1, 2. Gin matek ango ma Elia onongo myero otim, dok i yo ango ma en onongo pat ki Akab?

ELIA onongo mito ni eleg kene bot Wonne me polo. Ento lwak dano ma gitye kangete onongo pud guneno lanebi me ada-ni ka lwongo mac ki i polo, dok ngene kene ni jo mapol onongo gitye ki miti me rwot ineka aye. Ma peya Elia oito i wi Got Karmel me lega bot Lubanga Jehovah kakene, gin mo matek onongo tye ma myero en otim. En omyero olok ki Kabaka Akab.

² Jo aryo-ni onongo gipat mada. Akab, ma oruko ruk me deyo pa kabaka, onongo tamo pire kene, tamme goro, dok ongak woko ki i woro me ada. Elia oruko bongo ma lunebi giruko—bongo ma kite pe tek, gwok nyo laa lee nyo bongo me yer kinaga nyo yer dyel. En obedo ngat ma cwinye tek, ma lagen, dok tye ki niye matek. Nino meno ma onongo dong tye ka tum-mi onyuto kodi nga ma jo aryo-ni gubedo.

3, 4. (a) Pingo ninone pe obedo maber bot Akab ki jo mukene ma giworo Baal? (b) Lapeny ango ma wabinyamogi?

³ Ninone pe obedo maber bot Akab ki jo mukene ma giworo Baal. Dini ma Akab ki dakone, Daker Jejebel gunyayo i kaka apar me ker pa Icrael onongo kityeko turo kerone woko. Goba pa Baal onongo kinyuto ka maleng. En lubanga ma pe kwo-ni pe omedo ki moko mac matwal me gamo lega ma lunebine gulego ki kwok matino, kun girubo ki myel, ki ngolo komgi-gu. Baal pe omedo ki gwoko jo 450 magi ma jwerogi obedo ma oporre mada. Ento lubanga me goba-ni opoto i gin acel mukene, dok peko meno onongo dong kicok cobone. Pi mwaki adek, lunebi pa Baal gukwayo lubangagi pi giko two pa piny ma okelo can madit i lobogi, ento kulu, Baal pe omedo ki timone. Ki tungcel, Jehovah onongo cok nyuto ni en Lubanga me ada ki cwalo kot.—1 Luker 16:30–17:1; 18:1-40.

 ⁴ Awene kono ma Jehovah onongo bitimo meno? Ngo ma Elia onongo obitimo ka en woto ki kurone? Dok ngo ma watwero pwonyone ki bot laco man me niye? Kong wanenu gin mutimme ka wanyamo lokke.—Kwan 1 Luker 18:41-46.

5. Ngo ma Elia owaco ki Akab ni otim, tika onongo nen calo Akab opwonyo gin mo ki i gin ma otimme i nino meno?

⁵ Elia obino bot Akab ci owacci: “Cit dong ka cam ki ka mat, pien dwan kot ma mito cwer dong mor winnye.” Kabaka man ma kite rac-ci tika opwonyo gin mo ki i gin ma otimme i nino meno? Lok ma kicoyo pe tito, ento lok mo ma nyuto ngut, nyo ni en okwayo lanebi-ni ni oleg Jehovah pi kica bene pe. Akab mere “ocito woko ka cam ki ka mat.” (1 Luker 18:41, 42) Elia kono?

6, 7. Ngo ma Elia olego pire, dok pingo?

⁶ “Elia ocito malo i wi got Karmel, okulo wiye piny i ngom, orwako wiye i kin conge.” Ento ma Akab ocito mere ka pongo iye ki dek, Elia obedo ki kare me lega bot Wonne me polo. Go kong kit me mwolo ma kitito kany—Go cal pa Elia  ma ogungo okulle wa piny kun wiye tye cok ki conge. Elia onongo tye ka timo ngo? Ngene kene. Buk pa Yakobo 5:18, tittiwa ni Elia olego ni two pa piny ogik woko. Nen calo en olego lega ma kit meno i wi Got Karmel.

⁷ Con kong, Jehovah onongo owacci: “An dong abicwalo kot i lobo.” (1 Luker 18:1) Dong Elia olego pi cobbe pa miti pa Jehovah, kit ma Yecu opwonyo jo ma lube me lega pi gin acel-li mwaki ma romo alip acel lacen.—Mat. 6:9, 10.

8. Lanen pa Elia pwonyowa ngo i kom lega?

⁸ Lanen pa Elia-ni pwonyowa jami mapol i kom lega. Gin ma obedo dit i tam pa Elia obedo cobbe pa miti pa Lubanga. Ka watye ka lega, wiwa myero opo ni: “Ka walegge gin mo kun walubo gin ma en [Lubanga] mito, ci en winyo legawa.” (1 Jon 5:14) Dong tye ni, omyero wange miti pa Lubanga wek waleg i yo ma rwatte kwede—man nyuto ni omyero waket kwano Baibul obed gin me nino ducu i kwowa. Elia gire onongo mito ni two pa piny-nyi ogik woko, pi peko ma jo tugi onongo gitye ka limone. Cwinye myero obed ni opong ki pwoc i kare ma oneno tango ma Jehovah otimo i nino meno. I yo acel-lu, wan bene wamito ni legawa onyut pwoc ma tye i cwinywa kacel ki parwa pi ber bedo pa jo mukene.—Kwan 2 Jo Korint 1:11; Jo Pilipi 4:6.

9. Ngo ma Elia owaco ki laticce ni otim, dok kit aryo ango ma wabiloko iye?

⁹ Elia obedo labongo akalakala ni Jehovah bigiko two pa piny-nyi, ento onongo pe ngeyo awene ma Jehovah bigikone kwede. Dong ngo ma lanebi-ni otimo? Nen gin ma lok ma kicoyo waco: “Owaco bot laticce ni, ‘Cit kong icinen yo tung nam.’ Ka ocito woko oneno, ci owacci, ‘Gin mo pud peke.’ Elia dok owacce ni, ‘Cit doki’, tyen abiro.” (1 Luker 18:43) Lanen pa Elia-ni pwonyowa ki lok aryo. Me acel, lanebi-ni obedo labongo akalakala. Ki dok obedo ngat ma kiyo piny.

10, 11. (a) Elia onyuto ni pe etye ki akalakala mo i kom cikke pa Jehovah nining? (b) Pingo watwero bedo labongo akalakala kumeno?

¹⁰ Kit ma Elia obedo labongo akalakala i cikke pa Jehovah-ni,  en oyenyo lanyut ma nyuto ni Jehovah dong cok cwalo kot. Ocwalo laticce malo i wi cere nyo tur me ngiyo te polo pi lanyut mo me kot. Ka laticce odwogo, ci omiye ripot man ma pe mit-ti: “Gin mo pud peke.” Te polo onongo tye maleng, dok pol mo onongo pe malo. Ento tika iniang gin mo mapat mada? Wi opo ni Elia onongo owaco bot Kabaka Akab ni: “Dwan kot ma mito cwer dong mor winnye.” Lanebi-ni onongo twero loko gin ma kuman nining kun pol kot mo pe nen?

¹¹ Elia ongeyo pi cikke pa Jehovah. Macalo lanebi ki lacungo pi Jehovah, en onongo pe tye ki akalakala ni Lubanga bicobo Lokke. Elia pe obedo ki akalakala—ma omiyo en obedo calo onongo dong owinyo dwan kot. Man romo poyo wiwa i kom gin ma Baibul loko i kom Moses: En “ociro matek, macalo en neno Lubanga ma pe nen.” Lubanga tika tye ada kumeno boti? En miniwa tyen lok mapol ma miyo waketo niye ma kit meno i kome ki i kom cikkene.—Ibru 11:1, 27.

12. Elia onyuto nining ni ekiyo piny, dok en otimo ngo i kare ma owinyo ni latin pol mo onen?

¹² Doki, nen kit ma Elia obedo ma wange twolo kwede. En ocwalo laticce me dok cen, pe kicel nyo kiryo, ento tyen abiro kulu! Waromo goyo cal pa laticce ma ool ki dok cen tyen mapol, ento Elia obedo ki gen pi lanyut mo, dok pe oilo cinge. Motmot, i nge longene me tyen abiro, laticce odwoko ripot ni: “Aneno latin pol mo otinnge ki i nam, tidi rom ki cing dano keken.” Tika itwero goyo cal latic-ci ma oryeyo bade kun tiyo ki opany cinge me nyuto dit pa pol ma tye ka bino ki i te polo i wi Nam Madit? Latic-ci myero obed ni ocayo woko. Ento ki bot Elia, pol-li onongo obedo lanyut madit. En ociko laticce ki lok oyotoyot: “Cit bot Akab, iciwacce ni, ‘Yub gadigadini idok gang wek kot pe ogengi wot!’”—1 Luker 18:44.

13, 14. (a) Watwero lubo lanen me kiyo piny pa Elia nining? (b) Tyen lok ango ma watye kwede me kwo calo kare dong odic woko?

¹³ Dok aye, Elia onyuto lanen madit piwa. Wan bene wakwo i kare ma Lubanga cok bicobo yubbe ma otito. Elia okuro agikki me two pa piny; Lutic pa Lubanga i kare-ni gikuro agikki me lobo man. (1 Jon 2:17) Wang ma Jehovah okelo alokaloka meno, omyero wabed ma wakiyo piny, kit ma Elia otimo kwede-ni. Wod pa Lubanga, Yecu, omiyo tam bot jo ma lube ni: “Wubed ma wangwu twolo, pien pe wungeyo nino ma Rwotwu bibino iye.” (Mat. 24:42) Yecu mono onongo tye  ka wacci jo ma lube bibedo i col piny i lok me bino pa agikki? Pe, pien en oloko mada i kom kit ma lobo bibedo kwede ka agikki piny dong tye cok. Wan ducu watwero neno cobbe pa lanyut me “agikki piny.”—Kwan Matayo 24:3-7.

¹⁴ But lanyut-ti acel acel miyowa twon caden madit adada. Tika kodi lanyut ma kit meno miyo watiyo tic pa Jehovah ki mit kom pien kare dong odic woko? Latin pol ma onen i te polo-ni omiyo Elia obedo labongo akalakala ni Jehovah obitimo gin mo. Tika jami pe otimme kit ma lanebi-ni otito?

15, 16. Ngo ma otimme oyotoyot, dok ngo ma Elia myero obed ni ogeno ni Akab romo timone?

¹⁵ Lok ma kicoyo wacciwa ni: “Polo ocako cido woko ki pol oyotoyot twatwal, kun yamo kodo, ci kot ocako cwer madwong. Akab oito gadigadine odok i Jejreel.” (1 Luker 18:45) Jami ocako timme oyotoyot. I kare ma latic pa Elia waco lok pa lanebi-ni bot Akab, pol matidi-ni odoko dwong, ma ocido polo woko licuc. Yamo magwa ocako kodo. Olo dong twal, i nge mwaki adek ki nucu, kot ocwe i lobo Icrael. Ngom ma onongo otwo-ni omato kot. Ma kot odoko dwong, kulu Kicon opong, ci olwoko remo pa lunebi pa Baal ma kinekogi-ni. Jo Icrael ma wigi otang bene gunongo kare me lwoko cilo me woro Baal woko ki i lobogi.

¹⁶ Elia obedo ki gen ni kibijwero woro Baal ki i Icrael! Gwok obedo ka tamo kit ma Akab bineno kwede jami ma otimme. Tika Akab bikuno balle ci lokke ki i woro Baal? Jami ma otimme i nino meno omiyo tyen lok madit me lokke. Ngene kene ni, pe watwero ngeyo tam ma Akab obedo ka tamone i cawa meno. Lok ma kicoyo wacciwa keken ni kabaka “oito gadigadine odok i Jejreel.” Mono en opwonyo gin mo? Tika omoko tamme me loko yo me kwone? Jami ma otimme lacen nyuto ni pe. Ento, ninone onongo peya otum bot Akab—nyo bot Elia.

17, 18. (a) Ngo ma otimme i kom Elia i yo ma cito i Jejreel? (b) Ngo ma otimme i yo me ur i ngwec pa Elia me a ki i Karmel me cito i Jejreel? (Nen bene lok ma tye piny.)

 ¹⁷ Lanebi pa Jehovah ocako cito i yo acel ma Akab okwanyo. Piny-nye onongo dong ocido woko, yone bene dyak dok bor. Ento gin mo mapat dok otimme.

¹⁸ “Rwot onongo odiyo Elia ki cinge, omiyo otweyo pyere oringo kwede i nyim Akab nio kwede wa i dog gang me Jejreel.” (1 Luker 18:46) Ngene kene ni, Jehovah “onongo odiyo Elia ki cinge” i yo me tango. Jejreel onongo tye mairo 19, dok Elia pe obedo bulu. * Go kong lanebi-ni ma odolo dog bongone mabor-ri malo, kun tweyo i pyere wek tyene obed agonya, ci ongweco kun lubo yo ma odyak—ongweco madwir ma omako dok okato wa gadigadi me ker ma aguragura telo!

19. (a) Kero ki teko ma Lubanga omiyo ki Elia poyo wiwa i kom lok mene pa lunebi? (b) Ma Elia tye ka ngwec me cito i Jejreel, ngo ma en onongo ngeyo?

¹⁹ Meno obedo twon mot madit bot Elia! Nongo kodi kero, teko, ki gupu meno—nyo gwok makato kit kero mo keken ma yam en onongo i kare me bulune—myero obed ni obedo mit mada. Waromo po i kom lok pa lunebi ma loko ni jo ma lugen gibibedo ki yotkom ki kero i lobo me paradic. (Kwan Icaya 35:6; Luka 23:43) Ma Elia tye ka ngwec, en onongo ngeyo ni etye ki cwak pa Wonne, Jehovah, ma en aye Lubanga me ada!

20. Waromo nongo mot pa Jehovah nining?

²⁰ Jehovah tye ki miti madit me miyowa mot. Wayelle wunu me nongo motte ki kerowa ducu, pien pire tek adada botwa. Calo Elia, omyero wabed ma wakiyo piny, kun waneno maber gin ma nyuto ni Jehovah cok kelo alokaloka i kare man marac-ci. Calo Elia, watye ki tyen lok ducu me keto genwa i kom cikke pa Jehovah, “Lubanga me ada.”—Jab. 31:5.