Maako Sane Kpakpa a 10:1-52
-
Gba si himi kɛ gba mi pomi (1-12)
-
Yesu jɔɔ jokuɛ tsɔwi (13-16)
-
Nyumu niatsɛ ko sane bimi ɔ (17-25)
-
Níhi nɛ a kɛ sãa afɔle ngɛ Matsɛ Yemi ɔ he (26-31)
-
A gba Yesu gbenɔ ɔ kɛ fɔ si ekohu (32-34)
-
Blɔ nya nɛ Yakobo kɛ Yohane bi ɔ (35-45)
-
Yesu ji kpɔmi nɔ́ ngɛ nihi babauu a he (45)
-
-
A bli Batimeo hɛ yuyuilɔ ɔ hɛ ngmɛ (46-52)
10 E te si ngɛ lejɛ ɔ, nɛ e po Yɔdan Pa a kɛ ba Yudea huzu ɔmɛ a nya. Asafo kuu ɔmɛ kpale ba bua a he nya ngɛ e ngɔ. Nɛ kaa bɔ nɛ e pɔɔ peemi ɔ, e kpale bɔni mɛ ní tsɔɔmi.
2 Kɛkɛ nɛ Farisi bi ɔmɛ ba e ngɔ kɛ juɛmi ɔ kaa a ma ba ka lɛ, nɛ a bi lɛ ke ji mlaa ngmɛɔ blɔ kaa nyumu kɛ e yo nɛ po gba mi.
3 E he nɔ ke: “Mɛni mlaa Mose wo nyɛ ɔ?”
4 A de ke: “Mose ngmɛ blɔ kaa nɔ ko ma nyɛ maa ngma gba mi pomi womi kɛ ha e yo nɛ e ngmɛɛ e he.”
5 Se Yesu de mɛ ke: “Akɛnɛ nyɛ tsui he wa he je nɛ e ngma kita nɛ ɔ ngɔ ha nyɛ ɔ nɛ.
6 Se kɛ je adebɔ sisije ɔ, ‘E bɔ mɛ nyumu kɛ yo.
7 Enɛ ɔ he je nɛ nyumu ma si e tsɛ kɛ e nyɛ,
8 nɛ mɛ ni enyɔ ɔmɛ a maa pee he lo kake’ ɔ nɛ, lɛɛ a pi ni enyɔ hu, mohu ɔ, he lo kake.
9 Enɛ ɔ he ɔ, nɔ́ nɛ Mawu ngɔ kɛ tsa a, ko ha nɛ adesa ko nɛ e gba mi.”
10 Be kpa hu nɛ a ngɛ we ɔ mi ɔ, kaseli ɔmɛ bɔni lɛ enɛ ɔ he sane bimi.
11 E de mɛ ke: “Nɔ fɛɛ nɔ nɛ e kɛ e yo maa po gba mi nɛ e ma ya ngɔ nɔ kpa a, e puɛ gba,*
12 nɛ ke e ba mi kaa benɛ yo ko kɛ e huno po gba mi se ɔ, e ya gba nɔ kpa a, yo ɔ puɛ gba.”
13 Jehanɛ ɔ, nihi kɛ jokuɛ tsɔwi bɔni e ngɔ bami konɛ e pɛtɛ a he, se e kaseli ɔmɛ kã a hɛ mi.
14 Benɛ Yesu na nɔ́ nɛ ɔ, e mi mi fu nɛ e de mɛ ke: “Nyɛ ha jokuɛ tsɔwi ɔmɛ blɔ nɛ a ba ye ngɔ; nyɛ ko bɔ mɔde kaa nyɛ maa tsi mɛ blɔ, ejakaa nihi kaa kikɛ nɛ ɔmɛ a nɔ́ ji Mawu Matsɛ Yemi ɔ nɛ.
15 I ngɛ nyɛ dee ngɛ anɔkuale mi ke, nɔ fɛɛ nɔ nɛ e he we Mawu Matsɛ Yemi ɔ kaa bɔ nɛ jokuɛ nyafii maa pee ɔ, e be mi sɛe gblegbleegble.”
16 Kɛkɛ nɛ e fua jokuɛwi ɔmɛ nɛ e ngɔ e ninehi kɛ pue a nɔ, nɛ e bɔni mɛ jɔɔmi.
17 Benɛ e ngɛ blɔ nɔ kɛ yaa a, nyumu ko tu fo kɛ ba e ngɔ nɛ e ba kpla si ngɛ e hɛ mi nɛ e bi lɛ ke: “Tsɔɔlɔ Kpakpa, mɛni nɛ e sa kaa ma pee konɛ ma ná neneene wami?”
18 Yesu de lɛ ke: “Mɛni he je nɛ o tsɛ mi ke nɔ kpakpa a? Nɔ ko be nɛ e ji nɔ kpakpa kaa ja Mawu pɛ.
19 O le kita amɛ: ‘Koo gbe nɔmlɔ, ko puɛ gba, koo ju, koo ye lakpa odase, koo fia ojo, buu o tsɛ kɛ o nyɛ.’”
20 Nyumu ɔ de lɛ ke: “Tsɔɔlɔ, i ye ní nɛ ɔmɛ tsuo a nɔ kɛ je ye jokuɛwi a si tɔɔ.”
21 Yesu hyɛ lɛ nɛ e ná suɔmi ha lɛ, nɛ e de lɛ ke, “E piɛ mo nɔ́ kake: Yaa nɛ o ya jua níhi nɛ o ngɛ ɔ nɛ o ngɔ kɛ ha ohiatsɛmɛ, nɛ o ma ná juetli ngɛ hiɔwe; konɛ o ba pee ye se nyɛɛlɔ.”
22 Benɛ e nu munyu nɛ ɔ, e hao, nɛ e kɛ aywilɛho pue nɔ kɛ ho, ejakaa e ngɛ ní babauu.
23 Benɛ Yesu hyɛ ni ɔmɛ kɛ kpe ɔ, e de e kaseli ɔmɛ ke: “E he maa wa wawɛɛ nitsɛ kɛ ha nihi nɛ a ngɛ sika a kaa a maa sɛ Mawu Matsɛ Yemi ɔ mi!”
24 Se nɔ́ nɛ e de ɔ pee e kaseli ɔmɛ nyakpɛ. Kɛkɛ nɛ Yesu de mɛ ke: “Bimɛ, e he maa wa wawɛɛ nitsɛ kaa nɔ ko maa sɛ Mawu Matsɛ Yemi ɔ mi!
25 E ngɛ gbɔjɔɔ ha afukpɔngɔ kaa e maa gu abui hɛ ngmɛ mi pe kaa niatsɛ maa sɛ Mawu Matsɛ Yemi ɔ mi.”
26 Enɛ ɔ pee mɛ nyakpɛ wawɛɛ nitsɛ nɛ a bi lɛ* ke: “Lɛɛ mɛnɔ yi wami nɛ a ma nyɛ ma he mɔ?”
27 Yesu hyɛ mɛ too nɛ e de ke: “Ngɛ nimli a blɔ fa mi ɔ, e be hie peemi, se pi jã nɛ e ji ngɛ Mawu blɔ fa mi, ejakaa Mawu lɛɛ e nyɛɔ peeɔ nɔ́ fɛɛ nɔ́.”
28 Petro bɔni lɛ demi ke: “Hyɛ! Wa si níhi tsuo nɛ wa ba nyɛɛ o se.”
29 Yesu de ke: “Ngɛ anɔkuale mi ɔ, i ngɛ nyɛ dee ke nɔ ko be nɛ e si we aloo nyɛmimɛ nyumuhi aloo nyɛmimɛ yihi aloo nyɛ aloo tsɛ aloo bimɛ aloo ngmɔhi ngɛ imi kɛ sane kpakpa a he,
30 nɛ́ e nine be nɔ sue kɛ bɔ he si 100 amlɔ nɛ ɔ ngɛ be nɛ ɔ mi—wehi, nyɛmimɛ nyumuhi, nyɛmimɛ yihi, nyɛmɛ, bimɛ, kɛ ngmɔhi, nɛ́ yi mi wami hu piɛɛ he—kɛ neneene wami ngɛ níhi a blɔ nya tomi* nɛ ma a mi.
31 Se hlami sɛli babauu ma ba pee sekpɛtsɛmɛ, nɛ sekpɛtsɛmɛ ma ba pee hlami sɛli.”
32 Jehanɛ ɔ, a pue nɔ nɛ a ngɛ kuɔe kɛ yaa Yerusalɛm, nɛ Yesu sɛ a hlami, nɛ a nya kpɛ a he, nɛ ni nɛmɛ nɛ a nyɛɛ e se ɔ bɔni gbeye yemi. Nɛ e ngɔ Ni Nyɔngma Kɛ Enyɔ ɔmɛ kɛ ya se ekohu nɛ e bɔni mɛ níhi nɛ maa ba e nɔ ɔ demi. E de mɛ ke:
33 “Hyɛ! Wa ngɛ kuɔe kɛ yaa Yerusalɛm, nɛ a maa ngɔ nɔmlɔ Bi ɔ kɛ wo osɔfo nikɔtɔma amɛ kɛ womi ngmali ɔmɛ a dɛ mi. A maa bu lɛ gbenɔ fɔ, nɛ a maa ngɔ lɛ kɛ ha nihi nɛ a je je ma amɛ a mi ɔ,
34 nɛ nimli nɛ ɔmɛ maa ye e he fɛu nɛ a ma su lada ngɔ pue e nɔ nɛ a maa fiaa lɛ kpa nɛ a maa gbe lɛ, se ngɛ ligbi etɛne ɔ nɔ ɔ, e maa te si.”
35 Zebedeo binyumu ɔmɛ nɛ ji Yakobo kɛ Yohane ba e ngɔ nɛ a ba de lɛ ke: “Tsɔɔlɔ, nɔ́ fɛɛ nɔ́ nɛ wa ma bi mo ɔ, wa suɔ kaa o pee ha wɔ.”
36 E bi mɛ ke: “Mɛni nyɛ suɔ nɛ ma pee ha nyɛ?”
37 A he nɔ ke: “Ha wɔ he blɔ konɛ wa ti nɔ kake nɛ e hi si ngɛ o hiɔ nɔ, nɛ nɔ kake hu nɛ e hi si ngɛ o muɔ nɔ ngɛ o hɛ mi nyami ɔ mi.”
38 Se Yesu de mɛ ke: “Nyɛ li nɔ́ nɛ nyɛ ngɛ bie ɔ. Anɛ nyɛ ma nyɛ maa nu kplu ɔ nɛ i ngɛ nue ɔ, aloo nyɛ ma nyɛ ma ha nɛ a baptisi nyɛ kɛ baptisimi nɛ a ngɛ mi baptisie ɔ lo?”
39 A he nɔ ke: “Wa ma nyɛ.” Kɛkɛ nɛ Yesu de mɛ ke: “Kplu nɛ i ngɛ nue ɔ, nyɛ maa nu, nɛ baptisimi nɛ a ngɛ mi baptisie ɔ, a maa baptisi nyɛ.
40 Se kaa nɔ ko maa hi si ngɛ ye hiɔ nɔ aloo ye muɔ nɔ ɔ lɛɛ, pi ye blɔ nya ji lɔ ɔ, mohu ɔ, e ngɛ kɛ ha nihi nɛ a dla ngɔ to ɔ.”
41 Benɛ ni nyɔngma amɛ nɛ a piɛ ɔ nu nɔ́ nɛ ɔ he ɔ, a mi mi fu Yakobo kɛ Yohane.
42 Se Yesu tsɛ mɛ kɛ ba e ngɔ nɛ e de mɛ ke: “Nyɛ le kaa nihi nɛ a buɔ mɛ kaa je ma amɛ a nɔ yeli ɔ yeɔ a nɔ, nɛ a nimli ngua amɛ yeɔ a nɔ kɛ he wami.
43 E sɛ nɛ e ba jã ngɛ nyɛ kpɛti; mohu ɔ, nɔ fɛɛ nɔ nɛ e suɔ kaa e pee nɔmlɔ ngua ngɛ nyɛ kpɛti ɔ, e sa nɛ e pee nyɛ sɔmɔlɔ,
44 nɛ nɔ fɛɛ nɔ nɛ e suɔ kaa e ye kekleekle blɔ he ngɛ nyɛ kpɛti ɔ, e sa nɛ e pee nyɛ tsuo nyɛ nyɔguɛ.
45 Ejakaa benɛ nɔmlɔ Bi ɔ po ba a, pi nɛ e ba kaa a sɔmɔ lɛ, mohu ɔ, e ba konɛ e ba sɔmɔ nɛ e ngɔ e wami* kɛ ha kaa kpɔmi nɔ́ nɛ e kɛ kpɔ̃ nihi babauu.”
46 Enɛ ɔ se ɔ, a ba Yɛriko. Se benɛ e kɛ e kaseli ɔmɛ kɛ nihi nɛ a he hiɛ saii ngɛ Yɛriko ma a mi jee ɔ, Batimeo (Timeo binyumu ɔ), nɛ ji hɛ yuyuilɔ ko nɛ e baa ní ɔ hii si ngɛ gbɛjegbɛ ɔ he.
47 Benɛ e nu kaa Yesu, nɛ ji Nazarɛt no ɔ lɛ e bee ɔ, e bɔni ngmlaa kpami ke: “Yesu, David Bi, naa mi mɔbɔ!”
48 Enɛ ɔ he ɔ, nihi fuu bɔni kuɛmi kɛ bɔni lɛ womi nɛ a de lɛ ke e pee kɔ̃, se e ya nɔ nɛ e ngɛ ngmlaa kpae wawɛɛ po pe kekle ɔ ke: “David Bi, naa mi mɔbɔ!”
49 Enɛ ɔ he ɔ, Yesu da si nɛ e de ke: “Nyɛ tsɛ lɛ ha mi.” Kɛkɛ nɛ a tsɛ hɛ yuyuilɔ ɔ nɛ a de lɛ ke: “Ná tsui! Tee si; e ngɛ mo tsɛe.”
50 Benɛ e sake tade nɛ e wo ngɛ e tade ɔ nɔ ɔ ngɔ fɔ he ɔ, e te si pam, nɛ e ya Yesu ngɔ.
51 Kɛkɛ nɛ Yesu bi lɛ ke: “Mɛni o suɔ nɛ ma pee ha mo?” Nyumu ɔ nɛ e hɛ ngmɛ yu ɔ de lɛ ke: “Rabboni,* ha nɛ ma hyɛ nɔ́ ekohu.”
52 Kɛkɛ nɛ Yesu de lɛ ke: “Moo ya. O hemi kɛ yemi ɔ tsa mo.” Nɛ amlɔ nɔuu ɔ, e bɔni nɔ́ hyɛmi, nɛ e bɔni e se nyɛɛmi ngɛ gbɛjegbɛ ɔ nɔ.
Sisi Ningmahi
^ Hela, “e puɛ gba kɛ si e yo ɔ.”
^ E ma nyɛ maa pee kaa “a sibi.”
^ Aloo “yi nɔ.” Hyɛ Munyu Komɛ A Sisi Tsɔɔmi.
^ Aloo “susuma.”
^ E sisi ji, “Tsɔɔlɔ.”
