АМУЗЫКА ажәытәтәи Израиль акультура аҿы ихадаз ароль ааннакылон. Абиблиаҿы лассы-лассы рыӡбахә ҳәоуп аинструменталтә, иара убас авокалтә музыка. Иԥшьоу Аҩыра ажәабатәи ахәҭа аҟара — уи шәақәоуп. Урҭ рҟынтә зегь раасҭа еицырдыруа Аԥсаломқәеи, Соломон иашәеи, Аҵәыуареи роуп. Иџьашьатәӡам шәҟәык аҿы абас ахьану: «Абиблиа иаҳнарбоит амузыка ажәлар рыԥсҭазаара иалаҵәаны ишыҟаз» a.

Амузыка аԥсҭазаараҿы. Израильаа амузыкала ремоциақәа аадырԥшуан (Ис. 30:29). Аҳ иаҳраҭыԥ анааникылоз, аибашьрақәа рҿы аиааирақәа аныргоз, насгьы аныҳәақәа раан аҳәса аҵәҵәақәа змоу адаул иасуан, игәырӷьо ашәа рҳәон, икәашон (Аӡб. 11:34; 1 Сам. 18:6, 7; 1 Аҳ. 1:39, 40). Аӡә даныԥсуаз, израильаа агәаҟашәақәа рҳәон (2 Аш. 35:25). Макклинтоки Стронги ренциклопедиақәа рҿы ишҳәоу еиԥш, «ауриацәа даара амузыка бзиа избоз жәларын».

Амузыка аҳ иаҳҭынраҿы. Израильтәи аҳцәа амузыка даара бзиа ирбон. Саул Давид иаҳҭынрахьы дигеит, уи аҩымаа аирҳәаларц азы (1 Сам. 16:18, 23). Давид аҳас даныҟала, иара амузыкатә инструментқәа инапала иҟаиҵон, ашәақәа ихәыцуан, насгьы аоркестр еиҿикааит. Ԥыҭрак ашьҭахь уи аоркестр Иегова иныҳәарҭаҿы амузыка адырҳәон (2 Аш. 7:6; Ам. 6:5). Аҳ Соломон иаҳҭынраҿы ахацәагьы аҳәсагьы ашәа рҳәон (Еккл. 2:8).

Амузыка Анцәа имҵахырхәараҿы. Амузыка Иегова имҵахырхәараҿы ихадоу аҭыԥ ааннакылон. Иерусалимтәи аныҳәарҭаҿы 4 000-ҩык амузыкарҳәаҩцәа ыҟан (1 Аш. 23:5). Урҭ абыкьқәеи, акимвалқәеи, аҩымаақәеи, егьырҭ еиуеиԥшым арахәыцтә рҳәагақәеи адырҳәон (2 Аш. 5:12). Иегова музыкала дҳаразкуаз урҭ аҟазара злаз ашәаҳәаҩцәа рымацара ракәӡамызт. Израильаа есышықәсатәи аныҳәақәа азгәарҭарц азы Иерусалимҟа амҩа ианықәыз, Хыхь ихало рашәақәа рҳәон (Аԥсал. 120—134). Иудеиатәи анапылаҩыратә хыҵхырҭақәа изларҳәо ала, Иҳақәиҭу иуаххьа аан израильаа Халлел b ҳәа захьӡу Аԥсаломқәа рҳәон.

Анцәа имаҵзуҩцәа рзы уаанӡа еиԥш уажәгьы амузыка даара ихадоуп (Иак. 5:13). Ашәақәа Иегова имҵахырхәара иахәҭакуп (Еф. 5:19). Амузыка ҳашьцәеи ҳаҳәшьцәеи ҳареи ҳаиднакылоит (Кол. 3:16). Иара убас уи ҳацхраауеит ауадаҩрақәа рыхгара (Аус. 16:25). Шаҟа ибзиоузеи амузыка ахьҳамоу! Уи абзоурала Иегова иахь иҳамоу ахаҵареи абзиабареи ааҳарԥшлар ҳалшоит.