PI MWAKI mapol, jo ma gicayo lok me Baibul gubedo ka waco ni Kabaka Belcajar, ma kiloko i kome i buk pa Daniel, pe okwo ada. (Dan. 5:1) Gubedo ki tam meno pien jo ma gigolo jami ki i ngom onongo peya gunongo gin mo keken ma moko ni Belcajar okwo ada. Ento man olokke i mwaka 1854. Pingo?

I mwaka meno, latic pa gamente me Biritic ma nyinge J. G. Taylor ogolo jami ki i wi obwur me boma me Ur macon, ma kombeddi tye tung kupiny me lobo Iraq. Ki kuno, i ot mo mabor, en onongo lobo agulu mapol. Lobo agulu magi ma borgi romo incic angwen (centimita 10), onongo kigoro komgi ki coc pa Lubabilon macon. Coc ma tye i kom lobo agulu acel tye ki lega ma kicoyo pi Kabaka Nabonidus me Babilon ki latin kayone, Belcajar ni omyero gubed kwo pi kare malac. Kadi wa jo ma gicayo lok me Baibul guye ni: Man moko ni Belcajar okwo ada.

Ento, Baibul pe gik ki tito ni Belcajar okwo keken ento tito ni obedo bene kabaka. Pi man, jo ma gicayo lok me Baibul dok gubedo ki akalakala. Me labolle, William Talbot, lacayan ma okwo i kine ka mwaka 1875 ocoyo ni jo mogo giwaco ni “Bel-sar-ussur [Belcajar] oloyo loc kacel ki wonne Nabonidus. Ento pe tye gin mo keken ma moko ni man lok ada.”

Ento kicobo pyem man i kare ma coc ma kigoro i kom lobo agulu mukene onyuto ni won Belcajar, ma en aye Kabaka Nabonidus, onongo bedo pe i boma madit pi mwaki mapol i kare mogo. Buk me Encyclopaedia Britannica owaco ni, “I kare ma Nabonidus ocito i te okono, en onongo weko kerre kacel ki monnye i cing Belcajar.” Pi meno Belcajar oloyo loc kacel ki wonne i Babilon i kare meno. Dong, Alan Millard, lagol piny ma bene kwano leb macon owaco ni pore ni “buk pa Daniel olwongo Belcajar ni ‘kabaka.’”

Ngene kene ni, macalo lutic pa Lubanga, gin ma weko wamoko ni buk pa Daniel genne dok Lubanga aye oweko kicoyo pe tye nonge ka mo mukene kono ki i Baibul keken.​—2 Tem. 3:16.