Laco mukwongo, Adam, okwo pi cencwari mapol. Ento lacen, en oti ci oto woko. Nicakke i kare meno, dano gutemo yo mapol mapat pat me gengo tiyo. Ento, pe tye ngat mo ma dong onongo kwo ma pe tum. Pingo? Adam oti ci oto woko pien en otimo bal i kare ma pe owinyo dog Lubanga. Wan watii pien walako bal kacel ki adwogine to, ki bot Adam.​—Kwan Acakki 5:5; Jo Roma 5:12.

Wek wanong mit pa kwo ma pe tum, ngat mo omyero ocul ginkok me larowa. (Yubu 33:24, 25) Ginkok aye wel ma kiculo me gonyo ngat moni. Kitung botwa, omyero kigonywa ki i to. (Nia 21:29, 30) Yecu oculo ginkok i kare ma en oto piwa.​—Kwan Jon 3:16.

Pe kibigonyo dano ducu ki i two ki tiyo. Ki lok ada, jo ma pe giwinyo dog Lubanga, calo Adam, pe gibilimo mot me kwo ma pe tum. Jo ma kitimigi kica pi balgi keken aye gibinongo kwo ma pe tum.​—Kwan Icaya 33:24; 35:3-6.

Wek kitimiwa kica, omyero watim jami mogo. Omyero wange Lubanga kun wakwano Baibul. Baibul pwonyowa kit me kwo i yo maber ki dok kit ma watwero nongo kwede cwak pa Lubanga ki dong kwo ma pe tum.​—Kwan Jon 17:3; Tic 3:19.