Padîşahiya Xwedê hukûmeta Yehowa Xwedê ye. Di Kitêba Pîroz de, Padîşahiya Xwedê yan “Hukimdariya Xwedê” wek “hukimdariya ezmanan” jî tê binavkirin (Marqos 1:14, 15, NWT; Meta 4:17, NWT). Ev hukimdarî her çi qas ji hin aliyan ve dişibe hukûmetên dinyayê jî, ew ji her aliyî ve ji wan baştir e.

•   Hukimdar. Xwedê, Îsa Mesîh wek Hukimdarê vê Hukimdariyê tayîn kiriye. Yehowa ji wî re otorîteyeke wisa daye, ya ku ji otorîteya mirovan qat bi qat bilindtir e (Meta 28:18). Îsa Mesîh qeweta xwe tenê ji bo qenciyê bi kar tîne, û wî êdî îsbat kiriye ku ewê rêberekî pêbawer û dilşewat be (Meta 4:23; Marqos 1:40, 41; 6:31-34; Lûqa 7:11-17). Bi rêberiya Xwedê, Îsa Mesîh hin mirovên ji hemû miletan hilbijartine ku ew li ezmanan bi wî re “li ser dinê serweriyê bajon” (Peyxam 5:9, 10, Mizgînî).

•   Dem. Hukimdariya Xwedê wek hukûmetên dinyayê nîne, yên ku tenê ji bo demekê ne. Ewê “tu caran hilneweşe” (Danîêl 2:44, Mizgînî).

•   Welatî. Însanên ji hemû kok û miletan, ên ku guh didin qanûnên Xwedê, dikarin bibin welatiyên Hukimdariya Xwedê (Karên Şandiyan 10:34, 35).

•   Qanûn. Qanûnên Hukimdariya Xwedê ne tenê kirinên xerab qedexe dikin, lê alî mirovan dikin ku ew xisûsiyetên baş bînin meydanê. Kitêba Pîroz wisa dibêje: “‘Gerek tu ji Xwedayê xwe Yehowa bi temamiya dilê xwe, bi temamiya canê xwe û bi temamiya hişê xwe hez bikî’. Ev emrê pêşîn e û yê herî muhîm e. Emrê diduyan jî dişibe yê pêşîn û ev e: ‘Wek ku tu ji xwe hez dikî, gerek tu ji cîranê xwe hez bikî’” (Meta 22:37-39, NWT). Welatiyên Hukimdariya Xwedê hem ji Xwedê hem ji mirovan hez dikin û dixwazin ji bo wan qenciyê bikin.

•   Perwerde. Ji xeynî vê ku Hukimdariya Xwedê qanûnan datîne, ew mirovan hîn dike ku ew çawa dikarin li gor van qanûnan bijîn (Îşaya 48:17, 18).

•   Armanc. Armanca Hukimdariya Xwedê ne ev e ku hukimdaran bi navgîniya welatiyên xwe dewlemend bike. Armanca wê ev e ku daxwaza Xwedê bîne cih û rê veke ku kesên ku ji Xwedê hez dikin li dinyayê di cenetê de heta hetayê bijîn (Îşaya 35:1, 5, 6; Meta 6:10; Peyxam 21:1-4).