5 Mose 6:1-25
6 “Jehanɛ ɔ, mlaahi, blɔ tsɔɔmihi, kɛ kojomihi nɛ Yehowa nyɛ Mawu ɔ kɛ ha kaa a tsɔɔ nyɛ konɛ nyɛɛ ye a nɔ ke nyɛ po mi kɛ ya zugba nɛ nyɛ ma ya ngɔ ɔ nɔ ji nɛ ɔmɛ nɛ,
2 bɔ nɛ pee nɛ o ye Yehowa o Mawu ɔ gbeye, nɛ o ye e blɔ tsɔɔmi ɔmɛ kɛ e mlaa amɛ tsuo nɛ i ngɛ mo hae ɔ nɔ—o kɛ o bimɛ, kɛ o bibimɛ ɔmɛ—o wami ligbi ɔmɛ tsuo, konɛ o se nɛ kɛ ngɛ je mi.
3 Lɔ ɔ he ɔ Israel, moo bu tue nɛ o ye nɔ sisiisi konɛ e hi ha mo nɛ nyɛ he nɛ hiɛ ngɛ zugba nɛ nyɔ nyu kɛ hwo ngɛ bee ngɛ nɔ ɔ nɔ kaa bɔ nɛ Yehowa, o nɛmɛ ɔmɛ a Mawu ɔ wo mo si ɔ.
4 “Israel, Moo bu tue: Yehowa wa Mawu ɔ ji Yehowa kake.
5 Moo suɔ Yehowa o Mawu ɔ kɛ o tsui tsuo, kɛ o klaa* tsuo, kɛ o he wami* tsuo.
6 Mlaa nɛ ɔmɛ nɛ i ngɛ mo woe mwɔnɛ ɔ nɛ a hi o tsui nɔ,
7 nɛ o du kɛ wo o bimɛ* ɔmɛ a mi,* nɛ o tu a he munyu be mi nɛ o hii si ngɛ we mi, kɛ be mi nɛ o ngɛ nyɛɛe ngɛ blɔ nɔ, kɛ be mi nɛ o hwɔɔ si, kɛ be mi nɛ o te si.
8 Moo fĩ mɛ kɛ wo o nine he kaa kaimi nɔ́, nɛ a hi o hɛ nya* kaa yi fimi nɔ́.
9 Moo ngma mɛ ngɛ o we ɔ sinya tso ɔmɛ a he, kɛ agbo ɔmɛ a nya.
10 “Ke Yehowa o Mawu ɔ ngɔ mo kɛ ba zugba nɛ e kã o nɛmɛ Abraham, Isak, kɛ Yakob kita kaa e kɛ ma ha mo ɔ nɔ, nɛ ji ma nguahi nɛ a ngɛ fɛu nɛ pi mo nitsɛ nɛ o po,
11 wehi nɛ a mi hyi tɔ kɛ ní kpakpa slɔɔtohi fuu nɛ pi mo nɛ o tsu ní kɛ ná, nyu tomi muɔhi nɛ pi mo nɛ o tsua, kɛ wai ngmɔhi kɛ oliv tsohi nɛ pi mo nɛ o du, nɛ o ye nɛ o tɔ ɔ,
12 hyɛ nɛ hi nɛ o hɛ ko je Yehowa nɔ, nɔ nɛ e ngɔ mo kɛ je Egipt zugba a nɔ, kɛ je nyɔguɛ yemi mi* ɔ.
13 Yehowa o Mawu ɔ ji nɔ nɛ e sa kaa o ye lɛ gbeye, nɛ lɛ nɛ e sa kaa o sɔmɔ, nɛ e biɛ nɛ e sa kaa o kɛ kã kita.
14 Nyɛ ko ya nyɛɛ mawu kpahi, nɛ ji nihi nɛ a bɔle nyɛ kɛ kpe ɔ a mawu ɔmɛ ekoeko se,
15 ejakaa Yehowa o Mawu ɔ nɛ ngɛ nyɛ kpɛti ɔ ji Mawu nɛ suɔ kaa a ja lɛ pɛ. Ke pi jã a Yehowa o Mawu ɔ mi mi ma fu mo wawɛɛ, nɛ e ma kpata o hɛ mi kɛ je zugba a nɔ.
16 “Nyɛ ko ka Yehowa nyɛ Mawu ɔ kaa bɔ nɛ nyɛ ka lɛ ngɛ Masa a.
17 Nyɛɛ ye Yehowa nyɛ Mawu ɔ mlaa amɛ, kɛ e kaimi ɔmɛ, kɛ e blɔ tsɔɔmi ɔmɛ nɛ e fã nyɛ ke nyɛɛ ye a nɔ ɔ nɔ pɛpɛɛpɛ.
18 Moo pee nɔ́ nɛ da kɛ nɔ́ nɛ hi ngɛ Yehowa hɛ mi, konɛ e hi ha mo, nɛ o ya zugba kpakpa nɛ Yehowa o Mawu ɔ kã o nɛmɛ ɔmɛ kita ngɛ he ɔ nɔ, nɛ o ya ngɔ,
19 kɛ gu fieemi nɛ o maa fiee o he nyɛli ɔmɛ tsuo ngɛ o hɛ mi kaa bɔ nɛ Yehowa wo si ɔ nɔ.
20 “Hwɔɔ se ɔ, ke o bi* ba bi mo ke, ‘Mɛni ji kaimihi kɛ blɔ tsɔɔmihi kɛ kojomihi nɛ Yehowa wa Mawu ɔ kɛ ha nyɛ ɔ sisi?’ ɔ,
21 o ma de o bi* ɔ ke, ‘Wa ya pee nyɔguɛ ha Farao ngɛ Egipt, se Yehowa kɛ kɔni si wami je wɔ kɛ je Egipt.
22 Lɔ ɔ he ɔ, Yehowa ya nɔ nɛ e ngɔ okadihi kɛ nyakpɛ níhi, kɛ ní nguanguahi nɛ a ngɛ gbeye kɛ ba Egipt, kɛ Farao kɛ e we ɔ tsuo nɔ ngɛ wa hɛ mi.
23 Nɛ e je wɔ kɛ je lejɛ ɔ konɛ e ngɔ wɔ kɛ ba hiɛmɛ nɛ ɔ, nɛ́ e ngɔ zugba nɛ e kã wa nɛmɛ ɔmɛ kita ngɛ he ɔ kɛ ha wɔ.
24 Kɛkɛ nɛ Yehowa fã wɔ ke waa ye blɔ tsɔɔmi nɛ ɔmɛ tsuo a nɔ, nɛ waa ye Yehowa wa Mawu ɔ gbeye konɛ e hi ha wɔ kɛ ya neneene, nɛ waa ya nɔ nɛ waa hi wami mi kaa bɔ nɛ wa ngɛ mwɔnɛ ɔ.
25 Nɛ ke wa hyɛ saminya nɛ wa ye kita nɛ ɔmɛ tsuo a nɔ kɛ je bumi kpo kɛ ha Yehowa wa Mawu ɔ* kaa bɔ nɛ e fã wɔ ɔ, e maa bu wɔ dali.’
Sisi Ningmahi
^ Aloo “o níhi.”
^ Ngɛ Hebri gbi mi ɔ, “binyumu.”
^ Aloo “moo tí mi kɛ ha o bimɛ ɔmɛ; moo ma nɔ mi kɛ ha o bimɛ ɔmɛ.”
^ Ngɛ Hebri gbi mi ɔ, “o hɛngmɛ ɔmɛ a kpɛ.”
^ Ngɛ Hebri gbi mi ɔ, “nyɔguɛ yemi we mi.”
^ Ngɛ Hebri gbi mi ɔ, “binyumu.”
^ Ngɛ Hebri gbi mi ɔ, “binyumu.”
^ Ngɛ Hebri gbi mi ɔ, “wa ye kita nɛ ɔmɛ tsuo a nɔ ngɛ Yehowa wa Mawu ɔ hɛ mi.”
