Eyo, Larac-ci tye ada. En aye “lalo lobo man,” dok obedo cwec me cwiny ma kite odoko rac ci ojemo i kom Lubanga. (Jon 14:30; Jo Epeco 6:11, 12) Baibul tittiwa kit Larac-ci kun lwonge i yo magi:

•   Catan, ma tyen lokke ni “Lajemo.”—Yubu 1:6.

•   Larac, ma tyen lokke ni “Lakwot nying.”—Niyabo 12:9.

•   Twol, ma kitiyo kwede i Baibul pi “Labwola.”—2 Jo Korint 11:3.

•   Labit dano.—Matayo 4:3.

•   Lagoba.—Jon 8:44.

Pe cung mere pi kit marac

 Jo mogo gitamo ni Catan Larac-ci obedo kit mo marac ma watye kwede i cwinywa. Ento, Baibul tittiwa pi lok mo ma obedo i kin Lubanga gin ki Catan. Lubanga pe ki roc mo, pi meno pe twero bedo ni en obedo ka lok kene kene ki gin mo marac ma i cwinye. (Nwoyo Cik 32:4; Yubu 2:1-6) I yo acel-li, Catan bene obito Yecu, ma pe ki bal mo keken-ni. (Matayo 4:8-10; 1 Jon 3:5) Pi meno, Baibul nyuto ni Larac-ci tye ada, ento pe cung mere pi kit marac.

 Tika omyero wabed ki ur ni dano mapol pe giye ni Larac-ci tye ada? Pe wacel, pien Baibul wacci Catan tiyo ki bwola me cobo mitine. (2 Jo Tecalonika 2:9, 10) Diro acel ma en dong otiyo kwede i rwom ma lamal aye me bwolo dano mapol wek gutam ni en pe etye ada.—2 Jo Korint 4:4.

  Tam ma pe tye kakare: Lucifer obedo nying mukene pi Larac-ci.

 Lok ada: Nyig lok me leb Ibru ma kigonyo i Baibul mogo ni “Lucifer” tyen lokke ni “ngat ma ryeny.” (Icaya 14:12, NWT) Tyeng ma orumu ka ngete nyuto ni nyig lok man cung pi kabaka mapat pat me Babilon, ma Lubanga onongo bileyo wigi pi awakagi. (Icaya 14:4, 13-20) Lok man ni ‘ngat ma ryeny-nyi’ kitiyo kwede me nywaro luker me Babilon i kare ma kituro locgi.

  Tam ma pe tye kakare: Lubanga tiyo ki Catan me miyo pwod bot dano.

 Lok ada: Larac-ci obedo lamone pa Lubanga, ento pe laticce. Catan Larac-ci moro adot goba goba dok lwenyo i kom jo ma gitiyo pi Lubanga.—1 Petero 5:8; Niyabo 12:10.