NI RINÍʼ BINNI.

Stale binni ná gastiʼ naca quítecaʼ para guni ganarcaʼ bueltu pa cadi cucheenecaʼ ley. Ne xcaadxi binni ná bueltu ni ridopa lu ca rifa ni runi gobiernu ca ruseendacabe ni para gacanécabe binni ni caquiiñeʼ ni.

NI RINÍʼ BIBLIA.

Biblia qué ruzeeteʼ diʼ de quite binni para gapa stale bueltu. Peru rudiini conseju ni zacané laanu gánnanu ximodo ruuyaʼ Dios ni.

Stale binni riguite ca juegu riʼ para guni ganarcaʼ stale bueltu, peru cadi nga nga ni bisiidiʼ Jesús, laa guníʼ: «Lagapa laatu ti cadi guicá íquetu gápatu jma» (Lucas 12:15). Ni dxandíʼ la? stale binni riguite para gápacaʼ jma bueltu. Neca huaxiéʼ binni runi ganar lu ca juegu ca, peru ca lugar ra raca ca ni nacaʼ zanda guni ganar binni stale bueltu. Cumu racalaʼdxiʼ binni gaca ricu la? nga runi riguítecaʼ bueltu stiʼ ca lu ca apuesta ca. Qué racané ca juegu riʼ binni cadi guicá íquecaʼ gápacaʼ jma, sínuque rucaani laacaʼ gacaláʼdxicaʼ guni ganarcaʼ jma bueltu sin gúnicaʼ dxiiñaʼ.

Lu ca juegu riʼ ruyubi binni puru para laasi, ni racaláʼdxicaʼ nga gáxhacaʼ guiráʼ bueltu ni napa sti binni. Peru Biblia ná «cada tobi guyubi modo gacané stobi ne cadi guyubi para laasi» (1Corintios 10:24). Tobi de ca chii mandamientu ca ná: «Cadi gacaláʼdxiluʼ gápaluʼ xiixa stiʼ sti binni» (Éxodo 20:17). Ora racalaʼdxiʼ tuuxa guni ganar la? ribeza guniti sti binni bueltu ni napa para guiaanané ni.

Laaca cayabi Biblia laanu cadi guidúʼyanu suerte casi xiixa ni zacané laanu. Tiempu bibani ca israelita que, guyuu tu laa maʼ qué ñapa diʼ fe Dios me bizulú biʼniʼ adorarcaʼ «dios ni ribee suerte». ¿Ximodo biiyaʼ Dios nga yaʼ? Laabe guniʼbe: «Qué nusaana de ñúnitu cosa malu nezaluáʼ ne gulitu gúnitu ca cosa ni qué rusiecheʼ naa» (Isaías 65:11,12).

Ndaaniʼ caadxi guidxi rutópacabe bueltu ni riaana lu ca juegu riʼ para iquiiñeni ndaaniʼ guidxi ca; casi iquiiñeni para educación o para xcaadxi cosa ti gapa guidxi ca ni iquiiñe. Peru gastiʼ naca modo iquiiñe bueltu riʼ, ca juegu ra riguite binni apuesta rucaa ca ni laacaʼ guicá íquecaʼ gápacaʼ jma, guyúbicaʼ puru si para laasicaʼ ne guni ganarcaʼ bueltu sin gúnicaʼ dxiiñaʼ.

«Cadi gacaláʼdxiluʼ gápaluʼ xiixa stiʼ sti binni» (Éxodo 20:17).

NI RINÍʼ BIBLIA.

Biblia ná: «Ca ni ricá ique gaca ricu la? riábacaʼ lu tentación ne lu trampa, rápacaʼ stale deseu malu ni runiná laacaʼ ne redaneni stale yuubaʼ lu xpídacaʼ ne ruutini laacaʼ» (1 Timoteo 6:9). Ora ricá ique binni gapa jma rucaa ni laacaʼ quítecaʼ para guni ganarcaʼ stale bueltu. Cumu nabé malu ni la? Biblia ná caquiiñeʼ gucáʼnanu ni (Efesios 5:3).

Rucaa ca juegu riʼ binni guni ganarcaʼ bueltu sin gúnicaʼ dxiiñaʼ, ne zacá nga ruzulú rannaxhiicabe bueltu. Ne Biblia ná «guendarannaxhii bueltu nga xcu guiráʼ cosa malu». Pa guicá ique binni guni ganar jma bueltu la? zanda guniná ni laa, zanda gueeda gapa ansiedad o dede gusirá ni fe ni napa Dios. Ne Stiidxaʼ Dios ná ca ni maʼ biaba lu trampa riʼ «maʼ bininacaʼ laacaʼ» (1 Timoteo 6:10).

Ca binni ni ricá ique gapa jma nisi bueltu cá íquecaʼ ne qué ribánicaʼ nayecheʼ. Eclesiastés 5:10 ná: «Tuuxa ni riuulaʼdxiʼ gapa plata la? qué zadxá neca gapa stale plata, ne tuuxa ni riuulaʼdxiʼ gapa stale cosa risaca laaca qué zadxá neca ñapa jma».

Stale millón de binni ni gudxite juegu para guni ganarcaʼ stale bueltu yanna riʼ maʼ qué guidxélacaʼ xi gúnicaʼ. Casi ndaaniʼ guidxi Estados Unidos, nuu millón de binni ni napa viciu quite para guni ganar stale bueltu.

Proverbios 20:21 rusiidiʼ laanu ca binni ni ricá ique gapa jma zanda gácacaʼ ricu, peru qué zaguu Dios ndaayaʼ laacaʼ. Ne ca binni ni napa viciu quite zanda gueeda guzaabicaʼ stiʼ binni o guníticaʼ guiráʼ ni nápacaʼ casi ca xhamígucaʼ, dxiiñaʼ sticaʼ ne familia sticaʼ. Nga runi nabé galán chinándanu ca conseju ni zeeda lu Biblia purtiʼ rapa ca ni laanu para cadi gacananu pur ca juegu ca.

«Ca ni ricá ique gaca ricu la? riábacaʼ lu tentación ne lu trampa, rápacaʼ stale deseu malu ni runiná laacaʼ ne redaneni stale yuubaʼ lu xpídacaʼ ne ruutini laacaʼ» (1Timoteo 6:9).