Мангэ с детства камэласпэс природа. Амари семья часто вытрадэлас пал форо тэ подыкхас прэ гожа вэша и паня, савэ надур форостэр кай мэ выбариём Ювяскюля, дрэ Центра Финляндия. Адякэжэ мангэ камэнпэс о звери — кэдэ мэ сомас тыкно мангэ камэласпэс тэ облав кажнонэс э джюклэс и мыца, савэн мэ дыкхавас! Кэдэ мэ подбариём мангэ исыс пхаро тэ дыкхав сыр мануша накучь обджянпэс лэнца. Прогэя савото времё мэ попыём дрэ общество кай ракхэнас зверен, одой мэ встретил манушэн савэ думиндэ адяжэ сыр мэ.

Амэ причувасас бари зор, собы тэ домараспэс э воля зверенгэ: амэ росдасас информация прэ адая тема, пролыджясас протесты и выджясас про митинги. Ракирасас, собы тэ набикнэн лэнгиро мехо, и собы тэ накэрэн прэ лэндэ опыты. Амэ дажэ откэрдям пэскири организация ваш адава, собы тэ ракхас зверен. Нэ пал адава со амэ захалэс самас тэрдэ прэ пэскиро прэ амэндэ бут молы выкхарнас э ран. И исыс адасаво, со ман закэдэнас и сындякирнас.

Нэ мэ пиридживавас нанэ только пал зверендэ, мэ думинавас пал проблемы савэ исы про свэто. Прогэя савота времё мэ ужэ сомас нанэ дрэ екх организация, а ещё дрэ «Международно амнистия» и «Гринписо». Мэ отдавас сари зор, собы тэ подрикирав дело, саво кэрнас адалэ организации. Мэ поможинавас чорорэнгэ, бокхалэнгэ и сарэнгэ конэскэ исыс пхаро.

Мэ полыём, со не могу тэ парува адава свэто. Нэ хотя адалэ организации улэнас набарэ проблемы, нэ саек исыс проблемы савэ кэрнаспэс ещё бутыр. Мандэ исыс адасаво ощущениё, со Налачё причудя сари зор собы прэ адава свэто тэявэн только биды и ни конэскэ наисыс кэ адава нисаво дело. Мэ полэём, со не смогу ни со тэ кэрав.

Мэ полыём, со мири зор наухтылэл и мэ лэём тэ думинав пал Дэвлэстэ и Библия. Сыр то ґара мэ сыклыём пирэ Библия Яхваскирэ Свидетеленца. Онэ кучь обджянаспэс манца и интересовались мирэ джиипнаса, нэ мэ насомас готово тэ парував сота дрэ пэскиро джиипэн. Нэ дрэ адава моло саро исыс нанэ сыр раньшэ.

Мэ лакхтём пэскири э Библия и лэём ла тэ гинав. Ада исыс сыр бальзамо про миро розмардо ило. Мэ удыкхтём, дрэ Библия со чеинэ кучь тэ отлыджяспэс ко звери. Например, дрэ Притчи 12:10 ракирэлпэс, со «Праведно мануш дыкхэл пал пэскиро ското». Мэ адяжэ полэём, со Дэвэл нанэ банго дро биды савэ исы ко мануша. Проблемы кэрэнпэс одолэстэр, со бут мануша нашунэнпэс Дэвлэс. Мангэ исыс кучь про ило, кэдэ мэ уґалыём пал Яхваскири любовь и долготерпениё (Псалом 103:8—14).

Примерно дрэ адава времё мэ лакхтём купоно, дрэ саво мэ помангдём книга «Чему на самом деле учит э Библия?» и бичадём лэс. Кэ мэ явнэ дуй Свидетели и предложили мангэ тэ сыклёвав пирэ Библия. Мэ согласился. Мэ лэём тэ ходинав про встречи дро зало, кай скэдэнпэс Яхваскирэ Свидетели. И тэдэ библейско чачипэн лэя тэ барьёл дро миро ило.

Э Библия поможиндя мангэ тэ парував пэскиро джиипэн. Мэ чурдыём тэ тырдав и тэ напьявпэс, лэём тэ дыкхав пал пэстэ и пириячём тэ страминавпэс. Мэ парудём пэскиро отношениё ко рая (Римлянам 13:1). И налэём тэ кэрав биладжякунэ делы, дрэ савэ раньшэ ваш мангэ наисыс нисавэ запреты.

Пхарэдыр сарэстэр мангэ исыс тэ парував пэскиро отношениё ко организации. Адава кэрдяпэс нанэ пал екх дэвэс. Сначала мэ думиндём, со явава предателё, если пириячава тэ подрикирав лэн. Мэ полыём со только Дэвлэскиро Царство можэт тэ дэл адалэ свэтоскэ чачуны надежда. И мэ решил сарэ зорьятэр тэ подрикирав адава Царство и тэ поможинав явирэнгэ тэ уґалён пал лэстэ (Матфея 6:33).

Кэдэ мэ сомас активисто, мэ присыклыём тэ делинав манушэн прэ лачендэ и налачендэ, мэ сомас готово тэ маравпэс одолэнца, конэс гинавас налаченца. Э Библия поможиндя мангэ тэ наотлыджявпэс холяса ко мануша. Нэ мэ сыр христианино, стараюсь тэ камам сарэн манушэн (Матфея 5:44). Исы бут возможности тэ сыкавав, со мэ камам манушэн — екх лэндэр ада тэ роспхэнэс бахталы весть пал Дэвлэскиро Царство. Мэ радо тэ дыкхав сыр адая буты яндэл манушэнгэ миро и радость, и дэл чачуны надежда.

Одолэ поратэр сыр мэ сыклэём тэ патяв Яхваскэ, мандэ ячья покоё про ило. Мэ уверено, со ёв сыр Создателё надомэкэла, собы прэ манушэндэ и зверендэ постоянно издевались и со амари гожо пхув явэла уничтожено. Через пэскиро Царство ёв рискирла саро убытко, саво исыс кэрдо манушэнгэ и пхувьякэ (Исаия 11:1—9). Мэ радо, со мэ джинав адава чачипэн и могу тэ поможинав авирэнгэ тэ патян дрэ адава. Кана мэ надуминав, со должэн тэ парував адава свэто.