໜ້າຕົກໃຈຍັງບໍ່ໝົດເທົ່ານັ້ນ. ຂ້ອຍໄດ້ມາຮູ້ອີກວ່າມີຄວາມບໍ່ຍຸຕິທຳເກີດຂຶ້ນບັກຫຼາຍໆໃນສາທາລະນະລັດປະຊາທິປະໄຕເຢຍລະມັນ. ຕົວຢ່າງເຊັ່ນ ຄົນທີ່ບໍ່ສະໜັບສະໜູນຄອມມູນິດຈະຖືກປະຕິບັດແບບຊົນຊັ້ນຕ່ຳ. ມັນເປັນແບບນັ້ນໄດ້ແນວໃດ? ເປັນຫຍັງຄອມມູນິດບໍ່ເຮັດໃຫ້ເກີດຄວາມເທົ່າທຽມກັນ? ຄອມມູນິດເປັນພຽງຄວາມເພີ້ຝັນແມ່ນບໍ? ນີ້ເຮັດໃຫ້ຂ້ອຍເຄັ່ງຕຶງຫຼາຍ.
ຂ້ອຍກໍເລີຍປ່ຽນໄປສົນໃຈດົນຕີແລະສິລະປະ. ຂ້ອຍໄດ້ເຂົ້າຮຽນຢູ່ສະຖາບັນດົນຕີເຊິ່ງອາດເຮັດໃຫ້ມີໂອກາດໄດ້ຮຽນຕໍ່ຈົນເຖິງລະດັບມະຫາວິທະຍາໄລ ຂ້ອຍກໍເລີຍຝັນຢາກຈະເປັນສິລະປິນ. ໃນຕອນນັ້ນ ຂ້ອຍບໍ່ສົນໃຈຫຼັກສິນລະທຳທີ່ພໍ່ແມ່ເຄີຍສອນອີກຕໍ່ໄປ. ຂ້ອຍສົນໃຈແຕ່ຄວາມມ່ວນຊື່ນ ເຊິ່ງລວມເຖິງການຄົບຜູ້ຫຍິງຫຼາຍຄົນພ້ອມກັນ. ແຕ່ດົນຕີ ສິລະປະ ແລະການໃຊ້ຊີວິດຕາມໃຈໂຕເອງກໍບໍ່ໄດ້ຊ່ວຍໃຫ້ຄວາມກັງວົນຂອງຂ້ອຍຫຼຸດໜ້ອຍລົງ. ແມ່ນແຕ່ຮູບທີ່ຂ້ອຍແຕ້ມກໍສະທ້ອນໃຫ້ເຫັນຄວາມຢ້ານ. ອະນາຄົດຈະເປັນແນວໃດ? ແລະເຮົາເກີດມາເຮັດຫຍັງ?
ໃນທີ່ສຸດຂ້ອຍກໍພົບຄຳຕອບທີ່ຊອກຫາມາດົນ ຄຳຕອບນັ້ນເຮັດໃຫ້ຂ້ອຍປະຫຼາດໃຈ. ຕອນແລງມື້ໜຶ່ງຢູ່ສະຖາບັນດົນຕີ ຂ້ອຍນັ່ງລົມກັບໝູ່ນັກສຶກສາເລື່ອງອະນາຄົດ. ນັກສຶກສາຄົນໜຶ່ງທີ່ເປັນພະຍານພະເຢໂຫວາຊື່ແມນດີ້ *ໄດ້ຊ່ວຍຊີ້ທາງໃຫ້ຂ້ອຍ. ລາວບອກວ່າ “ອັນດຣຽດສ໌ ຖ້າເຈົ້າຢາກໄດ້ຄຳຕອບເລື່ອງຊີວິດແລະອະນາຄົດ ລອງເບິ່ງໃນຄຳພີໄບເບິນແມ້.”
ຂ້ອຍບໍ່ໄດ້ເຊື່ອທັນທີ ແຕ່ກໍຢາກຮູ້ວ່າຄຳພີໄບເບິນບອກຫຍັງ. ແມນດີ້ເປີດດານຽນບົດ 2 ໃຫ້ຂ້ອຍເບິ່ງ ແລະເມື່ອຂ້ອຍອ່ານຂ້ອຍກໍຮູ້ສຶກແປກໃຈຫຼາຍ. ມັນເປັນຄຳພະຍາກອນເລື່ອງມະຫາອຳນາດໂລກທີ່ລຽງຕາມລຳດັບ ເຊິ່ງໝາຍເຖິງລັດຖະບານຕ່າງໆທີ່ມີອິດທິພົນຫຼາຍໃນສະໄໝແຕ່ກີ້ມາຈົນຮອດສະໄໝຂອງເຮົາ. ແມນດີ້ຍັງໃຫ້ຂ້ອຍເບິ່ງຄຳພະຍາກອນອື່ນໆຈາກຄຳພີໄບເບິນທີ່ເວົ້າເຖິງເລື່ອງອະນາຄົດນຳ. ໃນທີ່ສຸດຂ້ອຍກໍພົບຄຳຕອບທີ່ຢາກຮູ້! ແລ້ວແມ່ນໃຜລະທີ່ເປັນຄົນຂຽນຄຳພະຍາກອນເຫຼົ່ານີ້ ແລະໃຜສາມາດທຳນາຍອະນາຄົດໄດ້ຢ່າງຖືກຕ້ອງແບບນີ້? ຫຼືວ່າມີພະເຈົ້າຢູ່ແທ້ໆ?
ຄຳພີໄບເບິນປ່ຽນຊີວິດຂ້ອຍແນວໃດ
ແມນດີ້ແນະນຳໃຫ້ຂ້ອຍຮູ້ຈັກກັບຮອດສ໌ແລະແອງເຈລິກ້າ ຄູ່ຜົວເມຍທີ່ເປັນພະຍານພະເຢໂຫວາທີ່ຊ່ວຍຂ້ອຍໃຫ້ເຂົ້າໃຈຄຳພີໄບເບິນຫຼາຍຂຶ້ນ. ບໍ່ດົນຂ້ອຍກໍເຂົ້າໃຈວ່າພະຍານພະເຢໂຫວາເປັນອົງການທາງສາສະໜາພຽງກຸ່ມດຽວທີ່ໃຊ້ແລະໃຫ້ຄວາມສຳຄັນກັບຊື່ຂອງພະເຈົ້າເຊິ່ງກໍຄື ເຢໂຫວາ ຢ່າງສະເໝີຕົ້ນສະເໝີປາຍ. (ຄຳເພງ 83:18; ມັດທາຍ 6:9) ຂ້ອຍໄດ້ຮູ້ວ່າພະເຢໂຫວາໃຫ້ໂອກາດມະນຸດມີຊີວິດຕະຫຼອດໄປແລະໄດ້ຢູ່ໃນໂລກທີ່ເປັນສວນອຸທິຍານ. ຄຳເພງ 37:9, ລ.ມ. ບອກວ່າ “ຄົນທີ່ລໍຖ້າພະເຢໂຫວາຈະໄດ້ຢູ່ໃນໂລກ.” ຂ້ອຍປະທັບໃຈເລື່ອງນີ້ຫຼາຍ ທຸກຄົນທີ່ໃຊ້ຊີວິດຕາມມາດຕະຖານຂອງພະເຈົ້າທີ່ບອກໄວ້ໃນຄຳພີໄບເບິນຈະໄດ້ຮັບໂອກາດນີ້.
ແຕ່ບັນຫາແມ່ນ ການປ່ຽນຊີວິດເພື່ອເຮັດຕາມຄຳສອນໃນຄຳພີໄບເບິນເປັນເລື່ອງຍາກຫຼາຍສຳລັບຂ້ອຍ. ການເປັນສິລະປິນທີ່ປະສົບຄວາມສຳເລັດເຮັດໃຫ້ຂ້ອຍເປັນຄົນຍິ່ງ ຂ້ອຍຈຶ່ງຕ້ອງຮຽນຮູ້ທີ່ຈະເປັນຄົນອ່ອນນ້ອມຖ່ອມຕົນ. ນອກຈາກນັ້ນ ການເຊົາໃຊ້ຊີວິດແບບຜິດສິນລະທຳກໍບໍ່ງ່າຍຄືກັນ. ຂ້ອຍຂອບໃຈພະເຢໂຫວາຫຼາຍແທ້ໆທີ່ອົດທົນ ເມດຕາ ແລະເຂົ້າໃຈຄົນທີ່ພະຍາຍາມປ່ຽນແປງໂຕເອງເພື່ອເຮັດຕາມຄຳສອນໃນຄຳພີໄບເບິນ!
ຄອມມູນິດແລະຄວາມເຊື່ອທີ່ວ່າບໍ່ມີພະເຈົ້າໄດ້ຫຼໍ່ຫຼອມຂ້ອຍມາຈົນຮອດອາຍຸ 18 ປີ ແຕ່ຄຳພີໄບເບິນປ່ຽນຊີວິດຂ້ອຍຕັ້ງແຕ່ນັ້ນມາ. ສິ່ງທີ່ໄດ້ຮຽນຊ່ວຍຫຼຸດຄວາມກັງວົນຂອງຂ້ອຍເລື່ອງອະນາຄົດແລະເຮັດໃຫ້ຂ້ອຍຮູ້ວ່າເຮົາເກີດມາເຮັດຫຍັງ. ໃນປີ 1993 ຂ້ອຍຮັບບັບເຕມາເປັນພະຍານພະເຢໂຫວາ ແລະໃນປີ 2000 ຂ້ອຍໄດ້ແຕ່ງດອງກັບທາບິຕ້າ ເຊິ່ງເປັນໝູ່ຮ່ວມຄວາມເຊື່ອທີ່ກະຕືລືລົ້ນ. ເຮົາໃຊ້ເວລາສ່ວນຫຼາຍໃນການຊ່ວຍຄົນອື່ນໃຫ້ຮຽນຄຳພີໄບເບິນ. ເຮົາພົບຫຼາຍຄົນທີ່ມີພູມຫຼັງຄືກັນກັບຂ້ອຍ ຄືຖືກຫຼໍ່ຫຼອມໂດຍຄອມມູນິດແລະຄວາມເຊື່ອທີ່ວ່າບໍ່ມີພະເຈົ້າ. ຂ້ອຍມີຄວາມສຸກຫຼາຍທີ່ໄດ້ຊ່ວຍເຂົາເຈົ້າໃຫ້ຮູ້ຈັກພະເຢໂຫວາ.
ປະໂຫຍດທີ່ໄດ້ຮັບ
ຕອນທີ່ຂ້ອຍເລີ່ມຮູ້ຈັກແລະຮຽນຄຳພີໄບເບິນກັບພະຍານພະເຢໂຫວາ ພໍ່ແມ່ຂ້ອຍຮູ້ສຶກຢ້ານຫຼາຍ. ແຕ່ຕໍ່ມາ ພໍ່ແມ່ກໍເຫັນວ່າຂ້ອຍປ່ຽນໄປໃນທາງທີ່ດີ. ຕອນນີ້ຂ້ອຍດີໃຈຫຼາຍ ທີ່ພວກເພິ່ນອ່ານຄຳພີໄບເບິນແລະໄປປະຊຸມກັບພະຍານພະເຢໂຫວາ.
ຂ້ອຍກັບທາບິຕ້າມີຊີວິດຄູ່ທີ່ມີຄວາມສຸກຍ້ອນເຮົາພະຍາຍາມຫຼາຍເພື່ອຈະເຮັດຕາມຫຼັກການໃນຄຳພີໄບເບິນເລື່ອງການໃຊ້ຊີວິດຄູ່. ເຊັ່ນ ການເຮັດຕາມຄຳແນະນຳທີ່ບອກໃຫ້ເຮົາສັດຊື່ຕໍ່ກັນຊ່ວຍໃຫ້ຊີວິດຄູ່ຂອງເຮົາໝັ້ນຄົງສະເໝີ.—ເຮັບເຣີ 13:4
ຂ້ອຍບໍ່ຢ້ານແລະກັງວົນເລື່ອງອະນາຄົດອີກຕໍ່ໄປ. ຂ້ອຍຮູ້ສຶກວ່າໂຕເອງເປັນສວນໜຶ່ງໃນຄອບຄົວຂອງຄົນທີ່ມີຄວາມເຊື່ອດຽວກັນທົ່ວໂລກ ມີສັນຕິສຸກແທ້ແລະເປັນນ້ຳໜຶ່ງໃຈດຽວກັນ. ເຮົາທຸກຄົນປະຕິບັດຕໍ່ກັນຢ່າງເທົ່າທຽມ. ນີ້ແມ່ນແນວຄິດທີ່ຂ້ອຍເຊື່ອແລະຊອກຫາມາຕະຫຼອດຊີວິດ.
^ ຂໍ້ 12 ຊື່ສົມມຸດ.
ເລື່ອງທີ່ເຈົ້າອາດຈະມັກ
ຫໍສັງເກດການ
ຂ້ອຍຮັກເບດສ໌ບອນຫຼາຍກວ່າທຸກສິ່ງ!
ແຊມມູເອນ ຮາມິວຕັນ ມັກໃນອາຊີບກິລາ ແຕ່ການສຶກສາຄຳພີໄບເບິນປ່ຽນຊີວິດຂອງລາວ.
ຫໍສັງເກດການ
ຂ້ອຍບໍ່ຢາກຕາຍ!
ອີວອນ ຄົວຣີເຄີຍຖາມວ່າ “ຂ້ອຍເກີດມາເຮັດຫຍັງ?” ຄຳຕອບທີ່ລາວໄດ້ຮັບໄດ້ປ່ຽນຊີວິດລາວ.
