SO PHENEL E BIBLIA
Kana varekon khelel peske pe lovende
Uni manush gindin ke chi kerel nasul khanikaske te khelen peske pe lovende, numa aver gindin ke si vareso kai atsavel ai kai nashtin te meken
Si vorta te khelas amenge pe lovende?
SO PHENEN LE MANUSH.
But manush gindin ke chi keren nasul te khelen peske pe lovende te kerena kako sar phenel o zakono le themesko. Vi uni amperetsii len love kotsar ai lasharen dieli kai azhutin avren.
SO PHENEL E BIBLIA.
E Biblia chi phenel ke chi trobus te khelas amenge pe lovende. Numa azhutil amen te das po gor sar dikhel les o Del.
Kana varekon khelel peske pe lovende e prama mai bari si, te niril le love kai khelen peske le kolaver, numa o Jesus phendias: “te na avel tumenge drago zurales le barvalimata” (Luk 12:15). Le manush khelen peske pe lovende sostar kamen mai ai khanchi nai lenge dosta. Si but love kai khelen peske, numa nai vushoro te niris len. Ai sar le manush kamen te aven barvale, khelen peske but love ando casino. Ai kako, chi azhutil le manushen te na avel lenge drago zurales le love, numa kerel te kamen love ande fuga.
Kana varekon khelel peske pe lovende rodel te niril le love kai jasarde le kolaver. E Biblia sikavel: “te na rodel peske mishtimos korkorho, numa savorhe te roden kodo le kavrenge” (1 Korintiana10:24). Iek anda le Desh Zakonuria si: “Chi trobus te kames [...] khanchi kai avela le avresko” (Éxodo 20:17). Kana iek manush kamel te niril azhukerel te ashel le loventsa kai jasarde le kolaver.
E Biblia phenel amenge te na dikhas e baj sar vareso kai azhutil amen. Uni israeliti kai nas len pakiamos ando o Del astarde te luvudin ka o del katar e Lashi Baj. Ai so gindilas o Del pa godo? Vo phendias ke chi meklesas te keren so nas vorta angla leske iakha, ai alosarde te keren so nas leske drago (Isaías 65:11, 12).
Ande uni thema lenpe love kai khelen peske le manush te lasharen dieli kai azhutin avren. Numa so keren le loventsa chi parhuvel katar ankliste: anda prame kai lasharen dieli kai azhutil le manushen kai drago lenge le love, kai kamen te nirin von korkorho ai kai kamen dieli kana chi keren khanchi.
“Chi trobus te kames [...] khanchi kai avela le avresko” (Éxodo 20:17).
Save bedi anel le manusheske kana khelel peske pe lovende?
SO PHENEL E BIBLIA.
E Biblia sikavel ke “kodola kai mangen te barvalon, peren ande zumaimos ai line le ande atsaimos katar but dieli bi malade, ai chorhe kai ingeren le manushen te xasavon” (1 Timote 6:9). Iek manush kai khanchi nai leske dosta kamel te khelel peske pe lovende. Pala godia e Vorba le Devleski phenel ke trobus te duriuvas anda sa kako (Efisiana 5:3).
Kana le manush khelen peske pe lovende, shai len love ande fuga ai godo kerel te kamen zurales le love. E Biblia mothol ke godo kamlimos “si kai ingerel ka but nasulimos”. Kana iek manush kamel te avel les mai ai mai love, godo gindo ningerel lesko traio. Ai godo shai ningerel les te na aliarelpe mishto ai te duriavol katar o Del. E Biblia phenel ke godola kai nai lenge dosta le love kai si len “thode ande penge ile but nekazo” (1 Timote 6:10).
Le manush kai nai lenge dosta le love kai si len ai kamen mai but love penge nai veselime. Eclesiastés 5:10 mothol: “Godo kai kamel le love chi avela veselime peske loventsa, ai chi godo kai kamel o barvalimos, le loventsa kai lel”.
Agies millonuria manush kai drago lenge te khelen peske nashtin te meken. Ai millonuria manush ando Estados Unidos si gadia.
Proverbios 20:21 sikavel ke le manush kai nai lenge dosta le love kai si len shai barbavon, numa o Del chi si te suntsol len. Godo kai nashtil te mekel te khelel peske shai jasarel sa so si les, te kamel love avreske, te jasarel amiguria, buki vai peska familia. Te las amen pala so phenel e Biblia azhutil amen ai arakhel amen katar le dieli chorhe kai aven kana khelas amenge pe lovende.
“Numa kodola kai mangen te barvalon, peren ande zumaimos ai line le ande atsaimos katar but dieli bi malade, ai chorhe kai ingeren le manushen te xasavon” (1 Timote 6:9).
