•  Liafuan atu loke 2

 Rikusoin husi Bíblia 3-5

•  Diskursu 3

•  Keʼe no hetan buat murak husi Bíblia 4

•  Lee Bíblia 5

•  Treinu kona-ba Haklaken 6-14

•  Komesa konversa 7

•  Vizita fali 8

•  Hanorin ema 9

•  Esplika Ita-nia fiar 10

•  Diskursu 11

•  Informasaun 12

•  Situasaun 13

•  Uza vídeo no publikasaun 14

•  Moris nuʼudar ema Kristaun 15-16

•  Estudu Bíblia iha Kongregasaun 16

•  Liafuan atu taka 17

•  Gaba no konsellu 18

•  Tempu 19

•  Vizita husi katuas área 20

•  Semana neʼebé iha asembleia ka reuniaun boot 21

•  Semana neʼebé iha Memoriál 22

•  Koordenadór ba Reuniaun Moris Kristaun no Haklaken 23

•  Aprezentadór ba Reuniaun Moris Kristaun no Haklaken 24

•  Katuas konsellu nian 25

•  Klase seluk 26

•  Vídeo 27

1. Matadalan ida-neʼe sei ajuda ema hotu neʼebé hola parte iha reuniaun Moris Kristaun no Haklaken. Ita presiza haree fali matadalan neʼe antes atu prepara Ita-nia parte hodi tuir Moris Kristaun no Haklaken Programa no nota. Haklaken-naʼin hotu hetan konvite atu halo knaar iha reuniaun neʼe. Se ema ida tuir reuniaun beibeik, konkorda ho Bíblia nia hanorin no moris tuir Bíblia nia matadalan, nia mós bele partisipa. Kuandu ema ida neʼebé seidauk sai haklaken-naʼin hakarak hetan knaar, koordenadór ba Reuniaun Moris Kristaun no Haklaken presiza koʼalia ho nia kona-ba kritéria sira, no tuirmai katuas neʼe sei fó-hatene se nia kumpre kritéria ka lae. Kuandu ida-neʼe akontese, irmaun ka irmán neʼebé halaʼo estudu Bíblia ho nia (ka inan ka aman neʼebé Testemuña) mós akompaña. Kritéria neʼe hanesan ho kritéria atu sai haklaken-naʼin neʼebé seidauk hetan batizmu.—od kap. 8 par. 8.

2. Minutu ida. Semana-semana, depois knananuk no orasaun, aprezentadór ba Reuniaun Moris Kristaun no Haklaken sei hatoʼo liafuan neʼebé book rona-naʼin sira atu rona didiʼak ba programa. Nia sei tau fokus ba pontu sira neʼebé sei ajuda kongregasaun.

 3. Diskursu: Minutu sanulu. Moris Kristaun no Haklaken fó sai tema no pontu rua ka tolu neʼebé importante husi diskursu neʼe. Katuas ka atan ba kongregasaun neʼebé kumpre kritéria mak sei hatoʼo parte neʼe. Kuandu programa lee Bíblia ba semana neʼe tama ba livru foun husi Bíblia, kongregasaun sei haree vídeo introdusaun husi livru neʼe. Irmaun neʼebé hatoʼo parte neʼe bele temi pontu balu husi vídeo, neʼebé liga ho tema. Maibé nia labele haluha atu koʼalia kona-ba pontu ida-idak neʼebé temi iha livru Moris Kristaun. Se iha tempu, nia presiza uza ho didiʼak dezeñu neʼebé bazeia ba informasaun neʼebé nia hatoʼo. Nia mós bele uza referénsia seluk tan atu fó sai pontu sira iha diskursu neʼe.

 4. Keʼe no hetan buat murak husi Bíblia: Minutu sanulu. Neʼe mak parte neʼebé halaʼo ho pergunta no resposta, no la iha introdusaun ka konkluzaun. Katuas ka atan ba kongregasaun neʼebé kumpre kritéria mak sei hatoʼo parte neʼe. Irmaun neʼebé hatoʼo parte neʼe presiza husu pergunta rua ba rona-naʼin. Nia bele deside atu lee ka la lee versíkulu sira neʼebé temi iha pergunta neʼe. Ema neʼebé hatoʼo komentáriu labele liu segundu 30.

 5. Lee Bíblia: Minutu haat. Knaar neʼe ba mane. Estudante tenke lee deʼit eskritura neʼebé temi iha programa no la presiza temi liafuan ruma atu loke ka remata. Aprezentadór ba reuniaun sei ajuda estudante atu lee ho loloos, komprende informasaun neʼebé nia lee, la sidi bainhira lee, énfaze liafuan neʼebé loos, lian tun-saʼe, pauza iha fatin neʼebé loos, no koʼalia hanesan baibain. Tanba dala ruma iha versíkulu uitoan deʼit ka barak liu atu lee, koordenadór ba Reuniaun Moris Kristaun no Haklaken tenke hanoin kona-ba estudante ida-idak nia abilidade bainhira fahe knaar neʼe.

6. Minutu 15. Iha parte neʼe sei fó oportunidade ba ema hotu atu hetan treinu kona-ba haklaken, no hadiʼa dalan neʼebé sira dada lia, oinsá sira haklaken no hanorin ema. Kuandu presiza, katuas sira mós bele hetan knaar nuʼudar estudante. Estudante ida-idak presiza hakaʼas an atu kumpre lisaun husi broxura Hanorin ka Hadomi Ema tuir lisaun neʼebé hakerek iha parénteze laran iha Moris Kristaun no Haklaken. Dala ruma, programa neʼe mak diskusaun, neʼebé hatoʼo husi katuas ida ka atan ba kongregasaun neʼebé kumpre kritéria.—Haree  parágrafu 15 kona-ba oinsá atu halaʼo parte diskusaun.

 7. Komesa konversa: Knaar neʼe ba feto ho feto, mane ho mane, ka mane ho feto neʼebé família rasik. Estudante no ninia ajudante bele halo knaar neʼe hodi tuur ka hamriik.—Atu hetan informasaun liután kona-ba tópiku ka situasaun ba knaar neʼe, haree  parágrafu 12 no  13.

 8. Vizita fali: Knaar neʼe ba feto ho ninia ajudante feto, ka mane ho ninia ajudante mane. (km-IN 5/97 p. 2) Estudante no ajudante bele tuur ka hamriik atu halo drama kiʼik. Estudante sei halaʼo vizita fali hodi tuir buat neʼebé sira konversa ona iha vizita antes neʼe.—Atu hetan informasaun liután kona-ba tópiku ka situasaun ba knaar neʼe, haree  parágrafu 12 no  13.

 9. Hanorin ema: Knaar neʼe ba feto ho ninia ajudante feto, ka mane ho ninia ajudante mane. (km-IN 5/97 p. 2) Estudante no ajudante bele tuur ka hamriik atu halo drama kiʼik. Drama kiʼik neʼe sei hatudu estudu Bíblia neʼebé komesa tiha ona. Lalika loke ka taka ho liafuan ruma, maibé se estudante nia pontu estudu nian mak kona-ba liafuan atu loke ka liafuan atu remata, nia bele halo ida-neʼe. Estudante bele hili atu lee ka la lee parágrafu sira husi livru.

 10. Esplika Ita-nia fiar: Se knaar neʼe mak nuʼudar diskursu, mane mak sei hatoʼo. Se neʼe mak nuʼudar drama kiʼik, feto ho ninia ajudante feto, ka mane no ninia estudante mane, ka mane ho feto neʼebé família rasik mak halaʼo knaar neʼe. Estudante presiza fó sai resposta neʼebé klaru iha dalan neʼebé matenek ba pergunta neʼebé sai nuʼudar tema hodi uza informasaun husi referénsia. Estudante bele deside se nia sei temi publikasaun referénsia nian ka lae.

 11. Diskursu: Mane mak halaʼo parte neʼe nuʼudar diskursu ba kongregasaun. Kuandu diskursu neʼe bazeia ba pontu ida husi apéndise A iha broxura Hadomi Ema, estudante presiza fó sai oinsá mak bele uza eskritura sira iha serbisu haklaken. Porezemplu, nia bele esplika bainhira mak ita bele uza eskritura ida, eskritura neʼe nia signifikadu, no oinsá atu troka hanoin ho ema neʼebé ita hasoru. Kuandu diskursu neʼe bazeia ba lisaun ida husi broxura Hadomi Ema, estudante presiza fó sai oinsá atu aplika informasaun neʼe iha serbisu haklaken. Nia bele fó sai ezemplu husi númeru 1, ka bele uza eskritura sira iha “Haree mós”, se neʼe bele ajuda.

   12. Informasaun: Parágrafu neʼe ho parágrafu tuirmai sei aplika ba parte “Komesa konversa” no “Vizita fali”. Baibain, estudante nia objetivu mak atu fahe lia-loos simples husi Bíblia neʼebé kona rona-naʼin nia situasaun, no prepara ba konversa tuirmai iha futuru. Ita presiza hili tópiku neʼebé dada ema nia atensaun tuir tempu. Ita bele deside atu temi ka la temi kona-ba publikasaun ka vídeo husi “Ekipamentu Hanorin nian”. Duké dekór deʼit buat neʼebé Ita sei koʼalia, Ita presiza hakaʼas an aumenta matenek atu dada lia, hanesan hatudu interese ba ema ida-idak no koʼalia hanesan baibain.

   13. Situasaun: Estudante presiza halo tuir knaar neʼebé nia simu hodi aplika tuir situasaun iha ninia área. Porezemplu:

1.  (1) Husi uma ba uma: Neʼe inklui haklaken uma ba uma, haklaken liuhusi telefone ka karta, no mós vizita fali ema neʼebé hasoru ona bainhira haklaken uma ba uma.

2.  (2) Haklaken la formál: Ita sei buka oportunidade atu haklaken kuandu konversa ho ema iha situasaun baibain. Neʼe inklui fahe informasaun balu husi Bíblia ba ema neʼebé Ita hasoru iha serbisu fatin, eskola, viziñu, iha transporte públiku, ka situasaun seluk iha Ita-nia moris loroloron nian.

3.  (3) Haklaken iha fatin públiku: Neʼe inklui haklaken ho karrosa, iha área negósiu nian, iha estrada, jardín, para karreta fatin, ka fatin seluk neʼebé bele hasoru ema.

 14. Uza vídeo no livru sira: Depende ba situasaun, estudante bele oferese atu hatudu vídeo ka publikasaun ruma. Kuandu matadalan haruka Ita atu hatudu vídeo ka Ita rasik deside atu halo ida-neʼe, Ita presiza koʼalia kona-ba vídeo maibé lalika loke.

15. Depois knananuk, parte ida ka rua tuirmai sei halaʼo ba minutu 15. Parte neʼe sei ajuda kongregasaun atu halo tuir Maromak nia Liafuan. Se la iha matadalan seluk, katuas ka atan ba kongregasaun neʼebé kumpre kritéria mak sei halaʼo parte sira-neʼe. Maibé, katuas deʼit mak sei hatoʼo diskursu kona-ba kongregasaun nia presiza. Kuandu halaʼo parte diskusaun, irmaun neʼebé hetan knaar sei husu pergunta neʼebé iha ona no mós pergunta seluk tan. Ninia introdusaun tenkesér badak atu bele iha tempu natoon hodi fó sai pontu importante hotu no rona-naʼin bele hola parte. Se parte neʼe iha entrevista, se bele, diʼak liu ema neʼebé atu entrevista saʼe ba plataforma duké koʼalia husi tuur-fatin.

  16. Estudu Bíblia iha Kongregasaun: Minutu 30. Katuas neʼebé kumpre kritéria mak sei halaʼo knaar neʼe. (Se iha katuas uitoan deʼit, bele mós fó knaar neʼe ba atan ba kongregasaun neʼebé kumpre kritéria.) Grupu katuas mak sei hili irmaun sira neʼebé bele dirije Estudu Bíblia iha Kongregasaun. Sira tenke tuir oras, tau fokus ba eskritura sira neʼebé importante, no ajuda rona-naʼin atu halo tuir lisaun husi estudu neʼe. Sira neʼebé hetan knaar neʼe sei hetan benefísiu hodi lee fali matadalan kona-ba oinsá atu dirije parte ho pergunta no resposta. (w23.04 p. 24, kaixa) La presiza halaʼo estudu neʼe toʼo minutu 30 se informasaun hotu hatoʼo ho klaru ona. Se bele, kada semana, diʼak atu uza irmaun sira neʼebé la hanesan atu dirije estudu ka lee livru neʼe. Se aprezentadór ba Reuniaun Moris Kristaun no Haklaken husu nia atu habadak estudu tanba razaun ruma, irmaun neʼebé dirije estudu neʼe sei halo desizaun kona-ba oinsá atu halo nuneʼe. Karik nia bele deside atu la lee parágrafu balu.

17. Minutu tolu. Aprezentadór ba Reuniaun Moris Kristaun no Haklaken sei halo rezumu ba programa hodi koʼalia kona-ba pontu balu neʼebé bele ajuda kongregasaun. Se iha tempu, nia mós sei temi pontu balu ba semana oin, no nia mós bele temi sé-sé deʼit mak iha knaar ba semana oin. Se la iha matadalan seluk, nia sei uza tempu neʼe atu hatoʼo avizu sira neʼebé importante no lee karta sira ba kongregasaun. Nia la presiza temi informasaun sira hanesan programa atu hamoos reuniaun-fatin, oras no fatin ba haklaken, maibé informasaun sira-neʼe tenke taka iha kuadru informasaun nian. Se avizu ka karta balu mak naruk no sei han tempu barak liu, nia presiza husu nanis irmaun sira atu habadak sira-nia diskursu iha parte “Moris nuʼudar ema Kristaun”. (Haree  parágrafu 16 no  19.) Reuniaun neʼe remata ho knananuk no orasaun.

18. Bainhira knaar husi estudante ida-idak hotu tiha, aprezentadór ba Reuniaun Moris Kristaun no Haklaken sei uza maizumenus minutu ida atu gaba estudante no fó konsellu hodi bazeia ba lisaun neʼebé nia aplika. Kuandu aprezentadór konvida estudante atu hatoʼo ninia parte, nia sei la fó sai kona-ba pontu ida-neʼebé mak estudante sei koko atu halo tuir. Kuandu estudante nia knaar hotu tiha, aprezentadór sei fó agradese ka gaba estudante, no tuirmai nia mós bele koʼalia kona-ba pontu neʼebé estudante halo tuir ona, ka esplika ho laran-diʼak tanbasá no oinsá mak estudante neʼe presiza tau atensaun ba pontu espesífiku neʼe. Aprezentadór mós bele koʼalia kona-ba pontu seluk husi estudante nia parte neʼebé bele ajuda estudante neʼe ka rona-naʼin sira. Se estudante ida presiza simu konsellu seluk tan kona-ba lisaun neʼebé nia aplika ka buat seluk, depois reuniaun hotu ka iha tempu seluk mak aprezentadór bele fó konsellu husi broxura Hadomi Ema, Hanorin ka livru Eskola Serbisu Kristaun.—Atu hetan informasaun liután kona-ba matadalan ba aprezentadór ba Reuniaun Moris Kristaun no Haklaken nian no mós ba katuas konsellu nian, haree  parágrafu 19,  24, no  25.

    19. Knaar ida-idak no mós aprezentadór nia liafuan labele liu tempu. Maski livru Moris Kristaun no Haklaken fó sai minutu ba parte ida-idak, ema neʼebé hatoʼo parte sira-neʼe la presiza hanoin atu uza tempu neʼe hotu se informasaun hatoʼo ho klaru ona. Se parte ruma liu tempu, aprezentadór ka katuas konsellu nian mak sei fó konsellu ba irmaun neʼe mesak. (Haree  parágrafu 24 no  25.) Reuniaun tomak, inklui knananuk no orasaun, sei halaʼo iha oras 1 minutu 45 nia laran.

20. Bainhira kongregasaun simu vizita husi katuas área, kongregasaun sei kontinua halo tuir programa iha livru Moris Kristaun no Haklaken, maibé presiza halo mudansa ba parte tuirmai neʼe: “Estudu Bíblia iha Kongregasaun” husi parte “Moris nuʼudar ema Kristaun” sei troka fali ho diskursu husi katuas área ba minutu 30. Antes katuas área hahú diskursu, aprezentadór ba Reuniaun Moris Kristaun no Haklaken sei halo rezumu ba programa ohin nian, temi pontu balu husi programa semana oin, hatoʼo avizu sira neʼebé importante no lee karta (se iha), no depois konvida katuas área atu hatoʼo diskursu ba kongregasaun. Bainhira diskursu hotu tiha, katuas área mak sei taka reuniaun hodi temi knananuk neʼebé nia rasik hili. Nia bele hili irmaun seluk atu taka ho orasaun. Durante katuas área nia vizita, sei la iha klase seluk. Grupu ida bele halaʼo sira-nia reuniaun kuandu katuas área vizita kongregasaun, maibé sira presiza hamutuk fali ho kongregasaun kuandu katuas área hatoʼo ninia diskursu serbisu nian ba kongregasaun.

21. Iha semana neʼebé iha asembleia ka reuniaun boot, kongregasaun sei la halaʼo reuniaun. Kongregasaun presiza hetan avizu katak ema ka família ida-idak presiza estuda informasaun husi reuniaun ba semana neʼe.

22. Se Memoriál monu iha loron baileet, ita sei la halaʼo Reuniaun Moris Kristaun no Haklaken ba semana neʼe.

23. Grupu katuas sei hili katuas ida atu serbí nuʼudar koordenadór ba Reuniaun Moris Kristaun no Haklaken. Katuas neʼe nia knaar mak atu organiza no tau matan ba reuniaun neʼe hodi tuir matadalan. Nia tenke komunika beibeik ho katuas konsellu nian. Kuandu koordenadór ba Reuniaun Moris Kristaun no Haklaken foin simu livru Moris Kristaun no Haklaken, nia sei halo kedas programa ba parte hotu iha reuniaun loron baileet ba fulan rua nian. Programa neʼe inklui estudante sira-nia knaar, parte seluk iha reuniaun, no mós aprezentadór neʼebé grupu katuas aprova ona. (Haree  parágrafu 3-16 no  24.) Kuandu arranja knaar, koordenadór presiza hanoin estudante nia idade, esperiénsia, no nia moris tuir duni tópiku neʼebé nia hatoʼo ka lae. Koordenadór mós presiza hanoin kona-ba buat hirak-neʼe kuandu fahe knaar ba parte seluk husi reuniaun. Ema hotu tenke hatene ninia knaar pelumenus semana tolu antes nia hatoʼo ninia parte. Ba estudante sira-nia knaar, presiza uza formuláriu Knaar ba Reuniaun Moris Kristaun no Haklaken (S-89). Koordenadór ba reuniaun Moris Kristaun no Haklaken presiza prepara programa ba reuniaun tomak no taka iha kuadru. Grupu katuas bele fó knaar ba katuas ida seluk ka atan ba kongregasaun ida atu ajuda nia. Maibé só katuas deʼit mak foti desizaun kona-ba sé mak sei hatoʼo knaar neʼebé laʼós parte estudante nian.

24. Kada semana, katuas ida mak halaʼo knaar nuʼudar aprezentadór ba Reuniaun Moris Kristaun no Haklaken. (Se katuas sira la toʼo, bele uza atan ba kongregasaun neʼebé kumpre ona kritéria.) Katuas neʼe sei hatoʼo liafuan atu loke no liafuan atu taka reuniaun neʼe. Nia mós sei sai nuʼudar aprezentadór ba parte ida-idak, no nia rasik mós dala ruma presiza halaʼo parte balu iha reuniaun neʼe, liuliu parte sira neʼebé dehan atu loke vídeo no la presiza esplikasaun. Ninia komentáriu depois no antes parte ida-idak tenke badak. Grupu katuas sei deside sé deʼit mak kumpre kritéria atu simu knaar nuʼudar aprezentadór, no katuas sira neʼebé tuir kritéria neʼe sei troka malu atu halaʼo reuniaun neʼe. Se presiza, katuas ba Reuniaun Moris Kristaun no Haklaken bele halaʼo knaar nuʼudar aprezentadór ba reuniaun neʼe dala barak liu fali katuas sira seluk. Baibain, katuas sira neʼebé kumpre kritéria atu halaʼo Estudu Bíblia iha Kongregasaun mós bele serbí nuʼudar aprezentadór ba reuniaun neʼe. Maibé grupu katuas labele haluha katak aprezentadór tenke iha kapasidade atu gaba estudante sira iha dalan neʼebé lori benefísiu ba rona-naʼin sira, no mós fó konsellu ho laran-diʼak kuandu presiza. Aprezentadór mós iha responsabilidade atu remata reuniaun tuir oras. (Haree  parágrafu 17 no  19.) Se aprezentadór hakarak no se iha fatin, nia bele uza mikrofone neʼebé iha palku ninin atu fó-hatene kona-ba parte tuirmai kuandu irmaun neʼebé sei hatoʼo parte neʼe hakbesik daudaun ba pódiu. Nia mós bele tuur iha kadeira no uza meza iha palku durante estudante sira lee Bíblia no hola parte iha Treinu kona-ba haklaken no kuandu nia fó konsellu ba sira. Neʼe sei ajuda atu labele han tempu barak.

25. Se bele, diʼak atu fó knaar neʼe ba katuas ida neʼebé iha ona esperiénsia kona-ba hatoʼo diskursu. Ninia knaar mak atu fó konsellu privadu ba ninia maluk katuas no atan ba kongregasaun kona-ba oinsá sira halaʼo sira-nia parte iha reuniaun. Neʼe inklui parte iha Reuniaun Moris Kristaun no Haklaken, diskursu públiku, dirije ka lee Livru Haklaken no Estudu Bíblia iha Kongregasaun. (Haree  parágrafu 19.) Se kongregasaun ida iha katuas barak neʼebé matenek atu hatoʼo diskursu no hanorin, katuas sira-neʼe bele hetan knaar nuʼudar katuas konsellu nian hodi troka malu kada tinan. Katuas konsellu la presiza fó konsellu beibeik ba irmaun sira-nia parte ida-idak.

26. Se iha estudante barak, kongregasaun bele iha klase seluk ba estudante nia knaar sira. Klase sira-neʼe hotu presiza iha irmaun neʼebé kumpre kritéria atu fó konsellu ba estudante sira. Diʼak liu se katuas mak halaʼo klase neʼe, maibé se presiza, atan ba kongregasaun neʼebé kumpre kritéria mós bele halaʼo knaar neʼe. Grupu katuas mak sei deside sé mak bele tau matan ba klase seluk no se sira hakarak troka malu atu halo knaar neʼe. Irmaun neʼebé simu knaar neʼe presiza halo tuir matadalan iha  parágrafu 18. Ba kongregasaun neʼebé iha klase seluk, estudante sira sei bá sala segundu depois parte “Keʼe no hetan buat murak husi Bíblia”. Estudante sira-neʼe sei fila fali ba sala primeiru bainhira estudante ikus nia knaar remata.

27. Vídeo sira neʼebé hili tiha ona sei loke tuir programa ba reuniaun loron baileet nian. Bele hetan vídeo sira-neʼe iha JW Library^®.

© 2023 Watch Tower Bible and Tract Society of Pennsylvania

S-38-TTP 11/23