E hii si ngɛ zugba, tslɔɔ fuu e nɔmlɔ tso ɔ tsuo kɛ je e yi mi kɛ ba pue e nane si. Moo po e he foni, e ma e yi si, e kɔnihi tsuo a mi jɔ, nɔ fɛɛ nɔ je e he, nɛ e nyɛ we nɛ e fie anunuhi nɛ a ngɛ lɛ hae ɔ po. E hii si ngɛ la zu mi kɛ tsɔɔ kaa e ngɛ kɔmɔ yee, nɛ ngɛyu lɛ e kɛ ngɛ e he hluae. E nɔ́ fɛɛ nɔ́ bɔ lɛ nɛ nɔ ko nɛ ji nɛ be ko nɛ be ɔ, a buu le ɔ, amlɔ nɛ ɔ, nɔ fɛɛ nɔ kua lɛ! E huɛmɛ, nihi nɛ e kɛ mɛ ngɛ kpɔ ɔ mi kɛ e weku li tsuo je e he. Nɔ fɛɛ nɔ, kɛ jokuɛwi po yeɔ e he fɛu. E susu kaa e Mawu nɛ ji Yehowa a nɛ kɛ jamɛ a haomi ɔ ba e nɔ, se jamɛ a susumi ɔ dɛ.​—Hiob 2:8; 19:18, 22.

Nyumu nɛ ɔ ji Hiob. Mawu de ngɛ e he ke: “Nɔ ko nɔ ko be je ɔ mi nɛ kɛ lɛ sɔ” (Hiob 1:8) Jeha lafa komɛ a se ɔ, loloolo ɔ Yehowa naa Hiob kaa nihi nɛ a yeɔ anɔkuale nɛ a peeɔ nɔ́ nɛ da a, a kpɛti nɔ kake.​—Ezekiel 14:14, 20.

Anɛ o kɛ yi mi wami kɛ oslaahi ngɛ kpee lo? Ke jã a, lɛɛ Hiob sane ɔ ma nyɛ maa wo o bua wawɛɛ. E maa ye bua mo nɛ o maa nu nɔ́ he je nɛ Yehowa sɔmɔli tsuo hia su nɛ ji anɔkuale yemi aloo dami ní peemi ɔ sisi. Adesahi jeɔ anɔkuale yemi kpo ke a jeɔ a tsui mi tsuo kɛ sɔmɔɔ Yehowa nɛ a yaa nɔ nɛ a peeɔ e suɔmi nya ní kɛ ji kaa a kɛ yi mi wami ngɛ kpee po. Nyɛ ha nɛ waa kase ní komɛ ngɛ Hiob he.

E ma nyɛ maa ba kaa benɛ Hiob gbo se ɔ, anɔkualetsɛ Mose lɛ ngma Hiob he sane kɛ fɔ si ɔ nɛ. Mumi klɔuklɔu ɔ ye bua Mose nɛ e tu níhi nɛ ya nɔ ngɛ hiɔwe ɔ hu he munyu, se pi níhi nɛ ya nɔ ngɛ zugba a nɔ nɛ kɔɔ Hiob si himi he ɔ pɛ.

Ngɛ Hiob he munyu ɔ sisije mi ɔ, wa naa kaa Hiob ngɛ bua jɔmi nɛ nɔ́ fɛɛ nɔ́ ngɛ nɔ yae ha lɛ saminya. E ji niatsɛ, nihi le lɛ nɛ a buu lɛ wawɛɛ ngɛ Uz zugba a nɔ. Eko ɔ, Uz ngɛ Arabia yiti je. E yeɔ bua ohiatsɛmɛ, kɛ nihi nɛ a be balɔ ko ɔ. Hiob kɛ e yo ɔ fɔ bimɛ nyɔngma. Nɔ́ nɛ pe lɛ tsuo, Huɛ bɔmi kpakpa ngɛ Hiob kɛ Mawu a kpɛti. E bɔɔ mɔde kaa e maa pee níhi nɛ sa Yehowa hɛ mi kaa bɔ nɛ Abraham, Isak, Yakɔb kɛ Yosɛf hu peeɔ. Kaa bɔ nɛ blematsɛmɛ nɛ ɔmɛ peeɔ, Hiob hu pee kaa osɔfo kɛ ha e weku ɔ, nɛ e sãã afɔle kɛ haa e bimɛ ɔmɛ.​—Hiob 1:1-5; 31:16-22.

Si kake too ɔ, sane ɔ tsake kɛ je Hiob nɔ kɛ ho níhi nɛ ya nɔ ngɛ hiɔwe ɔ nɔ ya. Wa le níhi nɛ ya nɔ ngɛ hiɔwe nɛ Hiob po li he nɔ́ ko. Benɛ Yehowa bɔfo ɔmɛ ba bua a he nya ngɛ e hɛ mi ɔ, Satan, nɛ e ji bɔfo atua tsɔlɔ ɔ hu piɛɛ a he kɛ ba. Yehowa le kaa Satan sume Hiob nɛ ji anɔkualetsɛ ɔ sane, enɛ ɔ he ɔ, Mawu kɛ Satan tu munyu nɛ e de lɛ benɛ Hiob yeɔ anɔkuale ha. Satan kɛ kã he nɔ ke: “O susuɔ kaa yaka gu lɛ Hiob yeɔ mo gbeye ɔ? O baa Hiob yi, kɛ e we mi bimɛ, kɛ nɔ́ tsuaa nɔ́ nɛ e ngɛ, nɛ nɔ́ ko hia we lɛ?” Satan sume nihi nɛ a yeɔ anɔkuale ɔ kɔkɔɔkɔ. Ke a je a tsui mi tsuo kɛ sɔmɔ Yehowa a, a ngɛ tsɔɔe kaa Satan ji nɔ se blɔ tsɔɔlɔ nɛ be suɔmi kɛ ha nɔ. Satan de kaa níhi nɛ Mawu kɛ dloo Hiob he je nɛ e ngɛ lɛ sɔmɔe ɔ nɛ. Lɔ ɔ he ɔ, Satan ngɛ tsɔɔe kaa ke Hiob ní ɔmɛ tsuo a hɛ mi kpata a, e maa gbiɛ Mawu!​—Hiob 1:6-11.

Eko ɔ, Hiob be lee mohu lɛɛ, se Yehowa ha lɛ he blɔ ngua ko konɛ e kɛ tsɔɔ kaa Satan ji lakpatsɛ. A ngmɛ Satan blɔ konɛ e kpata Hiob níhi tsuo a hɛ mi. Se e nɔmlɔ tso ɔ lɛɛ e nine ko ta he. Enɛ ɔ he ɔ, oya nɔuu nɛ Satan je e yi wu tso ní tsumi ɔ sisi. Ngɛ ligbi kake mi pɛ ɔ, haomi slɔɔtohi nɛ a mi wa ba Hiob nɔ. Si kake too ɔ, e lohwehi nɛ ji e nahi, tejihi, jijɔhi kɛ afukpɔngɔhi tsuo a hɛ mi kpata. Jehanɛ ɔ, e tsɔli ɔmɛ nɛ a hyɛɛ lohwe ɔmɛ a nɔ ɔ hu a gbe mɛ. Ngɛ kuu ɔ kake blɔ fami ɔ, a ba bɔ Hiob amaniɛ kaa “la nɛ je Mawu ngɔ”​—eko ɔ oslabai, lɛ gbe mɛ. Hiob ngɛ e tsɔli nɛ a gbo kɛ ohia si himi mi nɛ e ya jeɔ he susue nɔuu nɛ e nine su amaniɛ bɔmi nɛ he wa pe lɛ tsuo nɔ. E bimɛ nyɔngma amɛ bua a he nya ngɛ a nyɛminyumu nɔkɔtɔma a we ɔ mi, kɛkɛ nɛ tlukaa, kɔɔhiɔ nɛ nya wa ko fia ba ná tsu ɔ nɛ tsu ɔ hule kɛ pue e bimɛ ɔmɛ a nɔ nɛ mɛ tsuo a gbo!​—Hiob 1:12-19.

E he wa kaa wa maa nu bɔ nɛ Hiob nu he ha a sisi saminya. E hia e tade ɔ ngɛ e he, e sã e yi nɔ nɛ e ya hi si ngɛ zugba. Hiob mwɔ sane ɔ nya kaa Mawu nɛ ha lɛ nɛ Mawu lɛ ba ngɔ. Ngɛ anɔkuale mi ɔ, Satan ha nɛ e pee kaa nɔ́ nɛ Mawu lɛ ha nɛ jamɛ a haomi ɔmɛ ba e nɔ. Enɛ ɔ tsuo se ɔ, Hiob gbíɛ Mawu kaa bɔ nɛ Satan de kɛ sɛ hlami ɔ. Mohu ɔ, Hiob de ke: “A je Yehowa biɛ ɔ yi daa”.​—Hiob 1:20-22.

Satan mi mi fu nɛ e sume kaa e maa ngmɛɛ sane ɔ he. Benɛ bɔfo ɔmɛ bua a he nya ekohu ngɛ Yehowa hɛ mi ɔ, Satan ba hia si ngɛ a kpɛti. Yehowa je Hiob yi ekohu ejakaa e ya nɔ nɛ e ngɛ anɔkuale yee ngɛ kahi tsuo nɛ Satan kɛ ba e nɔ ɔ mi. Satan he nɔ ke: “Nɔ́ tsuaa nɔ́ nɛ ngɛ nɔ ko dɛ ɔ, e ma nyɛ ngɔ kɛ ha, ke e yi ma na wami kɛkɛ. Moo lɛɛ moo ye e nɔmlɔ tso ɔ awi kaa e be mo gbiɛe ngɛ o hɛ mi lo.” Satan susu kaa ke Hiob nu hiɔ wawɛɛ ɔ, e maa gbiɛ Mawu. Se Yehowa le kaa Hiob ma ya nɔ nɛ e maa ye lɛ anɔkuale, lɔ ɔ he ɔ, e ngmɛ Satan blɔ konɛ e wo Hiob hiɔ, se e ko gbe lɛ.​—Hiob 2:1-6.

E kɛ we nɛ Satan ngɔ hiɔ kɛ fia Hiob kaa bɔ nɛ a bɔ he amaniɛ kɛ je sisije ɔ. Mo susu bɔ nɛ e yo ɔ ní maa pee mɔbɔ ha a he nɛ o hyɛ. E ngɛ haoe momo ngɛ e bimɛ nyɔngma amɛ nɛ a gbo ɔ he, jehanɛ ɔ, e huno hu kpale nu hiɔ nɛ e ngɛ nɔ nae wawɛɛ! Haomi ɔ suu he je ɔ, e de e huno ɔ ke: “Tse o ngɛ anɔkuale ɔ yee kɛ mwɔɔ! Gbiɛ Mawu, nɛ o gbo!” E yo ɔ munyu tumi tsake kulaa. E tu munyu ɔ kaa nɔ ko nɛ e yi pue. Se loloolo ɔ, Hiob gbíɛ Mawu. E tu we munyu yayami ko po.​—Hiob 2:7-10.

Anɛ o le kaa anɔkuale sane nɛ ngɛ mɔbɔ nɛ ɔ kɔɔ mo hu o he lo? Mo kai kaa pi Hiob nya pɛ nɛ Satan po, se mohu ɔ, e po adesahi tsuo a nya. E de ke: “Nɔ́ tsuaa nɔ́ nɛ ngɛ nɔ ko dɛ ɔ, e ma nyɛ ngɔ kɛ ha, ke e yi ma na wami kɛkɛ.” Ngɛ blɔ ko nɔ ɔ, Satan ngɛ dee kaa adesa ko be nyɛe maa ye Yehowa anɔkuale! Satan ngɛ tsɔɔe kaa o be suɔmi nitsɛnitsɛ kɛ ha Mawu, lɔ ɔ he ɔ, ke o kɛ si himi ko nɛ mi wa kpe ɔ, o maa kua Mawu bɔ nɛ pee nɛ o yi nɛ ná wami. Satan ngɛ tsɔɔe kaa o foɔ mo pɛ o nɔ́ mi kaa bɔ nɛ le hu e peeɔ ɔ! Anɛ o ma ha nɛ Satan nɛ pee lakpatsɛ lo? Nɔ fɛɛ nɔ ngɛ he blɔ nɛ e kɛ ma nyɛ maa pee jã. (Abɛ 27:11) Wa hyɛ haomi kpã nɛ Hiob kɛ kpe ekohu.

Nyumuhi etɛ komɛ nɛ a le Hiob nɛ Baiblo ɔ tsɔɔ kaa a ji e huɛmɛ ɔ nu haomi nɛ ba e nɔ ɔ he, enɛ ɔ he ɔ, a ba konɛ a ba slaa lɛ nɛ a wo e bua. Benɛ a ma nɛ a na lɛ ngɛ tsitsaa, a yo we lɛ. Hiob ngɛ nɔ nae, hiɔ ɔ nɛ e nu ɔ ha nɛ e he womi nɔ yuɔ, enɛ ɔ ha nɛ Hiob tsake kulaa. Nyumuhi etɛ ɔmɛ, nɛ ji Elifaz, Bildad kɛ Zofar a ye aywilɛho, a fo ya wawɛɛ nɛ a mwɔ zu kɛ pue a yi mi. Kɛkɛ nɛ a hi si ngɛ Hiob kasa nya ngɛ zugba, nɛ a de we nɔ́ ko. A hi si jã kɛ je mɔtu kɛ ya si gbɔkuɛ otsi sɔuu nɛ a tu we munyu kake po. E sɛ nɛ wa susu kaa a nya nɛ a maa tsɔɔ kaa a ngɛ Hiob bua woe, ejakaa a bi we lɛ sane konɛ a kɛ le nɔ́ nɛ ngɛ le pee tutuutu, nɔ́ nɛ a le pɛ ji e ngɛ nɔ́ nae.​—Hiob 2:11-13; 30:30.

Nyagbenyagbe ɔ, Hiob nitsɛ bɔni munyu tumi. Hiob gbiɛ ligbi nɛ a fɔ lɛ ɔ kɛ tsɔɔ kaa e ngɛ nɔ́ nae wawɛɛ. Nɛ e tsɔɔ nɔ́ tutuutu he je nɛ e ngɛ nɔ́ nae jã a. E susu kaa Mawu lɛ kɛ haomi ɔmɛ ba e nɔ! (Hiob 3:1, 2, 23) E ngɛ mi kaa e ji nɔ ko nɛ ngɛ hemi kɛ yemi ngɛ Mawu mi mohu lɛɛ, se e hia bua womi wawɛɛ. Se benɛ e huɛmɛ ɔmɛ bɔni munyu tumi ɔ, Hiob na kaa afani nɛ a ma a nya po.​—Hiob 13:5.

Elifaz nɛ eko ɔ, lɛ ji nɔkɔtɔma, nɛ e wa pe Hiob hulɔ ɔ lɛ je munyu tumi sisi kekle. Pee se ɔ, ni enyɔ ɔmɛ hu tu munyu. Se, wa ma nyɛ maa de kaa mɛ tsuo a nyɛɛ susumi nɛ dɛ nɛ Elifaz hɛɛ ɔ se. Eko ɔ, o maa susu kaa tɔmi be ní ɔmɛ ekomɛ nɛ a dee ɔ he, ejakaa níhi nɛ a dee ɔmɛ ekomɛ kɔɔ Mawu he nɛ a tsɔɔ kaa Mawu nɔ kuɔ, e gblaa yayami peeli a tue nɛ e woɔ kpakpa peeli hiɔ. Se kɛ je sisije ɔ, a munyu ɔmɛ tsɔɔ kaa a susu we Hiob he. Elifaz kua anɔkuale munyuhi nɛ a he hia a nɛ e ma sane ɔ nya si kaa ke Mawu ji dalɔ nɛ e gblaa yayami peeli a tue ɔ, lɛɛ amlɔ nɛ ɔ nɛ e ngɛ heii kaa pe a ngɛ Hiob tue gblae ɔ, mɛni e tsɔɔ? Anɛ enɛ ɔ tsɔ we kaa Hiob ji yayami peelɔ lo?​—Hiob 4:1, 7, 8; 5:3-6.

E be nyakpɛ kaa, Hiob kɛ lɛ kpa we gbi. E kplɛɛ we nɔ́ nɛ e dee ɔ nɔ kulaa. (Hiob 6:25) Se bua woli etɛ nɛ ɔmɛ he ye kaa Hiob pee yayami ko nɛ e laa nɔ; lɔ ɔ he je nɛ e kɛ jamɛ a haomi ɔmɛ ngɛ kpee ɔ nɛ. Elifaz po Hiob nya kaa, e ji he nɔ wolɔ, yiwutsotsɛ nɛ e yí Mawu gbeye hulɔ. (Hiob 15:4, 7-9, 20-24; 22:6-11) Zofar hu de Hiob ke e kpa yi wu tso ní peemi nɛ e bua ko jɔ nɔ́ yayami peemi he. (Hiob 11:2, 3, 14; 20:5, 12, 13) Nɛ Bildad hu tu munyu ko nɛ hí kulaa. E tsɔɔ kaa eko ɔ Hiob bimɛ ɔmɛ pee yayami ngɛ blɔ ko nɔ, lɔ ɔ he ɔ, e da blɔ kaa a gbo!​—Hiob 8:4, 13.

Nyumuhi etɛ nɛ ɔmɛ nɛ a hɛɛ we juɛmi kpakpa a pee nɔ́ ko nɛ pa hí kulaa. A munyu tumi tsɔɔ kaa, pi nɛ Hiob yí Mawu anɔkuale kɛkɛ, se mohu ɔ, se nami be he kaa wa ma bɔ mɔde kaa wa ma ye Mawu anɔkuale! Ngɛ Elifaz munyu ɔ sisije ɔ, e tsɔɔ kaa mumi ko je e he kpo kɛ tsɔɔ lɛ. Nɔ́ nɛ ya nɔ ngɛ Elifaz kɛ jamɛ a daimonio mumi ɔ a kpɛti ɔ ha nɛ e ná juɛmi nɛ dɛ nɛ ma nyɛ maa ye nɔ awi wawɛɛ. Lɔ ɔ ji kaa: Mawu ‘he we e tsɔli ɔmɛ yi, nɛ e bɔfo ɔmɛ nitsɛnitsɛmɛ po, e naa tɔmi ngɛ a he.’ Nɛ tsɔɔ kaa ngɛ susumi nɛ ɔ nya a, adesa ko be nyɛe ma sa Mawu hɛ mi! Pee se ɔ, Bildad hu de ke anɔkuale nɛ Hiob maa yee ɔ he hia we Mawu kaa bɔ nɛ pi e kɔmɔ ji kaa gɔgɔ ye anɔkuale loo e yí anɔkuale ɔ!​—Hiob 4:12-18; 15:15; 22:2, 3; 25:4-6.

Anɛ o bɔ mɔde kaa o maa wo nɔ ko nɛ ngɛ nɔ́ nae wawɛɛ ɔ bua hyɛ lo? E be gbɔjɔɔ kulaa. Se wa ma nyɛ maa kase nɔ́ ko kɛ je Hiob huɛmɛ etɛ nɛ ɔmɛ nɛ a hɛɛ we juɛmi kpakpa amɛ a ngɔ, titli ɔ kɛ kɔ níhi nɛ e sɛ kaa wa de kɛ wa maa wo nɔ ko bua a he. Nyumuhi etɛ nɛ ɔmɛ tu munyu nguanguahi fuu, se a ji susumihi nɛ dɛ, nɛ a je we mɔbɔ nami kpo kɛ tsɔɔ Hiob, nɛ a kɛ e biɛ po tsɛ we lɛ! E hɛwi mɛ po kaa Hiob ngɛ nɔ́ nae, nɛ a susu we he po kaa e sa nɛ a je mi mi sami kpo kɛ tsɔɔ lɛ. * Lɔ ɔ he ɔ, ke nɔ ko nɛ o susuɔ e he ngɛ haoe ɔ, moo to o tsui si nɛ o je mi mi sami kpo kɛ tsɔɔ lɛ. Moo bɔ mɔde nɛ o wo nɔ ɔ hemi kɛ yemi mi he wami, nɛ o ye bua lɛ nɛ e ná hemi kɛ yemi ngɛ Mawu dloomi, e mɔbɔ nami, kɛ e dami sane yemi ɔ mi. Kaa Hiob huɛmɛ ɔmɛ lɛ a ngɛ nɔ́ nae ɔ, jã ji bɔ nɛ e ko pee. (Hiob 16:4, 5) Se be nɛ a po e nya kaa e yi Mawu anɔkuale ɔ, kɛ Hiob pe e ní ha kɛɛ?

Hiob ngɛ haoe momo loko e huɛmɛ ɔmɛ kpale ba bɔni munyu gagaaga nɛ ɔmɛ tue ɔ nɛ. Kɛ je sisije ɔ, lɛ nitsɛ e tsɔɔ kaa, be komɛ ɔ, e tuɔ “munyu basabasa” akɛnɛ e “nine mi je wu ɔ” he je. (Hiob 6:3, 26) Wa nu nɔ́ he je nɛ e de jã a sisi. E munyu ɔmɛ ha nɛ wa na heii kaa e ngɛ nɔ́ nae. Jehanɛ ɔ se hu ɔ, munyu nɛ e tuɔ tsɔɔ kaa e li nɔ́ he je nɛ níhi ngɛ nɔ yae jã a. Akɛnɛ haomihi nɛ e kɛ kpe ɔmɛ ba tlukaa nɛ a ngɛ nyakpɛ hu he je ɔ, e mwɔ sane ɔ nya kaa Yehowa nɛ e kɛ jamɛ a haomi ɔmɛ ba e nɔ. Ní komɛ nɛ a he hia ya nɔ nɛ Hiob li he nɔ́ ko nɔ́ ko, enɛ ɔ he ɔ, e da susumihi nɛ dɛ nɔ kɛ mwɔ sane nya.

Se ngɛ anɔkuale mi ɔ, Hiob ji nɔ ko nɛ e hemi kɛ yemi mi he wa wawɛɛ. E je kpo heii ngɛ munyu nɛ e kɛ e huɛmɛ ɔmɛ tuɔ mi. E munyu ɔmɛ ji anɔkuale, a ngɔɔ nɛ a woɔ wɔ he wami mwɔnɛ ɔ. E wo Mawu hɛ mi nyami wawɛɛ benɛ e tu bɔ nɛ adebɔ níhi a he ngɛ nyakpɛ ha he munyu ɔ, ejakaa níhi nɛ e de ɔmɛ tsɔɔ kaa Mawu lɛ je kpo tsɔɔ lɛ. Kaa nɔ hyɛmi nɔ ɔ, e de ke Yehowa ngɔ je ɔ ngɔ “kpla si nɛ nɔ́ ko hɛɛ we lɛ,” munyu nɛ ɔ ji munyu ko nɛ jehahi lafahi ba be loko je mi si kpali ba na kaa e ji anɔkuale. * (Hiob 26:7) Jehanɛ ɔ se hu ɔ, Hiob tu hɛ kɛ nɔ fɔmi nɛ e ngɛ kɛ ha hwɔɔ se ɔ he munyu, nɛ jamɛ a hɛ kɛ fɔmi ɔ nɔuu nɛ nyumuhi anɔkualetsɛmɛ nɛ a hi si blema a hu ngɛ. Hiob he ye kaa ke e gbo ɔ, Mawu maa kai lɛ, e hɛ maa ja ngɛ e he nɛ e maa kpale lɛ kɛ ba wami mi ekohu.​—Hiob 14:13-15; Hebri Bi 11:17-19, 35.

Nɛ sane nɛ kɔɔ dami ní peemi he ɔ hu nɛɛ? Elifaz kɛ e huɛmɛ ɔmɛ tsɔɔ kaa kɛ adesahi ye anɔkuale jio, a yi anɔkuale jio, pi Mawu he sane ji lɔ ɔ. Anɛ Hiob kplɛɛ jamɛ a susumi nɛ dɛ ɔ nɔ lo? Dɛbi kulaa! Hiob tsɔɔ kaa, Mawu bua jɔ anɔkuale yemi he. E kɛ nɔ mi mami de ngɛ Yehowa he ke: ‘E maa na ye dami ní peemi ɔ.’ (Hiob 31:6) Jehanɛ ɔ se hu ɔ, Hiob na kaa susumi nɛ dɛ nɛ e huɛmɛ nɛ a ma e bua womi ɔ hɛɛ ɔ te si kɛ wo e we anɔkuale yemi ɔ. Enɛ ɔ tsitsɛɛ Hiob nɛ lɛ hu e tu munyu fuu, munyu nɛ e tu ɔ nya ka saminya. E munyu ɔmɛ sɛ a wu mi nɛ a nyɛ we munyu ko tumi hu.

Hiob le kaa, e sa nɛ e ye Mawu anɔkuale ngɛ nɔ́ fɛɛ nɔ́ mi. Enɛ ɔ he ɔ, e tu bɔ nɛ e yeɔ anɔkuale ngɛ nɔ́ fɛɛ nɔ́ nɛ e peeɔ mi ɔ he munyu. Kaa nɔ hyɛmi nɔ ɔ, e kua wɔ jami mi ní peepeehi tsuo, e kɛ nihi yeɔ ngɛ mi mi jɔmi kɛ bumi mi, e hɛɛ jemi bami nɛ he tsɔ mi, e je bu kpo kɛ ha e gba si himi ɔ; nɛ nɔ́ nɛ pe kulaa, e ye e Mawu nɛ ji Yehowa a anɔkuale. Enɛ ɔ he ɔ, Hiob nyɛ nɛ e de kɛ nɔ mi mami kɛ: ‘I be dami ní peemi he ngmɛɛe, kɛ yaa si be nɛ maa gbo!’​—Hiob 27:5; 31:1, 2, 9-11, 16-18, 26-28.

Anɛ o naa dami ní peemi kaa bɔ nɛ Hiob naa lɛ ɔ lo? Pi wa nya nɛ wa kɛ maa de ke wa peeɔ dami ní pɛ kɛkɛ ɔ nɛ he hia, mohu ɔ, e sa nɛ wa ní peepee nɛ tsɔɔ jã. Ke wa buɔ Mawu tue nɛ wa peeɔ e suɔmi nya ní daa ligbi kɛ waa kɛ haomi ngɛ kpee po ɔ, lɔ ɔ tsɔɔ kaa wa suɔ Mawu kɛ wa tsui tsuo. Ke wa pee jã a, wa ma ha nɛ Yehowa bua maa jɔ nɛ zo maa gbe e nyɛlɔ nɛ ji Satan, kaa bɔ nɛ Hiob hu pee blema a. Lɔ ɔ ji blɔ nɛ hi pe kulaa nɛ wa maa gu nɔ kɛ kase Hiob hemi kɛ yemi ɔ!

Se pi Hiob sane ɔ nyagbe ji nɛ ɔ. E hɛ je sane nɛ he hia wawɛɛ ɔ nɔ, e fa lɛ nitsɛ e he, nɛ e bu e he dalɔ mohu pe Mawu. E sa nɛ a dlaa e susumi konɛ e susu níhi a he kaa bɔ nɛ Mawu susuɔ níhi a he ɔ. Se loloolo ɔ, e ngɛ nɔ́ nae nɛ e ngɛ aywilɛho yee, nɛ e hiaa bua womi wawɛɛ hulɔ. Mɛni Yehowa maa pee kɛ ye bua nyumu nɛ ngɛ hemi kɛ yemi nɛ yeɔ anɔkuale nɛ ɔ? A maa ha sane bimi nɛ ɔ heto ngɛ Hiob he munyu nɛ maa nyɛɛ enɛ ɔ se ɔ mi.