WER onongo obedo but tekwaro pa Luicrael ma pire tek adada. Baibul pol kare loko i kom kit ma dano onongo giwero kwede kun gigoyo jami wer mapatpat. Ki lok ada, but Baibul mapol obedo wer. Me labolle, Jabuli, Wer pa Solomon, ki dong Koko, onongo gubedo wer ma kicoyo me awera. Buk mo acel ma loko i kom kwo pa dano i kare me Baibul owaco ni Baibul nyuto ka maleng ni Luicrael onongo giwero wer.

Wer i kwogi me nino ducu. Luicrael onongo giwero wer me nyuto kit ma giwinyo kwede. (Ic. 30:29) Mon onongo gigoyo ajaa, giwero wer me yomcwiny, dok gimyelo i kare me kwer mogo calo ka kitye ka wiro kabaka manyen, ka lumony guloyo lweny, ki dok ka gitye i kwer mapatpat me woro Jehovah. (Lungol. 11:34; 1 Cam. 18:​6, 7; 1 Luker 1:​39, 40) Luicrael onongo bene giwero wer me nyuto arem cwiny ma gitye kwede ka ngat mo oto. (2 Tekwaro 35:25) Nen ka maleng ni Luicrael onongo gimaro wer matek adada.

Wer i gang kal pa kabaka. Luker me Icrael onongo gimaro winyo wer. Kabaka Caulo olwongo Daudi i gang ker wek ogone wer. (1 Cam. 16:​18, 23) I kare ma Daudi odoko kabaka, en oyubo jami goyo wer mapatpat, ocoyo wer mapol mamit, dok oguro kacel luwer mapol ma lacen onongo giwero i ot pa Lubanga. (2 Tekwaro 7:6; Amoc 6:5) Kabaka Solomon onongo tye ki luwer ma co ki ma mon ma giwero i gang kalle.—Latit. 2:8.

Wer me worogi. Ma dong pire tek loyo ducu, Luicrael onongo gitiyo ki wer me woro Jehovah. Ki lok ada, luwer 4,000 onongo giwero i ot pa Lubanga ma tye i Jerucalem. (1 Tekwaro 23:5) Onongo gigoyo nanga, opuk, atego agoya, kacel ki tum. (2 Tekwaro 5:12) Ento pe luwer ma ludiro magi keken aye onongo giworo Jehovah kun gitiyo wer. Luicrael mapol onongo bene giwero wer ma kilwongo ni Wer me Ito Wi Got ka gitye ka cito i Jerucalem ka kwero kwer ma bedo mwaka ki mwaka. (Jab. 120-134) Dok ma lubbe ki coc me tekwaro pa Lujudaya, Luicrael onongo giwero wer mogo ma i Jabuli a i kare me kwer me Kato.

Wer pud tye gin ma pire tek adada i kwo pa luwor Jehovah i kare-ni. (Yak. 5:13) Wawero wer bot Jehovah me pakke. (Ep. 5:19) Wawinyo ni watye cok ki omege ki lumege ka watye ka wero wer me pako Jehovah kacel. (Kol. 3:16) Dok ka watye ka wer nyo ka winyo wer ma loko i kom Jehovah, wanongo cuko cwiny dok weko wabedo ki kero me kanyo pekkiwa. (Tic 16:25) Wer obedo yo mamwonya me nyuto niyewa kacel ki marwa pi Jehovah.