HELA yinɔ sane ngmalɔ ko nɛ a tsɛɛ lɛ ke Herodotus nɛ e hi si jeha 2,500 nɛ be ɔ ngma munyu ko kɛ kɔ Egiptbi nɛ a hi si ngɛ e be ɔ mi ɔ a he. E ngma ke: “Ke niatsɛmɛ ngmɛ okplɔɔ nɛ a ye ní ɔ ta a, nɔ ko tlooɔ gbogboe daka kɛ bɔleɔ si. Nɔ́ nɛ hii daka nɛ ɔ mi ji tso nɛ a hlɔ kaa nɔ gbogboe, nɛ e kami ji nine blimi kake loo enyɔ, nɛ́ a diki he. E kɛ tsɔɔ nihi nɛ a ba okplɔɔ ngmɛmi ɔ sisi ɔ, nɛ e deɔ ke: ‘Nyɛɛ nu ní nɛ nyɛ bua nɛ jɔ, ejakaa ke nyɛ gbo ɔ, nyɛ maa pee kaa tso nɛ ɔ nɛ wami be e mi ɔ.’”

Pi Egiptbi pɛ nɛ a hɛɛ susumi ko kaa kikɛ ngɛ wami kɛ gbenɔ he. Mwɔnɛ ɔ, nɔ́ nɛ nihi pɔɔ demi ji, “Moo ye ní, nɛ o nu ní, nɛ o ná bua jɔmi.” Ke wami baa nyagbe ngɛ gbenɔ mi ɔ, mɛni heje nɛ wa fiɛ we wa yinɔ bɔnɛ wa ma nyɛ mɔ? Mɛni heje nɛ e sa nɛ waa bɔ mɔde nɛ waa pee nɔ́ nɛ da? Ke gbenɔ poɔ wami se ɔ, lɛɛ e sɛ kaa wa susuɔ nɔ́ nɛ maa ba hwɔɔ se he. Bɔfo Paulo de jã. E kale bɔnɛ nihi nɛ a he we yi kaa a ma tle ni gbogboehi si ɔ peeɔ a ní ha. E de ke: ‘Ke a be ni gbogboehi si tlee kɛ ba wami mi ekohu ɔ, lɛɛ “Nyɛ ha waa ye ní nɛ waa nu ní, ejakaa hwɔɔ pɛ wa gbo.”’—1 Korintobi 15:32.

Ngɛ anɔkuale mi ɔ, Paulo he we yi kaa ke nɔ ko gbo ɔ, e wami se po gbidigbidi. E ngɛ nɔ mi mami wawɛɛ kaa a ma tle gbogboehi a si kɛ ba wami mi ekohu kɛ hɛ kɛ nɔ fɔmi kaa a be gboe hu gblegbleegble. Nɔ́ ko heje nɛ a ná nɔ mi mami nɛ ɔ nɛ. Lɔɔ ji Kristo Yesu si nɛ Mawu tle * kɛ je gbeje ɔ nɛ. Enɛ ɔ ji anɔkuale munyu nɛ nɔ ko be nyɛe maa je he atsinyɛ kɔkɔɔkɔ. Ngɛ anɔkuale mi ɔ, Yesu si nɛ Mawu tle kɛ je gbeje ɔ ji nɔ́ titli nɛ ha nɛ hemi kɛ yemi nɛ kaseli ɔmɛ ngɛ ɔ mi wa.

Mɛni se wa ma nyɛ ma ná ngɛ Yesu si nɛ a tle kɛ je gbeje ɔ he? Mɛni blɔ nɔ wa gu kɛ le kaa a tle lɛ si niinɛ? Nyɛ ha nɛ waa hyɛ bɔnɛ Paulo tsɔɔ sane nɛ ɔ nya ha benɛ e ngma womi ya ha Kristofoli nɛ a ngɛ Korinto ɔ.

Kristofoli komɛ nɛ a hi blema Korinto ɔ, a yi mi tɛ̃ mɛ ngɛ gbogboehi a si temi ɔ he, nɛ a kpɛti ni  komɛ hu he we gbogboehi a si temi ɔ yi. Ngɛ kekleekle womi nɛ Paulo ngma ya ha Kristofoli ɔmɛ ɔ mi ɔ, e tsɔɔ mɛ níhi nɛ maa ba ke gbogboehi a si temi ɔ bɛ. E ngma ke: ‘Ke a be ni gbogboehi si tlee kɛ ba wami mi ekohu ɔ, lɛɛ a tle we Kristo hu si mɔ. Ke a tle we Kristo si kɛ bɛ wami mi ekohu ɔ, lɛɛ wa fiɛɛmi ɔ pee yaka; nɛ nyɛ hemi kɛ yemi ɔ hu pee yaka. Pi enɛ ɔ kɛkɛ! Enɛ ɔ tsɔɔ kaa wa ye Mawu he lakpa. Lɛɛ nyɛ hemi kɛ yemi ɔ pee yaka, nɛ nyɛ ngɛ yayami he wami ɔ sisi kɛ mwɔɔ. Kɛkɛ ɔ, nihi nɛ he Kristo ye nɛ a gbo ɔ, mɛ hu a hɛ mi ma kpata.’—1 Korintobi 15:13-18.

Paulo je e munyu ɔ sisi kɛ sane ko nɛ nɔ ko be nyɛe maa je he atsinyɛ: Ke a be ni gbogboehi si tlee kɛ ba wami mi ekohu ɔ, lɛɛ a tle we Kristo hu si mɔ. Ngɔɔ lɛ kaa a tle we Kristo si kɛ bɛ wami mi, jinɛ mɛni maa ba? Jinɛ sane kpakpa a nɛ wa ngɛ fiɛɛe ɔ peeɔ yaka; jinɛ e ji lakpa ngua nɛ wa ngɛ yee. Kristo si nɛ Mawu tle kɛ ba wami mi ɔ ji nɔ́ titli nɛ piɛɛ Kristofoli a hemi kɛ yemi ɔ he. E kɛ Baiblo ɔ mi tsɔɔmihi nɛ a he hia nɛ ji, Matsɛ nɛ Mawu ji, Mawu biɛ ɔ, Mawu Matsɛ Yemi ɔ, kɛ wa yi wami hemi ɔ ngɛ tsa kpa nɛ mi wa wawɛɛ. Kaa a tle we Yesu si kɛ bɛ wami mi ɔ, jinɛ Paulo kɛ bɔfo kpa amɛ a sɛ gbi ɔ ko pee yaka, aloo munyu gu ko kɛkɛ.

Ní kpahi hu maa nyɛɛ se. Kaa a tle we Kristo si kɛ ji gbeje ɔ, jinɛ hemi kɛ yemi nɛ Kristofoli ngɛ ɔ maa pee yaka. Jehanɛ se hu ɔ, lɔɔ ko tsɔɔ kaa Paulo kɛ ni kpahi tu nɔ nɛ tle Yesu si nɛ ji Yehowa Mawu ɔ hu he lakpa munyu. Enɛ ɔ hu ko tsɔɔ kaa munyu nɛ a tuɔ kaa Kristo “gbo ngɛ wa he yayami ɔmɛ a he” ɔ hu ko pee lakpa, ejakaa ke a tle we wa Kpɔlɔ ɔ si kɛ ji gbeje ɔ, e be nyɛe ma he nɔ ko yi wami. (1 Korintobi 15:3) Lɔɔ hu maa tsɔɔ kaa Kristofoli nɛ a gbe mɛ ngɛ a hemi kɛ yemi ɔ he ɔ a hɛ mi kpata yaka gu, ejakaa gbogboehi a si temi he hɛ kɛ nɔ fɔmi nɛ a ngɛ ɔ be mi.

Paulo mwɔ sane ɔ nya ke: “Ke wami nɛ ɔ mi kɛkɛ he nɛ wa ngɔ wa hɛ ngɔ fɔ Kristo nɔ ngɛ ɔ, lɛɛ wa ní ngɛ mɔbɔ pe nihi tsuo.” (1 Korintobi 15:19) Akɛnɛ Paulo kɛ Kristofoli kpahi he ye kaa a ma tle gbogboehi si heje ɔ, a ngmɛ blɔ nɛ a níhi a hɛ mi kpata, a kɛ yi mi wami kpe, a kɛ si himi nɛ mi wa hu kpe, nɛ a gbe a ti ni komɛ. Ke a be gbogboehi a si tlee ɔ, lɛɛ a na nɔ́ yaka mɔ!

Paulo he ye wawɛɛ kaa a ma tle gbogboehi a si. E le kaa a tle Yesu si kɛ je gbeje nɛ e ma odase yemi nɛ ɔ nɔ mi kpiti kɛ ha Korintobi ɔmɛ. E de ke: “Lɔɔ ji kaa Kristo gbo ngɛ wa he yayami ɔmɛ a he kaa bɔnɛ ngmami ɔmɛ tsɔɔ ɔ. Ngmami ɔmɛ ke a pu lɛ, nɛ ligbi nɛ ji ligbi etɛ ɔ, a tle lɛ si kɛ ba wami mi ekohu. E jé e he kpo ngɔ tsɔɔ Petro; nɛ pee se ɔ, e jé e he kpo ngɔ tsɔɔ ni nyɔngma kɛ enyɔ ɔmɛ. * Jehanɛ, e jé e he kpo ngɔ tsɔɔ e se nyɛɛli maa pee lafa enuɔ kɛ se ligbi kake. Nimli nɛ ɔmɛ a ti nihi fuu ngɛ kɛ ba si mwɔnɛ ɔ, se ni komɛ hu gbo. Lɔɔ se ɔ, e jé e he kpo ngɔ tsɔɔ Yakobo, nɛ Yakobo se ɔ, e jé e he kpo ngɔ tsɔɔ bɔfo ɔmɛ tsuo. Nyagbe ɔ, e jé e he kpo ngɔ tsɔɔ imi hulɔ.”—1 Korintobi 15:3-8.

Paulo kɛ nɔ mi mami je e munyu ɔ sisi ke Kristo gbo ngɛ wa he yayami ɔmɛ a he, nɛ a pu lɛ, nɛ a tle lɛ si kɛ ba wami mi ekohu. Mɛni ha nɛ Paulo he ye wawɛɛ jã a? Yi mi tomi kake heje ji kaa nihi fuu ye Kristo si temi ɔ he odase. Benɛ a tle Yesu si ɔ, e je e he kpo kɛ tsɔɔ ni kakaaka komɛ (Paulo nitsɛ hu piɛɛ he), kuu nyafii komɛ, kɛ nimli asafo nɛ a hiɛmi maa su 500 po. Nimli nɛ ɔmɛ a kpɛti nihi fuu a yi mi tɛ̃ mɛ benɛ a nu kaa a tle Yesu si ɔ! (Luka 24:1-11) Nihi nɛ Yesu je e he kpo kɛ tsɔɔ mɛ ngɛ e si temi ɔ se ɔ, a kpɛti nihi fuu ngɛ wami mi ngɛ Paulo be ɔ mi nɛ́ nihi ma nyɛ ma ya na mɛ kɛ ha nɔ mi mami. (1 Korintobi 15:6) Kaa nɔ kake aloo enyɔ ko pɛ nɛ Yesu je e he kpo kɛ tsɔɔ ɔ, jinɛ nihi ko de ke a tle we lɛ si, se e je e he kpo kɛ tsɔɔ nimli 500 kɛ se.

Mo kadi hu kaa Paulo de si enyɔ kaa Yesu gbo, nɛ a pu lɛ, nɛ a tle lɛ si kɛ ba wami mi “kaa bɔnɛ Ngmami ɔmɛ tsɔɔ ɔ.” Níhi nɛ ya nɔ ɔ ma nɔ mi kaa gbamihi nɛ a ngma ngɛ Hebri Ngmami ɔ mi kɛ kɔ Mesia a he ɔ ba mi. Enɛ ɔ maa nɔ mi kaa Yesu ji Mesia nɛ a wo he si ɔ nɛ.

Ngɛ odase nɛ nihi fuu nɛ Yesu je e he kpo kɛ tsɔɔ mɛ ɔ ye, kɛ nɔ́ nɛ Ngmami ɔ de ɔ tsuo se ɔ, nihi hi si ngɛ Paulo be ɔ mi nɛ a he we yi kaa a tle Yesu si,  nɛ mwɔnɛ ɔ hu jã nɔuu nɛ e ji. Ni komɛ de ke e kaseli ɔmɛ nɛ a tsɔɔ kaa a tle Yesu si ɔ ya ju Yesu gbogboe ɔ. Se, kaseli ɔmɛ be he wami nɛ a kɛ ma nyɛ maa fiee Roma ta buli nɛ a ngɛ yɔkɔ ɔ he bue ɔ. Ni komɛ hu tsɔɔ kaa Yesu si nɛ a tle nɛ e je e he kpo kɛ tsɔɔ nihi ɔ be mi. Se benɛ a tle lɛ si ɔ, e je e he kpo kɛ tsɔɔ nihi fuu ngɛ be ekpaekpahi a mi. Jehanɛ se hu ɔ, anɛ sisi numi ngɛ he kaa nɔ ko nɛ a tle we lɛ si ɔ maa sã abolo nɛ e gba lo kɛ ha nihi kaa bɔnɛ Yesu nɛ a tle lɛ si ɔ pee ngɛ Galilea a lo? (Yohane 21:9-14) Anɛ nɔ ko nɛ a tle we lɛ si ɔ ma nyɛ ma de nihi kaa a pɛtɛ e he nɛ a hyɛ lo?—Luka 24:36-39.

Loloolo ɔ, ni komɛ hu tsɔɔ kaa Yesu si temi ɔ ji munyu nɛ kaseli ɔmɛ po de. Se ke kaseli ɔmɛ pee jã a, mɛni se a ma ná? Nihi muɔ kaseli ɔmɛ, nɛ a wa mɛ yi mi, nɛ a gbe a ti ni komɛ ngɛ Yesu si temi ɔ he odase nɛ a ye ɔ heje. Mɛni heje nɛ a kɛ a wami maa wo oslaa mi ngɛ nɔ́ ko nɛ pi anɔkuale ɔ he? Jehanɛ se hu ɔ, a ye Yesu si temi ɔ he odase kekleekle ngɛ Yerusalem, ngɛ nihi nɛ a teɔ si kɛ woɔ mɛ nɛ a ngɛ nɔ́ ko hlae maa daa nɔ kɛ bu mɛ fɔ ɔ a hɛ mi.

Yesu si nɛ a tle ɔ ji nɔ́ nɛ wo kaseli ɔmɛ kã nɛ a nyɛ ye a Nyɔmtsɛ ɔ he odase ngɛ yi mi wami nɛ a kɛ kpe ɔ tsuo se. Yesu si temi ɔ ji nɔ́ titli nɛ Kristofoli heɔ yeɔ. Pi tsɔɔlɔ ko nɛ e le ní nɛ a gbe lɛ kɛkɛ he odase nɛ blema Kristofoli ɔmɛ ye. Mohu ɔ, a kɛ a wami wo oslaa mi nɛ a fiɛɛ Yesu si temi ɔ he sane kɛ tsɔɔ nihi, ejakaa lɔɔ maa nɔ mi kaa lɛ ji Kristo ɔ nɛ. Kristo ji Mawu Bi nɛ e ngɛ he wami, nɛ e ngɛ wami mi, nɛ e yeɔ bua mɛ, nɛ e tsɔɔ mɛ blɔ. Yesu si temi ɔ maa nɔ mi kaa mɛ hu ke a gbo ɔ, a ma tle mɛ si. Niinɛ, ke a tle we Yesu si ɔ, jinɛ Kristo jami be si hie. Kaa a tle we Yesu si ɔ, jinɛ e biɛ ko laa gbidigbidi.

Lɛɛ mɛni se wɔ nɛ wa ngɛ mwɔnɛ ɔ, wa náa ngɛ Kristo si temi ɔ he?