La 146:1-10
146 Nyɛ je Yah yi!*
Ha nɛ ma* je Yehowa yi.
2 Ma je Yehowa yi ye wami ligbi ɔ tsuo.
Ma la yi jemi lahi* kɛ ha ye Mawu ɔ be abɔ nɛ i ngɛ wami mi ɔ.
3 Koo ngɔ o hɛ kɛ fɔ ma nikɔtɔmahi* a nɔ,Aloo nɔmlɔ adesa ko nɔ, ejakaa e be nyɛe ma he nɔ yi wami.
4 E mumi* ɔ jeɔ e mi, nɛ e kpaleɔ kɛ yaa zu mi;Jamɛ a ligbi ɔ nɔuu ɔ, e susumihi a se poɔ.
5 Nɔ nɛ Yakob Mawu ɔ ji e yemi kɛ bualɔ ɔ ngɛ bua jɔmi,Nɔ nɛ e ngɔɔ e hɛ kɛ fɔɔ Yehowa e Mawu ɔ nɔ ɔ,
6 Hiɔwe kɛ zugba,Kɛ wo kɛ níhi tsuo nɛ ngɛ a mi ɔ a Peelɔ ɔ,Nɔ nɛ yeɔ anɔkuale be fɛɛ be ɔ,
7 Nɔ nɛ yeɔ dami sane ha nihi nɛ a fia mɛ ojo ɔ,Nɔ nɛ haa nihi nɛ hwɔ yeɔ mɛ ɔ niye ní ɔ.
Yehowa ha nɛ nihi nɛ a wo mɛ tsu ɔ ngɛ a he yee.*
8 Yehowa ngɛ hɛ yuyuili a hɛngmɛ blie;Yehowa ngɛ nihi nɛ a miɔ nɛ a maa nɔ si ɔ nɔ woe;Yehowa suɔ dali.
9 Yehowa ngɛ nibwɔhi a he piɛ poe;E baa awusa* kɛ yalɔyo a yi,Se e puɛɔ yiwutsotsɛmɛ a ga tsɔmihi.*
10 Yehowa maa pee Matsɛ kɛ ya neneene,Oo Zion, o Mawu ɔ maa pee matsɛ yi nɔhi tsuo.
Nyɛ je Yah yi!*
Sisi Ningmahi
^ Aloo “Haleluyah!” “Yah” ji biɛ Yehowa a kpiti pomi.
^ Aloo “ye klaa nɛ.”
^ Aloo “Ma fia la.”
^ Aloo “odehehi.”
^ Aloo “Kɔɔhiɔ nɛ e muɔ.”
^ Ngɛ Hebri gbi mi ɔ, “Yehowa ngɛ nihi nɛ a fĩ mɛ ɔ pɛnee.”
^ Ngɛ Hebri gbi mi ɔ, “bi nɛ e be tsɛ.”
^ Aloo “e haa yiwutsotsɛmɛ a blɔ kpɛɔ.”
^ Aloo “Haleluyah!” “Yah” ji biɛ Yehowa a kpiti pomi.
