САГЫШТААЛАП КӨРҮҢЕР ДААН: музейже экскурсиялап кирип келген силер. Экспонаттар чыып каан залга кирип кээриңерге, оларның хөй кезииниң өңү өжүп, эргижиреп, чарлып-чирлип калганын эскерип каан силер. Чамдыктарының бичии бузундулары артып калган. Оон солун чүүл: бичии кезектерин безин топтап көрүп болур дыка эки кадагалаттынган бир экспонат көрүп каан силер. Оон гидтен: «Бо чоокку үениң экспонады бе?» — деп айтырган силер. «Чок. Ол дээрге бурунгу үениң экспонаттарының бирээзи-дир, ону чаңгыс-даа чаартпаан» — деп, ол харыылаан. «Ынчаарга силер ону эки кадагалап, камнап турган ышкажыл силер» — деп сонуургаан силер. «Чок. Ол хатка-даа, чаъска-даа таваржып турган, безин үрегдекчилер ону узуткаар дээш оралдажып турган» — деп, гид чугаалаан. Кайгай бергеш: «Кандыг материалдан ону кылган чоор?» — деп айтырган силер.

Библияны база ындыг кайгамчык экспонат-биле деңнеп болур. Ийе, бистиң үевиске чедир элээн хөй бурунгу номнар кадагалаттынган. Ынчалза-даа оларның хөй кезии эргижиреп, үрелип калган. Ол эрги номнарда долгандыр турар бойдустуң дугайында бижээн чүүлдер амгы үениң фактыларынга дүүшпейн турар. Ында бижээн чамдык эмнээшкиннерниң аргалары дуза-даа чедирбейн, харын-даа кадыкка айыылдыг бооп турар. Бурунгу бижимелдерниң чүгле бичии кезектери арткан, а кол улуг сөзүглелдери чок азы үрелген.

Библия бурунгу өске номнардан ылгалып турар. Ону 3500 чыл бурунгаар бижип эгелээн-даа болза, ол бистиң үевиске чедир өскерилбээн. Ону хөй чылдар дургузунда өрттедип, хоруп, шоодуп база узуткаар дээш оралдажып турган. Ынчалза-даа ол шупту халдаашкыннарны ажып эртип келген. Кижилер чаа эртем ажыдыышкыннарын кылган тудум, Библияның эргижиревээнин, харын-даа ында шупту чүүлдү шагда-ла бижип кааны оларга билдингир апарган.

«Таанда библейжи сүмелер бистиң бо үеде дузалыг бооп болур бе?» деп айтырар чадавас силер. Бо айтырыгга харыылаар дизе, кижилерниң чуртталгазы чүге мындыг багай байдалда деп боданыңар. Улустуң хөй кезии ол дээрге дайыннар, агаар-бойдустуң хирленип турары, кем-херек үүлгедиишкиннери болгаш коррупция дээр. Ам адаанда бижиттинген Библиядан дүрүмнерни номчуптаалыңар. «Бир эвес улус ол дүрүмнерни сагып чурттаар болза, делегей экижиир бе?» деп бодуңардан айтырыңар.

ӨСКЕЛЕР-БИЛЕ АМЫР-ТАЙБЫҢ БОЛУРУ

«Амыр-тайбың нептередикчилери амыр-чыргалдыг, чүге дээрге Бурган оларны ажы-төлүм деп адаар» (Матфей 5:9). «Силерниң талаңардан, болдунар-ла болза, бүгү улус-биле эп-найыралдыг амыдыраңар» (Римчилерге 12:18).

ЭЭ КӨРНҮҮЧЕЛ БОЛГАШ ӨРШЭЭЧЕЛ ЧОРУК

«Өскелерге өршээлдиглер амыр-чыргалдыг, чүге дээрге Бурган оларга өршээлдиг боор» (Матфей 5:7). «Бот-боттарыңарга шыдамык хамаарылгалыг бооп, кайы-бирээңер өске-бир эжинге хомудап-даа турза, бот-боттарыңарны өршээңер. Дээрги-Чаяакчының силерни өршээгени дег, силер база ынчалдыр өршээңер!» (Колосчуларга 3:13.)

ЯЗЫ-СӨӨК ЫЛГАВАЗЫ

«Улус черни бир кылдыр чурттазын дээш, Ол [Бурган] чаңгыс кижиден бүгү кижи төрелгетенни тывылдырган» (Ажыл-чорудулга 17:26). «Бурган улусту ылгай көрбес дээрзин ам-на билдим. Кандыг-даа чоннуң иштинден Ону хүндүлээр база чөптүг чорукту барымдаалаар улус Ооң сеткилинге кирер-дир» (Ажыл-чорудулга 10:34, 35).

ЧЕРИВИСКЕ ХУМАГАЛЫГ БОЛУРУ

«Дээрги-Бурган-Чаяакчы кижини Эдемниң сесерлиинге ону болбаазыратсын база камгалап-карактазын дээш чурттадып каан» (Эге дөс 2:15). Бурган «черни узуткап турарларны чок кылыр» (Ажыдыышкын 11:18).

ЧАЗЫЙ БОЛГАШ САМЫЫРААР ЧОРУККА ХӨҢНҮ ЧОК БОЛУРУ

«Алыксак-чиксек чоруктан кичээнип чоруңар, кижиниң амыдыралы ооң эт-хөреңгизиниң элбээнден хамаарышпас болгай» (Лука 12:15). «Үй-балай самыырал азы кандыг-даа бужар чорук болгаш алыксак-чиксек чорук ышкаш чүүлдер дугайында араңарга чугаа безин көдүрүлбезин. Ындыг үүлгедиглер Бурганның ыдыктыг улузунга көңгүс таарышпас» (Эфесчилерге 5:3).

ШЫНЧЫ БОЛГАШ КЕЖЭЭ ЧОРУК

«Бүгү чүүлдерге бодувусту шын ап чоруурунче чүткүлдүг» (Еврейлерге 13:18). «Ооржу кижи оорланырын соксатсын, а ооң орнунга бодунуң кызыл күжү-биле амыдыралынга ажылда[зын]» (Эфесчилерге 4:28).

ӨСКЕЛЕРГЕ ДУЗА

«Кортуктарны сорук киириңер, кошкактарга чөленгииш болуңар, хамык улус-биле чымчак, чазык болуңар» (1 Фессалоникчилерге 5:14). «Түрегделге туттуруп чоруур өскүстерге, дулгуяк кадайларга дуза чедирер» (Иаков 1:27).

Бо дээрге анаа-ла чараш сөстер эвес-тир. Библия биске бо дүрүмнерни үнелээринге база амыдыралывыска ажыглаарынга дузалап турар. Улус бо дүрүмнерни сагып чурттап чораан болза, дыка хөй бергелерни шиитпирлептер ийик! Библияның сүмелери ам кажангызындан-даа артык ажыктыг. Ам безин Библия силерге канчаар дузалап болур?

Бир угаанныг кижи: «Мерген угаан бодунуң ажыл-херээ-биле шынзыттынар» — дээн (Матфей 11:19). Ол сөстер-биле чөпшээрежир силер бе? Сүмениң мерген угааныын түңнелинден көрүп каап болур. «Бир эвес Библия ажыктыг ном болза, чуртталгамны экижидер ужурлуг. Ол мээң бергелеримни канчаар шиитпирлептер?» деп боданыр чадавас силер. Бир херээжен кижиниң чижээн көрүптээлиңер.

Иринаның * шупту чүвези чедер, өөрүшкүлүг чурттап чораан. Хенертен удаа-дараа болган хай-халаптар ооң чуртталгазын өскертипкен. Баштай уруу чок апарган, оон ашаа каапкан. Ол акша талазы-биле бергелерге база таварышкан. «Баш муңгаш байдалга келген мен: уруум-даа, ашаам-даа, бажыңым-даа чок. Сагыш-сеткилим хоозураанындан чүнү-даа кылыр, чүнү-даа бодаар харык чок апарган мен» — деп, Ирина үлешкен.

Ирина бо библейжи шүлүктүң шынныын бодунга көрген: «Чурттап эртер хүннеривис чеден чылга деңнежир, а күштүг улус болза, сезен-даа хар чедир чурттаар, ол хуусааның дургузунда бисти муңгарал биле хилинчек тудуп чиир, чуртталгавыс караш дээр, өлүмче ужуга бээр — ол-ла-дыр бис» (Ырлар 89:10).

Ирина Библияны өөренип эгелээрге, ол аңаа камгалал апарган. Библияның сүмелерин ажыглаар болза, чуртталганы долузу-биле өскертиптер ном деп, хөй улус шынзыккан. Библия, статьяның эгезинде чугаалашканывыс ышкаш, музейде экспонатка дөмей. Үе эрткен соонда эргижиреп каар дыка хөй номнарның аразындан Библия ылгалып турар. Ол өске «материалдан» кылдынган болгаш, ындыг бе? Шынап-ла, Библияда кижилерниң эвес, а Бурганның бодалдарын бижип каан деп бүзүреп болур бе? (1 Фессалоникчилерге 2:13).

Чуртталга кыска болгаш бергелерлиг деп чөпшээрежир боор силер. Ылаңгыя берге байдалда кайыын сүмени, деткимчени дилээр-дир силер?

Библия хууда силерге канчаар дузалап болурун билип алыылыңар. Ол канчаар:

1. камгалап-кадагалап турар?

2. хостап турар?

3. күштү берип турар?

Дараазында статьяларга Библиядан сүмелер амыдырал-чуртталгага канчаар дузалап турарын сайгарар.