Navyalilwe uku Santo Domingo, mu Dominican Republic, nupya neene indi kasuli pa yana 4 yano avyazi itu yakwata. Avyazi yane yali asambilile sana nupya yalondesyanga ukutukuzya ningo nu kuti twazanwa na antu aaya ni miyele isuma. Lino naviilwe ala ipapita imyaka 4 kufuma pano avyazi yane yakomenkanyizizye ya misyonali aa mu ceici cakuti Memoni. Pa mulandu wakuti avyazi yane yatemilwe vino alumendo yaya yazwite ningo alino ni miyele yao isuma, patalengile yapingwilepo ukuti ulupwa lwitu luye aali lupwa lwa kutandikilapo kuno twikalanga ukuya mu ceici ca ina Klistu azumila mu yatakatifu (Church of Jesus Christ of Latter-day Saints) nanti mu ceici cakuti Memoni.

Lino nakulanga naipakizyanga ivyacitikanga umu ceici ciici nupya nacindike vino aa mu ceici isile amano ku ndupwa alino na masunde aalimo. Natemilwe sana pa kuya umu ceici ciici nupya nalondesyanga ukuya misyonali.

Lino nali ni myaka 18 ulupwa lwitu lwakukiile ku United States pakuti nkaye ku yunivesiti isuma. Lino papisile umwaka onga, yamayo yanono aato yamayo na ya wao, aali ya Nte Yakwe Yeova izile mu kututandalila uku Florida. Nupya yatunenyile ukuti tukazanweko ku ukongano. Natemilwe sana ukulola yonsi aalimo ya kukonkamo lino ya kalanda yakubelenga malembo alino nu kulembako ivyeo. Fwandi nani nalenzile peni ni pepala nu kutandika ukulemba ivyeo.

Pa cisila ca ukongano yanenyile ukuti vino nalondesyanga ukuya misyonali yangangazwilizya ukusambililako vimwi pali Baibo. Nelenginye inti yali insita isuma iya pano pa nsita iya ala namanya ivingi api buku lino yakaomvya umu ceici cakuti Memoni ukucila vino namanyile pali Baibo.

Lino twalanzyanyanga pali Baibo pa foni na yamayo yanono na ya wao, lyonsi yankomelezyanga ukuti nalinganya vino nazumiilemo na vino Baibo ikalanda. Yalondanga njisininkizizye nemwineco ukuti cii aali cumi.

Kwali ivintu ivingi vino twasambililanga umu ceici cakwe ya Memoni vino nazumiilemo, lelo ntamanyile ningo vino ivintu vivyo vikauvwana na vino Malembo yakalanda. Yamayo yaayo, yantumiileko Zyukini! yakwe Novemba 8, 1995, iyapanzilwe na ya Nte Yakwe Yeova, nupya muli magazini iyo mwali ivipande vimwi ivyalandanga pali vino ya Memoni yazumilamo. Icanzungwisye icakuti nizile iniluka ukuti fwandi ntamanyile ningo vino yasambilizyanga uku Memoni. Na cii calenzile ukuti ntandike ukulondelezya pa webusaiti yakwe ya Memoni pakuti indole ndi cakuti vino Zyukini! iya yalandanga vyali ivya cumi. Nazanyile ukuti vyali ivya cumi, nupya nasininkizye sana vivyo lino naile umu kutandala kuno yasungila ivintu vya mpiti vya ceici kwene cico cino yakaama ukuti Memoni.

Mpiti nazumile ukuti ivyaya mwi buku lyakwe ya Memoni ni vyaya muli Baibo vikauvwana. Nomba lino nizile ntandika ukubelenga sana Baibo nazanyile ukuti vino ya Memoni yakasambilizya ni vyaya muli Baibo visiuvwana.

Nupya ukulunda pali vii navulunganyiziwe sana pali vino ya Memoni yasambilizyanga pa mpanga. Wakwe yasambilizyanga ukuti icalo ca Edeni cayelile uku Missouri, umu mpanga ya Jackson, ku United States (U.S.A). Nupya intunguluzi zya mu ceici cakwe ya Memoni zyalandanga ukuti uwanda umwi “Leza alatandika ukuteeka insi kuomvya uteeko wa mu United States.”

Natandike ukwelenganya pali vino ya Memoni yasambilizyanga ukuti i vilacitikila impanga zyuze, wakwe impanga muno navyalilwe. Nuzizyeko uwacance umwi api lyasi lii uwa mu ceici kwene ciici uwasambililanga ivya kuomba u misyonali. Namuzizye ukwaula ukupita umumbali ndi cakuti angalwisyanya na ya Memoni aa ku mpanga yuze ndi cakuti impanga ino akaikalamo ikulwisyanya ni mpanga yao. Nazungwike sana lino walanzile ukuti angalwako! Natandike ukulondelezya sana pa vizumilo vino nataile nupya nuzizyeko ni ntunguluzi zimwi izya mu ceici cakwe ya Memoni. Yanenyile ukuti mu masuko ku mauzyo yane mwali ivintu vimwi ivikome ivyali nu kumanyikwa sile pa nsita yuze nga vyasokololwa.

Pa mulandu wakuti ntuvwile ningo pali vino yalondolwile, nelenginye sana pali nemwineco na pa mulandu uno nalondelanga ukuya misyonali umu ceici cakwe ya Memoni. Lyene nizile iniluka ukuti umulandu onga uno nalondelanga ukuya misyonali, u wakuti nalondanga ukwazwa antu. Lyene umulandu uze u wakuti, nalondanga ukucindikwa uku yantu. Nomba ntamanyile ivingi pali Leza. Nanti icakuti mpiti nabelenzilepo Baibo pa miku iingi, ntacindike vino ikalanda. Ntamanyile umulandu uno Leza wapangiile insi nanti antunze.

Kusambilila Baibo na ya Nte Yakwe Yeova, kwangazwilizya ukumanya izina lyakwe Leza, ivikacitika umuntu nga wafwa, alino na vino Yesu wacita pa kufikilizya ukulonda kwakwe Leza. Lyene lino papisile insita, nizile imanya ivyaya muli Baibo nupya naipakizyanga ukunenako yauze pa cumi cino nasambililanga. Lyonsi namanyile sile ukuti Leza akuno waya, nomba ndakai lyene ningalanda nawe umwi pepo nupya a cuzane umusuma sana. Nabatiziwe nu kuya Inte Yakwe Yeova pa 12 Julai, 2004, nupya lino papisile imyezi 6 natandike kuomba sana umu mulimo wa ina Klistu.

Naombela pa maofesi yakalamba yakwe ya Nte Yakwe Yeova uku Brooklyn, mu New York pa myaka 5. Naipakizyanga sana ukwavwilizya uku kupanga Mabaibo ni mpapulo izikalanda pali Baibo, ivikaazwa antu aingi sana umu nsi. Nupya natwalilila ukwazwa yauze ukusambilila pali Leza.