• Manzwi A Makalelo 2

• Litaba za Butokwa Zezwa Mwa Linzwi la Mulimu 3-5

  • Ngambolo 3

  • Kubatisisa Litaba za Butokwa za Kwa Moya 4

  • Kubala Bibele 5

• Muikataze Kupeta Hande Bukombwa 6-14

  • Kukalisa Puisano 7

  • Kukutela Kuambola ni Batu 8

  • Kuluta Batu Kuba Balutiwa 9

  • Kutalusa Zemulumela 10

  • Ngambolo 11

  • Mwakufela Lingambolo 12

  • Mikutalezo 13

  • Kuitusisa Mavidio ni Lihatiso 14

• Kupila Sina Bakreste 15-16

  • Tuto ya Bibele ya Puteho 16

• Manzwi A Mafelelezo 17

• Kubabaza Baituti ni Kufa Kelezo 18

• Kubuluka Nako 19

• Hamupotelwa ki Muokameli wa Mupotoloho 20

• Sunda ya Mukopano wa Mupotoloho Kamba ya Mukopano Omutuna 21

• Sunda ya Kupuzo 22

• Muokameli wa Mukopano wa Bupilo ni Bukombwa 23

• Muina-Situlo wa Mukopano wa Bupilo ni Bukombwa 24

• Muelezi wa Mutusi 25

• Makilasi Amañwi 26

• Mavidio 27

1. Litaelo zeinzi mwa fomu ye likatusa batu kaufela babanani lingambolo mwa mukopano wa Bupilo Bwaluna Bwa Sikreste ni Bukombwa. Batu bao baswanela kunyakisisa litaelo za ngambolo yabona zebonisizwe mwa Buka ya Mukopano wa Bupilo ni Bukombwa ni litaelo zebonisizwe mwa fomu ye pili basika kalisa kale kuitukiseza ngambolo yabona. Bahasanyi kaufela baswanela kumemiwa kuli baiñolise kufanga lingambolo za baituti. Babañwi babatukufalezwi ili babaswalisana ni puteho bakona kuiñolisa haiba balumela lituto za mwa Bibele mi bapila ka kulumelelana ni likuka za Sikreste. Muokameli wa Mukopano wa Bupilo ni Bukombwa uswanela kunyakisisa lika zetokwahala kuli mutu aiñolise mwa sikolo ni mutu yasi muhasanyi ili yabata kuiñolisa mwa sikolo mi kihona akataluseza mutu yo haiba ukwanisize zetokwahala kamba kutokwa. Muokameli wa Mukopano wa Bupilo ni Bukombwa uswanela kuikambota ni mutu yo fapilaa baba muzamaiseza tuto ya Bibele (kamba fapilaa bashemi bahae babali balumeli). Lika zetokwahala kuli mutu aiñolise mwa sikolo zaswana ni zetokwahala ku mutu yabata kuba muhasanyi yasika kolobezwa.—od kauha. 8 para. 8.

2. Muzuzu ulimuñwi. Sunda ni sunda, hamulaho wa pina ya kukwalula ni tapelo, muina-situlo wa Mukopano wa Bupilo ni Bukombwa ukatalusa litaba zekatusa baputehi kuitukiseza zekaitutiwa lizazi leo. Muina-situlo uswanela kutalusa lisupo zekatusa hahulu baputehi.

3. Ngambolo: Mizuzu ye 10. Toho ya taba ni lisupo zetuna zepeli kamba zetaalu libonisizwe mwa Buka ya Mukopano wa Bupilo ni Bukombwa. Ngambolo ye iswanela kufiwa ku muuna-muhulu kamba sikombwa sa puteho yali muluti yomunde. Haiba kubala Bibele kwa sunda yeo kukalisa ka kauhanyo yapili ya buka ya mwa Bibele, kukabuhiswa vidio yetalusa litaba ka za buka yeo. Yafa ngambolo ye ukaswalisanisa litaba ze mwa vidio ni toho ya taba ya ngambolo. Nihakulicwalo, uswanela kubona teñi kuli watalusa lisupo zebonisizwe mwa buka ya mukopano. Hape, haiba kusanani nako, uswanela kuitusisa hande maswaniso abonisizwe mwa Buka ya Mukopano, ili alukiselizwe kuzamaelela ni litaba zenyakisiswa. Hape wakona kuekeza litaba zeñwi zebatisisizwe, haiba litaba zeo litusa kuutwahalisa lisupo ze mwa ngambolo.

4. Kubatisisa Litaba za Butokwa za Kwa Moya: Mizuzu ye 10. Ye ki ngambolo ya lipuzo ni likalabo yesina manzwi a makalelo kamba manzwi a mafelelezo. Ilukela kufiwa ki muuna-muhulu kamba sikombwa sa puteho yali muluti yomunde. Yafa ngambolo ye uswanela kubuza baputehi lipuzo zepeli zebonisizwe. Hape wakona kulemuha haiba litimana zebonisizwe likatokwa kubaliwa kamba kutokwa. Babaalaba baswanela kufa likalabo zabona ka lisekondi ze 30 kamba zesafiti fo.

5. Kubala Bibele: Mizuzu yemine. Ngambolo ya muituti ye, iswanela kufiwa ki muituti wa muuna. Muituti yafilwe ngambolo ye uswanela kubala litaba zefilwe kusina kubulela sesiñwi kwa makalelo kamba kwa mafelelezo. Muina-situlo wa mukopano sihulu uswanela kutusa baituti kubala ka kunepahala, ka kutwisiso, ka kusafosa-fosa, kukoñomeka mihupulo yetaluswa, kucinca-cinca linzwi, kukutumana fokuswanela, ni kubala inge yaambola feela. Bakeñisa kuli mañolo amañwi abanga amatelele kufita amañwi, muokameli wa Mukopano wa Bupilo ni Bukombwa uswanela kuziba batu baswanela kufa lingambolo ka kuya ka buikoneli bwabona.

6. Mizuzu ye 15. Kalulo ye ya mukopano ilukiselizwe kutusa bahasanyi kaufela kuitukiseza mobakayo kutaleza mwa bukombwa ni kuekeza kwa buikoneli bwabona bwa kukalisa lipuisano, bwa kukutaza ni kuluta. Haiba kwatokwahala, baana-bahulu bakona kufiwanga lingambolo za baituti. Muituti ni muituti uswanela kubelekela fa tuto yasebeleza ku yona yefumaneha mwa broshuwa ya Kuluta kamba ya Mulate Batu yebonisizwe mwa kakwenda kakainzi kwa mafelelezo a ngambolo yabona mwa Buka ya Mukopano wa Bupilo ni Bukombwa. Ka linako zeñwi, fa tomahanyo kukabanga ni ngambolo yebonisizwe sina puisano. Ngambolo yecwalo ikafiwa ki muuna-muhulu kamba sikombwa sa puteho yali muluti yomunde.—Mubone paragilafu 15 kuli muzibe mwakuzamaiseza lipuisano zecwalo.

7. Kukalisa Puisano: Ngambolo ya muituti ye, yakona kufiwa ki muituti wa muuna kamba wa musali. Mutusi wa muituti wa muuna uswanela kuba muuna kamba wa mwa lubasi lwahabo yena, mi mutusi wa muituti wa musali uswanela kuba musali kamba wa mwa lubasi lwahabo yena. Muituti ni mutusi wahae bakona kuina kamba kuyema.—Kuli muzibe zeñata ka za mwakufela lingambolo ni mukutalezo omukona kuitusisa mwa ngambolo yamina, mubone paragilafu 12 ni 13.

8. Kukutela Kuambola ni Batu: Ngambolo ya muituti ye, yakona kufiwa ki muituti wa muuna kamba wa musali. Mutusi wa muituti wa muuna uswanela kuba muuna mi mutusi wa muituti wa musali uswanela kuba musali. (km 5/97 p. 2) Muituti ni mutusi wahae bakona kuina kamba kuyema. Muituti uswanela kubonisa mwakubulelela hakutela ku mutu yanaaikambotile ni yena fa musipili ofelile.—Kuli muzibe zeñata ka za mwakufela lingambolo ni mukutalezo omukona kuitusisa mwa ngambolo yamina, mubone paragilafu 12 ni 13.

9. Kuluta Batu Kuba Balutiwa: Ngambolo ya muituti ye, yakona kufiwa ki muituti wa muuna kamba wa musali. Mutusi wa muituti wa muuna uswanela kuba muuna mi mutusi wa muituti wa musali uswanela kuba musali. (km 5/97 p. 2) Muituti ni mutusi wahae bakona kuina kamba kuyema. Ngambolo ye iswanela kubonisa tuto ya Bibele yekalile kale kuzamaiswa. Hakutokwahali kubonisa makalelo kamba mafelelezo ayona konji haiba ki yona tuto yasebeleza ku yona muituti. Hakutokwahali kuli litaba kaufela za tuto libaliwe ka kutumusa, nihaike kuli kwakona kueziwa cwalo.

10. Kutalusa Zemulumela: Ngambolo ya muituti ye iswanela kufiwa ki muituti wa muuna haiba kubonisizwe kuli ki ngambolo. Haiba kubonisizwe kuli ki poniso, yakona kufiwa ki muituti wa muuna kamba wa musali. Mutusi wa muituti wa muuna uswanela kuba muuna kamba wa mwa lubasi lwahabo yena, mi mutusi wa muituti wa musali uswanela kuba musali kamba wa mwa lubasi lwahabo yena. Muituti uswanela kualaba puzo ya toho ya taba ya ngambolo ka kunepahala ni ka bukwala ka kuitusisa litaba zefumaneha mwa hatiso yebonisizwe. Muituti wakona kuamanga kamba kusa amanga kwa litaba ze mwa hatiso yebonisizwe ka nako yafa ngambolo yahae.

11. Ngambolo: Ngambolo ya muituti ye, iswanela kufiwa ki muituti wa muuna mi iswanela kufiwa sina ngambolo yefiwa kwa puteho. Haiba ngambolo ye itomile fa sisupo sesifumaneha mwa litaba zeekelizwe A mwa broshuwa ya Mulate Batu, muituti uswanela kubonisa molikona kuitusisezwa litimana zeo mwa bukombwa. Ka mutala, wakona kutalusa foikona kuitusisezwa timana yeo, zeitalusa, ni molukona kuitusiseza yona haluambola ni mutu mwa bukombwa. Haiba ngambolo ye itomile fa sisupo sesifumaneha mwa tuto yeñwi ya mwa broshuwa ya Mulate Batu, muituti uswanela kukoñomeka mosikona kuitusisezwa sisupo seo mwa bukombwa. Wakona kukoñomeka mutala obonisizwe mwa sisupo 1 sa tuto yeo kamba kukoñomeka litimana zeñwi zebonisizwe mwa tuto yeo, haiba kueza cwalo kwakona kutusa.

12. Mwakufela Lingambolo: Litaba ze mwa paragilafu ye ni yetatama liama kwa ngambolo ya “Kukalisa Puisano” ni ya “Kukutela Kuambola ni Batu”. Sikonkwani sa muituti ki kuambola ka za taba ya niti ya mwa Bibele yekona kutusa mutu yaambola ni yena ni kuambola ka nzila yekatahisa kuli puisano ito zwelapili musipili otatama, konji haiba kubonisizwe. Muituti uswanela kuketa taba yakanyakisisa kulikana ni miinelo ye mwa sibaka sapila ku sona. Wakona kuketa kufa kamba kusafa hatiso kamba kubuhisa vidio ya mwa Lihatiso Zeluitusisanga Kwa Kuluta Batu. Mwa sibaka sa kubulela litaba zebapetile mwa toho kamba kubala litaba zebañozi fa pampili, baituti baswanela kuitwaeza linzila za mwakuambolisanela hande ni batu, zecwale ka kubonisa kuli baisa pilu batu ni kubulela sina mobaambolelanga.

13. Mikutalezo: Muituti uswanela kuitusisa mukutalezo obonisizwe kulikana ni miinelo ye mwa sibaka sapila ku sona. Ka mutala:

1.  (1) Fa Ndu ni Ndu: Mukutalezo wo ukopanyeleza kukutaza fa ndu ni ndu—ibe kuli muile fa ndu ya mutu, kuambola ni yena fa luwaile, kamba ka kumuñolela liñolo—ni kukutela kuyo ambola ni mutu yene muambozi ni yena hane mukutaza fa ndu ni ndu.

2.  (2) Kukutaza ka Kutandaalelwa: Mukutalezo wo utalusa kuunga muhato wa kukutaza ku mutu yene luikambota ni yena litaba lisili. Kukona kukopanyeleza kuikambota fa taba yeñwi ya mwa Bibele ni batu bomubeleka ni bona, bomukena ni bona sikolo, bomupila ni bona, bomukopana ni bona hamuli mwa mbasi, kamba kwa sibaka sifi kamba sifi komukona kukopana ni batu hamunze mueza misebezi yamina ya ka zazi ni zazi.

3.  (3) Kukutaza fa Nyangela: Mukutalezo wo ukona kukopanyeleza kukutaza ka kuitusisa tukalani, kuikambota ni batu kwa libaka za lipisinisi, kukutaza mwa makululu, kamba mwa libaka za kuitabiseza ku zona, mwa libaka mokuyemiswanga limota, kamba mwa libaka zeñwi mobafumaneha batu.

14. Kuitusisa Mavidio ni Lihatiso: Ka kuya ka miinelo, muituti wakona kuitusisa vidio kamba hatiso yeñwi. Haiba ngambolo ya muituti inani vidio kamba haiba muituti aketa kuitusisa vidio yeñwi, uswanela kueza inge yabuhisa vidio yeo kono haswaneli kuibuhisa.

15. Hamulaho wa pina ya kukwalula, mwa mizuzu ye 15 ya kalulo ye, kukabanga ni ngambolo iliñwi kamba zepeli zelukiselizwe kutusa baputehi kupila ka kulumelelana ni zebaituta mwa Linzwi la Mulimu. Lingambolo ze zakona kufiwa ki baana-bahulu kamba likombwa za puteho babali baluti babande, konji haiba kuli kufilwe litaelo zeñwi kamba haiba kunani ngambolo ya butokwi bwa puteho, yeswanela kufiwa feela ki muuna-muhulu. Haiba ngambolo yeo ibonisizwe kuli ki puisano mubuleli wakona kubuza lipuzo zeñwi kwandaa kubuza feela lipuzo zefilwe. Haswaneli kubulela litaba zeñata kwa makalelo a ngambolo yahae ilikuli abe ni nako ya kukwahela lisupo zetuna ni kuli afe baputehi nako yeñata ya kualaba. Haiba kunani puisano ya zebonwi, muzwale kamba kaizeli yabuziwa lipuzo ulukela kuya fa libulelelo mwa sibaka sa kuina mwa sipula sahae, haiba kwakonahala.

16. Tuto ya Bibele ya Puteho: Mizuzu ye 30. Ngambolo ye iswanela kufiwa ku muuna-muhulu yali muluti yomunde. (Mwa liputeho mokunani baana-bahulu babanyinyani, likombwa za puteho babakwanisize zetokwahala bakona kuitusiswa haiba kwatokwahala.) Sitopa sa baana-bahulu siswanela kunyakisisa kuli ki bafi babafitile ku zekonisa za kuzamaisa Tuto ya Bibele ya Puteho. Mizwale babalumelelizwe kuzamaisa tuto ye baswanela kuba babakona kuizamaisa ka nzila yeutwahala ilikuli tuto isike yafitelela nako, bakoñomeke mañolo aswanela, ni kutusa baputehi kaufela kuziba mobakona kusebeliseza litaba zeitutilwe mwa bupilo bwabona. Mizwale babalumelelizwe kuzamaisa tuto ye bakatuseha haiba banyakisisa likuka zehatisizwe zeama mwakuzamaiseza lingambolo za lipuzo ni likalabo. (w23.04 p. 24, mbokisi) Haiba tuto yeitutiwa sunda yeo inyakisisizwe ka kutala, hakutokwahali kulibelela kuli nako ikwanelele. Haiba kwakonahala, sunda ni sunda kuswanela kuitusiswa mizwale babashutana-shutana kwa kuzamaisa Tuto ya Bibele ya Puteho ni kwa kubala maparagilafu. Haiba muina-situlo wa Mukopano wa Bupilo ni Bukombwa akupa kuli tuto ikusufazwe, muzamaisi uswanela kunyakisisa mwaka ikusufaleza. Mwendi wakona kulukisa kuli maparagilafu amañwi asike abaliwa.

17. Mizuzu yemilaalu. Muina-situlo wa Mukopano wa Bupilo ni Bukombwa ukalundululanga lisupo zetuna zeitutilwe mwa mukopano. Hape uswanela kutalusa ka bukuswani zekaitutiwa sunda yetatama. Haiba kusanani nako, wakona kubulela mabizo a baituti babaka ba ni lingambolo sunda yetatama. Muina-situlo uswanela kufa lizibiso kaufela zetokwa kufiwa kamba kubala mañolo kaufela atokwa kubalelwa puteho ka nako yabulela manzwi a mafelelezo, konji haiba kubonisizwe kuli hakuna lizibiso kamba mañolo atokwa kubaliwa. Litaba za kamita, zecwale ka litaba zeama sebelezo ya mwa simu ni litukiso za kukenisa Ndu ya Mubuso, haliswaneli kuzibiswa fa libulelelo kono liswanela kubeiwa fokupahekiwanga litaba. Haiba hakukonahali kufa lizibiso kamba kubala mañolo mwa nako yetomilwe ya manzwi a mafelelezo, muina-situlo wakona kukupa mizwale babanani lingambolo mwa kalulo ya mukopano ya Kupila Sina Bakreste kuli bakusufaze kwa lingambolo zabona. (Mubone paragilafu 16 ni 19.) Mukopano wo ukafela ka pina ni tapelo.

18. Hamulaho wa ngambolo ni ngambolo ya muituti, muina-situlo wa Mukopano wa Bupilo ni Bukombwa ukababazanga ni kufa kelezo yetomile fa tuto yasebeleza ku yona muituti ibato ba ka muzuzu ulimuñwi. Muina-situlo habiza muituti kuli ato fa ngambolo, haswaneli kubulela tuto yasebeleza ku yona muituti yo. Nihakulicwalo, muituti hasaafelize kufa ngambolo yahae ni hamulaho wa kumubabaza, muina-situlo wakona kubulela sisupo sesifa tuto yanaasebeleza ku yona muituti ni kutalusa libaka muituti haezize hande fa sisupo seo kamba kutalusa ka lilato libaka muituti hatokwa kuzwelapili kubelekela fa sisupo sa tuto yeo ni mwakona kuezeza cwalo. Hape muina-situlo wakona kutalusa litaba zeñwi zalemuhile mwa ngambolo zekona kutusa muituti kamba baputehi. Hamulaho wa mukopano kamba ka nako yeñwi isili, muina-situlo wakona kufa muituti ni muituti kelezo yeñwi ya kwa mukunda ka kuitusisa litaba zezwa mwa broshuwa ya Mulate Batu, ya Kuluta kamba mwa buka ya Sikolo sa Bukombwa, yeama sisupo sa kelezo sanaasebeleza ku sona muituti kamba sisupo sesiñwi.—Mubone paragilafu 19, 24, ni 25 kuli mufumane litaba zeñata ka za litaelo zeama misebezi yapeta muina-situlo wa Mukopano wa Bupilo ni Bukombwa ni musebezi wa muelezi wa mutusi.

19. Hakuna ngambolo yeswanela kufitelela nako yetomilwe, mi nihaiba ona manzwi a muina-situlo wa Mukopano wa Bupilo ni Bukombwa, haaswaneli kufitelela nako yetomilwe. Nihaike kuli mwa Buka ya Mukopano wa Bupilo ni Bukombwa kubonisizwe nako yeswanela kufiwa ngambolo ni ngambolo, haiba yafa ngambolo ukwahezi lisupo zetokwahala kaufela mwa nako yekuswani yesafiti fa nako yetomilwe, haatokwi kuekeza litaba zeñwi ka mulelo wa kukwaniseleza nako. Haiba babafa lingambolo baca nako, baswanela kufiwa kelezo ya kwa mukunda ki muina-situlo wa Mukopano wa Bupilo ni Bukombwa kamba muelezi wa mutusi. (Mubone paragilafu 24 ni 25.) Mukopano kaufela, kukopanyeleza cwalo ni lipina ni litapelo, uswanela kutanda hora iliñwi ni mizuzu ye 45.

20. Muokameli wa mupotoloho hapotela puteho yamina, mukopano ukazamaiswa sina mokuboniselizwe mwa Buka ya Mukopano wa Bupilo ni Bukombwa, mi licinceho feela zekaba teñi ki ze: Tuto ya Bibele ya Puteho ye mwa kalulo ya Kupila Sina Bakreste ikayoliwa ki ngambolo ya sebelezo ya mizuzu ye 30 yekafiwa ki muokameli wa mupotoloho. Pili ngambolo ya sebelezo isika fiwa kale, muina-situlo wa Mukopano wa Bupilo ni Bukombwa ukalundulula lisupo zeitutilwe mwa mukopano, ukatalusa ka bukuswani za sunda yetatama, kufa lizibiso zetokwahala, ni kubala mañolo atokwahala, mi cwale kihona akabiza muokameli wa mupotoloho. Hamulaho wa ngambolo ya sebelezo, muokameli wa mupotoloho ukakwala mukopano ka pina yaketile. Wakona kukupa muzwale yomuñwi kukwala ka tapelo. Hakuna makilasi amañwi a puo yeitusiswa ki puteho aswanela kubateñi ka nako ya kupota kwa muokameli wa mupotoloho. Sikwata sakona kuba ni mikopano yasona nihaiba ka nako yeo muokameli wa mupotoloho apotela puteho yeokamela sikwata seo. Nihakulicwalo, sikwata siswanela kuswalisana ni puteho hape kuli bateeleze kwa ngambolo ya sebelezo ya muokameli wa mupotoloho.

21. Mwa sunda ya mukopano wa mupotoloho kamba ya mukopano omutuna, hakubangi ni mikopano ya puteho. Baputehi baswanela kuhupuliswa kuli litaba ze fa tomahanyo ya mikopano ya sunda yeo liswanela kunyakisiswa ka nako ya tuto ya ka butu kamba ka nako ya kulapela sina lubasi.

22. Haiba Kupuzo ikaba mwahalaa sunda, Mukopano wa Bupilo ni Bukombwa hauna kubateñi.

23. Muuna-muhulu yaketilwe ki sitopa sa baana-bahulu ukaba muokameli wa Mukopano wa Bupilo ni Bukombwa. Muuna-muhulu yo ukabonanga teñi kuli mukopano wo wazamaiswa hande ka kuya ka litaelo zemwa fomu ye. Uswanela kusebelisana hande ni muelezi wa mutusi. Buka ya Mukopano wa Bupilo ni Bukombwa isazwa feela, muokameli wa Mukopano wa Bupilo ni Bukombwa ukaabela likalulo kaufela zekafiwa mwa likweli zepeli zeo. Likalulo zeo likopanyeleza lingambolo za baituti, lingambolo zesi za baituti, ni mizwale babakaba bo muina-situlo ili babaketilwe ki sitopa sa baana-bahulu. (Mubone maparagilafu 3 kuisa 16 ni paragilafu 24.) Halukisa tomahanyo ya lingambolo za baituti uswanela kubeya mwa munahano lilimo za muituti, yeloseli yanani yona, ni kubona haiba wakona kubulela ka kulukuluha fa taba yenyakisiswa. Uswanela kueza nto yeswana haabela lingambolo zesi za baituti za mwa mukopano. Lingambolo kaufela liswanela kufiwa lisunda zetaalu pili lizazi leifiwa ngambolo lisika fita kale. Fomu ya Ngambolo ya Mwa Mukopano wa Bupilo Bwaluna Bwa Sikreste ni Bukombwa (S-89) iswanela kuitusiswa kwa kufa lingambolo za baituti. Muokameli wa Mukopano wa Bupilo ni Bukombwa uswanela kubona teñi kuli tomahanyo ya lingambolo za mukopano kaufela yabeiwa fokupahekiwanga litaba. Sitopa sa baana-bahulu sakona kuketa muuna-muhulu yomuñwi kamba sikombwa sa puteho kuli amutusange. Nihakulicwalo, ki baana-bahulu feela babaswanela kuabela likalulo zesi za baituti.

24. Sunda ni sunda, kukabanga ni muuna-muhulu alimuñwi yakabanga muina-situlo wa Mukopano wa Bupilo ni Bukombwa. (Mwa liputeho mokunani baana-bahulu babanyinyani, likombwa za puteho babakwanisize zetokwahala bakona kuitusiswa haiba kwatokwahala.) Ki yena yakaitukiseza manzwi a kubulela kwa makalelo ni kwa mafelelezo a mukopano. Hape ukabizanga babafa lingambolo kaufela, mi haiba puteho inani baana-bahulu babanyinyani, wakona kufa lingambolo zeñwi hape mwa mukopano wo, sihulu lingambolo zesina puisano zetokwa feela kubuhisa vidio. Litaba zabulela hamulaho wa ngambolo ni ngambolo liswanela kuba zekuswani hahulu. Sitopa sa baana-bahulu sikaketanga baana-bahulu babali baluti babande kuli bapete musebezi wo. Baana-bahulu babali baluti babande bakafiwanga hahulu buikalabelo bwa kuba muina-situlo wa mukopano. Haiba kuli palo ya baana-bahulu mwa puteho ki yenyinyani, muokameli wa Mukopano wa Bupilo ni Bukombwa wakona kuitusiswa hahulu sina muina-situlo wa mukopano kufita baana-bahulu babañwi babali baluti babande. Haiba muuna-muhulu ki muluti yomunde mi wakwanisa kuzamaisa Tuto ya Bibele ya Puteho, uzibe waswanela kuketiwa kuba muina-situlo wa mukopano wo. Kono muhupule kuli muuna-muhulu yaketilwe kuba muina-situlo ukatokwanga kubabaza mizwale ni likaizeli babanani lingambolo za baituti ni kubafa kelezo yelilato haiba kwatokwahala. Hape muina-situlo ukabonanga teñi kuli mukopano ufela ka nako yetomilwe. (Mubone paragilafu 17 ni 19.) Haiba muina-situlo watabela mi kunani sibaka sesituna fa libulelelo, wakona kutomelwa maikulofoni yeñwi kwatuko yakona kuitusisa hanze abiza muzwale yato fa ngambolo yetatama. Hape, muina-situlo wakona kuina kwa tafule ka nako ya ngambolo ya muituti ya Kubala Bibele ni mwa kalulo ya mukopano yeli, Muikataze Kupeta Hande Bukombwa. Kueza cwalo kwakona kumutusa kubuluka nako.

25. Haiba kwakonahala, ki hande kuitusisa muuna-muhulu yanani yeloseli ili yali mubuleli yomunde kuli abe muelezi wa mutusi. Buikalabelo bwa muelezi wa mutusi ki kufa kelezo ya kwa mukunda haiba yatokwahala, kwa baana-bahulu kamba likombwa za puteho fa ngambolo ifi kamba ifi yebafile, kukopanyeleza cwalo ni lingambolo za mwa Mukopano wa Bupilo ni Bukombwa, lingambolo za nyangela, ni bababala maparagilafu ni babazamaisa Tuto ya Tawala ya Mulibeleli kamba Tuto ya Bibele ya Puteho. (Mubone paragilafu 19.) Haiba kunani baana-bahulu babañata mwa puteho babali baluti ni babuleli babande, silimo ni silimo baana-bahulu bakona kuketanga muuna-muhulu usili yali muluti kamba mubuleli yomunde kuli abe muelezi wa mutusi. Muelezi wa mutusi hatokwi kufa kelezo hamulaho wa ngambolo ni ngambolo yefiwa.

26. Haiba baituti ki babañata, liputeho zakona kuba ni makilasi amañwi a baituti. Kilasi ni kilasi iswanela kuba ni muelezi wayona, mi haiba kwakonahala, muelezi yo uswanela kuba muuna-muhulu. Haiba kwatokwahala, sikombwa sa puteho yaswanela wakona kuitusiswa. Sitopa sa baana-bahulu siswanela kuatula kuli ki mañi yaswanela kuba muelezi, ni kuli buikalabelo bo buswanela kushimbululelwanga kwa mizwale babashutana-shutana kamba kutokwa. Muelezi yo uswanela kulatelela muezezo otalusizwe mwa paragilafu 18. Haiba puteho inani kilasi yeñwi ya baituti, baituti baswanela kukupiwa kuya kwa kilasi yeo hamulaho wa kalulo ya Kubatisisa Litaba za Butokwa za Kwa Moya, ili ye mwa kalulo ya mukopano wo yeli, Litaba za Butokwa Zezwa Mwa Linzwi la Mulimu. Baituti bao baswanela kukutela mwa Ndu ya Mubuso hamulaho wa kalulo ya mukopano wo yeli, Muikataze Kupeta Hande Bukombwa.

27. Kunani mavidio amañwi akabuhiwanga mwa mukopano wo. Mavido ao a mwa mukopano wa mwahalaa sunda akafumanehanga fa app ya JW Library® mi akona kuungiwa ka kuitusisa lipangaliko zeshutana-shutana.

© 2023 Watch Tower Bible and Tract Society of Pennsylvania

S-38-SK 11/23