Mɛnɔ Ji Yehowa?
Nɔ́ nɛ Baiblo ɔ de
Yehowa ji anɔkuale Mawu ɔ nɛ a tu e he munyu ngɛ Baiblo ɔ mi ɔ, lɛ nɛ e Bɔ níhi tsuo. (Kpojemi 4:11) Gbali komɛ kaa Abraham kɛ Mose ja lɛ. Yesu hu ja lɛ. (1 Mose 24:27; 2 Mose 15:1, 2; Yohane 20:17) E ji Mawu kɛ ha “je ɔ tsuo,” se pi kɛ ha nihi pɔtɛɛ komɛ pɛ.—La 47:2.
Wa naa Mawu biɛ nɛ ngɛ slɔɔto nɛ ji Yehowa a ngɛ Baiblo ɔ mi. (2 Mose 3:15; La 83:18) Biɛ nɛ ɔ je Hebri peemi munyungu nɛ e sisi ji “e peeɔ” ɔ mi, nɛ womi mi leli komɛ susu kaa e hɛɛ sisi numi nɛ ji “O Deɔ O Peeɔ.” Sisi tsɔɔmi nɛ ɔ sa blɔ nya nɛ Yehowa ngɛ kaa Bɔlɔ kɛ Nɔ Nɛ Haa nɛ e si womihi baa mi ɔ saminya. (Yesaya 55:10, 11) Baiblo ɔ yeɔ bua wɔ nɛ wa leɔ Nɔ tutuutu nɛ hɛɛ biɛ nɛ ji Yehowa a saminya, kɛ e su titli nɛ ji suɔmi ɔ.—2 Mose 34:5-7; Luka 6:35; 1 Yohane 4:8.
Biɛ Yehowa a ji Mawu biɛ nɛ a tsɔɔ sisi kɛ je Hebri gbi mi kɛ ba Dangme mi. Lɔ ɔ ji Hebri ningma okadi eywiɛ nɛ ji יהוה (YHWH), nɛ a tsɛɛ ke Tetragrammaton ɔ. Nɔ ko li bɔ nɛ blema Hebri bi ɔmɛ tsɛɛ Mawu biɛ ɔ ha tutuutu. Se kɛ̃ ɔ, pi mwɔnɛ ɔ nɛ a kɛ biɛ Yehowa nɛ a tsɛɛ ngɛ Blɛfo Gbi mi ke “Jehovah” a bɔni ní tsumi. Biɛ “Jehovah” a je kpo kekleekle ngɛ Blɛfo gbi Baiblo nɛ William Tyndale tsɔɔ sisi ngɛ jeha 1530 ɔ mi ɔ. *
Mɛni he je nɛ nɔ ko li bɔ nɛ a tsɛɔ Mawu biɛ ɔ ha ngɛ blema Hebri gbi mi ɔ?
A be vawɛli ningma okadihi ngɛ blema Hebri ní ngmami mi. Kɔsonati pɛ nɛ a ngɛ. Se ke Hebri no ngɛ Hebri gbi ɔ kanee ɔ, e he wɛ ha lɛ kaa e kɛ vawɛli nɛ sa maa wo mi. Se benɛ a gbe Hebri Ngmami (“Somi Momo”) ɔ nya a, Yuda bi komɛ ná susumi yaya kaa e sɛ nɛ a tsɛ Mawu biɛ ɔ. Ke a ngɛ ngmami ko nɛ Mawu biɛ ɔ je kpo ngɛ mi kanee kɛ ngɛ nihi tsɔɔe ɔ, a ngɔɔ sablai komɛ kaa “Nyɔmtsɛ” loo “Mawu” kɛ daa biɛ ɔ nane mi. Bɔɔbɔɔbɔɔ ɔ, susumi yaya nɛ ɔ gbɛ fĩa, enɛ ɔ he ɔ, bɔ nɛ a tsɛɔ biɛ ɔ ha tutuutu ɔ laa. *
Ni komɛ susu kaa a tsɛɔ Mawu biɛ ɔ ke “Yahweh,” nɛ ni komɛ hu tsɛɔ biɛ ɔ ngɛ blɔ ekpa nɔ. A na Mose womi nɛ ji etɛ ɔ nɛ a ngma ngɛ Hela gbi mi ɔ fã ko ngɛ Ngo Wo ɔ womi kpohi nɛ a na a mi. Ngɛ fã nɛ ɔ mi ɔ, a tsɔɔ Mawu biɛ ɔ sisi tɛɛ ke, Iao. Blema Hela womi ngmali komɛ hu tsɔɔ kaa a tsɛɔ lɛ lae, I·a·beʹ, kɛ I·a·ou·eʹ, se nɔ mi mami ko be nɛ tsɔɔ kaa jã ji bɔ nɛ a tsɛɛ biɛ ɔ ngɛ blema Hebri gbi ɔ mi. *
Susumihi nɛ dɛ ngɛ Mawu biɛ nɛ ngɛ Baiblo ɔ mi ɔ he
Susumi nɛ dɛ: Baiblo sisi tsɔɔmihi nɛ biɛ “Yehowa” ngɛ mi ɔ tsɔɔ kaa Baiblo sisi tsɔɔli ɔmɛ nitsɛmɛ nɛ a kɛ biɛ ɔ wo mi.
Anɔkuale sane: Hebri munyungu nɛ ji Tetragrammaton nɛ a kɛ da si kɛ ha Mawu biɛ ɔ je kpo maa pee si 7,000 ngɛ Baiblo ɔ mi. * Baiblo sisi tsɔɔli fuu je blɔ nɛ a je Mawu biɛ ɔ kɛ je Baiblo ɔ mi, nɛ a kɛ sablai nɛ ji “Nyɔmtsɛ” da nane mi.
Susumi nɛ dɛ: Mawu Ope ɔ hia we biɛ pɔtɛɛ ko.
Anɔkuale sane: Mawu nitsɛ ngɔ e mumi klɔuklɔu ɔ kɛ wo Baiblo ngmali ɔmɛ he wami nɛ a ngɔ e biɛ ɔ kɛ tsu ní si akpehi abɔ. E tsɔɔ hu kaa e sa nɛ nihi nɛ sɔmɔɔ lɛ ɔ nɛ a ngɔ e biɛ ɔ kɛ tsu ní. (Yesaya 42:8; Yoel 2:32; Malaki 3:16; Roma Bi 10:13) Ngɛ anɔkuale mi ɔ, Mawu kã lakpa gbali nɛ a bɔ mɔde kaa a ma ha nɛ nihi a hɛ nɛ je E biɛ ɔ nɔ ɔ a hɛ mi.—Yeremia 23:27.
Susumi nɛ dɛ: Ngɛ blema Yuda bi ɔmɛ a kusumi nya a, e sa nɛ a je Mawu biɛ ɔ kɛ je Baiblo ɔ mi.
Anɔkuale sane: E ngɛ mi kaa Yuda jami hɛ mi nyɛɛli ɔmɛ ekomɛ tsɛ we Mawu biɛ ɔ mohu lɛɛ, se a je we biɛ ɔ ngɛ Baiblohi nɛ a kɛ tsu ní ɔmɛ a mi. Mawu sume nɛ waa nyɛɛ adesahi a kusumihi nɛ teɔ si kɛ woɔ e mlaa amɛ ɔ a se.—Mateo 15:1-3.
Susumi nɛ dɛ: E sɛ nɛ a kɛ Mawu biɛ ɔ nɛ tsu ní ngɛ Baiblo ɔ mi ejakaa nɔ ko lí bɔ nɛ Hebri Bi ɔmɛ tsɛɔ biɛ ɔ ha tutuutu.
Anɔkuale sane: Susumi kaa jã a tsɔɔ kaa Mawu ngɛ hlae nɛ nihi nɛ a tuɔ gbi slɔɔtohi tsuo nɛ a tsɛ e biɛ ɔ ngɛ blɔ kake nɔ. Se Baiblo ɔ tsɔɔ kaa Mawu jali nɛ a hi si blema a tuɔ gbi ekpaekpa, enɛ ɔ he ɔ, e slo bɔ nɛ nɔ tsuaa nɔ tsɛɔ nihi a biɛhi ha.
Kaa nɔ hyɛmi nɔ́ ɔ, mo susu Israel kojolɔ Yoshua he nɛ o hyɛ. Kekleekle jeha lafa a mi Kristofohi nɛ a tuɔ Hebri gbi ɔ ma tsɛ e biɛ ɔ ke, Yehoh·shuʹaʽ. A ti nihi nɛ tuɔ Hela gbi ɔ ma tsɛ biɛ ɔ ke, I·e·sousʹ. Baiblo ɔ kɛ bɔ nɛ Hela Bi ɔmɛ tsɛɔ Yoshua Hebri biɛ ɔ ha a tsu ní, nɛ enɛ ɔ tsɔɔ kaa Kristofohi kɛ bɔ nɛ a tsɛɔ biɛhi ngɛ mɛ nitsɛmɛ a gbi mi ha a lɛ tsu ní.—Bɔfo Ɔmɛ A Ní Tsumi 7:45; Hebri Bi 4:8.
A ma nyɛ maa ngɔ sisi tomi mlaa nɛ ɔ kɛ tsu ní ke a ngɛ Mawu biɛ ɔ sisi tsɔɔe. Tsa pi bɔ nɛ a tsɛɔ biɛ ɔ ha a nɛ he hia, mohu ɔ, e sa nɛ a kɛ biɛ ɔ nɛ wo hehi nɛ e je kpo ngɛ ngɛ Baiblo ɔ mi.
^ Benɛ Tyndale ngɛ Baiblo mi womi enuɔ nɛ sɛ hlami ɔ sisi tsɔɔe ɔ, e kɛ biɛ “Iehouah” nɛ tsu ní. Pee se nɛ blɛfo gbi ɔ tsake ɔ, bɔ nɛ a ngmaa Mawu biɛ ɔ ha a hu tsake. Kaa nɔ hyɛmi nɔ́ ɔ, ngɛ jeha 1612 mi ɔ, Henry Ainsworth kɛ biɛ “Iehovah” nɛ tsu ní ngɛ La womi ɔ nɛ e tsɔɔ sisi ɔ mi. Se be nɛ e pee tsakemi komɛ ngɛ e sisi tsɔɔmi ɔ mi ngɛ jeha 1639 mi ɔ, e kɛ biɛ nɛ ji “Jehovah” lɛ tsu ní. Nihi nɛ a tsɔɔ American Standard Version Baiblo ɔ sisi ngɛ jeha 1901 mi ɔ hu kɛ biɛ nɛ ji “Jehovah” a nɔuu tsu ní ngɛ hehi nɛ Mawu biɛ ɔ je kpo ngɛ ngɛ Hebri ngmami ɔ mi.
^ The New Catholic Encyclopedia, Second Edition, Kpo 14, ba fa 883-884 hu tsɔɔ kaa: “Be nɛ Yuda Bi ɔmɛ je nyɔguɛ tso mi kɛ ba a se ɔ, a susu kaa e sa nɛ a ná bumi ko kɛ ha biɛ nɛ ji Yahweh ɔ, lɔ ɔ he ɔ, a ngɔ munyungu komɛ kaa ADONAI loo ELOHIM kɛ da biɛ ɔ nane mi.”
^ Ke o ngɛ hlae nɛ o le babauu ɔ, hyɛ munyu nɛ ji, “Mawu Biɛ ɔ Ngɛ Hebri Ngmami ɔ Mi,” nɛ ngɛ womi wayo nɛ ji Mawu Munyu ɔ Kasemi Womi ɔ mi ɔ.
^ Hyɛ Theological Lexicon of the Old Testament, Kpo 2, ba fa 523-524.
Eko ɔ, O Bua Maa Jɔ Enɛ ɔ Hu He
ESSENTIAL BIBLE TEACHINGS
Anɛ Mawu Ngɛ Biɛ Lo?
Wa tsɛɔ Mawu ke Ope, Bɔlɔ, Nyɔmtsɛ kɛ ekpahi. Se Mawu biɛ nitsɛnitsɛ je kpo pe si 7,000 ngɛ Baiblo ɔ mi.
HWƆƆMI MƆ
Mɛnɔ ji Mawu?
Loko waa maa le Mawu saminya a, kekleekle ɔ, e sa nɛ waa kɛ lɛ nɛ bɔ huɛ. Kɛ o maa pee lɛ kɛɛ?
BAIBLO MI SANE BIMIHI NƐ A HA HETO
Biɛ Enyɛmɛ Nɛ Mawu Ngɛ?
Ni komɛ susu kaa Mawu ngɛ biɛhi fuu nɛ ekomɛ ji ‘Allah’ kɛ ‘Alfa kɛ Omega.’ Mɛni he je nɛ biɛ nɛ waa kɛ ma tsɛ Mawu ɔ he hia wawɛɛ ɔ?
BAIBLO TSƆƆMIHI
Moo Ka Bɔ Nɛ Wa Baiblo Mi Ní Kasemi ɔ Ngɛ Ha
Mo ha nɛ a kɛ mo nɛ ba kase Baiblo ɔ. A he we nɔ́ ko.