NKHANI YA PAPEJI LAKWAMBA
Kumbi vo Ŵanthu Akamba Vichitika?
Kumbi mungakhumba kuziŵa vo vikuchitikiyeningi kunthazi? Anandi akhumbisiska kuziŵa. Pe ŵanthu anandi wo akamba vinthu vo vichitikengi munthazi kweni ndi vosi cha vo vichitika. Ŵanaŵaniyani vinthu ivi:
-
ASAYANSI agwiriskiya nchitu vipangizu vapachanya kweniso ndalama zinandi kuti akambi vinthu vo vichitikengi. Mwakuyeruzgiyapu, mo kunangika kwa mphepu kungakwaskiya charu ndipuso asani kunyengi vuwa ku dera lo muja.
-
AKASWIRI AKUFUFUZA akamba vo vichitikengi pa nkhani ya bizinesi ndi ndali. Warren Buffett, yumoza wa ŵanthu akukhupuka ukongwa pa charu chapasi, waja wachikamba vo vichitikengi pa bizinesi yaki ndipu vichitika nadi. Ivi vachitiska kuti ŵanthu anyaki amudanengi kuti mchimi. Kaswiri munyaki wakufufuza Nate Silver, wagwiriskiya nchitu fundu zo anyaki akamba kuti waziŵi vo vichitikengi pa nkhani za ndali ku U.S. kweniso waziŵi wo alondiyengi mphotu chifukwa chakupanga mafilimu.
-
VINTHU VO VIKULEMBEKA KALI ativikamba kuti ndi mauchimi. Ŵanthu anyaki awona kuti vo Michel de Notredame (Nostradamus) wangulemba cha m’ma 1500, vifiskika mazuŵa nganu. Ŵanthu akambanga kuti kuchitikengi vinthu vakofya chifukwa kalendala ya ŵanthu a fuku la Maya yamalanga pa December 21, 2012.
-
ALONGOZGI A VISOPA nyengu zinyaki akamba kuti pacharu chosi pachitikengi vinthu vakofya ndi chilatu chakuti atcheŵeski ŵanthu kweniso kuti asere mu visopa vawu. Harold Camping ndi akumulondo ŵaki akambanga kuti charu chibwangandulikengi mu 2011 kweni vikuchitika cha.
-
AMASENGA akamba kuti ŵe ndi nthazi zapade zakuchimiya vinthu. Edgar Cayce ndi Jeane Dixon angukamba kuti kutuliya mu 1901 kuzifika mu 2000, kuchitikengi vinthu vinyaki ndipu vinguchitika nadi kweni vinandi vikuchitika cha. Dixon wangukamba kuti mu 1958, kuchitikengi Nkhondu Yachitatu ya Pacharu Chosi. Cayce wanguti cha m’ma 1970, msumba wa New York udilizikiyengi m’nyanja.
Kumbi pe nthowa yakugomezgeka yakuziŵiya vo vichitikengi kunthazi? Mphakwenere kufumba fumbu lenili chifukwa asani mwatingi muziŵengi vo vichitikengi, mwatingi muchitengi vinthu mwakupambana ndi mo mwachitiyanga kali.
