Iginsusumat han Biblia an mga panhitabo ngan kahimtang nga magtitigaman han “ikatarapos han [presente nga] sistema han mga butang” o “an katapusan han kalibutan.” (Mateo 24:3; An Baraan nga Kasuratan) Gintatawag han Biblia ini nga peryodo han panahon nga an “kataposan nga mga adlaw” ngan an “panahon han katapusan.” (2 Timoteo 3:1; Daniel 8:19; An Baraan nga Kasuratan) An masunod amo an pipira han makatirigamnan nga panhitabo ha kataposan nga mga adlaw o panahon han katapusan, sumala ha mga tagna:

• Dagku nga girra.​—Mateo 24:7; Pahayag 6:4.

• Gutom.​—Mateo 24:7; Pahayag 6:5, 6.

• Magkusog nga mga linog.​—Lucas 21:11.

• Epidemya.​—Lucas 21:11.

• Pagdamu han krimen.​—Mateo 24:12.

• Pagdaot han mga tawo ha tuna.​—Pahayag 11:18.

• Pagtikaraot han batasan han mga tawo​—damu an “diri mapasalamaton, diri maunungon, . . . diri naruruyag ha bisan ano nga pakigsabot, mga parapakaraot, waray pagpugong ha kalugaringon, mapintas, waray gugma ha kaopayan, mga traydor, matig-a an ulo, mahilig magrakudaku.”​—2 Timoteo 3:1-4.

• Pagkabungkag han pamilya, tungod kay an mga tawo “waray kinaiya nga gugma” ngan an mga anak “diri masinugtanon ha mga kag-anak.”​—2 Timoteo 3:2, 3.

• An gugma ha Dios han kadam-an nga tawo magtutugnaw.​—Mateo 24:12.

• Dayag nga pagkahipokrito ha relihiyon.​—2 Timoteo 3:5.

• Pag-uswag han pagsabot ha mga tagna ha Biblia, upod na an may kalabotan ha kataposan nga mga adlaw.​—Daniel 12:4.

• Pagsangyaw han maopay nga sumat han Ginhadian ha bug-os nga kalibotan.​—Mateo 24:14.

• Kalyap nga kawaray-interes ngan pagtamay pa ngani han ebidensya nga hirani na an kataposan.​—Mateo 24:37-39; 2 Pedro 3:3, 4.

• Durungan nga natutuman ini ngatanan nga tagna, diri la an pipira o an kadam-an hito.​—Mateo 24:33.

Nagkikinabuhi na ba kita ha “kataposan nga mga adlaw”?

Oo. Iginpapakita han mga kahimtang ha kalibotan ngan han kronolohiya han Biblia nga an kataposan nga mga adlaw nagtikang han 1914. Hito nga panahon, nagtikang magmando ha langit an Ginhadian han Dios, ngan usa han siyahan nga ginhimo hito amo an pagpaiwas kan Satanas nga Yawa ngan ha mga demonyo tikang ha langit ngan paglimita han ira mga buruhaton ha tuna. (Pahayag 12:7-12) An impluwensya ni Satanas ha mga tawo makikita ha ira damu nga maraot nga batasan ngan buhat, nga tungod hito an kataposan nga mga adlaw nagigin “peligroso nga mga panahon nga makuri pakiangayan.”​—2 Timoteo 3:1.