Abɛ 6:1-35
6 Ye bi, ke o ya da nɔ ko se,Ke o ya sa nubwɔ ko dɛ,*
2 Ke o wo si nɛ si womi ɔ du mo kaa klama,Ke o nya mi munyu fĩ mo ɔ,
3 Ye bi, moo pee nɔ́ nɛ ɔ konɛ o ye o he,Ejakaa o nyɛmi ɔ nine su o nɔ:
Yaa nɛ o ya ba o he si, nɛ o kpa lɛ pɛɛ esɔesɔ.
4 Ko ha nɛ o hɛngmɛ nɛ hwɔ mahe,Nɛ koo de kɔnɛɛ hulɔ.
5 Kpɔ̃ o he nɛ o je e dɛ kaa bɔ nɛ odabɔ jeɔ detsɛ dɛ ɔ,Kaa bɔ nɛ lohwe pɛlitsɛ jeɔ lohwe pɛlitsɛ nulɔ dɛ ɔ.
6 Hejɔtsɛ, yaa tatu ngɔ nɛ o ya kase lɛ;Moo to bɔ nɛ e peeɔ e ni ha a he hɛ konɛ o le ní.
7 E ngɛ mi kaa e be hɛ mi nyɛɛlɔ, loo nɔkɔtɔma, loo nɔ yelɔ ko mohu lɛɛ,
8 Se e hlaa e niye ní ngɛ mawulɛ be mi,Nɛ e buaa e niye ní nya ngɛ ní kpami be mi.
9 Mo hejɔtsɛ, o maa hwɔ si kɛ ya si mɛni be?
Mɛni be nɛ o maa te si kɛ je o mahe ɔ mi?
10 Oo, ma hwɔ mahe bɔɔ, ma de kɔnɛɛ bɔɔ,Ma bua ye nine nya nɛ ma jɔɔ ye he bɔɔ,
11 O hɛɛ mi jã nɛ ohia ma ba ná mo tlukaa kaa julɔ,Nɛ o he maa fĩ mo kaa nɔ́ nɛ awi yelɔ ba tua mo.
12 Yaka nɔmlɔ kɛ yiwutsotsɛ nyɛɛɔ kɛ yaa kɛ baa kɛ sisimi munyu;
13 E kɛ e hɛngmɛ, kɛ e nane, kɛ e nine nguɛhi peeɔ okadi.
14 E kɛ tsui yayaToɔ ga yaya, nɛ e gbɛɛ pɛ munyuhi kɛ fĩaa be fɛɛ be.
15 Lɔ ɔ he ɔ, e haomi ɔ maa ba tlukaa;Ngɛ be kpiti mi ɔ, a maa kũɔ lɛ nɛ e be hie tsami.
16 Ní ekpa komɛ ngɛ nɛ Yehowa hiɔ;Ee, ní kpaago komɛ ngɛ nɛ a peeɔ lɛ* tai:
17 He nɔ womi, lakpa yemi, nɔ nɛ pee we nɔ́ ko muɔ si puemi,
18 Ga yaya tomi, he sɔmi kɛ nɔ́ yayami peemi,
19 Lakpa odase yemi,Kɛ nyɛmimɛ a kpɛti pɛ womi.
20 Ye bi, moo ye o tsɛ mlaa nɔ,Nɛ ko kua o nyɛ blɔ tsɔɔmi.*
21 Moo fĩ mɛ kɛ wo o tsui he be fɛɛ be;Moo fĩ mɛ kɛ wo o kuɛ.
22 Ngɛ o yami kɛ o bami mi ɔ, e maa tsɔɔ mo blɔ;Ke o hwɔ si ɔ, e maa bu o he;Nɛ ke o hɛ tsɛ̃ ɔ, e maa tsɔɔ mo ní.*
23 Ejakaa kita a ji kane,Nɛ mlaa a ji la,Nɛ hɛ mi kamihi nɛ tsɔseɔ nɔ ɔ ji wami blɔ.
24 A maa bu o he ngɛ yo yaya a he,Ngɛ yo nɛ e je mi bami puɛ* ɔ nɔ sisimi lilɛ ɔ he.
25 Ko ha nɛ e he nɛ pee mo fɛu ngɛ o tsui mi,Nɛ ko ha nɛ e ngɔ e hɛngmɛ dɔkɔɔ ɔ kɛ gbla mo,
26 Ejakaa tuutuu polɔ haa nɛ nyumu yeɔ ohia nɛ abolo kake pɛ lɛ e nyɛɔ heɔ,Se nɔ kpa yo ngɔmi kpataa wami* nɛ he jua wa hɛ mi.
27 Anɛ nɔ ko ma nyɛ maa je la kɛ pue e gugue mi nɛ e tade be sãe lo?
28 Aloo nɔ ko ma nyɛ maa naa la ngu nɔ nɛ e nane si be sãe lo?
29 Jã pɛpɛɛpɛ nɛ e ji ngɛ nɔ fɛɛ nɔ nɛ e kɛ nɔ kpa yo náa bɔmi ɔ blɔ fa mi;Nɔ ko be nɛ e maa ta yo kaa jã a he nɛ a be e tue gblae.
30 Ke hwɔ ngɛ nɔ ko yee nɛ e ya ju konɛ e kɛ gbe e hwɔ ɔ,*Nihi gbi e he guɛ.
31 Se kɛ̃ ɔ, ke a nu lɛ ɔ, e maa to nane mi kɛ bɔ he si kpaago;E maa ngɔ e we mi níhi tsuo nɛ a he jua wa a kɛ ha.
32 Nɔ fɛɛ nɔ nɛ e kɛ yo puɛɔ gba a, e be juɛmi;*Nɔ nɛ peeɔ jã a ngɔɔ hɛ mi kpatami kɛ baa lɛ nitsɛ e nɔ.*
33 Haomi kɛ hɛ mi si puemi pɛ lɛ e ma ná,Nɛ zo nɛ gbe lɛ ɔ be jee gblegbleegble.
34 Ejakaa hunga jemi haa nɛ huno mi mi fuɔ wawɛɛ;Ke e ngɛ lue yee ɔ, e be mi mi sami kpo jee.
35 E be kpatami* nɔ́ ko nɔ kplɛɛe;Ke o ke lɛ ní babauu po, e tsui be jɔe.
Sisi Ningmahi
^ Nɛ tsɔɔ kaa o pee jã kɛ wo lɛ si.
^ Aloo “e klaa.”
^ Aloo “mlaa a.”
^ Aloo “e maa wo mo ga.”
^ Aloo “o klaa.”
^ Aloo “konɛ e kɛ ha nɛ e klaa nɛ tɔ ɔ.”
^ Ngɛ Hebri gbi mi ɔ, “e be tsui nɛ nuɔ nɔ́ sisi.”
^ Aloo “kɛ baa e klaa nɔ.”
^ Aloo “kpɔmi.”
