Tika obedo tam me mingo ka waye ni jo muto gibikwo doki? Lakwena Paulo pe otamo kumeno. En ocoyo pi teko pa cwiny maleng ni: “Ka dong genwa i kom Kricito konyowa i kwo me kare-ni keken, ci dong nongo watye marac makato jo ducu. Ento i adane, Kricito dong gicero woko ki i kin jo muto, en tye macalo wi mwaka pa jo muto.” (1 Jo Korint 15:19, 20) Paulo onongo ngeyoni nicer bitimme ada. Gin ma moko ni jo muto kibicerogi aye nicer pa Yecu. * (Tic pa Lukwena 17:31) Meno aye gin mumiyo Paulo olwongo Yecu ni “wi mwaka pa jo muto”—en obedo ngat mukwongo ma kicero me kwo pi naka. Ka Yecu aye obedo ngat mukwongo, ci man te lokke ni jo mukene bene kibicerogi.

Man aye tyen lok mukene mumiyo iromo bedo ki gen ni nicer bitimme ada. Jehovah aye Lubanga me ada. “Lubanga . . . pe loko lok goba.” (Tito 1:2) Jehovah peya oloko lok goba mo keken dok bene pe bitimone. Tika en onongo romo ciko pi nicer dok nyuto ni eromo cero dano ka lacen pe cobo cikkene? Meno pe twere!

Pingo Jehovah oketo yub me cero dano i anyim? Pi marre. Yubo openyo: ‘Ka dano dong oto, pud dok bibedo kwo? Ka lacen ibilwonga, ci abigamo dogi; pira bibedo mitti mada, pien in aye iketo an.’ (Yubu 14:14, 15) Yubu onongo ngeyoni Wonne me polo tye ki miti me cere. Lubanga tika dong olokke? “An a Rwot [Jehovah], pe alokke.” (Malaki 3:6) Lubanga pud tye ki miti ni jo muto myero gucer, gubed ma komgi yot dok ki yomcwiny. Meno aye gin ma lanyodo ma lamar mito ka ce latinne oto. Ento, apokapoka madit aye ni  Lubanga tye ki teko me cero dano ka mito.—Jabuli 135:6.

Jehovah bimiyo twero bot Wode wek okel yomcwiny bot jo ma gubedo ka koko jogi me amara ma guto. Yecu winyo nining ma lubbe ki cero jo muto? Ma peya Yecu ocero Lajaro, en oneno cwercwiny pa lamin Lajaro kacel ki lureme mumiyo en “okok ki pig wange.” (Jon 11:35) I nino mukene, Yecu orwatte ki dato mo me Nain ma onongo wode acel keken oto. Yecu “kica omake i kome, owacce ni, ‘Wek koko obedi.’” Cutcut en ocero wod pa dato-ni. (Luka 7:13) Pi meno, Yecu cwinye cwer ka dano gikumo dok bene gito. Pud dong cwinye bibedo yom ya ka en ojwayo kumo woko kun miyo dano cwinygi bedo yom i twok lobo lung!

Tika dong in i kumo pi to pa ngat mo? Iromo tamone ni to obedo peko ma pe kiromo cobone. Ento peko man kitwero cobone pien Lubanga bitic ki Wode me cero jo muto. Wi myero opo ni Lubanga mito ni inen kit ma ebicero kwede dano. En mito ni ibed kunnu me jolo joni me amara. Tam kong ni wubigoyo pulan me kwo pi naka kacel labongo weko lawoti!

Lionel, ma waloko i kome con-ni, wiye po ni: “Lacen, apwonyo lok kom nicer. Mukwongo, onongo tek tutwal me ye, dok bene onongo pe ageno ngat ma owacca lok man. Ento aneno ki i Baibul ci aniang ni meno lok ada! Pe atwero dong kuro me neno kwarona ka kicero.”

Tika imito medo ngecci? Lucaden pa Jehovah cwinygi bibedo yom me nyutti ki i Baibul pingo giye labongo akalakala ni nicer bitimme ada i anyim. *