A Ma Matsɛ Yemi Asahi Akpe—Nɛ A Ngɛ Nɔ Tsae
Ngɛ August 2013 ɔ mi ɔ, Yehowa Odasefohi nɛ a ngɛ Philippines ɔ su oti ko he ngɛ Matsɛ Yemi Asahi a mami mi. A ma Matsɛ Yemi Asa nɛ to nɔ akpe. Kaa bɔ nɛ e ji ngɛ mahi fuu a nɔ ɔ, asafohi babauu nɛ ngɛ Philippines ɔ be sika, nɛ a be níhi a si kpami nɛ mɛ nitsɛmɛ a ma nyɛ maa ma Matsɛ Yemi Asa nɛ sa. Jehahi babauu nɛ be ɔ, asafo komɛ kpeeɔ ngɛ nyɛmimɛ komɛ a we mi, nɛ ni komɛ hu buaa a he nya ngɛ pamploo gbahi a sisi.
Akɛnɛ Yehowa Odasefohi nɛ a ngɛ Philippines ɔ a he ngɛ hiɛe mlamlaamla he je ɔ, e he ba hia nɛ a ná Matsɛ Yemi Asahi fuu. Ngɛ jeha 1999 ɔ mi ɔ, Yehowa Odasefohi A Blɔ Tsɔɔmi Ajla Toli ɔmɛ to blɔ nya konɛ a ye bua asafohi nɛ a be sika a nɛ mɛ hu a ná Matsɛ Yemi Asahi. Ngɛ blɔ nya tomi nɛ ɔ mi ɔ, asafo nɛ ɔmɛ ma nyɛ ma ha sika fɛɛ ko nɛ a ma nyɛ, kɛkɛ ɔ, a maa ngɔ sika nɛ asafohi nɛ a ngɛ ma kpahi a nɔ kɛ ha a kɛ maa gbe yi konɛ a kɛ ma asa a ha mɛ. A tsɔse ni komɛ saminya ngɛ tsu mami mi nɛ a ye bua asafohi nɛ mɛ nitsɛmɛ a ma a Matsɛ Yemi Asa. Blɔ nya tomi nɛ ɔ nɛ a pee kɛ ha Odasefohi ngɛ je kɛ wɛ ɔ je sisi ngɛ Philippines ngɛ November 2001.
Iluminado ji Odasefo no. E ngɛ Marilao asafo nɛ ngɛ Bulacan ɔ mi. Lejɛ ɔ nɛ a ma Matsɛ Yemi Asa nɛ to nɔ akpe ɔ nɛ. Iluminado de ke: “I na kaa wa nyɛmimɛ Kristofo ɔmɛ suɔ a he nitsɛnitsɛ. Nihi fuu ngɔ a he kɛ ha faa, nɛ a ba ye bua—nyumuhi kɛ yihi, jokuɛwi kɛ nikɔtɔmahi tsuo piɛɛ he. Wa pee kake kɛ tsu ní ngɛ pu ɔ nɔ. Ke wa tsu ní nɛ pɔ tɔ wa he po ɔ, wa bua jɔɔ ní tsumi kpakpa nɛ wa tsu ngɛ ligbi ɔ mi ɔ he.”
Nihi nɛ a pi Odasefohi ɔ bua jɔ mɔde nɛ nihi nɛ a ngɔ a he kɛ ha a bɔ ɔ he. Tipa dlɛɛva ko nɛ e ngɔɔ zia kɛ tɛhi kɛ ba haa mɛ ɔ de ke: “Nyɛ he hiɛ kaa tatuhi! Nɔ tsuaa nɔ yeɔ bua. I nɛ nɔ́ ko kaa kikɛ gblee.”
Matsɛ Yemi Asa ehe nɛ a ma a
E sui otsi ekpa nɛ a gbe tsu ɔ mami nya. Matsɛ Yemi Asahi nɛ a maa mɛ mlamlaamla kaa kikɛ ɔ yeɔ bua nɛ asafo mi bi ɔmɛ ngmɛɛ we fiɛɛmi ní tsumi ɔ he kɛ fɔ we si.—Mateo 24:14.
Ellen hu ngɛ Marilao asafo ɔ mi. E de ke: “Jinɛ Matsɛ Yemi Asa momo ɔ nɔ kpi wɔ, nɛ wa ti nihi fuu hii kpo ɔ nɔ. Se Matsɛ Yemi Asa ehe ɔ ngɛ fɛu, nɛ wɔ tsuo wa yaa mi. Enɛ ɔ haa nɛ wa náa tsɔsemi kɛ níhi nɛ wa kaseɔ ngɛ wa kpe ɔmɛ a mi ɔ he se.”