NÍ KASEMI 6
LA 18 Wa Bua Jɔ Kpɔmi Nɔ́ ɔ He
Wa Bua Jɔ Kaa Yehowa Ngɔɔ Wa Yayamihi Kɛ Keɔ Wɔ
“Mawu suɔ je ɔ saminya, nɛ lɔ ɔ he ɔ, e ngɔ e Bi kake too ɔ kɛ ha.”—YOH. 3:16.
OTI NƐ NGƐ NÍ KASEMI Ɔ MI
Wa suɔ nɛ wa je hɛsa kpo wawɛɛ ngɛ wa yayamihi nɛ Yehowa kɛ keɔ wɔ ɔ he. Bɔ nɛ pee nɛ wa nyɛ nɛ waa pee jã a, wa maa hyɛ nɔ́ nɛ Yehowa pee konɛ e nyɛ nɛ e ngɔ wa yayami ɔmɛ kɛ ke wɔ.
1-2. Mɛni blɔ nɔ nɛ adesahi tsuo a si fɔfɔɛ ngɛ kaa niheyo ɔ nɛ a wo e ta ngɛ kuku 1 ɔ mi ɔ nɔ́ ɔ?
MOO po si fɔfɔɛ nɛ ɔ he foni nɛ o hyɛ. Ngɔɔ lɛ kaa niheyo ko fɔli ngɛ sika wawɛɛ. Se ligbi ko ɔ, e fɔli ɔmɛ ná oslaa nɛ a gbo. Enɛ ɔ ha nɛ niheyo ɔ ye aywilɛho wawɛɛ. Se nɔ́ kpa ko hu ha nɛ e ye aywilɛho pe jã po. E ba ná le kaa e fɔli ɔmɛ kpata sika tsuo nɛ weku ɔ ngɛ ɔ hɛ mi, nɛ a ye hiɔ kɛ piɛɛ he hulɔ. E fɔli ɔmɛ si we gbosi ní ko kɛ ha lɛ, mohu ɔ, hiɔ lɛ fɔɔ si ngɛ e kuɛ nɔ nɛ e maa wo. Se hiɔ ɔ kle pe lɛ.
2 Ngɛ blɔ ko nɔ ɔ, wa si fɔfɔɛ ngɛ kaa niheyo ɔ nɔ́ ɔ. Wa fɔli nɛ ji Adam kɛ Hawa a ye mluku, nɛ a hi paradeiso ko nɛ ngɛ fɛu ɔ mi. (1 Mose 1:27; 2:7-9) A ná he blɔ kaa a maa hi si ngɛ bua jɔmi mi kɛ ya neneene. Se tlukaa a, nɔ́ fɛɛ nɔ́ tsake. He blɔ nɛ a ná kaa a maa hi si kɛ ya neneene ngɛ Paradeiso ɔ mi ɔ bɔ mɛ. Mɛni gbosi ní nɛ a si kɛ ha a bimɛ ɔmɛ? Baiblo ɔ de wɔ ke: “Kɛ gu adesa kake [Adam] nɔ ɔ, yayami ba je ɔ mi, nɛ gbenɔ gu yayami nɔ kɛ ba, nɛ lɔ ɔ he ɔ, gbenɔ sã adesahi tsuo, ejakaa mɛ tsuo a pee yayami.” (Rom. 5:12) Gbosi ní nɛ Adam si ha wɔ ji yayami kɛ gbenɔ. Enɛ ɔ ngɛ kaa hiɔ ngua ko nɛ wa ti nɔ ko nɔ ko be nyɛe maa wo.—La 49:8.
3. Mɛni he je nɛ a ma nyɛ maa ngɔ wa yayami ɔmɛ kɛ to “hiɔ” he ɔ?
3 Yesu ngɔ yayami kɛ to “hiɔ” he. (Mat. 6:12; Luka 11:4) Ke wa tɔ̃ ɔ, e ngɛ kaa nɔ́ nɛ wa ye Yehowa hiɔ. E sa nɛ waa wo wa yayami ɔ he hiɔ. Ke wa nyɛ we nɛ waa wo hiɔ nɛ ɔ, lɛɛ wa ma gbo kɛ tsɔ, nɛ ke wa gbo hu ɔ, hɛnɔkami ko be kɛ ha wɔ.—Rom. 6:7, 23; 2 Pet. 2:12.
4. (a) Mɛni maa ba yayami peeli tsuo a nɔ ke nɔ ko yi bua mɛ? (La 49:7-9) (b) Ngɛ Baiblo ɔ mi ɔ, mɛni nɛ munyungu nɛ ji “yayami” ɔ tsɔɔ? (Hyɛ daka nɛ ji, “ Yayami” ɔ.)
4 Anɛ wa nine ma nyɛ maa su níhi tsuo nɛ bɔ Adam kɛ Hawa a nɔ ngɛ wa dɛ he lo? Dɛbi. (Kane La 49:7-9.) Ke nɔ ko yi bua wɔ ɔ, lɛɛ wa be hɛnɔkami náe kɛ ha gbogboehi a si tlemi ɔ. Ke e ba jã nɛ wa gbo ɔ, a be wɔ si tlee kaa bɔ nɛ e ji ngɛ lohwe ɔmɛ a blɔ fa mi ɔ.—Fiɛɛ. 3:19.
5. Mɛni nɛ wa Tsɛ nɛ ngɛ suɔmi ɔ pee kɛ ye bua wɔ konɛ waa wo yayamihi nɛ wa hɛɛ ɔ he hiɔ? (Hyɛ foni ɔ hulɔ.)
5 Ke nyumu niatsɛ ko suɔ nɛ e wo hiɔ ɔ tsuo nɛ niheyo ɔ nɛ wa wo e ta kɛ sɛ hlami ɔ fɔli ɔmɛ ye ɔ, kɛ o susu kaa niheyo ɔ maa nu he ha kɛɛ? Atsinyɛ jemi ko be he kaa e kɛ bua jɔmi maa kplɛɛ yemi kɛ buami ɔ nɔ. Jã nɔuu kɛ̃ nɛ wa Tsɛ nɛ ngɛ suɔmi nɛ ji Yehowa a ha wɔ nike ní ko. Nike ní nɛ ɔ wo yayami nɛ wa nine su nɔ kɛ je Adam ngɔ ɔ he hiɔ. Yesu de ke: “Mawu suɔ je ɔ saminya, nɛ lɔ ɔ he ɔ, e ngɔ e Bi kake too ɔ kɛ ha, konɛ nɔ fɛɛ nɔ nɛ e heɔ lɛ yeɔ ɔ, a ko kpata e hɛ mi, mohu ɔ, e ná neneene wami.” (Yoh. 3:16) Kpɔmi nɔ́ ɔ ma nyɛ ma ha nɛ huɛ bɔmi kpakpa nɛ hi waa kɛ Yehowa wa kpɛti hulɔ.
Yesu fiɛɛ sane kpakpa a nɛ kɔɔ bɔ nɛ Yehowa daa kpɔmi nɔ́ ɔ nɔ nɛ e ngɔɔ wa he yayamihi ɔ kɛ keɔ wɔ ɔ ha a he. ( Yoh. 3:16) Lɔ ɔ se ɔ, e je e tsui mi nɛ e ngɔ e wami kɛ ha kaa kpɔmi nɔ́ (Hyɛ kuku 5)
6. Mɛni he wa ma susu ngɛ ní kasemi nɛ ɔ mi, nɛ mɛni he je?
6 Mɛni blɔ nɔ wa ma nyɛ maa gu kɛ ná nike ní nɛ he jua wa nɛ ɔ he se, konɛ a ngɔ wa he yayamihi loo wa “hiɔ” ɔ kɛ ke wɔ? Bɔ nɛ pee nɛ waa na heto ɔ, wa ma susu munyu komɛ nɛ Baiblo ɔ kɛ tsu ní ɔ he, kɛ nɔ́ nɛ a tsɔɔ. Lɔ ɔmɛ ji waa kɛ Mawu wa kpɛti dlami, kpatami, kpɔmi nɔ́, he yemi, kɛ nɛ a maa bu wɔ dali. Ngɛ ní kasemi nɛ ɔ mi ɔ, wa maa na nɔ́ nɛ munyu nɛ ɔmɛ eko fɛɛ eko tsɔɔ. Ke wa pue wa yi mi tɛ ngɛ nɔ́ nɛ Yehowa pee kɛ ha wɔ ɔ he ɔ, lɔ ɔ ma ha nɛ wa je hɛsa kpo wawɛɛ.
YEHOWA SUƆ NƐ HUƐ BƆMI KPAKPA NƐ HI WAA KƐ LƐ WA KPƐTI
7. (a) Mɛni ji nɔ́ kpa ko hu nɛ bɔ Adam kɛ Hawa? (b) Akɛnɛ wa ji Adam kɛ Hawa sisi bimɛ he je ɔ, mɛni nɛ wa hia wawɛɛ? (Roma Bi 5:10, 11)
7 Benɛ Adam kɛ Hawa pee yayami ɔ, pi neneene wami pɛ nɛ bɔ mɛ, huɛ bɔmi kpakpa nɛ ngɛ a kɛ a Tsɛ nɛ ji Yehowa a kpɛti ɔ hu bɔ mɛ. Jinɛ Adam kɛ Hawa piɛɛ Mawu weku ɔ he. (Luka 3:38) Se benɛ a gbo Yehowa nɔ tue ɔ, e fiee mɛ kɛ je e weku ɔ mi loko a bɔni fɔmi. (1 Mose 3:23, 24; 4:1) Enɛ ɔ tsɔɔ kaa a sisi bimɛ tsuo, nɛ wɔ hu wa piɛɛ he ɔ be nyɛe maa hi Yehowa weku ɔ mi. Wa hia yemi kɛ buami loko wa ma nyɛ ma dla waa kɛ Yehowa wa kpɛti. (Kane Roma Bi 5:10, 11.) E sɛ nɛ waa ya nɔ nɛ waa pee Mawu he nyɛli, mohu ɔ, e sa nɛ waa pee e huɛmɛ. Bua jɔmi sane ji kaa Yehowa lɛ hia nane kekle konɛ e kɛ dla waa kɛ lɛ wa kpɛti. Ngɛ mɛni blɔ nɔ?
MAWU TO BLƆ NYA KONƐ WA NYƐ NƐ WAA PEE E HUƐMƐ
8. Mɛni blɔ nya nɛ Yehowa to konɛ huɛ bɔmi kpakpa nɛ hi waa kɛ lɛ wa kpɛti?
8 Kpatami ji blɔ nya nɛ Yehowa to konɛ huɛ bɔmi kpakpa nɛ hi e kɛ adesahi nɛ a ji yayami peeli ɔ a kpɛti. Yehowa ngɔ kpatami nɔ́ ko nɛ e kɛ nɔ́ nɛ bɔ Adam ɔ jua a sɔ kɛ ha. E pee jã konɛ wa nine nɛ su nɔ́ nɛ bɔ Adam ɔ nɔ ekohu. Hela Ngmami ɔ hu tsɔɔ blɔ nya nɛ Yehowa to konɛ huɛ bɔmi kpakpa nɛ hi waa kɛ lɛ wa kpɛti.—Rom. 3:25
9. Mɛni Yehowa pee konɛ e nyɛ nɛ e ngɔ Israelbi ɔmɛ a he yayami ɔmɛ kɛ ke mɛ?
9 Yehowa to blɔ nya konɛ e nyɛ nɛ e ngɔ Israelbi ɔmɛ a he yayamihi kɛ ke mɛ, nɛ huɛ bɔmi kpakpa nɛ hi e kɛ mɛ a kpɛti. Israelbi ɔmɛ yeɔ gbijlɔ klɛdɛɛ ko daa jeha. A tsɛɛ lɛ ke Kpatami Ligbi. Ngɛ jamɛ ligbi ɔ nɔ ɔ, osɔfo nɔkɔtɔma a daa ma bi ɔmɛ a nane mi nɛ e ngɔɔ lohwehi kɛ sãa afɔle. Ngɛ anɔkuale mi ɔ, lohwehi nɛ a kɛ sãa afɔle ɔ pɛ be nyɛe ma je adesahi a he yayami kɛ je kulaa, ejakaa adesahi a nɔ kuɔ pe lohwehi. Se ke Israelbi ɔmɛ tsake a tsui nɛ a sã afɔle nɛ Yehowa ngɛ hlae ɔ, e kɛ a yayami ɔ keɔ mɛ faa. (Heb. 10:1-4) Jehanɛ hu ɔ, afɔlehi nɛ a sãa ngɛ Kpatami Ligbi ɔ nɔ, kɛ afɔle kpahi nɛ a sãa a kaiɔ Israelbi ɔmɛ kaa a ji yayami peeli, nɛ a hia nɔ ko nɛ ma kpɔ̃ mɛ kɛ je yayami dɛ mi kulaa.
10. Mɛni Yehowa pee konɛ e nyɛ nɛ e ngɔ adesahi a he yayamihi kɛ ke mɛ kulaa?
10 Mɛni Yehowa pee konɛ e nyɛ nɛ e ngɔ adesahi a he yayamihi kɛ ke mɛ kulaa? E to blɔ nya nɛ e ngɔ e Bi nɛ e suɔ lɛ ɔ “kɛ ha si kake nyɔngloo, konɛ e tloo nihi babauu a he yayamihi.” (Heb. 9:28) Yesu ngɔ “e wami kɛ ha kaa kpɔmi nɔ́ nɛ e kɛ kpɔ̃ nihi babauu.” (Mat. 20:28) Mɛni ji kpɔmi nɔ́?
HIƆ NƐ YEHOWA WO KONƐ WA NYƐ NƐ WAA PEE E HUƐMƐ
11. (a) Ngɛ Baiblo ɔ nya a, mɛni ji kpɔmi nɔ́? (b) Mɛnɔ lɛ ma nyɛ maa wo kpɔmi nɔ́ ɔ?
11 Baiblo ɔ tsɔɔ kaa, kpɔmi nɔ́ ji hiɔ ko nɛ a woɔ konɛ a kɛ kpata nɔ ko aloo a kɛ dla nihi a kpɛti. Mɛni nɛ Yehowa kɛ ha konɛ adesahi a nine nɛ su nɔ́ nɛ bɔ Adam ɔ nɔ ekohu? Mo kai kaa Adam kɛ Hawa ye mluku, nɛ a ngɛ he blɔ kaa a maa hi si kɛ ya neneene. Se akɛnɛ a gbo tue he je ɔ, ní nɛ ɔmɛ bɔ mɛ. Lɔ ɔ he ɔ, e sa nɛ kpɔmi nɔ́ ɔ kɛ nɔ́ nɛ laa a jua nɛ sɔ pɛpɛɛpɛ. (1 Tim. 2:6) Nɔ nɛ ma nyɛ ma tsu nɔ́ nɛ ɔ he ní ji nyumu nɛ e wa, nɛ (1) e ye mluku (2) e ngɛ he blɔ kaa e maa hi si kɛ ya neneene ngɛ zugba a nɔ, kɛ (3) e suɔ kaa e ngɔ e wami kɛ ha aloo e kɛ sã afɔle ha wɔ. Jamɛ a nɔ ɔ maa ngɔ e wami kɛ wo nɔ́ nɛ e laa a he hiɔ.
12. Mɛni he je nɛ Yesu nyɛ nɛ e wo kpɔmi nɔ́ ɔ he hiɔ ɔ?
12 Nyɛ ha nɛ wa susu níhi etɛ a he je nɛ Yesu nyɛ nɛ e wo kpɔmi nɔ́ ɔ he waa hyɛ. (1) E ye mluku, nɛ tsɔɔ kaa “e pee we yayami ko.” (1 Pet. 2:22) (2) Akɛnɛ e ye mluku he je ɔ, e ngɛ he blɔ kaa e maa hi si ngɛ zugba a nɔ kɛ ya neneene. (3) E pee klaalo kaa e maa ngɔ e wami kɛ ha ngɛ wa he. (Heb. 10:9, 10) Yesu ye mluku kaa bɔ nɛ e ji ngɛ Adam blɔ fa mi loko e pee yayami ɔ. (1 Kor. 15:45) Lɔ ɔ he ɔ, kɛ gu Yesu gbenɔ ɔ nɔ ɔ, e nyɛ nɛ e ha kpatami nɔ́ nɛ e kɛ nɔ́ nɛ bɔ Adam ɔ sɔ. (Rom. 5:19) Enɛ ɔ he je nɛ a tsɛɛ Yesu ke “nyagbe Adam ɔ” nɛ. E he hia we nɛ nɔ kpa ko nɛ e ye mluku ɔ nɛ e ba wo nɔ́ nɛ bɔ Adam ɔ he hiɔ, ejakaa Yesu gbo “si kake nyɔngloo.”—Heb. 7:27; 10:12.
13. Mɛni slɔɔto lɛ ngɛ kpatami blɔ nya tomi ɔ kɛ kpɔmi nɔ́ ɔ a kpɛti?
13 Mɛni slɔɔto lɛ ngɛ kpatami blɔ nya tomi ɔ kɛ kpɔmi nɔ́ ɔ a kpɛti? Kpatami ɔ ji blɔ nya nɛ Mawu to konɛ e kɛ ha nɛ huɛ bɔmi kpakpa nɛ hi e kɛ adesahi a kpɛti. Kpɔmi nɔ́ ɔ ji hiɔ ɔ nɛ a wo konɛ a kɛ kpata adesahi nɛ a pee yayami ɔ kɛ Yehowa a kpɛti. Yesu ngɔ e wami nɛ ye mluku ɔ kɛ sã afɔle kɛ wo wa yayami ɔmɛ a he hiɔ.—Efe. 1:7; Heb. 9:14.
YEHOWA HA NƐ WA YE WA HE KƐ JE YAYAMI KƐ GBENƆ DƐ MI NƐ E BU WƆ DALI
14. Mɛni he wa ma susu, nɛ mɛni he je?
14 Kɛ wa náa nɔ́ nɛ Yehowa pee kɛ ha wɔ ɔ he se ha kɛɛ? Bɔ nɛ pee nɛ waa na heto ɔ, wa ma susu munyu enyɔ komɛ nɛ Baiblo ɔ kɛ tsu ní ɔ he, kɛ nɔ́ nɛ a tsɔɔ. Lɔ ɔ maa ye bua wɔ konɛ waa na bɔ nɛ Yehowa kɛ wa yayami ɔmɛ keɔ wɔ kɛ bɔ nɛ wa náa he se ha.
15-16. (a) Ngɛ Baiblo ɔ mi ɔ, ke a ke nɔ ko ye e he ɔ, mɛni e tsɔɔ? (b) Kɛ wa he nɛ wa ye ngɛ yayami kɛ gbenɔ he ɔ haa nɛ o nuɔ he ha kɛɛ?
15 Baiblo ɔ tsɔɔ kaa akɛnɛ a wo kpɔmi nɔ́ ɔ he je ɔ, wa ye wa he. Bɔfo Petro tsɔɔ nya ke: “Nyɛ le kaa pi níhi nɛ a puɛɔ, kɛ sika hiɔ aloo sika tsu nɛ a kɛ ha nɛ nyɛ ye nyɛ he [hela, “kpɔ̃ nyɛ”] kɛ je nyɛ yaka si himi blɔ nɛ nyɛ nɛmɛ ɔmɛ ngɔ kɛ ha nyɛ ɔ he. Mohu ɔ, a kɛ muɔ nɛ he jua wa, nɛ ngɛ kaa jijɔ bi nɛ kpa ko kɛ mu ko be e he ɔ muɔ, nɛ ji Kristo nɔ́ ɔ lɛ pee jã.”—1 Pet. 1:18, 19; sisi ningma.
16 Kɛ gu kpɔmi nɔ́ ɔ nɔ ɔ, wa ma nyɛ maa ye wa he kɛ je yayami kɛ gbenɔ dɛ mi. (Rom. 5:21) Ngɛ anɔkuale mi ɔ, akɛnɛ Yehowa gu Yesu muɔ ɔ nɛ he jua wa a nɔ kɛ kpɔ̃ wɔ he je ɔ, e sa nɛ wa hɛ nɛ sa nɔ́ nɛ Yehowa kɛ Yesu pee kɛ ha wɔ ɔ.—1 Kor. 15:22.
17-18. (a) Mɛni nɛ nɔ ko nɛ a maa bu lɛ dalɔ ɔ tsɔɔ? (b) Ke a bu wɔ dali ɔ, kɛ wa náa he se ha kɛɛ?
17 Baiblo ɔ tsɔɔ kaa Yehowa buɔ e sɔmɔli ɔmɛ dali. Enɛ ɔ tsɔɔ kaa e he hia we nɛ waa wo wa yayami ɔmɛ a he hiɔ hu. E ngɛ mi kaa Yehowa to blɔ nya nɛ ɔ mohu lɛɛ, se lɔ ɔ tsɔɔ we kaa e yi dami sane hu. Pi wɔ nitsɛmɛ wa mɔde bɔmi nya nɛ Yehowa buɔ wɔ dali, nɛ lɔ ɔ hu tsɔɔ we kaa e ma e hɛ kɛ fɔ wa yayami ɔmɛ hu a nɔ. Se akɛnɛ wa ngɛ hemi kɛ yemi ngɛ kpatami blɔ nya tomi ɔ kɛ kpɔmi nɔ́ ɔ nɛ a wo ɔ mi he je ɔ, Yehowa ngɛ nɔ́ ko nɛ e ma nyɛ maa da nɔ kɛ ngɔ wa he yayami ɔmɛ kɛ ke wɔ kulaa.—Rom. 3:24; Gal. 2:16.
18 Ke Yehowa bu wɔ dali ɔ, kɛ wa ma ná he se kɛɛ? A bu nihi nɛ a hla mɛ kaa a piɛɛ Yesu he kɛ ye nɔ ngɛ hiɔwe ɔ kaa Mawu bimɛ nɛ a da momo. (Tito 3:7; 1 Yoh. 3:1) Akɛnɛ a ngɔ a he yayami ɔmɛ kɛ ke mɛ he je ɔ, e pee kaa nɔ́ nɛ a pee we yayami ko gblee. Enɛ ɔ he ɔ, a sa kɛ ha Mawu Matsɛ Yemi ɔ. (Rom. 8:1, 2, 30) A bu nihi nɛ a ngɛ hɛnɔkami kaa a maa hi zugba a nɔ kaa dali nɛ a ji Mawu huɛmɛ, nɛ a ngɔ a he yayami ɔmɛ ke mɛ. (Yak. 2:21-23) Asafo kuu ngua a nɛ maa po Harmagedon ɔ ma nyɛ ma ná hɛnɔkami kaa a be a nya gbenɔ sae kulaa. (Yoh. 11:26) A ma tle “nihi nɛ a da” kɛ “nihi nɛ a dɛ” nɛ a gbo ɔ tsuo si. (Níts. 24:15; Yoh. 5:28, 29) Nyagbe ɔ, Yehowa sɔmɔli nɛ a buɔ lɛ tue ngɛ zugba a nɔ ɔ ma “ná Mawu bimɛ ɔmɛ a hɛ mi nyami he yemi ɔ.” (Rom. 8:21) Kɛ gu kpatami blɔ nya tomi ɔ nɔ ɔ, huɛ bɔmi kpakpa ma ba hi waa kɛ Yehowa nɛ ji wa Tsɛ ɔ wa kpɛti ekohu. Enɛ ɔ ji jɔɔmi nɛ se be nɛ wa ngɛ blɔ hyɛe!
19. Mɛni blɔ nɔ nɛ nɔ́ nɛ Yehowa pee ɔ ha nɛ wa si himi tsake kɛ pee kpakpa? (Hyɛ daka nɛ ji, “ Bɔ Nɛ Wa Náa He Se Ha.”)
19 Ngɛ anɔkuale mi ɔ, be ko nɛ be ɔ, wa si fɔfɔɛ ɔ ngɛ kaa niheyo ɔ nɛ e gbosi ní tsuo bɔ lɛ, nɛ e fɔli ɔmɛ si hiɔ agbo ko kɛ fɔ si ha lɛ ɔ. Se wa naa Yehowa si kaa e ye bua wɔ. Kpatami blɔ nya tomi ɔ kɛ kpɔmi nɔ́ ɔ ha nɛ wa si fɔfɔɛ tsake. Hemi kɛ yemi nɛ wa ngɛ ngɛ Yesu Kristo mi ɔ ha nɛ wa ye wa he kɛ je yayami kɛ gbenɔ dɛ mi. Ke Yehowa kɛ wa yayami ɔmɛ ke wɔ ɔ, e ngɛ kaa nɔ́ nɛ wa pee we yayami ko kulaa po. Nɔ́ nɛ pe kulaa a, huɛ bɔmi kpakpa ma nyɛ maa hi waa kɛ Yehowa nɛ ji wa hiɔwe Tsɛ nɛ ngɛ suɔmi ɔ wa kpɛti.
20. Mɛni he wa ma susu ngɛ ní kasemi nɛ nyɛɛ se ɔ mi?
20 Ke wa pueɔ wa yi mi tɛ ngɛ níhi nɛ Yehowa kɛ Yesu pee kɛ ha wɔ ɔ he ɔ, lɔ ɔ ma ha nɛ wa ma je hɛsa kpo wawɛɛ. (2 Kor. 5:15) Ke pi nɛ Yehowa kɛ Yesu ye bua wɔ ɔ, jinɛ wa be hɛnɔkami ko kulaa! Se ngɛ mɛni blɔ nɔ nɛ wa kpɛti nɔ fɛɛ nɔ náa yayami nɛ Yehowa kɛ keɔ wɔ ɔ he se? Wa ma susu sane bimi nɛ ɔ he ngɛ ní kasemi nɛ nyɛɛ se ɔ mi.
LA 10 Je Yehowa Wa Mawu ɔ Yi!
