KAPITULO 35

Paonan-o Ako Magigin Sangkay han Dios?

Tungod han makasurubo nga panhitabo ha kinabuhi ni Jeremy, nakita niya an kaopayan han pagin sangkay han Dios. “Han 12 anyos ako, ginbayaan kami ni Tatay,” siring niya. “Usa ka gab-i samtang nakada ha higdaan, nag-ampo ako kan Jehova ngan nakikimalooy ha iya nga bumalik unta hi Tatay.”

Tungod han duro nga kasubo ni Jeremy, gintikangan niya pagbasa an iya Biblia. Nabantad gud hiya han mabasa niya an Salmo 10:14. Nasiring ito mahitungod kan Jehova: “Ha imo nadangop an makalolooy nga biktima; ikaw an parabulig han bata nga waray tatay.” Hi Jeremy nasiring: “Inabat ko nga sugad hin nakikiistorya ha akon hi Jehova ngan ginpapasarig niya ako nga hiya an akon parabulig; hiya an akon Tatay. May-ada pa ba mas maopay nga tatay kay ha iya?”

PARIHO man an iyo sitwasyon ni Jeremy o diri, iginpapakita han Biblia nga karuyag ni Jehova nga magin sangkay ka niya. Ngani, an Biblia nasiring: “Magin duok ha Dios, ngan magigin duok hiya ha iyo.” (Santiago 4:8) Hunahunaa an kahulogan hito nga mga pulong: Bisan kon diri mo hiya nakikita—ngan diri kamo pariho hin edad o estado—karuyag ni Jehova nga Dios nga magin sangkay ka niya!

Pero may-ada ka kinahanglan buhaton basi magin sangkay an Dios. Pananglitan: Kon may-ada ka tanaman ha iyo balay, maaram ka nga diri ito basta la matubo. Basi mabuhi ito, kinahanglan mo ito saribohan hin regular ngan ibutang ha lugar nga makakabulig ha pagtubo hito. Puropariho liwat hito an pagin sangkay han Dios. Ano an imo mahimo buhaton basi magin marig-on an iyo pagin magsangkay?

Importante an Pag-aram

Ha mga magsangkay importante an komunikasyon—an pagpamati ngan pag-istorya. Importante liwat ito ha aton pakigsangkay ha Dios. Namamati kita ha Dios kon ginbabasa ngan gin-aadman naton an Biblia.—Salmo 1:2, 3.

Oo, bangin diri mo hilig an pag-aram. Damu nga batan-on an mas naruruyag magkita hin TV, mag-uyag, o makaupod an ira mga kasangkayan. Pero kon karuyag mo magin sangkay an Dios, kinahanglan mo mamati ha iya pinaagi ha pag-aram ha iya Pulong.

Pero ayaw kabaraka. An pag-aram ha Biblia diri makuri buhaton. Puydi mo ito ma-enjoy—bisan kon para ha imo diri mo hilig an pag-aram. An siyahan nga butang nga kinahanglan mo buhaton amo an paggahin hin panahon para pag-adman an Biblia. “May-ada ako eskedyol,” siring han batan-on nga babaye nga hi Lais. “Kada pagmamata ko ha aga, nagbabasa ako hin usa nga kapitulo han Biblia.” Hi Maria, nga 15 anyos, may-ada iba nga eskedyol. “Nagbabasa ako hin Biblia kada gab-i antes ako kumaturog,” siring niya.

Basi makagtikang ka hin personal nga pag-aram, kitaa an kahon nga, “ admi an imo Biblia.” Katapos, isurat ha ubos an oras kon san-o ka puydi mag-aram ha Pulong han Dios hin bisan 30 minutos la o sobra pa.

․․․․․

An pag-eskedyol tinikangan pa la. Kon matikangan mo na an pag-aram, bangin makita mo nga diri pirme masayon an pagbasa ha Biblia. Bangin umuyon ka ha 11 anyos nga hi Jezreel, nga prangka nga nagsiring, “May mga bahin han Biblia nga makuri masabtan ngan boring basahon.” Kon sugad hito an imo inaabat, ayaw pag-undang. Pirme hunahunaa nga an imo pag-aram ha Biblia amo an panahon nga imo igin-gagahin basi mamati kan Jehova nga Dios, an imo sangkay. Samtang mas nangangalimbasog ka nga maggahin hin panahon ha pag-aram ha Biblia, mas nag-i-enjoy ka ngan nagpapahimulos hito!

Importante an Pag-ampo

Nakikiistorya kita ha Dios kon nag-aampo kita ha iya. Maopay gud nga regalo an pag-ampo! Puydi ka makiistorya kan Jehova nga Dios ha bisan ano nga oras, adlaw man o gab-i. Andam hiya pirme mamati ha imo. Labot pa hito, karuyag liwat niya nga mabatian an imo isisiring. Salit gin-aaghat ka han Biblia: “Ha ngatanan nga butang pinaagi han pag-ampo ngan pangamuyo nga may pagpasalamat, ipahibaro niyo ha Dios an iyo mga hangyo.”—Filipos 4:6.

Sugad han iginpapakita han teksto, damu an imo puydi ig-ampo kan Jehova. Bangin upod hini an imo mga problema ngan kabaraka. Puydi mo liwat ig-upod an mga butang nga imo iginpapasalamat. Diri ba ginpapasalamatan mo an imo mga sangkay kon may-ada hira mag-opay nga ginhihimo para ha imo? Puydi mo liwat pasalamatan hi Jehova, nga mas damu an nahimo nga maopay para ha imo kay han bisan hin-o mo nga sangkay.—Salmo 106:1.

Ha ubos, igsurat an pipira nga butang nga imo iginpapasalamat kan Jehova.

․․․․․

Sigurado nga may mga panahon nga nahahadlok ka ngan nababaraka. An Salmo 55:22 nasiring: “Ipasa ngadto kan Jehova an imo pinas-an, ngan bubuligan ka niya. Diri gud niya papabay-an nga matumba an usa nga matadong.”

Ha ubos, isurat an imo mga nababarak-an nga karuyag mo ig-ampo.

․․․․․

Personal nga Eksperyensya

May usa pa nga bahin han imo pakigsangkay ha Dios nga importante liwat. An salmista nga hi David nagsurat: “Tilawi ngan kitaa nga hi Jehova maopay.” (Salmo 34:8) Han ginkomposo ni David an Salmo 34, diri pa la maiha nga nagkaada hiya makaharadlok nga eksperyensya. Napalagiw hiya kay karuyag hiya patayon ni Hadi Saul—ito pa la makaharadlok na. An mas makuri pa gud, kinahanglan niya umayop ha iya mga kaaway nga mga Filisteo. Tungod kay namimeligro gud an kinabuhi ni David, nagpakalurong-lurong hiya salit nakapalagiw hiya.—1 Samuel 21:10-15.

Waray hunahunaa ni David nga nakapalagiw hiya tungod han iya kalugaringon nga abilidad. Lugod, nagsiring hiya nga tungod ito han bulig ni Jehova. Antes han salmo nga gin-unabi pa la, ini an iya ginsurat: “Nagpakiana ako kan Jehova, ngan binaton hiya ha akon. Iya ako gintalwas ha ngatanan ko nga nahahadlokan.” (Salmo 34:4) Ito nga personal nga eksperyensya ni David an nagpagios ha iya nga aghaton an iba nga ‘tilawan ngan kitaon nga hi Jehova maopay.’ *

May nahuhunahuna ka ba nga nahitabo ha imo nga nagpapakita nga hinigugma ka ni Jehova? Kon may-ada, isurat ito ha ubos. Tigamni: An imo eksperyensya diri kinahanglan magin ekstraordinaryo. Hunahunaa an talagudti nga mga bendisyon nga imo nakakarawat kada adlaw, nga an iba hito bangin diri mo ngani napapansin.

․․․․․

Bangin an imo mga kag-anak an nagtutdo ha imo mahitungod ha Biblia. Kon amo, bendisyon ito. Bisan pa hito, kinahanglan mo maningkamot nga magkaada personal nga pakigsangkay ha Dios. Kon waray mo pa ito buhata, puydi mo gamiton an mga impormasyon dinhi hini nga kapitulo para mahimo ito. Bibendisyonan ni Jehova an imo mga paningkamot. An Biblia nasiring: “Padayon nga mangaro, ngan tatagan kamo; padayon nga mamiling, ngan makakaagi kamo.”—Mateo 7:7.

[Footnote]

NANGUNGUNA NGA TEKSTO

“Malipayon an mga mahunahunaon han ira espirituwal nga panginahanglan.”—Mateo 5:3.

TIP

Pagbasa hin upat ka pahina han Biblia kada adlaw, ngan matatapos mo ito pagbasa ha sulod hin mga usa ka tuig.

MAARAM KA BA . . . ?

An imo pagbasa hini nga libro ngan an pagsunod ha basado ha Biblia nga mga sagdon hini, nagpapakita nga hi Jehova interesado ha imo.—Juan 6:44.

AN PLANO KO BUHATON!

Para mas magpahimulos ha akon personal nga pag-aram ha Biblia, an akon bubuhaton ․․․․․

Para mas magin regular an akon pag-ampo, an akon bubuhaton ․․․․․

An karuyag ko ipakiana ha akon (mga) kag-anak mahitungod hini nga topiko amo an ․․․․․

ANO HA IMO PANHUNAHUNA?

● Ano an imo bubuhaton basi mas ma-enjoy mo an imo personal nga pag-aram ha Biblia?

● Kay ano nga karuyag ni Jehova mamati ha mga pag-ampo han diri perpekto nga mga tawo?

● Paonan-o mo mapapauswag an kalidad han imo mga pag-ampo?

[Blurb]

“Han bata pa ako, pauroutro la an akon mga pag-ampo. Yana, naniningkamot ako nga ig-ampo an mag-opay ngan magraot nga nahitatabo ha akon kada adlaw. Tungod kay iba-iba an nahitatabo ha akon kada adlaw, diri nagigin pauroutro an akon mga pag-ampo.”​—Eve

[Kahon/​Retrato]

Admi an Imo Biblia

1. Pagpili hin istorya ha Biblia nga karuyag mo basahon. Pag-ampo para hin kinaadman basi masabtan mo an imo ginbabasa.

  2. Basaha hin maopay an istorya. Ayaw pagdali. Gamita an imo imahinasyon samtang nagbabasa ka. Imadyina nga kaupod ka ha eksena: Kitaa an aksyon, pamatii an mga tingog han mga karakter, hamota an hangin, tilawi an pagkaon, ngan iba pa. Himoa nga buhi ha imo hunahuna an istorya!

3. Hunahunaa an imo pa la ginbasa. Ipakiana ha imo kalugaringon an mga pakiana sugad han masunod:

● Kay ano nga igin-upod ni Jehova ha iya Pulong ini nga istorya?

● Hin-o nga mga karakter an angay subaron, ngan hin-o an nagpapahamangno nga mga ehemplo?

● Ano nga mapulsanon nga mga leksyon an akon hibabaroan hini nga akon ginbasa?

● Ano an igintututdo ha akon hini mahitungod kan Jehova ngan han iya mga paagi?

4. Pag-ampo hin halipot ngadto kan Jehova. Isumat ha iya an imo nahibaroan ha imo pag-aram ha Biblia ngan kon paonan-o mo ito gagamiton ha imo kinabuhi. Pasalamati pirme hi Jehova han regalo niya ha imo—an iya Pulong, an Baraan nga Biblia!

[Retrato]

“An imo pulong lampara ha akon tiil, ngan lamrag ha akon dalan.”—Salmo 119:105.

[Kahon/​Retrato]

Unaha an Mas Importante

Damu ba an imo buruhaton salit waray ka panahon ha pag-ampo o pag-aram han Biblia? Kasagaran, nakadepende ito ha kon hain an imo gin-uuna.

Testingi ini: Kuha hin balde, ngan sudli ito hin dagku nga bato. Sunod, butangi ito hin baras—tubtob nga mapuno. An balde yana puno na hin bato ngan baras.

Yana, ihuwad an sulod han balde pero ayaw ilabog an baras ngan mga bato. Baliktara an proseso: Unaha pagsulod ha balde an baras katapos, ibutang an mga bato. Waray na umigo? Tungod ito kay hini nga higayon, gin-una mo pagsulod ha balde an baras.

Ano an punto? An Biblia nasiring: ‘Siguroha an mas importante nga mga butang.’ (Filipos 1:10) Kon uunahon mo an gudtiay nga mga butang sugad han kaliawan, aabaton mo nga waray na lugar ha imo kinabuhi an dagku nga mga butang—an espirituwal nga mga buruhaton. Pero kon susundon mo an sagdon han Biblia, makikita mo nga may-ada ka panahon para ha buruhaton han Ginhadian ngan ha pipira nga kaliawan. Depende la ito kon ano an imo siyahan nga ibubutang ha imo balde!

[Retrato]

An pakigsangkay ha Dios pariho hin tanaman ha balay nga kinahanglan atamanon para tumubo