Mikael, ma dini mukene gilwongo ni “Mikael Maleng,” obedo nying ma kimiyo ki Yecu ma pud peya obino i lobo, ki dong i kare ma odok cen i polo. a Mikael olaro lok ki Catan i nge to pa Moses dok okonyo lamalaika mo me cwalo kwena pa Lubanga bot lanebi Daniel. (Daniel 10:13, 21; Juda 9) Mikael tiyo tic ma lubbe ki tyen lok me nyinge—“Anga ma Tye Calo Lubanga?”—kun cung matek pi twero me loc pa Lubanga dok lwenyo i kom lumone pa Lubanga.—Daniel 12:1; Niyabo 12:7.

 Nen kong pingo waromo ye ni Yecu aye Mikael lamalaika madit.

•   Mikael aye “lamalaika madit.” (Juda 9) Nying me dog tic man ni “lamalaika madit,” ma tyen lokke “lawi lumalaika,” nonge i tyeng aryo keken me Baibul. I wang Baibul magi, nying me dog tic meno kitiyo kwede me lok i kom ngat acel keken, ma meno nyuto ni lamalaika acel keken aye “lamalaika madit.” Tyeng acel waco ni Rwot Yecu ma kicero “bilor piny kun a ki i polo ki lwongo me twer, ma dwan lamalaika maditte biwinnye.” (1 Jo Tecalonika 4:16) Yecu tye ki “dwan lamalaika maditte” pien en aye Mikael, lamalaika madit.

•   Mikael doro wi lumalaika mapol. “Mikael kacel ki lumalaikane gulwenyo i kom min kulu madit-ti,” Catan. (Niyabo 12:7) Mikael tye ki twero madit i polo, pien kilwonge ni “ngat acel madit i kin rwodi ducu” ki dok “rwot madit.” (Daniel 10:13, 21; 12:1) Lakwed lok mo me Cik Manyen ma nyinge David E. Aune owaco ni nying me dog tic magi nyuto ni Mikael aye “ladit ma doro wi lumalaika ducu.”

   Baibul loko i kom nying mukene acel pa ngat mo ma tye ki twero i wi lumalaika mapol. Waco ni, “Rwot Yecu binen iye ma kun a ki i polo kacel ki lumalaikane matek i dye mac ma lyel. I kare meno en biculo kwor.” (2 Jo Tecalonika 1:7, 8; Matayo 16:27) Yecu ‘odok cen i polo, ci kiketo lumalaika ki twer ki teko ducu i te locce.’ (1 Petero 3:21, 22) Pe twere pi Lubanga me keto Yecu ki Mikael macalo lulo wi lumalaika maleng wek gubed ka pyem i kingi. Ma ka meno, porre me ye ni nying aryo magi ducu, Yecu ki Mikael, gubedo nying ngat acel.

•   Mikael “bicung” i kare mo me “can madit.” (Daniel 12:1, NWT) I buk pa Daniel, lok man ni “bicung” pol kare kitiyo kwede me lok i kom kabaka ma bitimo gin mo madit me ur. (Daniel 11:2-4, 21, NWT) Yecu Kricito, ma kilwongo ni “Lok pa Lubanga,” bitiyo tic mo madit me ur macalo “Kabaka ma loyo luker ducu” kun jwero lumone pa Lubanga ducu dok bigwoko jo pa Lubanga. (Niyabo 19:11-16) En bitimo man i kare me ‘twon can madit atika, ma yam peya onen i lobo.’—Matayo 24:21, 42.