Ro chegø kja na jñiñi ke bʼꞹbʼꞹ a Sajonia, mi chju̱u̱ República Democrática Alemana (RDA). Kja in nzungø dya mi chu̱ji, yo in jyotegø o jitsʼkøji ja rgua minkø na joo. Nu RDA mi comunista, na punkjꞹ ntee a Sajonia dya mi nuu na mugui nu religión. Nutsʼkʼø dya mi creogø e Yose. Por dyechʼa jñincho kjɇɇ mi creogø kja ateísmo ñe comunismo.

¿Pjenga mi creogø nu comunismo? Mi gustaozꞹ nu meñe ke chjetrjui trʼexe yo ntee. Mi creogø ke para ke dya ro bʼꞹbʼꞹ yo dya jꞹ̱ji mechʼi, pɇski ra pɇ̱raji na joo ne mechʼi chjetrjui nga jñꞹji. Ro kichʼi dʼa organización ja bʼꞹbʼꞹ yo trʼatrʼi comunista. Ma mi enkʼø 14 kjɇɇ, ro pɇpjigø ja mi jmutꞹji yo xiskuama. Yo gobierno municipal a Aue o mⱥji ngekʼo o dyakøji na premio. Zø kja mi trʼigø o pa̱rgø janzi político kja nu país. Mi mbeñegø ke kʼo rmi kjagø ma joo i ke ra pɇsʼigø na punkjꞹ.

Pero dya kjogꞹ kʼo rmi mbeñegø. Kja nu kjɇɇ 1989 o chungꞹji nu ko̱nxtrjo a Berlín xo ñeje nu bloque cominista a Europa del Este.Me mi nzhoxꞹgø por yo nrrumꞹ yo kjogꞹ. Ro unkø nguenrra yo na sʼoo yo mi kjaji. Mi bʼꞹbʼꞹ kjo dya mi neji yo ntee kʼo dya mi ngeje comunista. Pero, ¿Pjenga kjogꞹyo? ¿Kjo dya jizhi nu comunismo ke nrre chjetrjui? ¿Kjo dya ma kjuanakʼo? Dya mi pa̱rgø pje ro mbeñegø.

Ro jɇzi kʼo mi kjagø, ro pjꞹrꞹ ro pjechi ro pjebʼizhi ñe ro ⱥtrʼⱥ yo pintura. Ro magø kja colegio de pjebʼizhi mi mbeñegø ro magø kja universidad; me mi negø ro pjebʼizhi i ro ⱥtrʼⱥ arte. Ro jyombeñegø kʼo o jitsi mi jyotrʼe ma mi tsʼikʼegø. Ngextrjo mi negø yo mbaxkua i ro sigø nʼaño xuntrʼi.Pero dya mi mⱥgø zø mi kjagø texeyo, nge yo mi ñetse ma mi ⱥtrʼⱥgø yo dibujo. ¿Pje ra kjogꞹ a ma axojñi? ¿Pjenga ri bʼꞹnkʼøjiba?

Me to ñangatrjogø ma ro meyagøyo. Dʼa nu paa, kja colegio ro minkʼø ko in dyojui ke mi ñaji yo ro kjogꞹ a ma axojñi. Xo mi bʼꞹbʼꞹnu e Mandy * kʼꞹ mi testigo e Jehová. Angeze go xitsʼkʼø: “Andreas, ma xa gi nee ri chøtrʼꞹ yo nrrꞹrꞹ yo trʼonꞹ, zopjꞹ yo mama ne Biblia”.

Mi negø ra pa̱ra̱ pje mbe o na bʼꞹbʼꞹ kja Biblia. E Mandy o jitsi kʼo mama kja Daniel nu capítulo 2, ma ro zopjꞹ, me ro kentrjogø. Nu profecía mama de yo na sʼoo kʼo kjaji yo nandyo gobierno más na nojo ke ro mandaji kja nu xoñijomꞹ hasta nu padyayo. E Mandy o jitsi nrro dyaja profecía de yo ra kjogꞹ. Ro trʼøtrkʼø kʼo mi nee ro pa̱rgø. Pero ¿kjo nge kʼꞹ bo dyꞹsʼꞹ ne profecía? ¿Kjo nge kʼꞹ o søø ro mama na joo pje nge kʼo ro kjogꞹ? ¿Bʼꞹbʼꞹtrjo dʼa Yose?

E Mandy o siji e Horts ñe e Angelika, angezebi Testigogui. Angezegui o pjøxkꞹgui ro meya nu Biblia. Ro unkʼø nguenrra ke yo testigo e Jehová usaoji ñe nⱥdʼⱥji o trju̱u̱ e Yose (Salmo 83:18; Mateo 6:9). Ro pjechkʼø ke e Jehová nee ke ra minkʼøji texe yo paa kja nu xoñijomꞹ nu mi na joo ga jmii. Kja Salmo 37:9 mama: “Ngextrjo yo tebʼe e Jehová ra mimiji kja ne xoñijomꞹ”. Me po gustaozgø ke texe yo ntee yo mimi ja ga nee e Yose søø ra mimiji ja ga mama nu texto.

Dya ro jɇzi dabadiji yo mama nu Biblia ke na sʼoo. Me mi nzhesegø nangeje ro to̱njo̱ na punkjꞹ ma mi pjebʼizhi ñe ma ro ⱥtrʼⱥ yo dibujo, pɇski pje rgo pjechi ro potꞹ ja go mbeñegø. Mi na sʼɇzhi ro jɇzi yo na sʼoo ko mi kjagø. Me ri unꞹgø pøjø e Jehová kʼꞹ me sʼiya xo pa̱ra̱ ra tebʼe ñe xo pa̱ra̱ ja ga søø yo ntee yo kjaa kʼo nee angeze.

Ro kjagø yo mama nu comunismo ñe nu ateísmo por dyechʼa jñincho kjɇɇ pero nu Biblia o potꞹ ja ma minkʼø. Kʼo ro pjechi me bo mbøxkʼø ngekʼua ro søgø na joo ñe dya ro mbeñegø na punkjꞹ yo ba e̱je̱. Kja ne kjɇɇ 1993 ro jigø i ro kjagø testigo e Jehová, Kja nu kjɇɇ 2000 ro chjꞹntꞹgø ko e Tabitha, ke nge Testigo. Nutsʼkʼøbʼe me ri jichkʼøbʼe yo ntee kʼo mama o Jñaa e Yose. Bʼꞹbʼꞹ na punkjꞹ ntee ke creoji kja comunismo ñe ateísmo mi nzakjazgø. Me ti mⱥkjø ra pjøsʼꞹgø yo ntee ngekʼua ra mba̱ra̱ji kʼo nee e Jehová.

Ma ro chɇzhigø ko yo Testigo, me bo pizhi yo in jyotegø. Pero angezebi janrragui ja ga mbøxkꞹgø yo ya ro pjechi. Nudya angezegui zopjꞹbi nu Biblia xo jmurꞹgui ko yo testigo e Jehová.

E Tabitha ñezgø ri kjabʼe lucha ngekʼua ra kjabʼe yo mama nu Biblia a yo ya chjꞹtʼꞹ, ngekʼua me ri mⱥkjøbʼe. Nzakja yo mama ke dya ra potka øjnꞹ yo ya chjꞹtʼꞹ (Hebreos 13:4).

Dya kja ri mbeñegø yo na kjogꞹ ni yo ra kjogꞹ a ma axojñiji. Nudya ri pɇsʼigø na bʼedyi kja trenxe ne xoñijomꞹ ke ka̱ra̱ji na joo ñe dya chu̱ji. Texeji nrre ri chjentrjui, nge kʼo rmi negø ñe mi jodʼꞹgøkʼo.