Manda na ya tɛnɛ tɛ Nzapa
Ye mɛ na lingɔ tɛrɛ lo na lá ti fangɔ ngbanga nɛ?
So ya tɛnɛ mɛ, mɔ na hũngɔ ahũnda mɛ mbanga ngoi mɛndɛ̃ mɔ ndo hũnda na tɛrɛ mɔ mɛ afa nga ndo mɛ mɔ lengbi ti luangɔ na gbinya ni kaya Ngbangɔ tɛ mɔ. Atɛmwɛ tɛ Yehova na zangɔ mɔ ya mɔ lua gbinya ni.
1. Lá ti fangɔ ngbanga du nɛ?
Nga ma se mɛ limɔ mɛ ge ndo kɔti ndo fa na ni, azi gba ndo da bɛ la ya, amiliarɛ tɛ azi na dɔngɔ gbanda longɔ so gbɛlɛ kiti ti Lo-lɛngɔ Gbia tɛ Nzapa ti nɛngɔ ya afa ngbanga tɛ la na bangɔ aye mɛndó ala li, ambanga na luangɔ dungɔ lɛ ngɛ̃́ ka ndozu wa ambɛni na sangɔ la kaya wá ti lifelo. Kanda Ngbangɔ pa ya lá ti fangɔ ngbanga na dungɔ lá ti hãngɔ azi na ya lo mɛ zanga mbilimbili. (Nzembo 96:13) Nzapa pɔna Yezo kpã ya lo fa ngbanga tɛ azi zu na mbilimbili.—Di Yisaya 11:1-5; Awa Pangɔ Kwa 17:31.
2. Ngasia la lá ti fangɔ ngbanga na lingɔ ya mbilimbili diri nɛ?
Na ngoi mɛndó Adama zo ti uzu atɔmbɔgɔ tɛrɛ Nzapa ko, lo ziandó hɛ̃ atara lo zu siɔ kpale, pɛnɔ, nga na kwá. (Roma 5:12) Ti nɛngɔ ya kpale niko ti zangangɔ mbilimbili awɛ ko, ayɔ ya Yezo diri na amiliarɛ tɛ azi mɛ kpili lɛ la ngɛ̃́. Mbɛti ti Suma kambisa ya kpale niko na lingɔ tɛrɛ lo na ya bulu koto kɔi ti Lo-lɛngɔ Gbia tɛ Yezo.—Di Suma 20:4, 11, 12.
Ta na fangɔ ngbanga tɛ azi mɛ na songɔ kwá na landangɔ ye mɛndó ala li uzu ti nɛngɔ ya ala kpili ma, kanda na fangɔ ni na landangɔɔ ye mɛ ala na lingɔ na bangɔ tɛnɛ mɛ kaya “arulo” mɛ mbɛti ti Suma shapitrɛ 20 atɛnɛ tɛnɛ ni. (Roma 6:7) Toma polo tɛnɛndó ya azi mɛ na diringɔ na la lɛ la ngɛ̃́ ti nɛngɔ ya ala manda kpale mɛ ba Nzapa ko, na dungɔ “azɔ̃ azi na asiɔ azi,”.—Di Awa Pangɔ Kwa 24:15.
3. Ye mɛ lá ti fangɔ ngbanga na lingɔ nɛ?
Azi mɛndó kpili zangangɔ ya ala hĩnga Yehova wa ala li nga kwa hɛ̃ lo ko, ala na luangɔ nzɔ̃ tangɔ ligɛrɛ ti gbinyangbingɔ seliye tɛ la wa ala linga aye mɛ nzɔ̃ni. Se ala li ngaso ko, songɔ kwá tɛ la na dungɔ “songɔ kwá ti dungɔ lɛ ngɛ̃́, NWT.” Kanda ambanga azi mɛ na songɔ ko, ta la na yengɔ mandangɔ kpale mɛ ba Yehova ma. Songɔ kwá tɛ la na dungɔ “songɔ kwá ti fangɔ ngbanga bingɔ li la.”—Di Yoanɛ 5:28, 29; Yisaya 26:10; 65:20.
Ngoi mɛ bí ti fangɔ ngbanga mɛ na ningangɔ bulu koto kɔi asi ka ndani ko, Yehova na hɛ̃ngɔ azi mɛ ndo tɔndɔ lo dungɔ lɛ ngɛ̃́ ti lengbingɔ ma se mɛndó ni da na ebandeli. (1 Kɔrinto 15:24-28) Ni du nvɛ̃ni nzɔ̃ dangɔ bɛ na lo tɛ azi zu mɛ ndo tɔndɔ Yehova! Na nda bulu ti koto kɔi Nzapa na zingɔ Satana kaya du ti nɛngɔ ya lo tara azi, ni na dungɔ tara ti ndani. Satana na tarangɔ azi fãni mɛndɛ̃ ya ala zia lége tɛ Yehova, kanda azi mɛ na kɛ̃ngɔ landangɔ lo na luangɔ dungɔ lɛ ngɛ̃ ti bwai na bwai ge lɛ sese.—Di Yisaya 25:8; Suma 20:7-9.
4. Mbanga lá mɛndɛ̃ ti fangɔ ngbanga mɛ na hɛ̃ngɔ azi nzɔ̃ kpale nɛ?
Ngbangɔ ndo ili nga bí mɛ gbanda nda gigi mɛ kɔ na ni ya “lá ti fangɔ ngbanga.” Bí ti fangɔ ngbanga niko na butangɔ azi, nga ma se mɛ ngu mɛndó ni na ngoi tɛ Noa akpɔ asiɔ azi zu. Ye ti dengɔ bɛ du ya, kpɔngɔ“asiɔ azi” mɛ na lingɔ tɛrɛ lo na bí mɛ na gangɔ ni na lɛkɛngɔ ndo mɛ ndasewa ti fãnani tɛ azi mɛ ndo “liye na seni adu ka da.”—Di 2 Petro 3:6, 7, 13.
