Лука иҟынтә ажәабжь бзиа 1:1—80
1 Имаҷҩымкәа ауаа иҟалаз ахҭысқәа ҭҵааны, ашәҟәы ианырҵарц рҽазыркит. Ҳара урҭ ахҭысқәа шыҟалаҵәҟьаз агәра ганы ҳаҟоуп,
2 избанзар иаҳзеиҭазҳәаз Анцәа иажәабжь зҳәоз роуп. Дара урҭ ахҭысқәа рыблақәа рыла ирбеит.
3 Акыр иаԥсоу Феофи́л, саргьы исыӡбеит зегь бзианы иҭҵааны, иҟаз шыҟаз еишьҭаргыланы иузысҩырц,
4 еилукааз шиашоу агәра ганы уҟазарц азы.
5 Иудеиатәи аҳ И́род* ихаан дыҟан А́виа игәыԥ иаҵанакуаз Заха́риа зыхьӡыз аԥшьаҩы. Иԥҳәыс Елизаве́та лыхьӡын, лара Ааро́н ишьҭра датәын.
6 Рҩыџьагьы Анцәа иҿаԥхьа ииашаз уаан, иуаа цқьақәан, избанзар Иегова* изакәанқәеи иԥҟарақәеи ак агмыжькәа инарыгӡон.
7 Дара ахшара дрымаӡамызт, избанзар Елизаве́та ахшара длоуамызт, рықәрагьы акыр инеихьан.
8 А́виа игәыԥ иатәыз аԥшьаҩцәа рмаҵзура аамҭа анааи, Заха́риа ԥшьаҩык иеиԥш Анцәа иҿаԥхьа имаҵзура наигӡон.
9 Аԥшьаҩцәа ирымаз аҵас инақәыршәаны, уажәы иара иоуп иалхыз, Иегова иныҳәарҭа дыҩналаны афимиам иблырц азы.
10 Афимиам анибылуаз аамҭазы, ажәлар адәахьы Анцәа иҳәон.
11 Ус, иҿаԥхьа Иегова имаалықь даацәырҵит. Амаалықь афимиам ахьырбылуаз акәырбаннагарҭа арыӷьарахь ала дгылан.
12 Заха́риа уи даниба, дшәан, иҟаиҵара изымдыруа дықәхеит.
13 Аха амаалықь иҳәеит: «Умшәан, Заха́риа, Анцәа уҳәара иаҳаит. Уԥҳәыс Елизаве́та аԥа длоуеит, уи Иоанн ихьӡуҵоит.
14 Ахәыҷы данилак, даараӡа угәырӷьалоит, угәырӷьарагьы ҳәаак аиуам, иира иеигәырӷьогьы рацәаҩхоит.
15 Иара Иегова иҿаԥхьа уаҩ дук иакәхоит. Аха аҩы ма иџьбароу даҽа рыжәтәк ахаан иҿахьы инеимгароуп. Уи диаанӡагьы иԥшьоу адоуҳа иоуеит.
16 Иара израильаа аӡәырҩы Рынцәа Иегова иахь ахынҳәра дрыцхраауеит,
17 насгьы Илиа идоуҳаи имчи иманы Анцәа иаԥхьа дцоит, абацәа рыгәқәа ахәыҷқәа рыгәқәа еиԥш иҟаиҵарц азы, имӡырҩуа ауаа аҟәышра змоу уаа иашақәаны иҟаиҵарц азы. Убасала иара урҭ Иегова имаҵ аура иазхиоу жәларны иҟаиҵоит».
18 Заха́риа амаалықь иеиҳәеит: «Ҟалашьас иамоузеи ари? Сара шьҭа сажәхьеит, сыԥҳәысгьы лықәрахь днеихьеит».
19 Амаалықь иҳәеит: «Сара Анцәа иҿаԥхьа игылоу Гавриил соуп. Иара ари ажәабжь бзиа уасҳәарц азы сааишьҭит.
20 Аха сажәақәа рыгәра ахьумгаз азы, иуасҳәаз зегь наӡаанӡа узымцәажәо, уҿаҳаны уаанхоит. Иуасҳәаз акәзар, уи ианаамҭоу инаӡоит».
21 Ажәлар Заха́риа изыԥшын. Дара даараӡа иџьаршьон абриаҟара аныҳәарҭа дахьыҩнахаз.
22 Даныҩныҵ, дышзымцәажәоз рбеит. Усҟан еилыркааит, аныҳәарҭаҿы дзыршанхаз ак шибаз. Заха́риа дахьзымцәажәоз азы, инапқәа рыла акәын ииҭахыз шреиҳәоз.
23 Имаҵзура аамҭа анынҵәа, иҩныҟа дцеит.
24 Ԥыҭрак ашьҭахь иԥҳәыс Елизаве́та лцәалтәымкәа дҟалеит. Фымз рыҩныҵҟа аҩны ддәылҵӡомызт. Лара илҳәон:
25 «Абар Иегова сара сзы иҟаиҵаз. Иара сигәалашәеит, исхыз ахьымӡӷ схихырц азы».
26 Фымз данырҭагылаз, Анцәа амаалықь Гавриил Галилеиа иҟаз Назарет захьӡыз ақалақь ахь дишьҭит,
27 ахаҵа дзымбацыз Мариа зыхьӡыз аҭыԥҳа лахь. Лара Давид ишьҭра иатәыз Иосиф зыхьӡыз ахаҵа дҳәаны диман.
28 Амаалықь даннеи, ус леиҳәеит: «Бзиара бымаз, аҳаҭыр ду иаԥсахаз аԥҳәызба. Иегова дбыцуп!»
29 Амаалықь иажәақәа Мариа лгәы дырхыҭхыҭит, ииҳәаз иаанагарызеишь ҳәагьы дхәыцуа далагеит.
30 Аха амаалықь ус леиҳәеит: «Бымшәан, Мариа, Анцәа дбықәныҳәеит.
31 Бара бцәабтәымкәа бҟалоит, аԥа дбоуеит, иагьихьӡыбҵоит Иисус.
32 Иара Хыхь иҟоу Анцәа Ду Иԥа ҳәа изырҳәалоит, иеиԥшугьы аӡә дҟалом. Анцәа Иегова уи иаб Давид иаҳраҭыԥ аҿы диртәоит.
33 Иара Иаков иҩнаҭа иатәу наӡаӡа Аҳас дрымазаауеит, Иаҳрагьы ҵыхәаԥҵәара амамкәа, наунагӡа иҟазаауеит».
34 Аха Мариа амаалықь диазҵааит: «Ҟалашьас иамоузеи уи, ахаҵа дсымбацзар?»
35 Амаалықь ус леиҳәеит: «Бара иԥшьоу адоуҳа боуеит, Хыхь иҟоу Анцәа Ду имч биҭоит, убри аҟынтә ибоуа ахәыҷы дыԥшьахоит, Анцәа Иԥа ҳәагьы изырҳәоит.
36 Абар быуа Елизаветагьы лықәра шцахьоугьы, аԥа длоураны дыҟоуп. Лара ахшара дызмоуа ҳәа шылзырҳәозгьы, лцәалтәымкәа дҟалеит, фымз дырҭагылоуп,
37 избанзар Анцәа илымшо ҳәа акгьы ыҟаӡам».
38 Усҟан Мариа ус лҳәеит: «Сара Иегова имаҵуҩ соуп. Исзуҳәаз зегь ишуҳәаз еиԥш иҟалааит». Нас амаалықь дцеит.
39 Ԥыҭрак ашьҭахь Мариа лҽааиқәлыршәан, иудатәи ашьхаҿы ишьҭаз ақалақь ахь дыццакы-ццакуа ддәықәлеит.
40 Заха́риа иҟны даннеи, Мариа Елизаве́та аԥсшәа лалҳәеит.
41 Убри аминуҭ азгьы Елизаве́та лымгәарҭа иҭаз асаби дышьҭыԥеит, убасҟан иԥшьоу адоуҳа лоуит.
42 Нас лыбжьы ҭыганы илҳәеит: «Бара Анцәа ииныҳәаз ԥҳәысуп, бхәыҷгьы дныҳәоуп.
43 Сызлаԥсахазеи сара абри аҩыза аҳаҭыр, Исықәиҭу иан сара сахь даартә еиԥш?
44 Быбжьы шаасаҳаз еиԥш, сымгәарҭа иҭоу асаби дгәырӷьан, дышьҭыԥеит.
45 Насыԥ бымоуп бара, ибаҳаз зегь агәра ахьыбгаз, избанзар Иегова ибеиҳәаз зегь наӡоит».
46 Мариа илҳәеит: «Сара Иегова дҳараскуеит.
47 Сеиқәырхаҩ Сынцәа исзыҟаиҵаз сеигәырӷьоит,
48 избанзар иара дгәеиҭеит ауаа ирылукаауа иҟам имаҵуҩы. Уажәшьҭа абиԥарақәа зегьы насыԥ змоу ҳәа сзырҳәалоит,
49 избанзар амч ду змоу Анцәа зеиԥшыҟам аус џьашьахә сзыҟаиҵеит. Иара ихьӡ ԥшьоуп,
50 ицәшәо зегьы еснагь ирыцҳаишьоит.
51 Иара имчала аус дуқәа ҟаиҵеит, зхы ҳаразкуаз еиԥхьирттеит,
52 ауаа дуқәа раҳраҭыԥ иахиҳәеит, иӷарыз ауаа ҳареикит.
53 Амла иакуаз рызхара рҿеиҵеит, ибеиаз ракәзар, рнапы ҭацәны ишьҭит.
54 Иара дааит имаҵзуҩы Израиль дицхраарц, ииҳәаз ажәа ахаан ишихамышҭуа ааирԥшырц,
55 избанзар ҳабацәа иреиҳәахьан, Авраами уи ихылҵуа ажәлари еснагь ишрыцҳаишьало».
56 Мариа хымз раҟара Елизаве́та лҿы дыҟан, нас лыҩныҟа дцеит.
57 Елизаве́та лаамҭа анааи, аԥа длоуит.
58 Агәылацәеи аҭынхацәеи Иегова Елизаве́та дышрыцҳаишьаз раҳаит, даргьы уи ажәабжь даара иаргәырӷьеит.
59 Ахәыҷы 8 мшы анихыҵ, дара иаԥхьатә хырсарц иааит, иаб ихьӡ Заха́риа ихьӡырҵарцгьы рҭахын.
60 Аха иан ус лҳәеит: «Мап, Иоанн ихьӡхоит».
61 Дара ирҳәеит: «Быуацәа рыбжьара ус зыхьӡу аӡәгьы дыҟаӡам».
62 Усҟан ахәыҷ иаб рнапқәа рыла адыргақәа ирбаны: «Ихьӡуҵарц иуҭахузеи?» — ҳәа иазҵааит.
63 Иара ӷәыцәмаҟьак сзаажәг ҳәа дрыҳәеит. Ианаарга, ус аниҵеит: «Ахәыҷы Иоанн ихьӡхоит». Зегьы уи даараӡа иџьаршьеит.
64 Убри аминуҭ азы изымцәажәоз Заха́риа дцәажәо дҟалеит, Анцәа ирҳаракрагьы далагеит.
65 Усҟан рааигәа-сигәа инхоз зегь шәеит. Иҟалаз иудеиатәи ашьхақәа рҿы ишьҭаз ақалақь зегь иахыҵәеит.
66 Уи заҳауаз зегьы ргәы иҭахәыцуан, иагьырҳәон: «Дызусҭахода ари ахәыҷы дандухалак?» Дара ирбон Иегова ахәыҷы дышицыз, убри азоуп ус зырҳәоз.
67 Ахәыҷы иаб Заха́риа иԥшьоу адоуҳа иоун, абри аҩыза аԥааимбаражәа иҳәеит:
68 «Аҽхәаԥхьыӡ игымзааит израильаа Рынцәа Иегова, избанзар иара ижәлар ихамышҭӡеит, ахақәиҭрагьы риҭеит.
69 Иара имаҵзуҩы Давид ишьҭра иатәу аиқәырхаҩ ӷәӷәа дҳаиҭеит,
70 избанзар ажәытәан инхоз иԥшьаз аԥааимбарцәа рыла иҳәахьан,
71 ҳаӷацәеи ҳазцәымӷуи зегь рҟынтә ҳшеиқәирхо.
72 Иара, ҳабацәа ишреиҳәахьаз еиԥш, ҳрыцҳаишьоит, иԥшьоу иеиқәшаҳаҭрагьы игәалашәоит,
73 игәалашәоит дықәны ҳаб Авраам ииҭахьаз ажәа.
74 Иара дқәит, ҳаӷацәа рҟынтә ҳанеиқәирхалак ашьҭахь, ҳамшәаӡакәа ҳимҵахырхәалартә еиԥш алшара шҳаиҭо,
75 ҳаԥсы ахьынӡаҭоу гәыкала имаҵ ҳауларц, ииҭаху ҟаҳҵаларц азы.
76 Уара, сыҷкәын, Хыхь иҟоу Анцәа Ду иԥааимбар ҳәа узырҳәоит, избанзар Иегова изы амҩа урхиарц азы иаԥхьа уцоит,
77 ижәлар ирылоуҳәарц рыгәнаҳақәа анранаижьлак ишеиқәирхо,
78 избанзар Ҳанцәа гәыкала ҳрыцҳаишьоит. Уи абзоурала, амра ангыло еиԥш, алашара ҳхаирԥхоит,
79 алашьцареи аԥсра ашәшьыреи иҵоу ауаа алашара рбарц. Уи алашара аҭынчра амҩа ҳаныларц азы иҟаҵатәу ҳнарбоит».
80 Ахәыҷы изҳауан, Анцәа имч алагьы дыӷәӷәахон. Иара израильтәи ажәлар Анцәа иажәабжь рылаҳәара далагаанӡа, ацәҳәыраҿы дынхон.
