1. Nyom

Dano gitye ki tam mapatpat i kom nyom kacel ki gin ma mitte wek nyom obed ki yomcwiny.

TYEN LOKKE: Lubanga aye ocako te yub me nyom, pi meno en ngeyo gin ma mitte pi jo munyomme me bedo ki yomcwiny. (Marako 10:​6-9) Yomcwiny bino ka jo munyomme-ni pe giketo cwinygi i kom gin ma gitwero nongone keken, ento i kom gin ma gitwero timone wek nyomgi obed matek. Laco ma maro dakone bigwoko dakone maber kun tere i yo me kica. Dok dako ma woro cware miyo cwak bot cware dok loko kwede i yo me kica.

TIRA ME BAIBUL TIYO: Laco mo ma nyinge Kwang ki dakone Ti, ma gia ki i lobo Vietnam, onongo gitamo ni pe gitwero bedo ki yomcwiny mo keken i nyomgi. Kwang onongo pol kare pe tero dakone i yo me kica. En owaco ni: “Onongo pe aparo kulu kit ma Ti winyo kwede dok kare ducu onongo abedo ka leyo wiye.” Ti onongo mito keto kenygi woko. En owaco ni: “Onongo awinyo calo pe dong atwero geno nyo woro cwara.”

Lacen, Kwang ki Ti gucako kwano Baibul dok gupwonyo kit me keto tira ma nonge i Jo Epeco 5:33 i tic i nyomgi. Kwang owaco ni, “Tyeng man okonya me niang ni pire tek adada me bedo lakica ki me weko Ti winyo ni kimare kun bene amine jami me kom. Ka atere kit meno, marre ki worone pira dongo matek.” Dok Ti owaco ni, “Ka amedde ki keto Jo Epeco 5:33 i tic, kun anyuto woro bot cwara, ci en bene bimedde ki mara kacel ki gwoka dok wabibedo ki kuc.”

 2. Kit me Tero Jo Mukene

Dano pol kare gitero jo mukene marac pien gia ki i rok nyo lobo mukene, ginen mapat, dinigi pat, nyo pien gibuto ki co nyo mon wadgi.

TYEN LOKKE: Baibul pe pwonyowa ni omyero wadag jo me rok nyo lobo mukene nyo co ki mon ma gitimo tim me tek gungu. Me ka meno, cuko cwinywa me woro dano ducu, labongo paro pi rokgi, lobogi, nyo kadi bed gin lucan nyo lulonyo. (Tic pa Lukwena 10:34) Kadi bed pe wacwako niyegi, nyo gin ma gitimo, ento pud watwero terogi ki kica kacel ki woro.—Matayo 7:12.

TIRA ME BAIBUL TIYO: Daniel odongo ma kipwonye ni omyero onen jo ma gia ki i Acia macalo lumonene. En odongo cwiny me adage i kom ngat mo keken ma a ki i Acia dok onongo pol kare yetogi ka orwatte kwedgi i dye lwak. Daniel owaco ni, “Onongo agengo ngeya ki waco ni atye ka cwako lobona. Pe atamo kulu ni tamma kacel ki jami ma atimo onongo rac.”

Lacen Daniel ocako kwano Baibul. Daniel owaco ni, “Onongo mitte ni alok tamma kwicikwici. Onongo mitte ni anen dano kit ma Lubanga nenogi kwede—ni wan ducu warom labongo paro pi lobo ma waa ki iye.” Daniel otito kit ma en winyo kwede i kare-ni ka orwatte ki dano. En owaco ni: “Pol kare pe aketo tamma i kom ka ma gia ki iye. I kare-ni amaro dano ducu dok atye ki lurem macok ma gia ki i but lobo-ni ducu.”

 3. Cente

Pol pa dano giyelle me doko lulonyo wek gibed ki yomcwiny kacel ki anyim maber.

TYEN LOKKE: Wamito cente, ento pe dong ni ka watye ki cente, ci nongo wabibedo ki yomcwiny kacel ki anyim maber. (Carolok 18:11; 23:​4, 5) Me ka meno, yomcwiny me ada kacel ki anyim maber jenge i kom keto i tic ryeko ma a ki bot Lubanga ma nonge i Baibul.—1 Temceo 6:​17-19.

TIRA ME BAIBUL TIYO: Laco mo ma a ki i lobo Indonesia ma nyinge Cardo, oketo cwinye ducu ka yenyo lonyo. En owaco ni, “Onongo atye ki jami ducu ma dano gimito. Onongo atuk ki dege dok awilo jami, mutoka, kacel ki odi ma welgi tek.” Ento lonyo man pe orii. Cardo owaco ni, “Ngat mo otuko diro ci okwalo cente ducu ma onongo atute matek me nongone. Onongo atiyo matek pi mwaki mapol me doko lalonyo, ento i agikkine cwinya otur adada pien adong labongo gin mo dok awinyo calo konya pe.”

Cardo ocako lubo tira ma nonge i Baibul madok i kom cente. I kare-ni en dong pe tiyo ki kerone ducu me yenyo lonyo ento oyero me kwo kwo ma rwomme lapiny. En owaco ni, “I kare-ni dong awinyo calo atye ki lonyo me ada pien atye ki wat maber ki Lubanga. Aywayo nino mot i dyewor ducu, dok atye ki yomcwiny me ada.”

 4. Tim me Buto

Dano tye ki tam mapatpat ka odok i lok me buto.

TYEN LOKKE: Baibul oketo wang coo i kom kit ma omyero wacob kwede mitiwa me buto. Lok man ni “tim kwele” kwako abor, tim me malaya, buto i kin jo ma pe gunyomme, tim me tek gungu, ki dong buto ki lee. (1 Jo Korint 6:​9, 10) Tim me buto obedo mic mua ki bot Lubanga ma en mito ni obed i kin laco ki dako ma gunyomme keken.—Carolok 5:​18, 19.

TIRA ME BAIBUL TIYO: Dako mo ma a ki i lobo Australia ma nyinge Kylie owaco ni: “I kare ma wiya nono, onongo atamo ni ka arwatte i buto, ci abiwinyo ni kimara dok abinongo gwok maber. Ento olungtukene aye otimme. Onongo awinyo marac dok cwinya tur adada.”

Lacen, Kylie opwonyo dok oketo i tic gin ma Baibul pwonyo madok i kom tim me buto. En owaco ni: “Atwero neno ni rwom me kit ma atir pa Lubanga tye me gwoka ki i arem cwiny ki peko. I kare-ni atimo jami i yo ma Jehovah mito. Man ma dong atye ki cwara, awinyo ni atye ki gwok muromo dok kimara. Keto i tic tira me Baibul oweko abwot ki i bedo ki turcwiny!”