Dakika 60 mukwongo ma pud kinywalo latin anywala pire tek tutwal i kwo pa latin meno. Pingo? Pien mege ma gitingo, dok gimiyo cak bot lutinogi ka pud gunywal anywala gibedo ki wat macok ki latin dok man konyo i dongo pa latin meno. a

Gin ango ma tugo cwiny min latin weko gwoko latinne ki mar madit adada? Professor Jeannette Crenshaw otito i magajin me The Journal of Perinatal Education ni ka dako onywal, adamme cwalo hormone ma kilwongo ni oxytocin madwong dok man “weko wat pa min latin bedo cok adada ki latinne ka woto ki gudo, neno dok doto latinne.” Hormone mukene bene ma adam cwalo i kare meno “konyo min latin me winyo maber” ka tuku dok loko ki latinne. Pingo man pire tek?

Wonwa ma lamar Jehovah aye ma oketo wat macok i kin min latin ki latinne. b Kabaka Daudi owaco ni Lubanga aye ma yam ‘omiyo ginywale’ dok ogwoke maber i kare ma en latin lakere. En olego ni: “Cakke ma ginywala abedo ka jengnge i komi, cakke i kare ma maa onywala iye in ibedo Lubangana.”​—Jabuli 22:9, 10.

TAM KONG: Ka Lubanga aye ma oketo wat macok ma tye i kin min latin ki latinne wek en ogwok latinne maber, ci itamo ni en pe paro piwa ki acel acel macalo “wan litino pa Lubanga”?​—Tic pa Lukwena 17:29.

Yecu Kricito, ma ngeyo Lacwecwa maber loyo ngat mo keken opwonyo ni: “Ojwinyojwiny aryo pe gicato pi cente apar? Ento mo acel pe poto piny i ngom ma Wonwu pe ngeyo. Kadi bed wa yer wiwu dong gikwanogi woko liweng. Pi meno, pe wulwor; pien piwu tek twatwal makato pi ojwinyojwiny mapol.”​—Matayo 10:29-31.

Jo manok keken i kinwa aye ma giketo tamgi i kom winyi matino tino ma gineno, tutwalle me neno ka ‘mo acel i kingi opoto piny.’ Ento Wonwa me polo neno gin ducu ki acel acel! Ento winyo​—kadi wa winyi mapol—​pud pigi pe tek loyo dano. Pwony ma wanongo nen ka maleng ni: Pe myero ‘ilwor’ ni Lubanga pe neni. Me ka meno, en tye ki miti madit i komi!

Ginacoya cuko cwinywa ni

• “[Jehovah] neno kabedo ducu, en neno jo ma lutim maraco kacel ki jo ma kitgi beco.”​—CAROLOK 15:3.

• “[Jehovah] neno jo ma kitgi atir, dok ciko ite winyo koko ma gikok bote pi kony.”​—JABULI 34:15.

• “Abibedo ki yomcwiny madwong pi mar meri ma pe lokke, pien dong ityeko neno can ma omaka, dok ityeko winyo koko me can ma odiya.”​—JABULI 31:7.

Tika twero kelo alokaloka mo i kwowa ka wangeyo ni Lubanga tye ki miti i ngo ma watye ka timone dok nenowa ki wang me mar? Man twere, ma lubbe ki ngo ma laminwa Hannah, c ma a ki i lobo England owaco:

“Pi kare malac, onongo awinyo calo Jehovah pe mara dok pe gamo legana. Abedo ka tamo ni an aye ma ape ki niye muromo. Onongo bene awinyo calo kitye ka pwoda nyo pira pe tek. Awinyo calo Lubanga pe paro pira.”

I kare-ni dong, Hannah pe ki akalakala mo keken i kom mar pa Jehovah. Gin ango ma oloko tamme? En otito ni, “Alokaloka man otimme motmot. Wiya po pwony mo me Baibul mwaki mapol angec ma onongo tye ka lok i kom ginkok pa Yecu, ma ogudo kwona matek adada, dok okonya me moko ada ni Jehovah mara matek. Pol kare ka Lubanga ogamo legana, akok ki pig wanga, pien aniang ni Jehovah kara mara. Medo i kom meno, kwano Baibul pira kena ki wot i cokke pa Lukricitayo opwonya jami mapol adada i kom Jehovah, kite, kacel ki kit ma en paro kwede piwa. I kare-ni dong, aneno cwak ki mar pa Jehovah piwa ki mitine me konyowa ki acel acel.”

Gin ma Hannah owaco-ni cuko cwinywa adada. Ento itwero moko ada ni Lubanga niang dok wiye po i kom pekoni? Pwony ma lubo man binyamo lapeny meno.