Dɛbi. Waa kɛ wa he woɔ wehi a mi fiɛɛmi ní tsumi ɔ mi daa, se wa de we ke lɔ ɔ he je ɔ, e sa nɛ a he wa yi wami. (Efeso Bi 2:8-9) Mɛni he je?

 Mo susu nɔ́ hetomi nɔ́ nɛ ɔ he nɛ o hyɛ: Ngɔɔ lɛ kaa nyumu ko nɛ haa nɔ nɔ́ wo si kaa e ma ha nɔ tsuaa nɔ nɛ maa ya he pɔtɛɛ ko ngɛ be pɔtɛɛ ko mi ɔ nike ní ko nɛ he jua wa. Ke o he ye kaa nyumu ɔ maa ye e si womi ɔ nɔ ɔ, anɛ o kɛ e blɔ tsɔɔmi be ní tsue lo? E ngɛ heii kaa o kɛ e blɔ tsɔɔmi ma tsu ní! Eko ɔ, o maa suɔ nɛ o de o huɛmɛ kɛ o wekuli konɛ mɛ hu a ná nike ní ɔ eko. Ke o ya nɛ e ke mo nɔ́ ɔ, pi lejɛ ɔ nɛ o ya ngɛ be nɛ e tsɔɔ ɔ nya a he je, mohu ɔ, e ke mo nɔ́ ɔ akɛnɛ e suɔ kaa e maa ke mo nɔ́ he je.

 Jã kɛ̃ nɛ Mawu wo si kaa e ma ha nihi tsuo nɛ a peeɔ tue bumi kɛ haa lɛ ɔ neneene wami, nɛ Yehowa Odasefohi he ye kaa si womi nɛ ɔ maa ba mi. (Roma Bi 6:23) Wa bɔɔ mɔde kaa wa maa tu wa hemi kɛ yemi ɔ he munyu kɛ tsɔɔ nihi, nɛ wa hyɛɛ blɔ kaa a ma ná Mawu si womi ɔmɛ a he se. Se wa he we yi kaa wa yi wami hemi daa si ngɛ wa he nɛ waa kɛ woɔ wa fiɛɛmi ní tsumi ɔ mi ɔ nɔ. (Roma Bi 1:17; 3:28) Ngɛ anɔkuale mi ɔ, adesa ko be nɛ ma ná Mawu dɛ mi jɔɔmihi nɛ a nɔ be nɛ ɔ ngɛ lɛ nitsɛ e mɔde bɔmi nya. “Pi nɔ́ nɛ da nɛ wa pee he nɛ e he wa yi wami ngɛ; mɔbɔ kɛkɛ lɛ e na wɔ.”—Tito 3:5.