Na ini den yari di pasa, papa nanga mama ben kan de den fosiwan di ben e kisi na okasi fu taki nanga den pikin fu seks. Den ben kan hori a yari fu den na prakseri te den ben e du disi.

Ma now ala sani kenki. A buku The Lolita Effect e taki: „Moro nanga moro yonguwan e kisi fu du nanga sani di abi fu du nanga seks. Srefi felem nanga tra sani di meki gi pikin-nengre e abi fu du nanga seks.” A sani disi bun noso a fowtu gi pikin-nengre?

Sani di abi fu du nanga seks de fu si na ala sei. Deborah Roffman di skrifi a buku Talk to Me First e taki: „Tori di sma e gi, reklame, felem, buku, poku, TV show, sms, game, telefon nanga computer furu nanga sani di e wiki seksfiri. Disi e meki taki yonguwan nanga pikin-nengre srefi e prakseri taki seks musu fu de . . . a moro prenspari sani na ini a libi.”

Bisnis e gebroiki en fu meki moni. Sma di e meki reklame èn di e seri sani, e gebroiki den sani disi fu seri krosi gi yonguwan. Na so den yonguwan disi e leri fu poti tumusi furu prakseri na densrefi yonguyongu kaba. A buku So Sexy So Soon e taki: „Bisnisman sabi taki yonguwan wani de leki den speri fu den èn den wani taki den speri disi feni den bun. Na dati den e gebroiki fu kisi den. Den prenki di den e poti tapu den sani di den e seri, a no fu gi yonguwan deki-ati fu abi seks, ma na fu meki moni na den tapu.”

Sma no e taki nofo fu en. A no te wan sma sabi fa wan wagi e rèi, dan dati wani taki a e rèi bun ini a verkeer. Na so a de tu taki te wan sma sabi sani fu seks dan dati no wani taki a o gebroiki a sabi disi fu teki bun bosroiti.

Hori disi na prakseri: A prenspari ini a ten disi fu leri yu pikin fa fu „gebroiki den frustan fu man si sani krin” so taki den kan „sabi san bun èn san no bun.”​—Hebrewsma 5:14.

Taki nanga yu pikin. Awansi yu feni en muilek, toku na yu frantwortu fu taki nanga yu pikin fu seks. Tyari yu frantwortu.​—Bijbeltekst: Odo 22:6.

Abi syatu takimakandra nanga den. Na presi fu hori wan langa lezing gi den, a bun fu taki syatu nanga den fu den sani disi. Kande te un de ini wagi noso te un e du wan pikin wroko. Poti wan tu aksi fu yepi yu pikin fu taki fa a e denki. Fu eksempre, na presi fu aksi en: „Yu lobi den sortu reklame dati?” yu kan aksi: „Fu san ede yu denki taki den e gebroiki den sortu fowtow disi fu meki reklame?” Baka te a piki, yu kan aksi en: „Ma fa yu feni a sani dati?”​—Bijbeltekst: Deuteronomium 6:6, 7.

Hori a yari fu yu pikin na prakseri. Leri den yongu pikin fu yu den trutru nen fu den syenpresi, èn fa den musu kibri densrefi gi sma di e du ogri nanga pikin-nengre. Te a pikin e kon moro owru, yu kan taigi en fa a e du kon taki sma e kisi pikin. Sorgu taki fosi a pikin fu yu kon moro bigi, yu leri en fu frustan bun san na seks èn fu tyari ensrefi na wan fasi di fiti.

Leri en bun maniri nanga gwenti. Leri yu pikin​—yonguyongu kaba fu—​de eerlijk, fu abi lespeki èn fu de loyaal. Dan te yu o bigin taki nanga en fu seks, a o moro makriki gi yu. Taigi den krin fa yu wani taki den tyari densrefi. Fu eksempre, efu yu no wani taki den abi seks fosi den trow, dan taigi den krin. Taigi den fu san ede a no bun èn san kan de den bakapisi. A buku Beyond the Big Talk e taki: „Yonguwan di sabi taki den papa nanga mama no wani taki den abi seks fosi den trow, e meki moro muiti fu no abi seks.”

De wan bun eksempre. Du san yu e leri den. Fu eksempre, yu e lafu te sma e gi morsu lafu tori? Yu e weri krosi di e sori fa yu skin de? Yu e du sani fu wiki sekslostu fu trawan? Den sani disi kan meki taki yu pikin no o du san yu e leri en.​—Bijbeltekst: Romesma 2:21.

Tan du muiti. Seks na wan kado fu Gado, èn te tu sma trow, a kan de wan prisiri sani (Odo 5:18, 19). Sori yu pikin krin taki efu a wakti teleki a trow, a o man prisiri fu a kado disi. A no o sari èn a no o abi den broko-ede di sma e kisi te den abi seks fosi den trow.​—1 Timoteyus 1:18, 19.