Maako Sane Kpakpa a 12:1-44
12 Jehanɛ ɔ, e kɛ mɛ bɔni munyu tumi nɛ e ngɔ nɔ́ he tomi níhi kɛ tsu ní. E de mɛ ke: “Nyumu ko pee wai ngmɔ nɛ e po piɛ ngɔ wo he nɛ e tsua wai ngami he ngɛ mi nɛ e ma mɔ; lɔ ɔ se ɔ, e ngɔ kɛ wo ngmɔ huli a dɛ, nɛ e hia blɔ kɛ ho ma se ya.
2 Benɛ wai yiblii kpami be su ɔ, e tsɔ e nyɔguɛ ɔmɛ a ti nɔ kake kɛ ya ngmɔ huli ɔmɛ a ngɔ konɛ e ya ngɔ wai yiblii ɔ eko ngɛ a dɛ.
3 Se a nu lɛ, nɛ a kongo lɛ, nɛ a fiee lɛ kɛ ho kɛ e dɛ gu.
4 E kpale tsɔ nyɔguɛ kpa ko hu kɛ ya a ngɔ, nɛ a fia e yi mi nɔ́ nɛ a pue e hɛ mi si.
5 Nɛ e kpale tsɔ nɔ kpa, nɛ lɛɛ lɛɛ a gbe lɛ. E tsɔ nihi fuu hulɔ, nɛ a kongo a ti ni komɛ, nɛ ni komɛ hu lɛɛ a gbe mɛ.
6 E ngɛ nɔ kake nɛ e piɛ, e binyumu nɛ e suɔ. Nyagbe ɔ, e tsɔ lɛ a ngɔ nɛ e de ke: ‘A maa bu ye binyumu ɔ.’
7 Se jamɛ a ngmɔ huli ɔmɛ de a sibi ke, ‘Gbosi ní yelɔ ɔ ji nɛ ɔ nɛ. Nyɛɛ ba, nyɛ ha nɛ waa gbe lɛ konɛ wa nine nɛ su e gbosi ní ɔ nɔ.’
8 Kɛkɛ nɛ a nu lɛ, nɛ a gbe lɛ nɛ a ya sake lɛ kɛ fɔ wai ngmɔ ɔ se.
9 Mɛni wai ngmɔtsɛ ɔ maa pee? E maa ba nɛ e ma ba gbe ngmɔ huli ɔmɛ nɛ e maa ngɔ wai ngmɔ ɔ kɛ wo ni kpahi a dɛ.
10 Anɛ nyɛ kane we ngmami nɛ ɔ hyɛ lo? ‘Tɛ ɔ nɛ tsu mali ɔmɛ kua a, lɔ ɔ lɛ ba pee kɔ̃ nya tɛ titli.*
11 Enɛ ɔ je Yehowa* ngɔ, nɛ ngɛ wa hɛ mi ɔ, e ngɛ nyakpɛ.’”
12 Enɛ ɔ he ɔ, a ngɛ hlae nɛ a maa nu lɛ, se a ye asafo kuu ɔ gbeye, ejakaa a le kaa a he je nɛ e ngɔ nɔ́ he tomi nɔ́ ɔ kɛ tsu ní ɔ nɛ. Enɛ ɔ he ɔ, a si lɛ nɛ a je.
13 Enɛ ɔ se ɔ, a tsɔ Farisi bi komɛ kɛ nihi nɛ a fĩ Hɛrode ma kudɔmi kuu ɔ se ɔmɛ a ti ni komɛ kɛ ya e ngɔ konɛ a gu e nya mi munyu nɔ nɛ́ a nine nɛ su e nɔ.
14 Benɛ a ba a, a bi lɛ ke: “Tsɔɔlɔ, wa le kaa o ji anɔkualetsɛ, nɛ o tsɔɔ Mawu blɔ ɔ ngɛ anɔkuale mi, nɛ o pee we níhi konɛ o kɛ sa nɔmlɔ ko hɛ mi, ejakaa o hyɛ we bɔ nɛ nihi ngɛ ha ngɛ kpo nɔ, mohu ɔ, o tsɔɔ Mawu blɔ ɔ ngɛ anɔkuale mi. Anɛ mlaa ngmɛɛ blɔ* kaa a wo tó kɛ ha Kaisare aloo a ko wo?
15 Anɛ e sa nɛ waa wo aloo e sɛ nɛ waa wo?” Akɛnɛ e le kaa osato nɛ a ngɛ pee he je ɔ, e bi mɛ ke: “Mɛni he je nɛ nyɛ ngɛ mi kae ɔ? Nyɛɛ ngɔ denario* kake kɛ ba ha mi nɛ ma hyɛ.”
16 A ngɔ kake kɛ ba ha lɛ, nɛ e bi mɛ ke: “Mɛnɔ foni kɛ ningma ji nɛ ɔ?” A ha lɛ heto ke: “Kaisare níhi.”
17 Kɛkɛ nɛ Yesu de ke: “Nyɛɛ ngɔ Kaisare níhi kɛ ha Kaisare, se nyɛɛ ngɔ Mawu níhi kɛ ha Mawu.” Nɛ e he pee mɛ nyakpɛ.
18 Jehanɛ ɔ, Saduki bi ɔmɛ nɛ mɛɛ a deɔ ke gbogboehi a si tlemi ko be ɔ ba nɛ a ba bi lɛ ke:
19 “Tsɔɔlɔ, Mose ngma ha wɔ ke, ke nɔ ko nyɛminyumu gbo kɛ je e yo he nɛ e si we bi ngɛ e se ɔ, e nyɛminyumu nɛ e ngɔ yo ɔ nɛ e kɛ lɛ nɛ fɔ bimɛ ha e nyɛminyumu ɔ.
20 Nyɛmimɛ nyumu kpaago komɛ hi si. Kekle nɔ ɔ ngɔ yo, se benɛ e gbo ɔ, e si we bi ngɛ e se.
21 Nɔ enyɔne ɔ ngɔ yo ɔ nɛ e gbo, se e si we bi ngɛ e se, nɔ etɛne ɔ hu, jã nɔuu.
22 Nɛ mɛ ni kpaago ɔmɛ tsuo a si we bi ngɛ a se. Nyagbe ɔ, yo ɔ hu ba gbo.
23 Ngɛ gbogboehi a si tlemi ɔ mi ɔ, mɛnɔ lɛ yo ɔ maa pee e yo? Ejakaa mɛ ni kpaago ɔmɛ tsuo a kɛ lɛ hi si kaa a yo.”
24 Yesu bi mɛ ke: “Nyɛ li Ngmami ɔ, nɛ nyɛ li Mawu he wami ɔ hulɔ, anɛ pi enɛ ɔ he je nɛ nyɛ ngɛ tɔ̃e ɔ lo?
25 Ejakaa ke nihi te si kɛ je gbeje ɔ, nyumuhi be yo ngɔe, nɛ a kɛ yihi hu be gba hae, mohu ɔ, a maa hi kaa bɔfohi nɛ a ngɛ hiɔwe ɔ.
26 Se kɛ kɔ gbogboehi nɛ a ma tle mɛ si ɔ he ɔ, anɛ nyɛ kane we ngɛ Mose womi ɔ mi kaa ngɛ mio tso ɔ he sane ɔ mi ɔ, Mawu de lɛ ke: ‘Imi ji Abraham Mawu kɛ Isak Mawu kɛ Yakɔb Mawu ɔ’ lo?
27 E ji hɛ kali ɔmɛ a Mawu, se pi ni gbogboe ɔmɛ a Mawu. Nyɛ tɔ̃ nitsɛnitsɛ.”
28 Womi ngmali ɔmɛ a ti nɔ kake nɛ e ba lejɛ ɔ nu a nya sami ɔ. Benɛ e na kaa e ha mɛ heto saminya a, e bi lɛ ke: “Ngɛ kita amɛ tsuo a kpɛti ɔ, te nɔ́ nɛ ji kekleekle nɔ́* nɛɛ?”
29 Yesu he nɔ ke: “Kekleekle nɔ́ ɔ ji, ‘Oo Israel, bu tue, Yehowa* wa Mawu ɔ, e ji Yehowa* kake,
30 nɛ e sa nɛ o suɔ Yehowa* o Mawu ɔ kɛ o tsui tsuo kɛ o susuma* tsuo kɛ o juɛmi tsuo kɛ o he wami tsuo.’
31 Enyɔne ɔ ji nɛ ɔ nɛ, ‘E sa nɛ o suɔ o nyɛmi kaa bɔ nɛ o suɔ o he ɔ.’ Kita kpa ko be nɛ e pe enɛ ɔmɛ.”
32 Womi ngmalɔ ɔ de lɛ ke: “Tsɔɔlɔ, nɔ́ nɛ o de ɔ da, nɛ e ji anɔkuale, ‘E ji Nɔ Kake, nɛ ngɛ e se ɔ, nɔ ko be hu’;
33 nɛ suɔmi nɛ nɔ ko maa suɔ lɛ kɛ e tsui tsuo kɛ e nɔ́ sisi numi tsuo kɛ e he wami tsuo nɛ e maa suɔ e nyɛmi kaa bɔ nɛ e suɔ e he ɔ hi kulaa pe sami bɔhi kɛ afɔlehi tsuo.”
34 Benɛ Yesu na kaa e ha heto ngɛ ní lemi nya a, e de lɛ ke: “O kɛ Mawu Matsɛ Yemi ɔ he kɛ we kulaa.” Se nɔ ko nɔ ko ná we kã nɛ e bi lɛ sane ko hu.
35 Se benɛ Yesu ngɛ ní ɔ tsɔɔe ngɛ sɔlemi we ɔ, e bi ke: “Kɛ e ba kɛɛ nɛ womi ngmali ɔmɛ deɔ ke David bi ji Kristo ɔ?
36 Mumi klɔuklɔu ɔ ha nɛ David nitsɛ de ke, ‘Yehowa* de ye Nyɔmtsɛ ɔ ke: “Hii si ngɛ ye hiɔ nɔ kɛ yaa si ma ngɔ o he nyɛli ɔmɛ kɛ wo o nane si.”’
37 David nitsɛ tsɛɔ lɛ ke Nyɔmtsɛ, lɛɛ kɛ e peeɔ kɛɛ nɛ e peeɔ e bi mɔ?”
Nɛ asafo kuu ngua a kɛ bua jɔmi ngɛ lɛ tue bue.
38 Nɛ ngɛ e ní tsɔɔmi ɔ mi ɔ, e ya nɔ nɛ e de ke: “Nyɛɛ hyɛ nyɛ he nɛ hi ngɛ womi ngmali ɔmɛ nɛ a suɔ kaa a maa wo tade klɔii kɛ hi nyɛɛe, nɛ a suɔ kaa nihi nɛ a fɔ mɛ ngɛ juahi a nɔ ɔ he.
39 A suɔ hɛ mi sɛhi a nɔ himi* ngɛ kpe he ɔmɛ kɛ hehi nɛ nihi nɛ a he biɛ hiɔ ngɛ gbɔkuɛ okplɔɔ ngmɛmihi a sisi.
40 A miɔ yalɔyihi* a wehi,* nɛ a sɔleɔ gagaaga konɛ nihi nɛ a na mɛ. Nimli nɛ ɔmɛ a nine maa su kojomi nɛ mi wa* wawɛɛ nɔ.”
41 Kɛkɛ nɛ e hi si ngɛ he ko nɛ e ma nyɛ maa na sika tsumi daka amɛ, nɛ e bɔni bɔ nɛ asafo kuu ɔ ngɔ sika kɛ ba ngɛ sika tsumi daka amɛ a mi woe ɔ hyɛmi, nɛ niatsɛmɛ fuu ngɔ sika babauu kɛ ba ngɛ mi woe.
42 Jehanɛ ɔ, yalɔyo* ohiatsɛ ko ba nɛ e ngɔ sika nyafii enyɔ nɛ sui nɔ́ ko kulaa* kɛ ba wo mi.
43 Kɛkɛ nɛ e tsɛ e kaseli ɔmɛ kɛ ba e ngɔ nɛ e de mɛ ke: “Ngɛ anɔkuale mi ɔ, i ngɛ nyɛ dee ke yalɔyo* ohiatsɛ nɛ ɔ ngɔ babauu kɛ wo mi pe ni kpa amɛ tsuo nɛ a ngɔ sika kɛ ba wo sika tsumi daka amɛ a mi ɔ.
44 Ejakaa mɛ tsuo ɔ, nɔ́ nɛ a ná nɛ be nɔ ɔ nɛ a kɛ ba wo mi, se yalɔyo* ɔ lɛɛ, e we ohia a mi nɛ e je nɛ e ngɔ nɔ́ nɛ e ngɛ ɔ tsuo, nɛ ji nɔ́ nɛ e kɛ maa hyɛ e he ɔ tsuo kɛ ba wo mi.”
Sisi Ningmahi
^ Hela, “yi ngɛ kɔ̃ nya.”
^ Hyɛ Munyu Komɛ A Sisi Tsɔɔmi.
^ Aloo “e da blɔ.”
^ Hyɛ Munyu Komɛ A Sisi Tsɔɔmi.
^ Aloo “he hia pe kulaa.”
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
^ Aloo “sɛhi nɛ a hi pe kulaa nɔ himi.”
^ Aloo “ahoyihi.”
^ Aloo “weto ní.”
^ Aloo “jiɔ.”
^ Aloo “ahoyo.”
^ Hela, “lepta enyɔ nɛ ji kuadran kake.” Hyɛ Munyu Komɛ A Sisi Tsɔɔmi.
^ Aloo “ahoyo.”
^ Aloo “ahoyo.”
