Níhi a mi hlali tsɔɔ kaa gbehi ma nyɛ maa ngɔ a gugwɔ kɛ le gbe kpahi nɛ bɔle mɛ ɔ a jeha, a bɔ su kɛ bɔ nɛ a ngɛ he nue ha. A ma nyɛ ma tsɔse gbehi konɛ a nyɛ nɛ a nu oplɛmihi kɛ tsopa yayahi a he fu. Ngɛ adesahi a blɔ fami ɔ, a ngɔɔ a hɛngmɛ kɛ leɔ níhi nɛ ngɛ nɔ yae ngɛ a kasa nya, se gbehi lɛɛ a kɛ a gugwɔ lɛ leɔ. A kɛ a gugwɔ nɛ “leɔ” níhi nɛ ngɛ nɔ yae.

 MO Susu He Nɛ O Hyɛ: Gbe gugwɔ nuɔ nɔ́ he fu wawɛɛ pe adesahi a gugwɔ si akpehi a bɔ. National Institute of Standards and Technology nɛ ngɛ U.S ɔ bɔ amaniɛ kaa, ke a ngɔ nɔ́ nyafii kɛ wo nyu babauu mi po ɔ, gbe gugwɔ ma nyɛ maa nu nɔ́ ɔ he fu. Kaa nɔ hyɛmi nɔ́ ɔ, ke a ngɔ sikli nɛ sui mine fã po kɛ wo nyu nɛ e hiɛmi maa su ama tɔ kakaaka 15, 723 mi ɔ, gbe gugwɔ ma nyɛ maa nu kaa sikli ngɛ mi.

 Mɛni he je nɛ gbe gugwɔ nuɔ nɔ́ he fu wawɛɛ pe adesahi a gugwɔ ɔ?

•   Gbe gugwɔ ɔ he pɔ, enɛ ɔ he ɔ, e nyɛɔ gblaa ní slɔɔtoslɔɔtohi a he fu.

•   Gbe woɔ mumi kɛ guɔ e gugwɔ puɔ kake mi, nɛ e kɛ puɔ kake ɔ nuɔ nɔ́ he fu. Ke gbe nu nɔ́ he fu ɔ, kɔɔhiɔ ɔ ya guɔ e scent receptors (he nɛ haa e nuɔ nɔ́ he fu) ɔ mi.

•   Gbe gugwɔ ɔ he nɛ e kɛ nuɔ nɔ́ he fu ɔ klemi maa su 130 square centimeters (20 sq in.) loo nɔ́ nɛ pe jã, se adesa nɔ́ ɔ lɛɛ, e klemi maa su 5 square centimeters (0.8 sq in.) pɛ.

•   Níhi nɛ yeɔ bua gbe kɛ nuɔ nɔ́ he fu ɔ hiɛ pe adesahi a nɔ si 50 sɔuu.

 Ní nɛ ɔmɛ yeɔ bua gbehi nɛ ke a nu nɔ́ ko he fu ɔ, a leɔ ní slɔɔtoslɔɔtohi nɛ ngɛ nɔ́ ɔ mi. Kaa nɔ hyɛmi nɔ ɔ, wa ngɔɔ wa gugwɔ kɛ nuɔ hwonyu he fu, se ní leli tsɔɔ kaa ke gbe nu hwonyu ko he fuɔ, e leɔ níhi nɛ a kɛ hoo jamɛ a hwonyu ɔ tsuo.

 Nitsumi he nɛ ji Pine Street Foundation nɛ a hlaa níhi a mi kɛ kɔɔ cancer he ɔ tsɔɔ kaa, gbe juɛmi kɛ e gugwɔ tsuo ní kɛ bla a, enɛ ɔ he je ɔ, e ji “níhi nɛ a nyɛɔ nuɔ nɔ́ he fu wawɛɛ ngɛ nyakpɛ blɔ nɔ ngɛ je ɔ mi” ɔ a kpɛti kake. Jemi si kpali ngɛ mɔde bɔe kaa a maa pee “klamahi” nɛ ma nyɛ maa nu oplɛmihi, tsopa yayahi, kɛ hiɔhi slɔɔtohi nɛ cancer piɛ he ɔ a he fu.

 Kɛ o susu kɛɛ? Anɛ bɔ nɛ gbe gugwɔ tsuɔ ní ha a ba gu aloo nɔ ko lɛ bɔ?