Luka Sane Kpakpa a 1:1-80
1 Akɛnɛ i na kaa nihi fuu bɔ mɔde kaa a ma bua anɔkuale munyuhi nɛ wa kplɛɛ nɔ kaa a da kɛ pi si* ɔmɛ a nya
2 kaa bɔ nɛ nihi nɛ a na kɛ a hɛ ngmɛ kɛ je sisije nɛ a ji sɛ gbi ɔ he sɔmɔli ɔ ngɔ kɛ ha wɔ ɔ he je ɔ,
3 imi hu i hla níhi tsuo nɛ ya nɔ kɛ je sisije ɔ mi fitsofitso, nɛ i ma ye juɛmi nya si kaa ma ngma bɔ nɛ sane ɔ ya nɔ setsɔsetsɔ ha a kɛ ha mo, wa nɔmo Teofilo,
4 konɛ o na kaa níhi nɛ a de mo nɛ o kase ɔ ji anɔkuale nitsɛnitsɛ.
5 Benɛ Hɛrode* ngɛ matsɛ yee ngɛ Yudea a, osɔfo ko hi si nɛ a tsɛɛ lɛ ke Zakaria. E ji Abiya osɔfohi a kuu ɔ mi no. E yo ɔ je Aaron bimɛ yi ɔmɛ a kpɛti, nɛ e biɛ ji Elizabɛt.
6 Mɛ ni enyɔ ɔmɛ tsuo a ji dali ngɛ Mawu hɛ mi, a yeɔ Yehowa* kita amɛ kɛ e mlaa amɛ tsuo a nɔ, nɛ piami ko be a he.
7 Se a be bi, ejakaa yosa ji Elizabɛt, nɛ mɛ ni enyɔ ɔmɛ tsuo a bwɔ.
8 Ligbi ko ɔ, benɛ e su a kuu ɔ nɔ nɛ e ngɛ sɔmɔe kaa osɔfo ngɛ Mawu hɛ mi
9 kaa bɔ nɛ osɔfo yemi blɔ nya tomi ɔ ngɛ ɔ, e ba su e nɔ, nɛ e sɛ Yehowa* jami he ɔ konɛ e ya sã tsopa kɛ e he via.
10 Nɛ nimli babauu ɔ tsuo ngɛ sɔlee ngɛ kpo ɔ nɔ ngɛ tsopa kɛ e he via sami ngmlɛfia a mi.
11 Yehowa* bɔfo ko ba je e he kpo kɛ tsɔɔ lɛ. E ba daa si ngɛ tsopa kɛ e he via sami la tɛ ɔ hiɔ nɔ je.
12 Se benɛ Zakaria na lɛ ɔ, e tsui po, nɛ e ye gbeye.
13 Se bɔfo ɔ de lɛ ke: “Zakaria, koo ye gbeye, ejakaa a bu o pɛɛ kpami nɛ mi wa a tue nɛ a ma ha mo heto. O yo Elizabɛt ma fɔ binyumu, nɛ o maa wo lɛ biɛ ke Yohane.
14 Ke a fɔ lɛ ɔ, o bua maa jɔ nɛ o ma nya wawɛɛ nitsɛ, nɛ nihi babauu hu ma nya jã nɔuu,
15 ejakaa e maa pee nɔmlɔ ngua ngɛ Yehowa* hɛ mi. Se e sɛ nɛ e nu wai loo dã nɛ nya wa ko kulaa, nɛ mumi klɔuklɔu ɔ ma hyi lɛ tɔ kɛ maa je e nyɛ ɔ fɔmi kotoku mi tɔɔ,
16 nɛ e maa kpale Israel bi ɔmɛ a ti nihi fuu kɛ ba Yehowa,* a Mawu ɔ ngɔ.
17 Jehanɛ se hu ɔ, e kɛ Eliya mumi ɔ kɛ e he wami ɔ maa sɛ e hlami, nɛ e maa kpale tsɛmɛ a tsui kɛ ba bimɛ a he kɛ tue gboli kɛ ba dali a juɛmi nɛ a kɛ tsuɔ ní ɔ he, konɛ e dla nihi ngɔ to Yehowa.”*
18 Zakaria de bɔfo ɔ ke: “Kɛ ma plɛ kɛ ná nɔ mi mami kaa nɔ́ nɛ ɔ maa ba mi kɛɛ? Ejakaa nɔmoyo ji mi, nɛ ye yo ɔ hu bwɔ.”
19 Bɔfo ɔ ha lɛ heto ke: “Imi ji Gebriɛl, nɔ nɛ e daa Mawu hɛ mi haa a nɛ. A tsɔ mi ke ma ba jaje manye munyu nɛ ɔ kɛ ha mo.
20 Se hyɛ! o maa pee mumui, nɛ o be nyɛe maa tu munyu kɛ yaa si ligbi nɛ ní nɛ ɔmɛ maa ba mi, ejakaa níhi nɛ i de mo nɛ a maa ba mi ngɛ be nɛ a to ɔ nya a, o he we yi.”
21 Jamɛ a be ɔ mi tsuo ɔ, ni ɔmɛ ngɛ Zakaria mlɛe, nɛ e pee mɛ nyakpɛ kaa e se ya kɛ wawɛɛ ngɛ jami he ɔ jã.
22 Benɛ e je kpo ɔ, e nyɛ we nɛ e tu munyu. Kɛkɛ nɛ a yɔse kaa e na nyakpɛ nɔ́* ko ngɛ jami he ɔ. E ngɛ okadihi pee kɛ ngɛ mɛ tsɔɔe, se e nyɛ we nɛ e tu munyu.
23 Benɛ ligbi ɔmɛ nɛ e kɛ ma tsu e ní tsumi klɔuklɔu ɔ* ba nyagbe ɔ, e je kɛ ho e we mi ya.
24 Ligbi komɛ a se ɔ, e yo Elizabɛt ngɔ hɔ nɛ e ngɔ e he kɛ laa nyɔhiɔ enuɔ, nɛ e hii dee ke:
25 “Amlɔ nɛ ɔ, nɔ́ nɛ Yehowa* pee ha mi ji nɛ ɔ nɛ. E kai mi nɛ e ha nɛ ye hɛ mi nɛ pue si ngɛ nihi a hɛ mi ɔ se po.”
26 Benɛ e hɔ ɔ ye nyɔhiɔ ekpa a, Mawu tsɔ bɔfo Gebriɛl kɛ ya Galilea ma nɛ a tsɛɛ ke Nazarɛt ɔ mi.
27 E ya yomiyo ko nɛ nyumu ko nɛ a tsɛɛ lɛ ke Yosɛf, nɛ e je David we ɔ mi ɔ ya bi e si* kaa e maa ngɔ lɛ ɔ ngɔ. A tsɛɛ yomiyo ɔ ke Maria.
28 Nɛ benɛ bɔfo ɔ ba e ngɔ ɔ, bɔfo ɔ de lɛ ke: “He manye, mo nɛ a ná o he bua jɔmi babauu, Yehowa* kɛ mo ngɛ.”
29 Se bɔfo ɔ munyu ɔ ha nɛ e hao wawɛɛ, nɛ e bɔ mɔde kaa e maa nu fɔmi nɛ e fɔ lɛ ɔ sisi.
30 Lɔ ɔ he ɔ, bɔfo ɔ de lɛ ke: “Maria, koo ye gbeye, ejakaa Mawu ná o he bua jɔmi.
31 Nɛ hyɛ! o maa ngɔ hɔ nɛ o ma fɔ binyumu, nɛ o maa wo lɛ biɛ ke Yesu.
32 E ma ba pee nɔmlɔ ngua, nɛ a ma tsɛ lɛ ke Hiɔwe Lokoo No ɔ Bi, nɛ Yehowa* Mawu maa ngɔ e tsɛ David matsɛ sɛ ɔ kɛ ha lɛ,
33 nɛ e maa ye Yakɔb we ɔ nɔ Matsɛ kɛ maa ya neneene, nɛ e Matsɛ Yemi ɔ se be poe.”
34 Se Maria de bɔfo ɔ ke: “Kɛ enɛ ɔ ma plɛ kɛ ba mi ha kɛɛ, ejakaa i kɛ nyumu ko ná we bɔmi hyɛ?”
35 Bɔfo ɔ ha lɛ heto ke: “Mumi klɔuklɔu ɔ maa ba o nɔ, nɛ Hiɔwe Lokoo No ɔ he wami ɔ maa ha o nɔ. Enɛ ɔ he je ɔ, a ma tsɛ nɔ nɛ o ma fɔ ɔ ke klɔuklɔu, Mawu Bi.
36 Nɛ hyɛ! o weku no Elizabɛt nɛ e bwɔ ɔ hu hɛɛ hɔ, nɛ e ma fɔ binyumu. Nɔ nɛ a ke a tsɛɛ lɛ ke yosa a, e hɛɛ hɔ nyɔhiɔ ekpa ji nɛ ɔ nɛ;
37 ejakaa nɔ́ ko nɔ́ ko sui Mawu peemi.”
38 Lɔ ɔ se ɔ, Maria de ke: “Hyɛ! Yehowa mawayo ji mi! E ba mi ha mi kaa bɔ nɛ o de ɔ.” Kɛkɛ nɛ bɔfo ɔ je e he.
39 Enɛ ɔ he ɔ, ngɛ jamɛ a be ɔ mi ɔ, Maria pue nɔ esɔesɔ kɛ ho Yuda ma ko nɛ ngɛ yoku ɔmɛ a nɔ ɔ mi ya,
40 nɛ e ya sɛ Zakaria we ɔ mi nɛ e fɔ Elizabɛt.
41 Nɛ benɛ Elizabɛt nu nɛ Maria fɔ lɛ ɔ, bimwɔyo ɔ nɛ ngɛ e fɔmi kotoku ɔ mi ɔ tu, kɛkɛ nɛ mumi klɔuklɔu ɔ hyi Elizabɛt tɔ,
42 nɛ e kpa ngmlaa wawɛɛ ke: “A jɔɔ mo ngɛ yihi a kpɛti, nɛ a jɔɔ bi nɛ ngɛ o fɔmi kotoku ɔ mi ɔ!
43 Lɛɛ kɛ ba lɛ kɛɛ nɛ i ná he blɔ nɛ ɔ kaa ye Nyɔmtsɛ ɔ yayo ba ye ngɔ ɔ?
44 Ejakaa hyɛ! benɛ o fɔ mi nɛ i nu o gbi pɛ ɔ, bimwɔyo nɛ ngɛ ye fɔmi kotoku ɔ mi ɔ kɛ bua jɔmi tu.
45 Yo ɔ nɛ e he ye ɔ hu ngɛ bua jɔmi, ejakaa níhi nɛ Yehowa* ha nɛ a de lɛ ɔ maa ba mi sisiisi.”
46 Nɛ Maria de ke: “Ye susuma* woɔ Yehowa* nɔ gojoo,
47 nɛ ye mumi ɔ maa ya nɔ ma nya ngɛ Mawu, ye yi Wami Helɔ ɔ he
48 kaa e kai e mawayo nɛ e be nɔ́ ko ɔ. Ejakaa hyɛ! kɛ je amlɔ nɛ ɔ kɛ yaa a, yi nɔhi tsuo maa jaje ke i ngɛ bua jɔmi,
49 ejakaa Hewamitsɛ ɔ pee ní nguanguahi ha mi, nɛ e biɛ ngɛ klɔuklɔu,
50 nɛ ngɛ yi nɔ fɛɛ yi nɔ mi ɔ, e naa nihi nɛ a yeɔ lɛ gbeye ɔ mɔbɔ.
51 E kɛ e nine tsu he wami ní tsumihi; e gbɛ nihi nɛ a woɔ a he nɔ ngɛ a tsui mi susumi mi ɔ ngɔ fĩa.
52 E kple nimli nguanguahi si kɛ je matsɛ sɛhi a nɔ, nɛ e wo nihi nɛ a be nɔ́ ko ɔ a nɔ;
53 nihi nɛ hwɔ ngɛ mɛ yee ɔ, e ha mɛ ní kpakpahi nɛ a tɔ saminya, nɛ e fiee niatsɛmɛ kɛ ho kɛ a dɛ gu.
54 E ba ye bua e sɔmɔlɔ Israel kɛ tsɔɔ kaa mɔbɔ
55 nɛ e wo si kaa e maa na Abraham kɛ e nina a,* e hɛ be nɔ jee kɛ maa ya neneene. Enɛ ɔ ji nɔ́ nɛ e de wa nɛmɛ ɔmɛ ɔ nɛ.”
56 Maria kɛ lɛ hi si maa pee nyɔhiɔ etɛ, nɛ lɔ ɔ se ɔ, e kpale kɛ ho lɛ nitsɛ e we mi ya.
57 Jehanɛ ɔ, Elizabɛt fɔmi be ba su nɛ e fɔ binyumu.
58 Nɛ nihi nɛ e kɛ mɛ ngɛ kpɔ ɔ mi ɔ kɛ e weku li nu he kaa Yehowa* na lɛ mɔbɔ babauu, nɛ a kɛ lɛ nya.
59 Ngɛ ligbi kpaanyɔne ɔ nɔ ɔ, a ba po jokuɛ nyumuyo ɔ, nɛ jinɛ a kɛ e tsɛ Zakaria biɛ ɔ yaa wo lɛ.
60 Se e yayo de mɛ ke: “Dɛbi! a ma tsɛ lɛ ke Yohane.”
61 Enɛ ɔ he ɔ, a de lɛ ke: “Nɔ ko tsa be o weku ɔ mi nɛ a tsɛɛ lɛ jã.”
62 Kɛkɛ nɛ a pee okadi kɛ bi jokuɛ ɔ tsɛ ɔ biɛ nɛ e suɔ kaa e maa wo lɛ.
63 Enɛ ɔ he ɔ, e ha nɛ a ngɔ sleeti kɛ ba ha lɛ, nɛ e ngma ngɛ nɔ ke: “A ma tsɛ lɛ ke Yohane.” Kɛkɛ nɛ e pee mɛ tsuo nyakpɛ.
64 Amlɔ nɔuu ɔ, e lilɛ kpa a pɛne nɛ e bɔni munyu tumi, nɛ e bɔni Mawu yi jemi.
65 Nɛ gbeye nu nihi tsuo nɛ e kɛ mɛ ngɛ kpɔ ɔ mi ɔ, nɛ a bɔni ní nɛ ɔmɛ tsuo a he munyu tumi ngɛ Yudea ma nɛ ngɛ yoku ɔmɛ a nɔ ɔ mi.
66 Nɛ nihi tsuo nɛ a nu he ɔ ngɔ kɛ to a tsui mi, nɛ a hii bie ke: “Mɛni nɔmlɔ po jokuɛ nɛ ɔ ma ba pee?” Ejakaa ngɛ anɔkuale mi ɔ, Yehowa* nine ngɛ e nɔ.
67 Kɛkɛ nɛ mumi klɔuklɔu hyi e tsɛ Zakaria tɔ, nɛ e gba nɛ e de ke:
68 “A je Yehowa* Israel Mawu ɔ yi, ejakaa e kai e we bi ɔmɛ, nɛ e ha nɛ a ye a he.
69 Nɛ e tle yi wami hemi koli ko* si kɛ ha wɔ ngɛ e sɔmɔlɔ David we ɔ mi
70 kaa bɔ nɛ e gu e gbali klɔuklɔu ɔmɛ nɛ a hi si blema a nɔ kɛ de ɔ.
71 E tsɔɔ kaa e ma he wa yi wami kɛ je wa he nyɛli kɛ nihi tsuo nɛ a ngɛ wɔ nyɛe ɔmɛ a dɛ mi,
72 nɛ e maa na wɔ mɔbɔ ngɛ wa nɛmɛ ɔmɛ a he je. E ma kai e somi klɔuklɔu ɔ,
73 kita nɛ e kã wa nɛ Abraham
74 kaa ke e je wɔ kɛ je he nyɛli a dɛ mi ta a, e ma ha wɔ he blɔ konɛ waa kɛ kã nɛ sɔmɔ lɛ ngɛ blɔ klɔuu nɔ,
75 nɛ wa fĩ e se, nɛ waa pee níhi nɛ da ngɛ e hɛ mi wa wami ligbi ɔmɛ tsuo.
76 Se mo jokuɛ nɛ ɔ lɛɛ, a ma tsɛ mo ke Hiɔwe Lokoo No ɔ gbalɔ, ejakaa o maa sɛ Yehowa* hlami nɛ o ma dla e blɔ ɔmɛ,
77 konɛ o ha e we bi ɔmɛ nɛ a ná yi wami hemi nɛ a ma ná kɛ gu a he yayami ɔmɛ nɛ a kɛ maa pa mɛ ɔ nɔ ɔ he nile
78 ngɛ wa Mawu ɔ mi mi sami ɔ he je. Mi mi sami nɛ ɔ ma ha nɛ la ma kpɛ kɛ je hiɔwe kɛ ha wɔ kaa mɔtu pu,
79 nɛ e ma ha nihi nɛ a hii si ngɛ diblii kɛ gbenɔ hɔ mi ɔ la, nɛ e ma kudɔ wa nane ɔmɛ kɛ ya tue mi jɔmi blɔ ɔ nɔ.”
80 Nɛ jokuɛ ɔ ba wa, nɛ e he wa ngɛ mumi mi, nɛ e ya nɔ nɛ e hi zia zugba a nɔ kɛ ya si ligbi ɔ nɛ e je e he kpo pãa kɛ tsɔɔ Israel ɔ.
Sisi Ningmahi
^ Aloo “munyuhi nɛ wa ngɛ nɔ mi mami kaa a ngɛ mi.”
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
^ Aloo “nina.”
^ Aloo “níhi nɛ e tsuɔ nɛ nihi náa he se ɔ.”
^ Hyɛ Munyu Komɛ A Sisi Tsɔɔmi.
^ Aloo “wo lɛ si.”
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
^ Aloo “Ye nɔmlɔ tso ɔ tsuo.” Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
^ Hela, “wu ɔ.”
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
^ Aloo “yi wami helɔ ko nɛ e ngɛ he wami wawɛɛ.” Hyɛ Munyu Komɛ A Sisi Tsɔɔmi, “Koli.”
^ Hyɛ Munyu Komɛ A Sisi Tsɔɔmi.
