1 Kronika 17:1-27
17 Benɛ David ba je lɛ nitsɛ e we* ɔ mi pɛ nɛ e de gbalɔ Natan ke: “Hyɛ kaa i ngɛ we nɛ a kɛ seda tsohi ma mi, be mi nɛ Yehowa somi daka a ngɛ bo tsu mi.”
2 Natan ha David heto ke: “Moo pee nɔ́ fɛɛ nɔ́ nɛ ngɛ o tsui mi, ejakaa anɔkuale Mawu ɔ kɛ mo ngɛ.”
3 Jamɛ a nyɔ ɔ mi nɔuu ɔ, Mawu kɛ Natan tu munyu ke:
4 “Yaa nɛ o ya de ye sɔmɔlɔ David ke, ‘Nɔ́ nɛ Yehowa ngɛ dee ji nɛ ɔ nɛ: “Pi mo nɛ o maa ma we ha mi nɛ ma hi mi.
5 Ejakaa kɛ je be nɛ i ngɔ Israel kɛ ba, kɛ ba si mwɔnɛ ligbi nɛ ɔ, i hí we ko mi, mohu ɔ, bo tsuhi a mi sɔuu lɛ i hi, kɛ je he kake kɛ ya he kpa.*
6 Kɛ je be nɛ i kɛ Israelbi ɔmɛ tsuo nyɛɛ ɔ, anɛ i bi Israel kojoli nɛ i hla kaa a hyɛ ye ma a nɔ ɔ a ti nɔ ko hyɛ ke, ‘Mɛni he je nɛ o ngɔɛ seda tsohi kɛ pui we ha mi’ lo?”’
7 “Amlɔ nɛ ɔ, de ye sɔmɔlɔ David ke, ‘Nɔ́ nɛ Yehowa tabohiatsɛ ɔ ngɛ dee ji nɛ ɔ nɛ: “I ngɔ mo kɛ je lohwehi a ní yemi hehi, kɛ je to kuu ɔ se, kaa o ba pee ye ma Israel hɛ mi nyɛɛlɔ.
8 Nɛ he fɛɛ he nɛ o maa ya a, ma piɛɛ o he, nɛ ma kpata o he nyɛli ɔmɛ tsuo a hɛ mi;* nɛ ma ha nɛ o he biɛ kaa bɔ nɛ nimli nguahi nɛ a ngɛ zugba a nɔ ɔ he biɛ ɔ.
9 Ma hla he ko ha ye ma Israel, nɛ ma to mɛ si ngɛ lejɛ ɔ, nɛ a maa hi lejɛ ɔ, nɛ nɔ ko be a nya gbae hu; nɛ yiwutsotsɛmɛ be mɛ yi mi wae* hu kaa bɔ nɛ a pee be ko nɛ be ɔ,
10 kɛ je ligbi nɛ i hla kojoli kɛ da ye ma Israel nya a. Nɛ ma ba o he nyɛli ɔmɛ tsuo si. Jehanɛ hu ɔ, i ngɛ mo dee ke, ‘Yehowa maa po we ha mo.’*
11 “‘“Ke o ligbi ɔmɛ ba nyagbe nɛ o gbo ɔ,* ma wo o nina* ko nɔ ngɛ o se, o binyumu ɔmɛ a kpɛti nɔ kake, nɛ ma ha nɛ e matsɛ yemi ɔ maa ma si kpɛii.
12 Lɛ ji nɔ nɛ maa po we kɛ ha mi, nɛ ma ha nɛ e matsɛ sɛ ɔ maa ma si kpɛii kɛ ya neneene.
13 Ma pee e tsɛ, nɛ e maa pee ye binyumu. I be ye suɔmi nɛ se pui ɔ jee ngɛ e nɔ kaa bɔ nɛ i je ngɛ nɔ nɛ sɛ o hlami ɔ nɔ ɔ.
14 Ma ha nɛ e maa da si ngɛ ye we ɔ kɛ ye matsɛ yemi ɔ mi kɛ ya neneene, nɛ e matsɛ sɛ ɔ maa hi si kɛ ya neneene.”’”
15 Natan bɔ David munyu nɛ ɔmɛ tsuo nɛ́ a je ngɔ tsɔɔ lɛ ɔ.
16 Kɛkɛ nɛ Matsɛ David ba nɛ e ba hi si ngɛ Yehowa hɛ mi, nɛ e de ke: “Oo Yehowa Mawu, mɛnɔ ji mi? Nɛ mɛnɔmɛ ji ye we ɔ loko o ngɔ mi kɛ ba su he nɛ i ngɛ nɛ ɔ?
17 Oo Mawu, enɛ ɔ tsuo se ɔ, o kpale tu o sɔmɔlɔ ɔ we ɔ he munyu kɛ ya si hwɔɔ se tɔɔ, nɛ o na mi kaa nɔ ko nɛ e sa kaa a kpale wo e nɔ,* Oo Yehowa Mawu.
18 Mɛni pa ngɛ nɛ o sɔmɔlɔ David ma de mo ngɛ ye hɛ mi nyami nɛ o wo ɔ he, be mi nɛ o le o sɔmɔlɔ ɔ saminya kikɛ nɛ ɔ?
19 Oo Yehowa, o sɔmɔlɔ ɔ, kɛ nɔ́ nɛ o tsui suɔ* he je nɛ o pee ní nguangua nɛ ɔmɛ tsuo, nɛ o je o we agboje ɔ kpo ɔ nɛ.
20 Oo Yehowa, nɔ ko be nɛ e ngɛ kaa mo, nɛ Mawu ko be kaa ja mo pɛ; nɔ́ fɛɛ nɔ́ nɛ wa nu kɛ wa tue ɔ maa enɛ ɔ nɔ mi.
21 Ma te nɛɛ lɛ ngɛ zugba a nɔ nɛ ngɛ kaa o ma Israel? Anɔkuale Mawu ɔ ya nɛ e ya kpɔ̃ mɛ kaa e we bi. O ná biɛ ha o he kɛ gu ní nguanguahi kɛ nyakpɛ níhi nɛ o pee ɔ nɔ, nɛ o fiee je mahi ngɛ o we bi nɛ o kpɔ̃ mɛ kɛ je Egipt ɔ a hɛ mi.
22 O pee o ma Israel mo nitsɛ o ma kɛ yaa neneene; nɛ mo Yehowa, o ba pee a Mawu.
23 Amlɔ nɛ ɔ, Oo Yehowa, moo ye si nɛ o wo o sɔmɔlɔ ɔ kɛ e we ɔ nɔ kɛ ya neneene, nɛ́ o pee kaa bɔ nɛ o wo si ɔ pɛpɛɛpɛ.
24 O biɛ ɔ nɛ hi si daa,* nɛ́ a wo nɔ kɛ ya neneene, konɛ nihi nɛ a de ke, ‘Yehowa tabohiatsɛ ɔ, nɛ ji Israel Mawu ɔ ji Mawu kɛ ha Israel,’ nɛ́ o sɔmɔlɔ David we ɔ nɛ ma si kpɛii ngɛ o hɛ mi.
25 Ejakaa mo, ye Mawu, mo lɛ o je o yi mi tomi kpo kɛ tsɔɔ o sɔmɔlɔ ɔ kaa o maa po we ha lɛ.* Enɛ ɔ he je nɛ o sɔmɔlɔ ɔ ná kã kɛ ngɛ sɔlemi nɛ ɔ sɔlee ha mo ɔ nɛ.
26 Nɛ amlɔ nɛ ɔ, Oo Yehowa, mo ji anɔkuale Mawu ɔ nɛ, nɛ o kɛ ní kpakpa nɛ ɔmɛ wo o sɔmɔlɔ ɔ si.
27 Enɛ ɔ he ɔ, o bua nɛ jɔ he nɛ́ o jɔɔ o sɔmɔlɔ ɔ we ɔ, nɛ́ e hi si kɛ ya neneene ngɛ o hɛ mi, ejakaa mo Yehowa, o jɔɔ o sɔmɔlɔ ɔ we ɔ, nɛ a jɔɔ e we ɔ kɛ yaa neneene.”
Sisi Ningmahi
^ Aloo “matsɛ we.”
^ Eko ɔ, e sisi ji “i jeɔ bo tsu mami he kake kɛ yaa bo tsu mami he kpa, kɛ sihi he kake kɛ yaa sihi he kpa.”
^ Ngɛ Hebri gbi mi ɔ, “ma poo o he nyɛli ɔmɛ tsuo kɛ je o hɛ mi.”
^ Ngɛ Hebri gbi mi ɔ, “be hae nɛ pɔ nɛ tɔ a he.”
^ Aloo “ma ha nɛ o sisi bimɛ nɛ a ye matsɛ.”
^ Ngɛ Hebri gbi mi ɔ, “o ya piɛɛ o nɛmɛ ɔmɛ a he ɔ.”
^ Ngɛ Hebri gbi mi ɔ, “ngmɛdu.”
^ Aloo “nɔ ko nɛ hɛɛ blɔ nya ngua.”
^ Aloo “o suɔmi nya.”
^ Aloo “Ha nɛ nɔ́ nɛ o biɛ ɔ daa si kɛ ha a nɛ ba mi.”
^ Aloo “O ma ha nɛ e sisi bimɛ maa ye matsɛ.”
