“Lubanga me polo biketo ker mukene ma ri nakanaka ma pe gitwero balone, kadi dit me locce bene pe gibiweko i cing rok mukene. Ker meno manyen-ni bituro ker magi ducu ngido woko matitino, ci tyekogi woko ducu, en aye dong bicung bedo matwal.”​—Daniel 2:44.

Ker pa Lubanga obedo gamente me polo. Lalocce ma kiyero obedo Yecu Kricito ma bineno ni miti pa Lubanga otimme pe i polo keken ento wa i lobo kany. (Matayo 6:9, 10) Gamente man pe kibileyone ki gamente pa dano pien obedo “ker ma ri nakanaka pa Rwotwa ma en Lalarwa Yecu Kricito.” Kuc ma rii naka bibedo tye labongo akalakala.​—2 Petero 1:11.

“Catan kikome bene lokke nen macalo lamalaika ma menyo piny. Man pe dong gin ma pire dit twatwal ka ce lutic pa Catan gilokke ginen calo lutic ma tiyo gin ma atir; agikkigi bibedo rom ki gin ma gutiyo.”​—2 Jo Korint 11:14, 15.

Dini goba gibinyutone ka maleng ni obedo tic pa Larac dok kibijwerone woko ki i lobo. Pwony goba kacel ki lok me onyo remo pa dini goba bibedo pe. Man bimiyo kare bot jo ma maro “Lubanga makwo, dok me ada” me worre ki “niye acel” ki “cwiny ki ada.” Man bikelo kuc ki note!​—1 Jo Tecalonika 1:9; Jo Epeco 4:5; Jon 4:23.

“Lubanga kikome aye bibedo kwedgi, kun bene bedo Lubangagi. En bijwayo pig wanggi woko ducu. To bene dong bibedo pe, kadi kumo nyo koko, nyo arem, pien gin macon dong ducu gurwenyo woko matwal.”​—Niyabo 21:3, 4.

Lubanga Jehovah biweko man timme kun tiyo ki Wode, Yecu, ma omiyo kwone pi dano me lobo. (Jon 3:16) Ite tira pa Yecu, dano ducu bibedo ki  kwo labongo roc. Deno can mo bibedo pe pien “Lubanga kikome aye bibedo kwedgi” kun jwayo “pig wanggi woko ducu.” Bedo ki roc kacel ki deno can bibedo jami ma okato; “Jo ma kitgi atir gibicamo lobo, dok gibibedo iye matwal.”​—Jabuli 37:29.

“Ci [Yeco Kricito] omako min kulu madit ca, ma obedo twol macon-ni, ma en aye Ladot dok Catan bene, ka otweye woko pi mwaka alip acel, ci obole woko i bur ma tere pe gik, oloro dog bur woko, omwono woko bene kun oketo lanen i wiye wek pe dok omedde ki bwolo rok ducu.”​—Niyabo 20:2, 3.

Jami ducu ma Catan okelo bibedo pe, ka Catan kacel ki jogi kitweyogi ka dok kibologi i “bur ma tere pe gik,” man nyuto ni pe gibibedo ki kero me timo gin mo keken. Pe dong gibidoro jami ma dano timo. Pud dong wabibedo ki yomcwiny me kwo i lobo ma Catan kacel ki jogine gipe iye!

“Kare me agikki” bigik ki gin ma Yecu olwongo ni kare me “twon can madit atika.” En owacci. “I kare meno twon can madit atika bitimme iye, ma yam peya onen i lobo, nia wa i acakki lobo nio kwede wa onyoo, dok pe bene binen.”​—Matayo 24:21.

Canne bibedo dit atika i yo ni bitimme i yo ma peya otimme matwal. Man bigik ki “mony i nino madit pa Lubanga Won Twer Ducu,” ma kilwongo ni “Armagedon.”​—Niyabo 16:14, 16, lok ma tye i tere piny.

Jo me kabedo ducu ma gimaro jami matir gitye ka kuro agikki me lobo pa Catan-ni. Nen kong mot mogo ma tye ka kurogi i Ker pa Lubanga.

“Lwak dano mapol ata” gibigwokogi me kwo i lobo manyen me kuc: Lok pa Lubanga waco ni “lwak dano mapol ata” gibia ki i “twon can madit atika” kun gigwokogi me kwo i lobo manyen ma kit ma atir bedo iye (Niyabo 7:9, 10, 14; 2 Petero 3:13) Gin gibimiyo pwoc bot Yecu Kricito, “Latin romo pa Lubanga ma kwanyo bal me lobo” macalo ngat ma olarogi.​—Jon 1:29.

Adwogi maber bia ki i pwony ma Lubanga miyo:I lobo manyen, “lobo ducu bipong ki ngec pa Rwot [Jehovah].” (Icaya 11:9) Pwony man ma Lubanga miyo-ni bipwonyowa kit me kwo ki kuc ki dano ducu kun kwako wa kabedo ma orumowa. Lubanga ocikke ni: “An a Rwot Lubangawu amito pwonyowu wek wubed maber, kun atelowu i yo ma myero wuwot iye.”​—Icaya 48:17.

Jo me amara ma guto gibicerogi ki i lyel: I kare ma Yecu tye i lobo, en ocero Lajaro ki i lyel. (Jon 11:1, 5, 38-44) Pi meno, en onyuto gin ma en bitimone i rwom ma lamal i yub me Ker pa Lubanga.​—Jon 5:28, 29.

Kuc ki kit matir biromo lobo ducu pi naka: Ite loc pa Kricito, turo cik bibedo jami ma okato. Wangeyo nining? Pien Yecu, twero neno cwiny dano, dong en bitic ki tekone me ngolo kop me poko jo ma kitgi atir ki jo ma kitgi pe atir. Jo ma bikwero loko kitgi maraco pe gibiyegi me kwo i lobo manyen pa Lubanga.​—Jabuli 37:9, 10; Icaya 11:3, 4; 65:20; Matayo 9:4.

Waneno jami manok ki i kin lok pa lunebi mapol me Baibul ma nyuto kare mamwonya ma tye ka bino. Ka Ker pa Lubanga biloyo lobo-ni, “kuc madwong” bibedo tye. (Jabuli 37:11, 29) Jami ducu ma kelo arem ki deno can, ma oyelo dano tutwal-li bibedo pe. Lok pa Lubanga wacci: “Nen, aketo jami ducu doko nyen. . . . lok magi lok ma genne dok me ada.”​—Niyabo 21:5.