PWONY ME ANYAMA ME 43
WER 90 Wucuk Cwiny Luwotwu
Gin Ango ma Twero Konyi ka Itye ki Akalakala?
“Wubed ki wang mabit me neno jami ducu.”—1 TEC. 5:21.
GIN MA WABIPWONYO
Wabipwonyo kit me loyo akalakala ma weko pe watiyo pi Jehovah maber.
1-2. (a) Kodi lapeny mene ma lutic pa Jehovah gitwero pennye kwede? (b) Gin ango ma wabinyamo i pwony man?
WAN ducu, kadi bed watino nyo wateggi, i kare mogo wabedo ki akalakala. a Me labolle, tam kong i kom latit kwena mo ma pud tidi ma bedo ka pennye kekene ka ce Jehovah mare. Pi meno, en twero bedo ki akalakala ka ce omyero enong batija. Labol mukene obedo pa omego mo ma i kare ma pud tidi oyero me keto tic pi Jehovah mukwongo me ka yero me tiyo tic ma kelle cente madwong. I kare man ma dong tye ka teggi-ni, tye ki cente manok adada me gwoko jo me ode. En twero cako bedo ki akalakala ka ce emoko tam ma atir i kare ma en pud tidi. Tam kong bene i kom laminwa mo ma otii ma dong tekone nok adada. Cwinye twero tur pien dong en pe twero cobo tic ma yam timo. Tika dong i kare mo ipennye ki lapeny calo magi: ‘Jehovah tika nena? Tika abinongo bakacic mo pien ajalo jami mapol wek ati pi Jehovah? An mono tika konya pud tye bot Jehovah?’
2 Ka pe watute me nongo lagam pi lapeny calo magi, ci twero weko niyewa i kom Jehovah doko goro kun bene wajuko wore woko. I pwony man, wabinyamo cik ma igi lac me Baibul ma gitwero konyowa ka watye ki gung cwiny ka ada (1) Jehovah marowa, (2) tam ma wamoko i kare mukato obedo me ryeko, nyo (3) konywa pud tye bot Jehovah.
KIT ME LOYO AKALAKALA
3. Gin ango ma watwero timo ka watye ki lapeny mogo ma weko wabedo ki akalakala?
3 Ka watye ki akalakala, pire tek ni wayeny lagam ki i Baibul. Ka watimo meno, niyewa i kom Jehovah kacel ki watwa kwede bijing bedo matek, dok wabibedo ki kero me ‘cung matek liking i kom niyewa.’—1 Kor. 16:13.
4. Watwero bedo ki ‘wang mabit me neno jami ducu’ nining? (1 Jo Tecalonika 5:21)
4 Kwan 1 Jo Tecalonika 5:21. Baibul ocuko cwinywa ni omyero ‘wabed ki wang mabit me neno jami ducu.’ Watwero timo man nining? Ka watye ki akalakala i kom gin mo, bedo ber ka wamoko lokke ki i Baibul. Me labolle, tam kong i kom latit kwena matidi ma kiloko i kome i paragraf me acel ma tye ki akalakala ka ce Jehovah paro pire. Tika myero en oca lapeny man acaya? Pe, en myero ‘obed ki wang mabit me neno jami ducu’ kun kwanyo kare me niang tam pa Jehovah i kom lok man.
5. Watwero nongo lagam pa Jehovah pi lapenywa nining?
5 Ka watye ka kwano Baibul, nongo bedo calo Jehovah tye ka lok kwedwa. Ento omyero watim ma kato kwano Baibul keken ka wamito nongo lagam pa Jehovah pi lapenywa. Mitte ni wayeny ci wakwan Ginacoya ma twero gamo lapenywa kikome. Me timo meno, watwero timo kwed kun watiyo ki jami kwedo lok ma dul pa Jehovah ominiwa. (Car. 2:3-6) Mitte ni waleg Jehovah kun wapenye wek okonywa me nongo lagamme pi lapenywa. I nge meno, watwero yenyo cik ma igi lac me Baibul kacel ki ngec mukene ma twero konyowa. Bedo ber bene me kwano lok ma kicoyo i kom lutic pa Jehovah ma lugen ma onongo bene giwinyo kit ma wawinyo kwede.
6. Cokkewa konyowa nining me loyo akalakala ma watye kwede?
6 Ka kitye ka nyamo Baibul i cokkewa, nongo bedo calo Jehovah tye ka lok kwedwa. Ka wabedo tye i cokke kare ducu, watwero winyo gin mo i pwony nyo lagam ma ngat mo omiyo ma obedo gin ma wamito kikome me gamo lapenywa. (Car. 27:17) Kong dong wanyamu gin ma twero konyowa me gamo lapeny adek ma waloko i komgi i paragraf me aryo.
KA ITYE KI AKALAKALA KA CE JEHOVAH PARO PIRI
7. Lapeny mene ma jo mogo gipenye kwede?
7 Tika dong nino mo ipennye kekeni ni, ‘Tika ada Jehovah nena?’ Ka iwinyo calo piri pe tek, ci itwero tamo ni pe twerre kulu me bedo larem Lacwe polo ki lobo. Twero bedo ni Kabaka Daudi bene obedo ki tam ma kit meno. En obedo ki ur ni Jehovah paro pi dano ci openyo ni: “Ai Rwot [Jehovah], dano gin ango ma miyo ipo pire? Dano adana ma mwa-ni pingo ibedo ka tamo pire?” (Jab. 144:3) Dong tika ada Jehovah paro pi ngat acel acel? Itwero nongo lagam pi lapeny man ki kwene?
8. Ma lubbe ki 1 Camuel 16:6, 7, 10-12, gin ango ma Jehovah neno i kom dano?
8 Ki i Baibul, wapwonyo ni Jehovah neno kadi wa jo ma ginen calo konygi pe bot jo mukene. Me labolle, Jehovah ooro Camuel i ot pa Yece me wiro wod pa Yece acel macalo kabaka me Icrael. Yece olwongo awobe abiro i kin awobene aboro me rwatte ki Camuel, ento en pe olwongo Daudi, ma en aye onongo obedo acogo. b Kadi bed kit meno, Jehovah oyero Daudi aye. (Kwan 1 Camuel 16:6, 7, 10-12.) Jehovah oneno cwiny Daudi. En oneno ni awobi matidi loyo-ni mare matek.
9. Pingo itwero bedo ki gen ni Jehovah paro piri? (Nen bene cal.)
9 Tam kong i kom kit ma Jehovah dong otyeko nyuto kwede ni eparo piri. En mini tam ma pud dong ber loyo ma lubbe ki kwo ma itye ka kato ki iye. (Jab. 32:8) Man nyuto ka maleng ni en ngeyi maber. (Jab. 139:1) Ka iketo tira pa Jehovah i tic dok ineno kit ma konyi kwede, ci man biweko imoko ni Jehovah paro piri. (1 Tekwaro 28:9; Tic 17:26, 27) Jehovah neno jami ducu ma itimo me tic pire ki me bedo lawiny bote. En bene neno kit mabeco ma itye kwede dok mito bedo laremi. (Jer. 17:10) Dok cwinye bibedo yom adada ka oniang ni in bene imito bedo Lareme.—1 Jon 4:19.
‘Ka ce iyenyo Jehovah, ci in ibinonge.’—1 Tekwaro 28:9 (Nen paragraf 9) c
KA ITYE KI AKALAKALA KA CE IMOKO TAM ME RYEKO I KARE MUKATO ANGEC
10. Ka walwodo tam ma wamoko i kare mukato angec, lapeny macalo mene ma watwero bedo kwede?
10 I kare mogo, jo mukene gitwero lwodo tam ma gumoko i kare mukato angec ci gibedo ka paro ka ce gumoko tam me ryeko. Twero bedo ni gujalo dog tic ma culle ber nyo gumoko tamgi pe me cako biacara moni wek gibed ki kare me medo ticgi pi Jehovah. Man dong mwaki mapol okato. Gitwero neno luwotgi ma guyero me bedo ki dog tic madongo i lobo-ni ma i kare-ni gitye ka nongo cente mabup dok ginen calo kwogi tye mayom. Macalo adwogine, gitwero pennye kekengi ni: ‘Tika tam ma amoko me tic pi Jehovah obedo tam maber loyo? Nyo tika onongo myero amedde ki dog ticca ma ajalo ca wek abed ki cente madwong i kare-ni?’
11. Pingo laco Jabuli 73 cwinye otur adada?
11 Ka dong ipennye ki lapeny macalo magi, ci nen kong gin ma Baibul tito i kom laco Jabuli 73. En oneno jo ma pe gitiyo pi Lubanga ento komgi yot, gulony matek, dok ginen calo pe gitye ki par mo keken. (Jab. 73:3-5, 12) I kare ma oneno ni kwogi tye mayot, man omiyo en owinyo calo tutene me tic pi Jehovah konye pe. Tam man ‘obedo ka yelle dyeceng jwi.’ (Jab. 73:13, 14) En olwenyo nining ki tam maraco magi?
12. Ma lubbe ki Jabuli 73:16-18, gin ango ma okonyo laco jabuli man me lweny ki turcwiny?
12 Kwan Jabuli 73:16-18. Laco jabuli man ocito i ot pa Jehovah. Ki kunnu, i kin jo pa Jehovah, en obedo ki kare me tamo tam ma atir. En oniang ni kadi bed jo mukene onongo gitye ka nongo kwo mayot, ento gipe ki gen mo pi anyim. Pi meno, en oloyo turcwiny woko dok obedo ki tekcwiny ni keto tic pi Jehovah mukwongo i kwone aye obedo tam maber loyo. Macalo adwogine, en omoko tamme matek me medde ki tic pi Jehovah.—Jab. 73:23-28.
13. Gin ango ma itwero timo ka itye ka koko ange pi tam mogo ma imoko i kare mukato angec? (Nen bene cal.)
13 Kit ma laco jabuli man otimo kwede, in bene itwero loyo tam mogo ma kelo turcwiny ki kony pa Baibul. I yo ma nining? Wi opo i kom jami mabeco ma itye kwede, calo mot ma Jehovah omini, dok wi opo ni jo ma pe gitiyo pi Jehovah pe ginongo cwak ma mege. Pi pol pa jo ma pe gitiyo pi Jehovah, bedo ki dog tic ma culle bup kacel ki kwo mayot aye gin ma pire tek loyo botgi, pien pe gitye ki gen mo mapat. Ento in, pe itye ka nongo mot mabeco ki bot Jehovah i kare-ni keken, ento en ocikke me mini jami mabeco makato i kare me anyim. (Jab. 145:16) Tam bene i kom lok man: Tika waromo ngeyo kit ma kwowa onongo bibedo kwede ka onongo wamoko tam mapat? Ento tye gin acel ma wangeyo labongo akalakala mo keken: Ka imoko tam ma jenge i kom marri pi Lubanga ki pi dano luwoti, pe ibikeng gin mo keken maber.
Go ni dong itye ka kwo i Paradic (Nen paragraf 13) d
KA ITYE KI AKALAKALA KA CE KONYI PUD TYE BOT JEHOVAH
14. Kodi peko ango ma jo mukene gitye ka kato ki iye, dok lapeny ango ma gitwero pennye kwede?
14 Jo pa Jehovah mogo pe dong gitwero cobo tic mapol kit ma gimito kwede pien dong gutii woko, komgi lit, nyo gitye ki goro me kom. Meno twero weko giwinyo ni pigi pe tek bot Jehovah. Gitwero pennye kekengi ni, ‘Tika konya pud tye bot Jehovah?’
15. Gin ango ma laco Jabuli 71 onongo tye ki gen iye?
15 Laco Jabuli 71 bene onongo winyo kit meno. En olego ni: “Pe ibwota bene i kare ma tekka dong otum woko.” (Jab. 71:9, 18) Kadi bed en onongo dong goro, laco jabuli man obedo ki tekcwiny ni ka etiyo pi Lubangane ki gen, ci Jehovah bikonye. Kit ma laco jabuli man opwonyo kwede, Jehovah cwinye bedo yom i kom jo ma gitute ki kerogi ducu me tic Pire kadi bed goro me kom tye.—Jab. 37:23-25.
16. I yo ma nining ma jo muteggi gitye me kony bot Jehovah? (Jabuli 92:12-15)
16 Ka ibedo ngat ma dong oteggi, tute me nene kit ma Jehovah neni kwede. En twero konyi me medde ki tic pire kadi bed itye ki goro me kom. (Kwan Jabuli 92:12-15.) Me ka keto tammi i kom jami ma pe dong itwero timone, tam i kom jami ma itwero timo. Me labolle, lanen maber ma iweko kacel ki miti ma inyuto i kom jo mukene twero jingogi. Itwero tito ki jo mukene kit ma Jehovah okonyi kwede pi mwaki mapol magi ducu kacel ki cikkene me Baibul ma itye ka kuro neno cobbegi. Dok wi pe owil ni legani pi jo mukene tye ki teko madwong. (1 Pet. 3:12) Labongo paro pi kwo ma watye ka kato ki iye, wan ducu watye ki gin mo ma watwero timo pi Jehovah ki pi jo mukene.
17. Pingo omyero wagwokke ki poro ticwa ki pa jo mukene?
17 Ka cwinyi otur pien pe itwero cobo tic mapol pi Jehovah, bed ki gen ni gin mo keken ma itimo, pire tek adada bote. Itwero bedo ki miti me poro ticci ki tic pa jo mukene. Ento gwokke ki timo meno! Pingo? Pien Jehovah pe porowa ki jo mukene. (Gal. 6:4) Me labolle, Maliam owiro Yecu ki moo ma ngwecce kur ma welle tek adada. (Jon 12:3-5) Ki tungcel, dato ma lacan-ni, obolo nyig cente aryo ma welle nok adada. (Luka 21:1-4) Ento Yecu pe oporo mon aryo magi. Me ka meno, Yecu owaco ni gin ducu gunyuto niye matek. Yecu onongo lubo lanen pa Wonne kore ki kore. Pi meno, itwero bedo ki gen ni Jehovah neno jami ducu ma itimo pi niyeni kacel ki marri pire, dok en pwoyo matek, kadi bed ki tung boti nen calo gin matidi.
18. Gin ango ma bikonyowa me lweny ki akalakala ma watye kwede? (Nen bok ma wiye tye ni “ Lok pa Jehovah Konyi me Lweny ki Akalakala.”)
18 Wan ducu wayelle ki akalakala i kare mogo. Ento kit ma waneno kwede, Baibul twero konyowa me loyogi. Pi meno, tute ki keroni ducu me nongo lagam pi lapeny ma itye kwede ci ibibedo ki gen, me ka bedo ki turcwiny. Jehovah ngeyi maber adada. En tye ki pwoc madit pi tam ma imoko me keto pi ticce mukwongo i kwoni dok en bigwoko cikkene me mini mot. Bed ki tekcwiny ni Jehovah maro dok paro pi luticce ma lugen ducu.
WER 111 Gin Mumiyo Cwinywa Yom
a LOK MA KITITO TERE: I pwony man, wabinyamo akalakala mogo ma weko wabedo ki gung cwiny ka ce piwa tek bot Jehovah nyo tam ma yam wamoko con obedo tam me ryeko. Man pat ki kodi akalakala mogo ma kinyamogi i Baibul ma kwako bedo labongo niye i kom Jehovah ki cikkene.
b Kadi bed Baibul pe tittiwa mwaka pa Daudi i kare ma Jehovah oyere, ento nen calo en onongo obedo awobi me mwaka apar ki wiye keken.—Nen Wi Lubele me Sektemba 1, 2011, pot 29, para. 2.
