Cwiny maleng obedo teko pa Lubanga. (Mika 3:8; Luka 1:35) Ka kiwaco ni Lubanga ocwalo cwiny mere maleng ka moni, nongo en otiyo ki tekone me cobo mitine.​—Jabuli 104:30; 139:7, NW.

 Ki i Baibul, nyig lok ma kigonyo ni “cwiny” oa ki i nyig lok me leb Ibru ni ruʹach ki dok pneuʹma i leb Grik. Pol kare nyig lok man i leb aryo-ni ducu niange ni teko pa Lubanga nyo cwiny maleng. (Acakki 1:2) Ento Baibul bene tiyo ki nyig lok magi me lok i kom jami mukene:

•   Yamo me yweyo.​—Kabakuk 2:19; Niyabo 13:15.

•   Yamo ma kodo.​—Acakki 8:1; Jon 3:8.

•   Kero ma weko lee bedo kwo.​—Yubu 34:14, 15.

•   Kit ma ngat moni winyo kwede ki dong kite.​—Wel 14:24.

•   Cwec me cwiny calo lumalaika ki dong Lubanga.​—1 Luker 22:21; Jon 4:24.

 Jami magi ducu ma bene kilwongogi ni cwiny-nyi pe ginen bot dano ento adwogi pa jami ma gitimo nen ka maleng. ‘Calo yamo, cwiny maleng bene pe nen, pe ki kom, dok tek adada.’​—An Expository Dictionary of New Testament Words, ma W. E. Vine aye ocoyo.

 Baibul bene lwongo cwiny maleng pa Lubanga ni “cinge.” (Jabuli 8:3; 19:1; Luka 11:20; por ki Matayo 12:28.) Kit macalo ladiro tic cing tiyo ki cinge me tic, Lubanga bene otiyo ki cwiny maleng me timo jami magi:

•   Cweyo Polo ki Lobo.​—Jabuli 33:6; Icaya 66:1, 2.

•   Coyo Baibul.​—2 Petero 1:20, 21.

•   Tango ma luticce macon gutimo ki dong tito kwena ki mit kom.​—Luka 4:18; Tic pa Lukwena 1:8; 1 Jo Korint 12:4-11.

•   Konyo luticce ma gilubo cikke me dongo kit mabeco.​—Jo Galatia 5:22, 23.

Cwiny maleng pe obedo lubanga

 Kit ma Baibul lwongo cwiny maleng pa Lubanga ni “cinge” nyo ‘yweyo-ni,’ man nyuto ni cwiny maleng pe obedo lubanga nyo ngat mo makwo pire kene. (Nia 15:8, 10) Cing ladiro tic pe twero pokke woko ki i kome ci cako kwo pire kene; i yo acel-li cwiny maleng pa Lubanga pe tiyo pire kene labongo Lubanga. (Luka 11:13) Baibul poro cwiny maleng ki pii, niye ki ngec. Man nyuto ni cwiny maleng pe obedo gin mo ma kwo.​—Icaya 44:3; Tic pa Lukwena 6:5; 2 Jo Korint 6:6.

 Baibul nyutiwa nying Lubanga Jehovah kacel ki Wode Yecu Kricito; ento pe tye ka mo keken i Baibul ma kinyutiwa nying cwiny maleng. (Nen coc ma tye i piny i Nia 3:15; Luka 1:31) I kare ma kinyuto polo i yo me tango bot Lakricitayo mo ma nyinge Citefano, en oneno jo aryo keken, ento pe adek. Baibul waco ni: Citefano “opong ki cwiny maleng, ci ociko wange i polo oneno deyo pa Lubanga, kun Yecu ocung i nget Lubanga yo tung acuc.” (Tic pa Lukwena 7:55) Lubanga onongo tye ka tic ki tekone ma en aye cwiny maleng me konyo Citefano wek onen ginanyuta meno.

 Tam ma pe tye atir ni: “Tipo maleng” nyo cwiny maleng obedo lubanga dok tye but Lubanga ma opokke iye adek, kit ma kinyuto kwede i 1 Jon 5:7, 8 i Baibul me King James version.

 Lok ada: Kicoyo i 1 Jon 5:7, 8 i Baibul me King James version ni “i polo, tye Won, Lok ki Tipo Maleng: gin adek-ki ducu gitye acel. Dok tye lucaden adek i lobo.” Kadi bed kumeno, lukwed lok gunongo ni lakwena Jon aye pe ocoyo lok magi, pi meno, pe myero obed i Baibul. Professor Bruce M. Metzger ocoyo ni: “Akalakala mo keken pe ni lok man lok goba dok pe myero obed i Cik Manyen.”​—A Textual Commentary on the Greek New Testament.

 Tam ma pe tye atir ni: Baibul waco ni cwiny maleng obedo ngat mo, dok man nyuto ni cwiny maleng tye lubanga.

 Lok ada: I kine mukene, Ginacoya loko i kom cwiny maleng calo tye ka lok i kom ngat mo makwo. Me labolle, Yecu oloko i kom cwiny maleng calo tye ka lok i kom gin makwo kun lwongo ni “lacungudwar” nyo lakony ma ma bimoko lok ada, bitelo dano, bititigi lok, biwinyo lok, dok biketo deyo i kom Lubanga. (Jon 16:7-15) Ento man pe nyuto ni cwiny maleng obedo lubanga nyo ngat mo. Baibul bene loko i kom ryeko, to ki bal calo gubedo dano makwo. (Carolok 1:20; Jo Roma 5:17, 21) Me labolle, kiwaco ni ryeko tye ki ‘tic’ ki ‘lutino,’ bal bwolo dok neko dano dok bene kelo miti mapatpat i cwinywa.​—Matayo 11:19; Luka 7:35; Jo Roma 7:8, 11.

 Tam ma pe tye atir ni: Nongo batija i nying cwiny maleng nyuto ni en bene obedo lubanga.

 Lok ada: Baibul i kine mukene tiyo ki nyig lok ni “nying” ka tye ka lok i kom teko nyo twero. (Nwoyo Cik 18:5, 19-22; Esta 8:10) Man bene rom ki leb Munu ma kimaro tic kwede ni “i nying cik.” Lok man pe nyuto ni cik obedo dano nyo gin mo makwo. Ngat ma onongo batija “i nying” cwiny maleng nongo ye teko pa cwiny maleng ki dong kit ma Lubanga tiyo kwede me cobo yubbe.​—Matayo 28:19.

 Tam ma pe tye atir ni: Lukwena pa Yecu kacel ki lupwonnyene me kare macon onongo giye ni cwiny maleng obedo lubanga nyo ngat mo.

 Lok ada: Baibul pe waco meno, dok pe tye lok mo me tekwaro ma kicoyo ma moko meno. Buk me Encyclopædia Britannica waco ni: “Lok man ni Cwiny Maleng obedo Lubanga . . . Ocakke i mwaka 381 ki i cokke mo pa lubicob ma kilwongo ni Council of Constantinople.” Man otimme mwaki makato 250 kulu i nge to pa lakwena me agikki.