1. I yo ma nining ma Lukricitayo gitwero bedo calo yat? (Nen bene cal.)

 “YAMO pol kare pe turo yat ma twero gom.” Carolok man nyuto ni yat myero obed ki kero me gom ka yamo tye ka kodo matek wek pe otur. Wan bene omyero wagom calo yat nyo watim alokaloka ka kwo odoko tek ka wamito medde ki tic pi Jehovah ki yomcwiny. Watimo man nining? Omyero wanyut niango ki jolo alokaloka i kwowa dok bene wawor tam ma jo mukene gumoko.

2. Kit mene ma bikonyowa me jolo alokaloka, dok gin ango ma wabinyamo i pwony man?

² Wan macalo lutic pa Jehovah, omyero wabed jo ma ginyuto niango. Mitte bene ni wabed jo mamwol dok ma lukica. I pwony man, wabineno kit ma nyuto kit magi okonyo kwede Lukricitayo mogo me jolo alokaloka ma otimme i kwogi. Wabineno bene kit ma nyuto niango twero konyowa kwede. Ento mukwongo, kong wanenu gin ma watwero pwonyone ki bot Jehovah kacel ki Yecu, ma gin aye lanen maber loyo pa jo ma ginyuto niango.

3. Wangeyo nining ni Jehovah nyuto niango?

³ Kilwongo Jehovah ni obedo “Got” pien en cung matek ma pe yenge. (Nwo. 32:4) Kadi bed kit meno, en bene nyuto niango. Ka jami woto ki lokke i lobo-ni, Jehovah timo alokaloka dok bineno ni jami ducu ma en ocikke pire bicobbe. Jehovah ocweyowa i calle, pi meno en ominiwa kero me timo alokaloka ka kwowa olokke. Ki i Baibul, wanongo cik ma igi lac ma gitwero konyowa me moko tam me ryeko kadi bed watye ka kato  ki i peko ma nining. Lanen pa Jehovah kacel ki cik ma igi lac ma en ominiwa konyowa me ngeyo ni, kadi bed en obedo “Got,” Jehovah bene pud nyuto niango.

4. Mi labol ma nyuto niango pa Jehovah. (Lulevi 5:7, 11)

⁴ Jehovah nyuto niango dok yone me timo jami pe tye ki roc mo keken iye. En pe obedo ngat ma lagingi i kit ma en tero kwede ki dano. Me labolle, nen kong kit ma Jehovah onyuto kwede niango bot Luicrael. En onongo pe mito ni jo ducu gumi gityer marom aroma, kadi bed gin lucan nyo lulonyo. I kare mogo, en onongo ye ni ngat acel acel omi gityer ma rwatte ki kerone.—Kwan Lulevi 5:7, 11.

5. Mi labol ma nyuto mwolo ki kica pa Jehovah.

⁵ Mwolo kacel ki kica pa Jehovah tugo cwinye me nyuto niango. Me labolle, Jehovah onyuto ni en emwol i kare ma onongo mito jwero jo maraco ma i Codom. Jehovah otiyo ki lumalaikane me waco ki Lot ni oring woko wa i kin godi. Lot obedo ki lworo me ringo wa kunu. Pi meno, en obako doge ni kiwek en kacel ki lupacone giring i Joar, taun mo ma Jehovah onongo omoko tamme me jwerone woko bene. Jehovah onongo twero miyo rukca ni Lot myero olub gin ma En owaco-ni kikome. Me ka meno, en owinyo lok pa Lot, dok pe ojwero Joar. (Acak. 19:18-22) Mwaki miya mapol lacen, Jehovah onyuto cwiny me kica i kom jo ma gibedo i boma me Nineve. En ooro lanebi Yona me waco ki jo Nineve ma kitgi raco-ni ni kibijwero gin kacel ki boma meno woko. Ento i kare ma jo Nineve gungut, kica omako Jehovah i komgi dok pe kijwero boma meno.—Yona 3:1, 10; 4:10, 11.

6. Tit kong kit ma Yecu olubo kwede lanen pa Jehovah me nyuto niango.

⁶ Yecu olubo lanen pa Jehovah me nyuto niango. Kicwalo Yecu i lobo me tito kwena bot “jo Icrael keken, pien gitye calo romi murwenyo.” Ento en onyuto niango i kare ma tye i ticce me pwony. Me labolle, dako mo ma pe obedo Laicrael olege ni ocang nyare ma onongo “cen tye ka une marac twatwal.” Ki cwiny me kica, Yecu otimo gin ma dako-ni olege kun cango nyare woko. (Mat. 15:21-28) Nen kong labol mukene. I acakki me ticce me pwony, Yecu owaco ni: “Ngat ma bikwera. . . , an bene abikwere.” (Mat. 10:33) Ento tika en okwero Petero, i nge Petero kwere tyen adek kulu? Pe. Yecu ongeyo ni Petero owinyo malit adada pi gin ma en otimo-ni, dok oniang ni Petero obedo laco ma lagen. I nge cer pa Yecu, en onen bot Petero dok nen calo owacce ni etimme kica dok pud emare matek.—Luka 24:33, 34.   

7. Ma lubbe ki Jo Pilipi 4:5, wamito ni jo mukene gunenwa nining?

⁷ Watyeko neno ni Lubanga Jehovah ki Yecu Kricito gubedo jo ma nyuto niango. Ento wan kono? Jehovah mito ni wan bene wabed jo ma nyuto niango. (Kwan Jo Pilipi 4:5, NWT. b) Baibul mo acel ogonyo tyeng  man ni: “Nyut ki i ticci ni ibedo ngat ma niang.” Watwero pennye kekenwa ni: ‘Tika dano ginena ni abedo ngat ma niang dok ajolo tam pa jo mukene? Nyo ginena macalo ngat ma lagingi, ger, dok wiye tek? Tika aketo gingi i kom jo mukene me timo jami kit ma atamo ni omyero obed kwede? Nyo mono awinyo tam pa jo mukene dok atimo mitigi ka opore?’ Ka wamedde ki lubo lanen pa Jehovah ki Yecu, ci wabimedde bene ki nyuto niango. Kong dong wanenu kabedo aryo ma mitte ni wanyut iye niango—ka alokaloka otimme i kwowa dok ka tam pa jo mukene opokke woko ki megwa.

8. Gin ango ma twero konyowa me nyuto niango ka kwowa olokke? (Nen bene lok ma i tere piny.)

⁸ Mitte ni wanyut niango ka kwowa olokke. Alokaloka mogo gitwero keliwa pekki ma onongo pe watamo ni wabikato ki iye. Me labolle, watwero nongo peko me yotkom atura. Nyo peko me can lim nyo alokaloka i gamente twero weko kwowa bedo matek adada. (Latit. 9:11; 1 Kor. 7:31) Twero bene bedo tek botwa me tic pi Jehovah ka ce dulle ominiwa mot me tic mukene nyo kikobowa i kabedo mukene. Labongo paro pi alokaloka ma otimme, pud watwero cobo ticwa ka watimo jami angwen magi: (1) ye ni kwoni otyeko lokke woko, (2) tam i kom anyim ento pe kwoni macon, (3) ket cwinyi i kom jami mabeco ma tye i kwoni, dok (4) tim jami me konyo jo mukene. c Kong dong wanenu kit ma omegiwa ki lumegiwa mogo gunongo kwede adwogi mabeco ki i timo jami angwen magi.

9. I yo ma nining ma luot mo ma lumiconari gukanyo pekki ma obino atura?

⁹ Ye ni kwoni otyeko lokke woko. Omego Emanuele ki dakone Francesca onongo kicwalogi ka tic macalo lumiconari i lobo mukene. I kare ma pud gucako pwonyo leb apwonya kacel ki ngeyo omege ki lumege ma i kacokkegi, two Korona opoto dok onongo mitte ni gubed ka kengi. Ci min Francesca oto woko atura. Francesca onongo tye ki miti madwong me bedo kacel ki lupacogi, ento onongo pe gitwero cito pi peko me two Korona. Gin ango ma okonye me kanyo pekki magi ducu? Mukwongo, Emanuele ki Francesca gulego pi ryeko me kanyo peko me nino acel acel wek par pe obwogi woko. Jehovah ogamo legagi i karene kikome kun tiyo ki dulle. Me labolle, gunongo cuko cwiny ki i vidio mo, ma omego mo acel oloko iye ni: “Ka wajolo alokaloka ma otimme i kwowa labongo galle, ci yomcwinywa bene bidwogo oyotoyot dok wabitiyo ki kare meno me tic pi Jehovah ki konyo jo mukene.” d Me aryo, gin gumoko tamgi me medo dirogi me miyo caden kun gitiyo ki cim dok gucako kwano Baibul ki ngat mo. Me adek, guye kony pa omege ki lumege dok gubedo ki pwoc pi mar pa utmege magi. Lamego mo ma lakica obedo ka cwalligi mecej macego cego nino ducu pi mwaka acel kulu. Ka wan bene wajolo alokaloka ma otimme i kwowa, ci wabibedo ki yomcwiny pi jami ma watwero timone.   

10. I yo ma nining ma laminwa mo acel ojolo kwede alokaloka madit ma otimme i kwone?

¹⁰ Tam i kom anyim ento pe kwoni macon. Laminwa mo ma nyinge Christina, ma a ki i lobo Romania dok bedo i lobo Japan, cwinye otur adada i kare ma kijuko kacokkegi me leb Muno. Kadi bed kit meno, en pe obedo ka  tamo pi gin ma okato. Me ka meno, en ocito i kacokke me leb Japanese dok otute ki kerone ducu me tito kwena i leb Japanese. En openyo dako mo ma onongo con gutiyo kacel kwede ni opwonye kit me loko leb Japanese maber. Dako meno oye tic ki Baibul kacel ki brocuwa me Bed ki Kwo Maber Nakanaka! me pwonyo laminwa Christina leb Japanese. Pi meno, Christina opwonyo kit me loko leb Japanese maber, ento ma pire tek loyo, dako-ni ocako nyuto miti me pwonyo ada. Ka waketo cwinywa i kom anyim ento pe kwowa macon, ci alokaloka ma pe wabyeko twero keliwa mot ma pe wabyeko.

11. Gin ango ma okonyo luot mo ma gubedo ki peko me cente?

¹¹ Tim jami me konyo jo mukene. Luot mo ma gibedo i lobo ka ma kiketo iye kigeng i kom ticwa, gucako bedo ki peko me can lim i kare ma lobogi odonyo i banya madit dok wel jami omedde adada. Alokaloka ango ma gutimo? Me acel, gudwoko piny wel cente ma gitiyo kwede. Me aryo, me ka bedo ka paro pi pekkigi, gulungo wigi ka konyo dano i tic me pwony. (Tic 20:35) Omego-ni owaco ni, “Bedo ka tero cawa malac i tic me pwony oweko pe wabedo ki kare me tamo tam maraco, ento ominiwa kare me timo miti pa Lubanga.” Ka kwowa olokke, omyero wiwa opo kit ma pire tek kwede me medde ki konyo jo mukene, tutwalle i ticwa me pwony.

12. I yo ma nining ma lanen pa lakwena Paulo twero konyowa me jolo alokaloka i ticwa me pwony?

¹² Mitte ni wanyut niango i ticwa me pwony. Dano ma watito kwena botgi gitye ki tam mapatpat madok i kom Lubanga dok gia ki i kabedo kacel ki tekwaro mapatpat. Lakwena Paulo onyuto niango, dok watwero lubo lanenne. Yecu ocimo Paulo macalo ‘lakwena bot Lurok.’ (Rom. 11:13) Pi meno, Paulo onongo tito kwena bot Lujudaya, Lugrik, jo ma gukwano, lucaro, lutic pa gamente, kacel ki luker. Wek Paulo obed ki kare me pwonyo jo magi ducu, en ‘olubo kit ducu ma dano gitye kwede.’ (1 Kor. 9:19-23) En otamo matut i kom tekwarogi, ka ma gua ki iye, kacel ki jami ma giye iye. Man okonye me nyuto niango dok me lok kwedgi i yo ma twero ywayo tamgi i kom Lubanga. Wan bene watwero dongo dirowa me tito kwena ka wanyuto niango dok watamo matut i kom yo maber loyo me konyo ngat acel acel.

13. Peko ango ma kitito pire i 1 Jo Korint 8:9 ma watwero gwokke kwede ka waworo tam pa jo mukene?

¹³ Nyuto niango bene konyowa me woro tam pa jo mukene. Me labolle, lumegiwa mukene gimaro wero doggi ento mukene pe gimaro. Lukricitayo mogo gimato kongo i yo mupore, ento mukene giyero pe me matone kulu. Lukricitayo ducu gitye ki miti me bedo ma komgi yot ento giyero yo mapatpat me nongo cango. Ka kare ducu watamo ni tamwa keken aye tye atir dok watemme me diyo omegiwa ki lumegiwa me timo gin ma wamito, man weko wabalo cwiny omegiwa dok wakelo apokapoka i kacokke. Labongo akalakala mo, pe wamito timo meno! (Kwan 1 Jo Korint 8:9; 10:23, 24) Kong dong wanenu labol aryo ma nyuto kit ma keto i tic cik ma igi lac me Baibul twero konyowa me nyuto niango ki gwoko kuc.

14. Cik ma igi lac mene ma omyero wiwa opo iye ka watye ka moko tam madok i kom cital rukwa kacel ki yer wiwa?

¹⁴ Cital ruk kacel ki yer wic. Jehovah pe wacciwa kodi bongo ango ma omyero waruki, ento en ominiwa cik ma igi lac me aluba. Omyero warukke i yo ma nyuto ni wan wabedo lutic pa Lubanga, kun nongo wanyuto niango, woro, kacel ki ‘wic ma kwiri.’ (1 Tem. 2: 9, 10; 1 Pet. 3:3) Pi meno, pe omyero warukke i yo ma weko dano giketo tamgi mukato kare woko i kom kit ma wanen kwede. Cik ma igi lac me Baibul bene konyo luelda pe me keto cik ma meggi ka odok i kom cital ruk kacel ki yer wic. Me labolle, luelda me kacokke mo onongo gimito konyo omege matino mogo ma onongo giporo cital nginyo yer wic pa bulu luwotgi. I yo ma nining ma onongo luelda gitwero konyogi labongo como cik mo? Laneno me adwol omiyo tam ki luelda ni guwac ki omege magi ni, “Ka itye ka miyo pwony i nyim lwak, ce dano guketo tamgi mukato kare woko i kom kit ma inen kwede ma loyo gin ma itye ka pwonyone, ci nge ni peko madit tye i kom cital rukki nyo yer wii.” Tam man okonyo omege matino magi me niang gin ma myero gutim dok onongo pe mitte ni luelda gucom cik mo. e

15. Cik ma igi lac mene ma omyero wiwa opo iye ka watye ka moko tam madok i kom yo me nongo cango? (Jo Roma 14:5)

¹⁵ Lok ma kwako yotkom. Lakricitayo acel acel myero omok tamme pire kene ka odok i kom lok me yotkome. (Gal. 6:5) Ka Lakricitayo oyero me nongo kony me ot yat, ci omyero olub cik me Baibul ma waco ni pe wati ki remo nyo tim jokjok. (Tic 15:20; Gal. 5:19, 20) Mapat ki cik magi, Lakricitayo acel acel twero yero yo me nongo cango mupore pire. Jo mukene giyenyo kony me yotkom ki bot ludaktari keken, ento jo mogo gitiyo ki yo mukene mapat. Twero bedo ni waye ni yo me cango moni ber adada nyo rac, ento mitte ni wawor twero pa omege ki lumege me yero yo me cango ma gimito. Ka odok i kom lok man, omyero wiwa opo i kom lok ada angwen magi: (1) Ker pa Lubanga keken aye bicango two ducu dok matwal. (Ic. 33:24) (2) Lakricitayo “acel acel myero omok tamme pire kene” ka  odok i kom gin maber pire. (Kwan Jo Roma 14:5.) (3) Pe wangolo kop i kom jo mukene dok pe watimo gin mo keken ma twero weko gipoto. (Rom. 14:13) (4) Lukricitayo ginyuto mar dok giniang ni kuc me kacokke pire tek loyo tamgi nyo mitigi. (Rom. 14:15, 19, 20) Ka wiwa obedo ka po i kom lok man, ci wabibedo ki wat macok ki omege ki lumege dok wagwoko kuc i kacokke.

16. I yo ma nining ma laelda twero nyuto niangone i kit ma tero kwede ki luelda luwote? (Nen bene cal.)

¹⁶ Luelda omyero guwek lanen maber me nyuto niango. (1 Tem. 3:2, 3) Me labolle, laelda pe myero otam ni kare ducu omyero kiti ki tamme pien mwakane dit loyo pa luelda mukene-ni. En myero oniang ni cwiny maleng pa Jehovah twero tic ki laelda mo keken me waco gin mo ma twero konyogi me moko tam me ryeko. Dok ka pol pa luelda guye i kom tam moni ma pe turo cik ma igi lac me Baibul, ci laelda ma nyuto niango bicwako tam meno, kadi bed en pire kene tamme opokke woko.   

17. Adwogi mabeco ango ma wanongo ka wabedo jo ma ginyuto niango?

¹⁷ Ka wabedo jo ma ginyuto niango, wanongo adwogi mabeco mapol. Wabedo ki wat macok ki omege ki lumege, dok kuc bedo tye i kacokke. Wanongo mit pa bedo i kin jo pa Jehovah ma kitgi kacel ki tekwarogi patpat. Dok tye me yomcwiny adada me ngeyo ni kadi bed wan ducu pe warom, waworo Jehovah macalo jo me ot acel ma gunote. Ma pire tek loyo ducu, watye ki yomcwiny me ngeyo ni watye ka lubo lanen pa Lubangawa Jehovah, me nyuto niango.